NEET-UG પેપર લીક મુદ્દે Gen-Z દ્વારા દેશવ્યાપી વિરોધ બાદ ધર્મેન્દ્ર પ્રધાને કેન્દ્રીય શિક્ષણ મંત્રી પદેથી રાજીનામું આપ્યું છે. મહારાષ્ટ્રમાં વિપક્ષ દાદા ભૂસેના રાજીનામાની માંગ કરી રહ્યું છે, જ્યારે પંજાબમાં, ભાજપ અને કોંગ્રેસ હરજોત સિંહ બેન્સના રાજીનામાની માંગ કરી રહ્યા છે. આ વચ્ચે, BAMS પરીક્ષાના પેપર લીક પર ગુજરાતમાં વિવાદ ફાટી નીકળ્યો છે. વિદ્યાર્થીઓનો આરોપ છે કે ગુજરાત આયુર્વેદ યુનિવર્સિટીની BAMS પરીક્ષાના પ્રશ્નો વોટ્સએપ પર લીક થયા હતા. કુલ 12 પ્રશ્નોમાંથી 11 સોશિયલ મીડિયા પર હતા. કોંગ્રેસ અને AAP એ આ મુદ્દા પર ભાજપ પર નિશાન સાધ્યું છે. આમ આદમી પાર્ટીના યુવા પાંખના પ્રમુખ બ્રિજરાજ સોલંકી મંત્રી રીવાબા જાડેજાના રાજીનામાની માંગ કરી રહ્યા છે.

શું છે સંપૂર્ણ કહાની?

જામનગર સ્થિત ગુજરાત આયુર્વેદ યુનિવર્સિટીએ ત્રીજા વર્ષના બેચલર ઓફ આયુર્વેદિક મેડિસિન એન્ડ સર્જરી (BAMS) પરીક્ષાનું પ્રશ્નપત્ર લીક થયાના આરોપોની તપાસના આદેશ આપ્યા છે. વિદ્યાર્થીઓનો દાવો છે કે પરીક્ષા અગાઉ લગભગ બધા પ્રશ્નો વોટ્સએપ ગ્રુપ ચેટમાં શેર કરવામાં આવ્યા હતા. આ આરોપો 20 જુલાઈના રોજ યોજાયેલી ત્રીજા વર્ષની BAMS 'શલ્ય તંત્ર-1' (સર્જરી) પરીક્ષા સાથે સંબંધિત છે. વિદ્યાર્થીઓનો આરોપ છે કે પેપર પરના 12 પ્રશ્નોમાંથી 11 પરીક્ષા પહેલા વોટ્સએપ પર શેર કરાયેલા પ્રશ્નો સાથે મેળ ખાતા હતા અને જેમમે પ્રશ્નોને મહત્ત્વપૂ ગણાવવામાં આવ્યા હતા. યુનિવર્સિટીના પરીક્ષા પ્રભારી નિયામક એચ.પી. ઝાલાએ જણાવ્યું હતું કે પરીક્ષા 20 જુલાઈના રોજ બપોરે 12:30 વાગ્યે પૂર્ણ થઈ હતી, અને તેમને તે જ સાંજે કથિત લીક અંગે ફરિયાદ મળી હતી.

કોંગ્રેસના મહાસચિવ (સંચાર) જયરામ રમેશે સોમવારે X પર આ મુદ્દો ઉઠાવ્યો હતો, જેમાં તેમણે આરોપ લગાવ્યો હતો કે 2014 થી 2024 દરમિયાન ગુજરાતમાં 34 વખત પેપર લીક થયું છે. તેમણે લખ્યું કે, વધુ એક દિવસ, વધુ એક પેપર લીક. આ વખતે જામનગરમાં ગુજરાત આયુર્વેદ યુનિવર્સિટીમાં. આ કોઈ અપવાદ નથી. 2014 થી 2024 દરમિયાન ગુજરાતમાં 34 વખત પેપર લીક થયું છે. GPSC ચીફ ઓફિસરનું પરીક્ષા પેપર (2014), તલાટી પેપર (2015 અને 2016), TAT-શિક્ષક, મુખ્ય સેવિકા, નાયબ ચિટનીસ અને લોક રક્ષક દળ પેપર (2018), બિન-સચિવાલય ક્લાર્ક પરીક્ષા (2019), હેડ ક્લાર્ક, DGVCL વિદ્યુત સહાયક અને સબ-ઓડિટર પરીક્ષા (2021), ફોરેસ્ટ ગાર્ડ પરીક્ષા (2022), અને જુનિયર ક્લાર્ક પરીક્ષા (2023) આ બધા પેપર લીક થયા.

યુનિવર્સિટીએ જણાવ્યું છે કે પ્રશ્નપત્ર લીક થયું હતું કે નહીં તે હજુ તેણે સુધી નક્કી કર્યું નથી, અને ઉમેર્યું છે કે તપાસમાં બહાર આવશે કે પરીક્ષા પ્રક્રિયામાં કોઈ ગેરરીતિ થઈ છે કે નહીં. આ આરોપો એવા સમયે આવ્યા છે જ્યારે સ્પર્ધાત્મક પરીક્ષાઓમાં ગેરરીતિઓ, ખાસ કરીને NEET-UG પેપર લીક અંગે દેશભરમાં વિરોધ પ્રદર્શન થઈ રહ્યા છે અને આવી ઘટનાઓ પર સઘન તપાસ કરવામાં આવી રહી છે. વિરોધ પ્રદર્શન બાદ કેન્દ્રીય શિક્ષણ મંત્રી ધર્મેન્દ્ર પ્રધાને 25 જુલાઈના રોજ રાજીનામું આપ્યું હતું; તેમનું રાજીનામું પ્રદર્શનકારીની મુખ્ય માંગણીઓમાંની એક હતી. સરકારી ભરતી પરીક્ષાઓમાં વારંવાર પેપર લીક થવાના પગલે ગુજરાતે 'ગુજરાત જાહેર પરીક્ષા (અન્યાયી માધ્યમો નિવારણ) અધિનિયમ, 2023' લાગૂ કર્યો. આ કાયદામાં અયોગ્ય માધ્યમો અને સંગઠિત પરીક્ષા ગેરરીતિ સંબંધિત ગુનાઓ માટે કેદ અને દંડની જોગવાઈ છે.

દેશમાં E20 પેટ્રોલને લઈને છેડાયેલી બહેસ હવે તેજ થઇ ગઇ છે. સરકારની E20 નીતિ વિરુદ્વ સતત અવાજ ઉઠાવી રહેલા સામાજિક કાર્યકર અને ઉદ્યોગપતિ તહસીન પૂનાવાલાને મોટો ઝટકો લાગ્યો છે: તેમનું ઇન્સ્ટાગ્રામ એકાઉન્ટ સસ્પેન્ડ કરવામાં આવ્યું છે. ખાસ વાત એ છે કે, આ કાર્યવાહી ત્યારે જ કરવામાં આવી છે જ્યારે તેમણે E20ના વિરોધમાં 31 જુલાઈના રોજ દિલ્હીમાં 'ગાડી માર્ચ' યોજવાની યોજનાની જાહેરાત કરી હતી. સોશિયલ મીડિયા પર તેમના સમર્થકો આને આંદોલનને દબાવવાના પ્રયાસ ગણાવી રહ્યા છે, ત્યારે ઇન્સ્ટાગ્રામે હજુ સુધી સસ્પેન્શનનું સત્તાવાર કારણ જણાવ્યું નથી.

તાજેતરના દિવસોમાં તહસીન પૂનાવાલાએ સતત E20 પેટ્રોલ વિરુદ્વ વીડિયો અને પોસ્ટ શેર કર્યા હતા. તેમણે 31 જુલાઈના રોજ ઈન્ડિયા ગેટથી પાર્લામેન્ટ સ્ટ્રીટ સુધી 'ગાડી માર્ચ'માં જોડાવા માટે લોકોને અપીલ પણ કરી હતી. આ માર્ચનો હેતુ સરકારને E20 પેટ્રોલને ફરજિયાત બનાવવાના તેના નિર્ણય પર પુનર્વિચાર કરવા અને સામાન્ય લોકોને નિયમિત પેટ્રોલનો ઉપયોગ કરવાનો વિકલ્પ પૂરો પાડે તેવી માંગ કરવાનો હતો.

https://twitter.com/tehseenp/status/2082691046581113279?s=20

તેહસીન પૂનાવાલાએ આજે સોશિયલ મીડિયા પ્લેટફોર્મ 'X' પર એક પોસ્ટમાં, જણાવ્યું હતું કે, મારું ઇન્સ્ટાગ્રામ એકાઉન્ટ @tehseenpoonawalla સસ્પેન્ડ કરવામાં આવ્યું છે. આ સરકાર હવે ઇન્સ્ટાગ્રામથી પણ ડરે છે. જે લોકો મને જાણે છે તેઓ જાણે છે કે હું એક સભ્ય વ્યક્તિ છું. હું હંમેશાં તથ્યો અને તર્કના આધારે વાત કરું છું. હું ક્યારેય અપશબ્દોનો ઉપયોગ કરતો નથી.

E20 પેટ્રોલ વિરુદ્ધ શરૂ થયેલી ઝુંબેશ હવે રસ્તાઓથી લઈને સોશિયલ મીડિયા સુધી ફેલાઈ ચૂકી છે. તાજેતરમાં 'E20 જનતા પાર્ટી' નામની ઓનલાઈન ઝુંબેશને પણ ખૂબ લોકપ્રિયતા મળી છે. જે કોઇ રાજકીય પક્ષ છે કે રજિસ્ટર્ડ સંગઠન નથી, પરંતુ પોતાને સામાન્ય લોકોનો અવાજ ગણાવે છે. આ એકાઉન્ટને તાજેતરમાં જ NEET પરીક્ષાના પેપર મુદ્દા પર દિલ્હીમાં વિરોધ પ્રદર્શન કરનાર 'કોકરોચ જનતા પાર્ટી' સાથે પણ જોડીને જોવામાં આવી રહ્યું છે. જેની શરૂઆત આવી જ રીતે સોશિયલ મીડિયા પર વ્યંગ અને મીમ્સથી થઈ હતી. આ જ નામનો ઉપયોગ કરતું બીજું એક એકાઉન્ટ પણ સોશિયલ મીડિયા પર સક્રિય થયું હતું, પરંતુ હવે તેને સસ્પેન્ડ કરવામાં આવ્યું છે.

આ ઉપરાંત, દિલ્હીમાં અનેક ટ્રાન્સપોર્ટ સંગઠનોએ E20 ઇંધણના વિરોધમાં સંસદ માર્ચની જાહેરાત કરી છે. ટ્રાન્સપોર્ટ સંગઠનોનો દાવો છે કે E20 પેટ્રોલથી માઇલેજ ઘટે છે અને જૂના વાહનો પર તેની અસર પડી શકે છે; જ્યારે, સરકારે આ દાવાઓને ફગાવતા E20 સલામત અને પર્યાવરણ માટે રીતે શ્રેષ્ઠ ઇંધણ ગણાવી રહી છે.

કેન્દ્ર સરકાર સતત કહી રહી છે કે E20 એટલે કે 20 ટકા ઇથેનોલ અને 80 ટકા પેટ્રોલનું મિશ્રણ દેશની તેલ આયાત પર નિર્ભરતા ઘટાડશે, ખેડૂતોની આવક વધારવામાં મદદ કરશે અને પ્રદૂષણ પણ ઘટાડશે. સરકારે એ પણ સ્પષ્ટ કર્યું છે કે E20 સ્તરથી આગળ ઇથેનોલ મિશ્રણ વધારવાની હાલમાં કોઈ તાત્કાલિક યોજના નથી. બીજી તરફ, E20નો વિરોધ કરતા ગ્રુપો તેને ગ્રાહકો પર લાદવામાં આવેલો નિર્ણય ગણાવતા નિયમિત પેટ્રોલ ખરીદવાનો વિકલ્પ ઉપલબ્ધ કરાવવાની માંગ કરી રહ્યા છે.

થોડા દિવસ અગાઉ મેઘરાજાએ ગુજરાતને ધમરોળ્યું. સુરત, નવસારી, વલસાડ સહિત રાજ્યના અનેક ભાગોમાથી પૂરની તબાહીના દૃશ્યો સામે આવ્યા હતા. જોકે અત્યારે મેઘાએ વિરામ લીધો છે, પરંતુ હવે ગુજરાતના માથે એક સાથે વરસાદની 4 સિસ્ટમ સક્રિય થતા આજથી ફરી વરસાદી માહોલ જામશે. રાજ્યમાં એકસાથે જે ચાર વરસાદી સિસ્ટમ સક્રિય છે, તેમાં 1. ડીપ ડિપ્રેશન, 2. મોનસૂન ટ્રફ, 3. અપર એર સાયક્લોનિક સર્ક્યુલેશન અને 4. વેસ્ટર્ન ડિસ્ટર્બન્સનો સમાવેશ થાય છે. જેથી આગામી 6 દિવસ સુધી ભારેથી અતિભારે વરસાદની આગાહી કરવામાં આવી છે આ સિસ્ટમને કારણે આજથી વરસાદનું જોર વધશે. ડીપ ડિપ્રેશનની અસરના કારણે પણ વરસાદી સિસ્ટમ મજબૂત બની છે.

દિવ્યભાસ્કરના અહેવાલ મુજબ, આજે  દક્ષિણ ગુજરાત તથા મધ્ય ગુજરાતના વિવિધ જિલ્લાઓમાં છૂટાછવાયા સ્થળોએ અતિભારે વરસાદની આગાહી છે,  હવામાન વિભાગ દ્વારા આજે સુરત સહિત 7 જિલ્લામાં ઓરેન્જ એલર્ટ આપવામાં આવ્યું છે. ઉત્તર ગુજરાત, મધ્ય ગુજરાત અને દક્ષિણ ગુજરાતના જિલ્લાઓમાં ધોધમાર વરસાદ વરસી શકે છે. હવામાન વિભાગ દ્વારા આગામી 3 કલાક (બપોરે 1 વાગ્યા સુધી) પંચમહાલ, છોટાઉદેપુર, વડોદરા, નર્મદા અને દાહોદ જિલ્લામાં 40 કિમીની ઝડપે પવન અને વીજળી સાથે મધ્યમ વરસાદની (5થી 15 મિમી/કલાક) શક્યતાને પગલે ઓરેન્જ એલર્ટ જાહેર કરાયું છે. જ્યારે અમદાવાદ, ગાંધીનગર, સુરત અને આણંદ સહિતના જિલ્લાઓમાં હળવા વરસાદની સંભાવના સાથે યલો વોચ રખાઈ છે. વરસાદને કારણે નીચાણવાળા વિસ્તારોમાં પાણી ભરાવાની અને ટ્રાફિકજામની શક્યતા હોવાથી તંત્ર દ્વારા નાગરિકોને બિનજરૂરી મુસાફરી ટાળવા તેમજ જર્જરિત મકાનો કે ઝાડ નીચે ઊભા ન રહેવા એડવાઈઝરી અપાઈ છે.

જ્યારે 31 જુલાઈના રોજ અમદાવાદ, આણંદ, વડોદરા, ભરૂચ, નર્મદા, સુરત, તાપી અને ડાંગ જિલ્લામાં રેડ એલર્ટ સાથે અત્યંત ભારે વરસાદની ચેતવણી આપવામાં આવી છે.  31 જુલાઈએ વડોદરામાં અત્યંત ભારે વરસાદનું રેડ એલર્ટ હવામાન વિભાગ દ્વારા જાહેર કરવામાં આવ્યું છે. આવતીકાલે તમામ શૈક્ષણિક સંસ્થાઓમાં રજા જાહેર કરવામાં આવી. જિલ્લા કલેક્ટર અનિલ ધામેલિયાએ તમામને સુરક્ષિત રહેવા અપીલ કરી છે. આજે 30 જુલાઈએ જ મોડી રાતથી વડોદરા શહેર-જિલ્લા પર વરસાદનું સંકટ છે. આ ઉપરાંત 1 ઓગસ્ટના રોજ ઉત્તર ગુજરાતમાં ઓરેન્જ એલર્ટ સાથે મુસળધાર વરસાદ વરસવાની સંભાવના વ્યક્ત કરવામાં આવી છે.

હવામાન વિભાગના ડિરેક્ટર ડૉ. એ.કે દાસના જણાવ્યા મુજબ, રાજ્યમાં વીજળીના કડાકા-ભડાકા સાથે થંડરસ્ટોર્મની વોર્નિંગ 1 ઓગસ્ટ સુધી આપવામાં આવી છે. દરિયાઈ વિસ્તારમાં પવનની દિશા દક્ષિણ-પશ્ચિમ દિશા તરફ રહેશે અને તીવ્ર પ્રેશર ગ્રેડિયન્ટના કારણે મજબૂત પવનની સ્થિતિ રહેશે, જેમાં પવનની ગતિ 20થી 25 નોટ્સ રહેશે. ભારે પવનની સંભાવનાથી 1 ઓગસ્ટ સુધી માછીમારો માટે વોર્નિંગ જારી કરાઈ છે.

ગાંધીનગર સ્થિત સ્ટેટ ઈમરજન્સી ઓપરેશન સેન્ટર (SEOC) ખાતે રાહત કમિશનર ગૌરાંગ મકવાણાના અગ્રસ્થાને 'વેધર વૉચ ગ્રુપ'ની બેઠક યોજાઈ હતી. આ બેઠકમાં રાજ્યમાં વરસાદી પરિસ્થિતિ અને આપત્તિ વ્યવસ્થાપન માટે વહીવટી તંત્રની તૈયારીઓની સર્વગ્રાહી સમીક્ષા કરવામાં આવી હતી. રાહત કમિશનરે તમામ સંકલિત વિભાગોને સાધનો તથા ટીમોનું મેપિંગ કરી તુરંત એક્શન મોડમાં રહેવા, માર્ગ-મકાન વિભાગને જર્જરિત મકાનો અને હોર્ડિંગ્સ હટાવવા તેમજ કાચા મકાનો અને ઝૂંપડપટ્ટીમાં રહેતા નીચલા સ્તરના લોકો સુધી આપત્તિના સંદેશા સમયસર પહોંચાડી એક્સ્ટ્રા કેર લેવા આદેશ આપ્યા હતા.

બેઠક દરમિયાન રાહત કમિશનરે જણાવ્યું હતું કે રાજ્યમાં વિષમ વરસાદી પેટર્ન જોવા મળી રહી છે, જ્યાં વલસાડ-નવસારીમાં 100 ટકા જેટલો વરસાદ નોંધાયો છે અને ધોળકામાં ટૂંકા સમયમાં 20 ઈંચ જેટલો અભૂતપૂર્વ વરસાદ પડ્યો છે. આવી પરિસ્થિતિને ધ્યાને રાખીને તમામ કલેક્ટરો અને આપત્તિ વ્યવસ્થાપન ટીમોને હાઈ એલર્ટ કરાયા છે. સુરક્ષા દળોના સંકલનથી દક્ષિણ ગુજરાતમાં પૂરની સ્થિતિ પહેલાં અગાઉથી અંદાજે 53,600થી વધુ નાગરિકોને સુરક્ષિત સ્થળે ખસેડવામાં આવ્યા છે તથા પૂરના પાણીમાં ફસાયેલા 9,600થી વધુ લોકોને સફળતાપૂર્વક ઉગારી લેવામાં આવ્યા છે.

મુંબઈ સમાચારના અહેવાલ મુજબ, અંબાલાલ પટેલે 30 જુલાઈથી ઓગસ્ટ મહિનાના પ્રથમ સપ્તાહ સુધી ગુજરાતમાં ભારેથી અતિભારે વરસાદની ચેતવણી આપી હતી. અંબાલાલ પટેલે જણાવ્યું કે, બંગાળની ખાડીમાં એક મજબૂત વરસાદી સિસ્ટમ સક્રિય થઈને ગુજરાત તરફ આવી રહી છે. જેના કારણે 30 જુલાઈની રાતથી વરસાદની શરૂઆત થશે અને 31 જુલાઈ તથા 1 ઓગસ્ટ દરમિયાન રાજ્યના ઘણા વિસ્તોરમાં ભારે વરસાદ પડશે.  આ ઉપરાંત 3 ઓગસ્ટથી 13-14 ઑગસ્ટ સુધી પણ તબક્કાવાર વરસાદી રાઉન્ડ ચાલુ રહેવાની હવામાન નિષ્ણાંતે આગાહી કરી છે.

અંબાલાલ પટેલ મુજબ, મધ્ય ગુજરાતમાં વડોદરા, આણંદ, નડિયાદ, પંચમહાલ, દાહોદ અને છોટાઉદેપુરમાં ભારેથી અતિભારે વરસાદની સંભાવના છે.. કેટલાક વિસ્તારોમાં 4 થી 10 ઇંચ, જ્યારે છૂટાછવાયા વિસ્તારોમાં 15-20 ઇંચ સુધીનો  વરસાદ ખાબકી શકે છે. દક્ષિણ ગુજરાતમાં નવસારી, આહવા અને વલસાડના વિસ્તારોમાં પણ મુશળધાર વરસાદ સાથે પૂર જેવી સ્થિતિ સર્જાઈ શકે છે. ઉત્તર ગુજરાત અને સૌરાષ્ટ્ર-કચ્છમાં મહેસાણા, બનાસકાંઠા, પાટણ, રાધનપુર, કડી, કલોલ, સાબરકાંઠા અને અરવલ્લી તેમજ સુરેન્દ્રનગર, મોરબી, રાજકોટ, જામનગર અને કચ્છના ભાગોમાં પણ હળવાથી ભારે વરસાદી ઝાપટાં પડશે.

આ ઉપરાંત અંબાલાલે ખેડૂતોને સાવચેત કરતા જણાવ્યું કે ખેતરોમાં પાણી ભરાઈ રહેવાથી કપાસ જેવા પાકોમાં સુકારો આવવાની શક્યતા છે, તેથી ખેડૂતોને પાણીના નિકાલની યોગ્ય વ્યવસ્થા કરવી જોઈએ. 3 ઓગસ્ટથી 'આશ્લેષા' નક્ષત્ર શરૂ થઈ રહ્યું છે. આ નક્ષત્રનું પાણી ખેતી માટે ખાસ અનુકૂળ ગણાતું નથી. પરંતુ ભાલ વિસ્તારના સુકા ઘઉંના પાક માટે જમીનમાં ભેજ સંગ્રહવા માટે આ પાણી ફાયદાકારક સાબિત થશે. 17 ઓગસ્ટ પછી શરૂ થતું 'મઘા' નક્ષત્રનું પાણી ખેતી અને જળ સંગ્રહ માટે ઉત્તમ માનવામાં આવે છે.

ઉલ્લેખનીય છે કે છેલ્લા 24 કલાકમાં 50 તાલુકામાં 1 મિમીથી લઈને દોઢ ઇંચ સુધીનો વરસાદ નોંધાયો છે. સૌથી વધુ દાહોદના સંજેલીમાં 1.38 ઇંચ, સિંગવડમાં 1.06 અને મહીસાગરના લુણાવાડામાં પણ એક ઈંચ વરસાદ નોંધાયો છે. ધોલેરા પંથકમાં ઉપરવાસમાં પડેલા ભારે વરસાદથી ચારે તરફ માત્ર પાણી જ પાણી જોવા મળી રહ્યું છે.

રાજ્યમાં સીઝનનો 55.22 % વરસાદ

રાજ્યમાં સૌથી વધુ વરસાદ દક્ષિણ ગુજરાત 78.49%માં નોંધાયો છે, જ્યારે મધ્ય-પૂર્વ ગુજરાતમાં 47.86%, સૌરાષ્ટ્રમાં 43.98%, ઉત્તર ગુજરાતમાં 42.18%, અને રાજ્યમાં સૌથી ઓછે વરસાદ 19.05% કચ્છમાં વરસાદ નોંધાયો છે.

પોતાના વિવાદિત નિવેદનો અને સોશિયલ મીડિયા પોસ્ટને કારણે હંમેશા ચર્ચામાં રહેતી સોશિયલ મીડિયા સ્ટાર કીર્તિ પટેલ ફરી એકવાર કાયદાના સકંજામાં આવી છે. સુરતની પુણા પોલીસે સોશિયલ મીડિયા પર પરિવારની ભયંકર બદનક્ષી કરવા અને ધમકી આપવાના ગુનામાં કીર્તિ પટેલની સુરેન્દ્રનગરથી ધરપકડ કરી છે. ભાવનગરના વેપારી અને મહિલા સરપંચના પતિ રાજુ ભમ્મરે કીર્તિ પટેલ તથા ભાવનગરની સસ્પેન્ડેડ મહિલા કોન્સ્ટેબલ નયના બારૈયા સામે ગંભીર કલમો હેઠળ ગુનો નોંધાવ્યો હતો.

દિવ્યભાસ્કરના અહેવાલ મુજબ, 12 જુલાઈના રોજ નોંધાયેલી ફરિયાદ પ્રમાણે ફરિયાદી રાજુભાઈ ભમ્મરે જણાવ્યું હતું કે, તેઓ અગાઉ ગુજરાત પોલીસમાં ફરજ બજાવતી નયના બારૈયા સાથે આશરે 21 મહિના સુધી લિવ-ઇન રિલેશનશિપમાં રહ્યા હતા. આ સંબંધ પૂરો થયા બાદ, નયના બારૈયાની ઉશ્કેરણી અને કહેવાથી જ કીર્તિ પટેલે રાજુભાઈ અને તેમના પરિવાર વિરુદ્ધ સોશિયલ મીડિયા પર ઝેર ઓકવાનું અને બદનામ કરવાનું પૂર્વયોજિત ષડયંત્ર રચ્યું હતું.

ગત 5 જૂન, 2026ના રોજ કીર્તિ પટેલે રાજુભાઈના મોબાઈલ પર વ્હોટ્સએપ કોલ કરીને તેમની પત્ની (જેઓ ગામના સરપંચ છે) ને તેમના જ સગા ભાઈ સાથે અનૈતિક સંબંધ હોવાના ગંભીર અને ખોટા આક્ષેપો કર્યા હતા. આ સાથે જ કીર્તિ પટેલે ફોન પર એવી ધમકી આપી કે હું તને જોઈ લઈશ. તેમજ અત્યંત અભદ્ર અને ન બોલવાના અપશબ્દોનો પ્રયોગ કર્યો હતો.

ફોન પર ધમકી આપ્યા બાદ કીર્તિ પટેલે પોતાના ઓફિશિયલ ઇન્સ્ટાગ્રામ ID 'KIRTI NI MOJ5143' પરથી અવારનવાર વીડિયો અને રીલ્સ અપલોડ કર્યા હતા. જેમાં રાજુભાઈના ઘર અને પરિવાર વિશે અભદ્ર વાતો ફેલાવી પત્ની અને ભાઈના ચરિત્ર પર જાહેરમાં કાદવ ઉછાળ્યો હતો. આ જાહેર પ્લેટફોર્મ પર વીડિયો મૂકીને સમગ્ર પરિવારની સામાજિક પ્રતિષ્ઠાને ધૂળધાણી કરવાનો પ્રયાસ કરાયો હતો.

વાયરલ વીડિયોમાં કીર્તિ પટેલે એવા પણ ગંભીર આક્ષેપો કર્યા હતા કે, રાજુએ 250 છોકરીઓની જિંદગી બગાડી છે અને તેનું સમર્થન કરનારા લોકોની મા-બહેનો વિશે પણ આપત્તિજનક ટિપ્પણીઓ કરી હતી. આ ઉપરાંત, જ્યાં તું સામે મળીશ ત્યાં નયના તારા કપડાંનું બિલ આપશે અને તારે એમજ ઘરે જવું પડશે જેવી ધમકીઓ આપીને આર્થિક બાબતો તેમજ ખંડણી અંગે પણ ખોટા કથનો કર્યા હતા.

સૌથી ચોંકાવનારી વાત એ છે કે, કીર્તિ પટેલે અપલોડ કરેલા આ બદનક્ષીકારક અને અપમાનજનક વીડિયોને કાયદાની રક્ષક ગણાતી મહિલા પોલીસ કર્મચારી નયના બારૈયાએ પોતાના ઇન્સ્ટાગ્રામ આઈડી 'naina paliwal 0005' પર સ્ટોરી અને સ્ટેટસમાં શેર કરીને આ ગુનાહિત કૃત્યમાં પૂરેપૂરો સાથ આપ્યો હતો. આ મામલે પુણા પોલીસ દ્વારા કીર્તિ પટેલની ધરપકડ કરવામાં આવી છે જ્યારે આરોપી નયનાની ધરપકડના ચક્રો ગતિમાન કર્યા છે.

આ મામલે DCP આલોક કુમારે જણાવ્યું કે,  સુરત શહેરના પુણા પોલીસ સ્ટેશન વિસ્તારમાં BNSની ધારા 296(b) (અશ્લીલ શબ્દોનો ઉપયોગ), એક્સ્ટોર્શન, માનહાનિ, ગુનાહિત ધમકી અને ગુનાહિત ષડયંત્ર સહિત IT એક્ટની કલમ 67 હેઠળ એક ફરિયાદ નોંધાઈ હતી. આ કેસમાં કીર્તિ પટેલ અને નયના બારૈયા સામેલ છે. આરોપી કીર્તિ પટેલે નયના બારૈયા સાથે મળીને ₹12 લાખ લઈને રેપની ફરિયાદમાં સેટલમેન્ટ કરવાનો પ્રયાસ કર્યો હતો. આ ઉપરાંત, ફરિયાદી રાજુ ભુવા ભમ્મર પાસેથી અલગ-અલગ સમયે દોઢ વર્ષના ગાળામાં કુલ ₹3 કરોડ 12 લાખ પડાવી લેવામાં આવ્યા છે. તપાસ બાદ કોર્ટમાં રિપોર્ટ રજૂ કરીને કેસમાં રંગદારીની કલમ ઉમેરવામાં આવી હતી અને બંને આરોપીઓને નોટિસ પાઠવાઈ હતી. ત્યારબાદ જૂનાગઢ તરફથી કીર્તિ પટેલની ધરપકડ કરવામાં આવી છે, જેને કોર્ટ સમક્ષ રજૂ કરીને રિમાન્ડ મેળવવાની કામગીરી કરાશે.

આરોપીના ગુનાહિત ઇતિહાસ અંગે વાત કરતા DCPએ જણાવ્યું કે, કીર્તિ પટેલ સામે કાપોદ્રા પોલીસ સ્ટેશનમાં પણ અગાઉ તોડ-એક્સટોર્શનનો ગુનો નોંધાયેલો છે. તે સોશિયલ મીડિયા ઇન્ફ્લુઅન્સર તરીકે ખોટા મેસેજ અને વીડિયો વાયરલ કરતી હોવાથી, કાયદાકીય પ્રક્રિયા અંતર્ગત ઇન્સ્ટાગ્રામ દ્વારા તેનું એકાઉન્ટ ડીએક્ટિવેટ કરવામાં આવ્યું છે.

નવા એકાઉન્ટ અને ધમકીના પ્રશ્ન અંગે તેમણે સ્પષ્ટ કર્યું કે, મહિલા PSI દ્વારા આ અંગે તપાસ ચાલી રહી છે. સામાન્ય રીતે વીડિયો બનાવવો એ ગુનો નથી, પરંતુ કયા હેતુથી વીડિયો બનાવીને કોને ટાર્ગેટ કરાય છે અને પૈસા પડાવવાનો પ્રયાસ થાય છે કે કેમ? તે બાબતો ધ્યાને રાખીને જ કાયદાકીય કાર્યવાહી કરવામાં આવે છે. અગાઉના ગુનાઓમાં આરોપી જામીનની શરતોનું ઉલ્લંઘન કરતી હોવાથી જામીન રદ કરવા માટે પણ કોર્ટમાં રિપોર્ટ રજૂ કરી દેવાયો છે અને બીજી આરોપીને ઝડપી પાડવા પ્રયાસો ચાલુ છે.

ઉત્તર પ્રદેશના મથુરા જિલ્લાના બલદેવ પોલીસ સ્ટેશન વિસ્તાર હેઠળના છૌલી ગામમાં લગભગ એક મહિના પહેલા થયેલા ત્રણ વર્ષના બાળકના મૃત્યુના કેસમાં એક નવો વળાંક આવ્યો છે. બાળકના પિતા દ્વારા નોંધાવવામાં આવેલી ફરિયાદના આધારે પોલીસે માતા અને તેના કથિત પ્રેમી સામે હત્યાનો કેસ નોંધ્યો છે અને તપાસ શરૂ કરી છે. પોલીસે જણાવ્યું છે કે નિષ્પક્ષ તપાસ ચાલી રહી છે, અને એકત્રિત થયેલા પુરાવાના આધારે આગળની કાર્યવાહી કરવામાં આવશે.

ફરિયાદી કૃષ્ણ મુરારીના જણાવ્યા અનુસાર, તેમની પત્ની રુચિએ 28 જૂનની સાંજે ફોન કરીને જાણ કરી હતી કે તેમનો આશરે ત્રણ વર્ષનો પુત્ર માધવ વારંવાર પ્રયાસ કરવા છતા જાગી રહ્યો નથી. ત્યારબાદ બાળકને સારવાર માટે મથુરાની એક ખાનગી હોસ્પિટલમાં લઈ જવામાં આવ્યો હતો, જ્યાં ડૉક્ટરોએ તેને મૃત જાહેર કર્યો હતો. ત્યારબાદ પરિવારે બાળકના અંતિમ સંસ્કાર કરી દીધા હતા.

પિતાનો આરોપ છે કે, થોડા સમય પછી તેણે પોતાની પત્નીને એક યુવાન સાથે ફોન પર વાત કરતા સાંભળી, જેમાં કથિત રૂપે બાળકના મૃત્યુનો ઉલ્લેખ કરવામાં આવ્યો હતો. ત્યારબાદ પૂછપરછ કરવામાં આવતા પત્નીએ કથિત રીતે સ્વીકાર્યું કે તેનો એક યુવક સાથે પ્રેમ સંબંધ હતો અને ફોન પર વાતચીત દરમિયાન બાળક અવાજ કરી રહ્યો હતો, જેથી નારાજ થઇને તેણે તેનું ગળું દબાવી દીધું હતું, જેના પરિણામે તેનું મૃત્યુ થયું હતું. ફરિયાદમાં વધુમાં આરોપ મૂકવામાં આવ્યો છે કે કથિત પ્રેમીને પણ આ ઘટનાની જાણ હતી.

આ બાબતની માહિતી મળતા પોલીસે માતા અને તેના કથિત પ્રેમી સામે કેસ નોંધ્યો છે અને તપાસ શરૂ કરી છે. પોલીસ મોબાઇલ કોલ રેકોર્ડ, અન્ય ટેકનિકલ પુરાવા અને સંબંધિત વ્યક્તિઓના નિવેદનો એકત્રિત કરી રહી છે. પોલીસ સ્ટેશનના પ્રભારી અભય કુમાર શર્માએ જણાવ્યું હતું કે આ કેસની દરેક દૃષ્ટિકોણથી તપાસ કરવામાં આવી રહી છે. તપાસ દરમિયાન બહાર આવનારા તથ્યોના આધારે કાયદેસરની કાર્યવાહી કરવામાં આવશે. હાલમાં પૂછપરછ અને ઉપલબ્ધ પુરાવાઓના આધારે આરોપોની તપાસ કરવામાં આવશે.

દિલ્હી યુનિવર્સિટી સંલગ્ન સેન્ટ સ્ટીફન્સ કોલેજમાં નવા ડ્રેસ કોડને લઈને વિવાદ ફાટી નીકળ્યો છે. કોલેજ પ્રશાસને કેમ્પસના ઘણા મુખ્ય વિસ્તારોમાં વિદ્યાર્થીઓને શોર્ટ્સ પહેરવા પર પ્રતિબંધ મૂક્યો છે. આ નિર્ણયનો વિરોધ કરતા ઘણા વિદ્યાર્થીઓ મંગળવારે નવા સત્રના પહેલા દિવસે શોર્ટ્સ પહેરીને કોલેજ પહોંચ્યા હતા અને પોતાનો નારાજગી વ્યક્ત કરી હતી.

કોલેજ પ્રશાસને જાહેર કરેલી નોટિસ અનુસાર, શોર્ટ્સ પહેરીને વર્ગખંડો, એસેમ્બલી હૉલ, લાઇબ્રેરી, ડાઇનિંગ હૉલ અને ચેપલ જેવા વિસ્તારોમાં પ્રવેશ પર પ્રતિબંધ છે. નોટિસમાં તમામ જૂનિયર સભ્યોને સંસ્થાના ડ્રેસ કોડનું કડક પાલન કરવાનો નિર્દેશ આપવામાં આવ્યો છે. તેમાં કૉલેજના નવા પ્રિન્સિપાલ સુસાન એલિયાસની સહી છે. કૉલેજનું કહેવું છે કે કેમ્પસમાં શિસ્ત, ગરિમા અને ઔપચારિક શૈક્ષણિક વાતાવરણ જાળવવા માટે આ પગલું લેવામાં આવ્યું છે.

નવા નિયમનો વિરોધ કરતા ઘણા વિદ્યાર્થીઓ નવા સત્રના પહેલા જ દિવસે શોર્ટ્સ પહેરીને કોલેજ પહોંચ્યા હતા. વિદ્યાર્થીઓનું કહેવું છે કે કપડાં એ વ્યક્તિગત સ્વતંત્રતાનો વિષય છે અને આવા પ્રતિબંધો વિદ્યાર્થીઓના અધિકારોને મર્યાદિત કરે છે. વિરોધ કરી રહેલા વિદ્યાર્થીઓએ પ્રશ્ન કર્યો હતો કે કોલેજ શિક્ષણ અને શૈક્ષણિક વાતાવરણને બદલે વિદ્યાર્થીઓના પોશાક પર કેમ ધ્યાન કેન્દ્રિત કરી રહી છે. કેટલાક વિદ્યાર્થીઓએ એવો પણ દાવો કર્યો હતો કે તેમને અગાઉથી નિર્ણય વિશે પૂરતી માહિતી આપવામાં આવી નહોતી, જેના કારણે સત્રના પહેલા દિવસે મૂંઝવણ ઊભી થઈ.

જોકે નોટિસમાં ખાસ કરીને જૂનિયર સભ્યોનો ઉલ્લેખ છે, પરંતુ વિદ્યાર્થીઓનો દાવો છે કે વહીવટીતંત્ર આ નિયમ સીનિયર વિદ્યાર્થીઓ પર પણ લાગુ કરી રહ્યું છે. આનાથી વિદ્યાર્થી સંગઠનમાં મૂંઝવણ ઊભી થઈ છે. ઘણા વિદ્યાર્થીઓએ સ્પષ્ટ માર્ગદર્શિકા જાહેર કરવાની માંગ કરી છે, જેથી તે સ્પષ્ટ થઇ જાય કે નિયમ કયા-કયા વિદ્યાર્થીઓ પર લાગૂ થશે.

સેન્ટ સ્ટીફન કૉલેજનો આ નિર્ણય હવે સોશિયલ મીડિયા અને વિદ્યાર્થી સમુદાયમાં ચર્ચાનો વિષય બની ગયો છે. એક પક્ષનું માનવું છે કે શૈક્ષણિક સંસ્થાઓને શિસ્ત અને સંસ્થાકીય શિષ્ટાચાર જાળવવા માટે ડ્રેસ કોડ લાગૂ કરવાનો અધિકાર છે. તો, બીજો પક્ષ આને વિદ્યાર્થીઓની વ્યક્તિગત પસંદગીઓ અને અભિવ્યક્તિની સ્વતંત્રતામાં દખલગીરી માને છે.

Toyotaએ ભારતીય બજારમાં તેની નવી કાર લોન્ચ કર્યું છે. આ એક એક પિકઅપ ટ્રક છે. આપણે વાત કરી રહ્યા છીએ Toyota Hiluxની, જે હવે તેના નવા અવતારમાં ભારતમાં આવી ગઇ છે. આમ તો કંપનીએ આ ટ્રકને વૈશ્વિક બજારોમાં પહેલેથી જ ઉતારી ચૂકી છે, ત્યારે ભારતીય બજારમાં તેની એન્ટ્રી ખૂબ મહત્ત્વપૂર્ણ છે.

આ કારની 9મી પેઢી છે. નવી પિકઅપ ટ્રકમાં ફરીથી ડિઝાઇન કરાયેલ એક્સટીરિયર અને ઇન્ટીરિયર મળે છે. આ ઉપરાંત કંપનીએ આમા નવીનતમ તકનીક અને સુવિધાઓનો ઉમેરો કર્યો છે. જો કે, અત્યારે પણ આ ગાડી IMV બોડી-ઓન-ફ્રેમ પ્લેટફોર્મ પર આવે રહી છે. ચાલો જાણીએ તેની ખાસ વાતો.

કિંમત શું છે?

Toyota Hiluxને કંપનીએ ₹31,99,000 (GX 4x2 ઓટોમેટિક વેરિયન્ટ માટે) ની પ્રારંભિક એક્સ-શૉરૂમ કિંમત સાથે લોન્ચ કર્યું છે. તો કાર GX 4x4 ઓટોમેટિક વેરિયન્ટની કિંમત ₹33,69,000 (એક્સ-શૉરૂમ) છે, જ્યારે VX 4x4 ઓટોમેટિક ₹36,69,000ના એક્સ-શોરૂમ ભાવે લોન્ચ કરવામાં આવી છે.

એક્સટીરિયરમાં નવું શું છે?

નવી Hiluxમાં વધુ એપરાઇટ ફ્રન્ટ-એ ડિઝાઇન સાથે આવે છે, જેમાં સ્લીક LED હેડલેમ્પ્સ આપવામાં આવ્યા છે. તેમાં હનીકોમ્બ-પેટર્નવાળી ગ્રિલ છે, અને આગળના ભાગમાં બ્રાન્ડના લોગોને બદલે Toyota લખેલું મળશે. પિકઅપમાં બ્લેક વ્હીલ આર્ચ ક્લેડિંગ, રોલ બાર્સ, નવા 18-ઇંચ એલોય વ્હીલ્સ અને ફૂટબોર્ડ્સથી સજ્જ છે.

પાછળ કારમાં LED ટેલ લેમ્પ્સ આપવામાં આવ્ય છે, જે C-આકારના DRL સિગ્નેચર અને Toyota લેટરિંગ સાથે આવે છે. તેમાં ફરીથી ડિઝાઇન કરેલું બમ્પર પણ છે, જે ઇન્ટિગ્રેટેડ સ્ટેપ સાથે આવે છે. આનાથી પિકઅપના કાર્ગો બેડ પર ચઢવાનું સરળ થઇ જાય છે. પિકઅપ ટ્રક 6 રંગો- સલ્ફર મેટાલિક, પ્લેટિનમ પર્લ વ્હાઇટ મેટાલિક, એટિટ્યૂડ બ્લેક, એશ, ઇમોશનલ રેડ અને સુપર વ્હાઇટમાં ઉપલબ્ધ છે.

ઇન્ટીરિયર અને ફીચર્સ

Hiluxના કેબિનની વાત કરીએ તો, તેમાં 12.3 ઇંચનું ડિજિટલ ઇન્સ્ટ્રૂમેન્ટ ક્લસ્ટર અને 12.3 ઇંચનું ટચસ્ક્રીન ઇન્ફોટેનમેન્ટ ડિસ્પ્લે મળે છે. આ કારમાં Toyota લોગો ધરાવતા 3 સ્પોક સ્ટીયરિંગ વ્હીલ મળે છે. ઇન્ફોટેનમેન્ટ સિસ્ટમ Toyota સ્માર્ટ કનેક્ટથી સજ્જ છે. પિકઅપમાં એપલ કારપ્લે અને એન્ડ્રોઇડ ઓટો, વાયરલેસ ચાર્જિંગ, ડ્યૂઅલ-ઝોન ક્લાઇમેટ કંટ્રોલ, કનેક્ટેડ કાર ટેક્નોલોજી, પાવર્ડ અને વેન્ટિલેટેડ ફ્રન્ટ સીટ્સ, મલ્ટી-ટેરેન મોડ્સ, OTA અપડેટ્સ, 360-ડિગ્રી કેમેરા અને ADAS જેવા ફીચર્સ મળે છે.

કોકરોચ જનતા પાર્ટી (CJP)એ આરોપ લગાવ્યો કે, તેના આંદોલનમાં સામેલ વિદ્યાર્થીઓને હેરાન કરવામાં આવી રહ્યા છે અને ધરપકડની ધમકી આપવામાં આવી રહી છે. પાર્ટીએ ચેતવણી આપી છે કે જો આવું ચાલુ રહેશે, તો તે મોદી સરકાર સામે વધુ એક મોટું આંદોલન શરૂ કરશે. સાથે જ પાર્ટીએ એમ પણ કહ્યું કે સરકારે સુપ્રીમ કોર્ટના ચૂકાદાને માધ્યમ બનાવીને વિદ્યાર્થીઓ સામે નોંધાયેલી FIRને સક્રિય ન રાખે.

મંગળવારે સુપ્રીમ કોર્ટે નિર્દેશ આપ્યો હતો કે દિલ્હીના જંતર-મંતર અને દેશભરના વિવિધ રાજ્યોમાં 'કોકરોચ જનતા પાર્ટી'ની આગેવાની હેઠળના તાજેતરના વિરોધ પ્રદર્શનોમાં ભાગ લેનારાઓ સામે કોઈ દંડાત્મક કાર્યવાહી કરવામાં ન આવે; જોકે, કોર્ટે સ્પષ્ટ કર્યું હતું કે આ રાહત એ લોકોને નહીં મળે, જેમનો ગુનાહિત રેકોર્ડ છે.

આનો ઉલ્લેખ કરતા CJP પ્રવક્તા સૌરવ દાસે તેમના X હેન્ડલ પર લખ્યું કે, સુપ્રીમ કોર્ટનો રાજકીય ઉપયોગ સરકારના ફાયદા માટે નહીં કરી શકાય. તેના આદેશોને સરકારના હિત માટે હથિયાર તરીકે ઉપયોગ નહીં કરી શકાય. સમગ્ર દેશ સામે એક ગંભીર ખાતરી આપવામાં આવી હતી; તેનું સન્માન કરવું જોઈએ. બધી FIR પાછી ખેંચવી જોઈએ.

જો ગુનેગારો ખુલ્લામાં ફરી રહ્યા હતા, તો પોલીસે તેમના અગાઉના કેસોમાં જામીન રદ કરવા માટે કોર્ટનો સંપર્ક કરવો જોઈતો હતો. સાથે જ એ પણ જવાબ આપવો જોઇએ કે આ વ્યક્તિઓ સમાજમાં આટલી મુક્ત રીતે કેવી રીતે ફરી રહી હતી. જોકે, સરકાર આનો ઉપયોગ FIRને જીવંત રાખવા માટે નહીં કરી શકે. જેથી પાછળથી સાચા પ્રદર્શનકારીઓને નિશાન બનાવી શકાય.

સૌરવ દાસે કહ્યું કે, જો સરકારને આની છૂટ આપવામાં આવે, તો તે ચોક્કસપણે તેનો ઉપયોગ કરશે. યુવાનો આને કોઈપણ કિંમતે સ્વીકારશે નહીં! અમે ભવિષ્ય માટે અવાજ ઉઠાવનારા દરેક પ્રદર્શનકારીની સાથે ઉભા રહીશું.

કાનૂની સમાચાર અને વિશ્લેષણ વેબસાઇટ લાઈવ લો અનુસાર, ન્યાયાધીશ સૂર્યકાંત, ન્યાયાધીશ જોયમલ્યા બાગચી અને ન્યાયાધીશ વી. મોહનાની બેન્ચે વિવિધ રાજ્યોમાં પોલીસ કસ્ટડીમાં લેવામાં આવેલા સગીરોને તાત્કાલિક મુક્ત કરવાનો આદેશ આપ્યો. કોર્ટે એ પણ સ્પષ્ટ કર્યું કે આ રાહત ગુનાહિત રેકોર્ડ ધરાવતા પ્રદર્શનકારીઓને લાગુ પડશે નહીં.

સુપ્રીમ કોર્ટે એમ પણ કહ્યું કે પોલીસના કથિત અત્યાચારના પ્રથમ દૃષ્ટિએ નિષ્પક્ષ અને સ્વતંત્ર તપાસની માંગ કરીએ છીએ. કોર્ટે સંકેત આપ્યો કે તે આ ઘટનાઓની નિષ્પક્ષ તપાસ સુનિશ્ચિત કરવા માટે ઉચ્ચ-સ્તરીય સમિતિની રચના પર વિચાર કરી રહી છે. જોકે, સમિતિની રચના કરતા પહેલા, કોર્ટે કેન્દ્ર સરકાર અને દિલ્હી પોલીસને પોતાનો પક્ષ રેકોર્ડ પર રાખવાની તક આપી હતી. કોર્ટે જણાવ્યું હતું કે હિંસા થઈ હોય તેવા અન્ય રાજ્યો પણ કોર્ટ સમક્ષ પોતાનો પક્ષ રજૂ કરી શકે છે. આ મુજબ, કોર્ટે દિલ્હી, મહારાષ્ટ્ર, બિહાર, કેરળ, મધ્યપ્રદેશ અને ઉત્તર પ્રદેશના મુખ્ય સચિવોને નોટિસ જારી કરી હતી. આ દરમિયાન, સુપ્રીમ કોર્ટે નિર્દેશ આપ્યો હતો કે આ વિરોધ પ્રદર્શનો સાથે સંબંધિત તમામ CCTV ફૂટેજ, ડ્રોન રેકોર્ડિંગ, વાયરલેસ કોમ્યુનિકેશન લોગ અને અન્ય સંબંધિત રેકોર્ડ સાચવવામાં આવે.

CJPએ દાવો કર્યો હતો કે મોદી સરકારે ચર્ચા દરમિયાન તેમને ખાતરી આપી હતી કે વિરોધ પ્રદર્શનોમાં સામેલ કોઈપણ વિદ્યાર્થી સામે કોઈ કાર્યવાહી કરવામાં આવશે નહીં અને તમામ FIR પાછી ખેંચી લેવામાં આવશે. પશ્ચિમ બંગાળ, આસામ અને બિહાર જેવા રાજ્યોની સરકારોએ પણ કહ્યું છે કે આંદોલનકારી વિદ્યાર્થીઓ સામે કોઈ કાર્યવાહી કરવામાં આવશે નહીં. પરંતુ, સોશિયલ મીડિયા પર અસંખ્ય પોસ્ટ્સ અને વીડિયો ફરતા થઈ રહ્યા છે જેમાં દાવો કરવામાં આવી રહ્યો છે કે પોલીસ વિરોધ પ્રદર્શનમાં ભાગ લેનારા વિદ્યાર્થીઓની અટકાયત કરી રહી છે અથવા તેમને પૂછપરછ માટે બળજબરીથી લઈ જઈ રહી છે. જો કે અમે આવા કોઈ વીડિયો કે દાવાઓની સ્વતંત્ર રીતે ચકાસણી કરી નથી, પરંતુ CJPએ તેમનો ઉલ્લેખ કરીને આરોપ લગાવ્યો છે કે સરકાર પોતાના વચનનું સંપૂર્ણપણે પાલન કરી રહી નથી.

CJPના સ્થાપક અભિજીત દીપકેએ એક વીડિયો સંદેશમાં કહ્યું કે, પોલીસ અનેક રાજ્યોમાં વિદ્યાર્થીઓને હેરાન કરી રહી છે. સરકાર વિદ્યાર્થીઓને ડરાવવા-ધમકાવવાનું બંધ કરે. જો વિદ્યાર્થીઓ સામે ધાકધમકી, અટકાયત અને ધરપકડની ધમકીઓ ચાલુ રહેશે, તો કોકરોચ જનતા પાર્ટી ફરી એકવાર વિશાળ આંદોલન શરૂ કરશે. અમે ફરીથી પ્રદર્શન કરીશું.

તો, CJPના પ્રવક્તા આશુતોષ રંકાએ સમાચાર એજન્સી PTIને જણાવ્યું હતું કે 25 જુલાઈના રોજ કેન્દ્રીય મંત્રીઓ જે.પી. નડ્ડા અને જીતેન્દ્ર સિંહ સાથેની મુલાકાત દરમિયાન સ્પષ્ટ વચન આપવામાં આવ્યું હતું કે વિદ્યાર્થીઓ સામે કોઈ કાર્યવાહી કરવામાં આવશે નહીં. જો કેન્દ્રીય મંત્રીઓની વાતનું કોઇ વેલ્યૂ નથી, તો મને ખબર નથી કે સરકારમાં કોની વેલ્યૂ છે.

તો, CJPએ મંગળવારે દાવો કર્યો હતો કે દિલ્હી પોલીસે જંતર-મંતર વિરોધ સ્થળ નજીક મળી આવેલા પથ્થરોથી ભરેલા ટ્રકને ચાર દિવસ માટે પોતાની કસ્ટડીમાં રાખ્યો હતો. CJPએ ન્યૂઝલોન્ડ્રીના અહેવાલનો ઉલ્લેખ કરતા આ દાવો કર્યો હતો. સંગઠનનું કહેવું છે કે આ ટ્રક 20 જુલાઈ પહેલા ચાર દિવસ માટે દિલ્હી પોલીસે જપ્ત કરેલા વાહનોમાંનો એક હતો.

CJPએ સોશિયલ મીડિયા પ્લેટફોર્મ X પર લખ્યું હતું કે, અમારા જંતર-મંતર વિરોધ સ્થળ નજીક મળી આવેલ પથ્થરોથી ભરેલો 'રહસ્યમય' ટ્રક મળ્યો હતો, તે 20 જુલાઈ પહેલા ચાર દિવસ સુધી દિલ્હી પોલીસે જપ્ત કરેલા વાહનોમાં સામેલ હતો. CJPએ આગળ લખ્યું હતું કે, આ ચોંકાવનારી તપાસે અમારા સૌથી મોટા ભયને સાચો સાબિત કર્યો. એવું લાગે છે કે શાંતિપૂર્ણ લોકશાહી વિરોધ પ્રદર્શનને વિક્ષેપિત કરવાનો, હિંસા ભડકાવવાનો અને નિર્દોષ લોકોને ફસાવવાનો ઇરાદાપૂર્વક પ્રયાસ કરવામાં આવ્યો હતો.

પોસ્ટમાં CJPએ પ્રશ્ન કર્યો હતો કે જપ્ત કરેલા પથ્થરોથી ભરેલા વાહનને શાંતિપૂર્ણ વિરોધ સ્થળ નજીક લાવવાનો આદેશ કોણે આપ્યો હતો.? CJPએ લખ્યું કે, દિલ્હી પોલીસે તાત્કાલિક આનો જવાબ આપવો જોઈએ અને શાંતિપૂર્ણ પ્રદર્શનકારીઓની મોટી ભીડ વચ્ચે પથ્થરથી ભરેલા આ વાહનને મૂકવાનો નિર્ણય લેનારા અધિકારીઓ સામે કડક કાર્યવાહી કરવી જોઈએ. નોંધનીય છે કે 20 જુલાઈના રોજ CJPના 'સંસદ માર્ચ'ના દિવસે અભિજીત દિપકેએ પણ દાવો કર્યો હતો કે પોલીસે ઇરાદાપૂર્વક આ ટ્રક પ્રદર્શન સ્થળની નજીક પાર્ક કરી હતી.

તાજેતરમાં જ અમદાવાદ જિલ્લાના વિરમગામ પંથકમાં મુશળધાર વરસાદ ખાબકવાને કારણે પૂરની પરિસ્થિતિ સર્જાઇ હતી. જેમાં ભારે તારાજી સર્જાઇ હતી હાલ વરસાદ બંધ થતા પૂરના પાણી ધીમે-ધીમે ઓસરી રહ્યા છે અને જનજીવન પાટે ચડવા લાગ્યું છે, ત્યારે ધારાસભ્ય હાર્દિક પટેલે મુખ્યમંત્રી ભૂપેન્દ્રભાઈ પટેલને પત્ર લખીને  વિરમગામ, માંડલ, દેત્રોજ તથા નળકાંઠા વિસ્તારમાં અતિભારે વરસાદ અને પૂરની પરિસ્થિતિને કારણે થયેલ નુકસાનનો તાત્કાલિક સર્વે કરાવી અસરગ્રસ્ત પરિવારો માટે વિશેષ રાહત પેકેજ જાહેર કરવાની માંગ કરી છે.

ભાજપના ધારાસભ્ય હાર્દિક પટેલે મુખ્યમંત્રી ભૂપેન્દ્ર પટેલને લખેલા પત્રમાં જણાવ્યું છે કે, વિરમગામ, માંડલ, દેત્રોજ તથા નળકાંઠા વિસ્તારમાં છેલ્લા કેટલાક દિવસોથી થયેલા અતિભારે વરસાદ અને ઉપરવાસમાંથી આવેલા પાણીના કારણે અનેક ગામોમાં ગંભીર પૂર જેવી પરિસ્થિતિ સર્જાઈ છે. ઘરો, દુકાનો, ખેતીની જમીન તથા જાહેર મિલકતોમાં પાણી ફરી વળતાં મોટા પાયે નુકસાન થયું છે. અનેક પરિવારો ઘરવિહોણા બન્યા છે, ઘરવખરીને નુકસાન થયું છે તથા ખેડૂતો, પશુપાલકો, નાના વેપારીઓ અને શ્રમિક વર્ગ ભારે આર્થિક સંકટનો સામનો કરી રહ્યા છે.

તેમણે પોતાના પત્રમાં વધુમાં જણાવ્યુ કે, આપના (મુખ્યમંત્રી) માર્ગદર્શન હેઠળ અમે વિરમગામ, માંડલ, દેત્રોજ અને નળકાંઠા વિસ્તારમાં અંદાજિત 500 જેટલા પરિવારોને ઘરવખરી, મકાન અને પશુપાલન સહાય આપી ચૂક્યા છીએ. આ કુદરતી આપત્તિના કારણે સમગ્ર વિસ્તારનું જનજીવન ગંભીર રીતે પ્રભાવિત બન્યું છે. તેથી સરકારના સંબંધિત વિભાગો દ્વારા યુદ્ધના ધોરણે અસરગ્રસ્ત વિસ્તારોનો તાત્કાલિક સર્વે હાથ ધરી સરકારની પ્રવર્તમાન જોગવાઈઓ મુજબ વિશેષ રાહત પેકેજ જાહેર કરવામાં આવે તેવી મારી અંગત ભલામણ છે.

હાર્દિક પટેલે પોતાના પત્રમાં આ બાબતોને પ્રાથમિકતા આપવાની વિનંતી કરી છે:

(1) ખેડૂતો માટે પાક અને જમીન નુકસાન સહાય: ખેતરોમાં પાણી ભરાઈ જવાથી તથા જમીન ધોવાઈ જવાના કારણે ઉભા પાકને વ્યાપક નુકસાન થયું છે. અસરગ્રસ્ત ખેડૂતોને હેક્ટર દીઠ ઉદાર વળતર, બિયારણ સહાય તેમજ જરૂરી કૃષિ સહાય તાત્કાલિક આપવામાં આવે.

(2) નાના વેપારીઓ અને લારી-ગલ્લાધારકો માટે આર્થિક સહાય: દુકાનો અને વ્યવસાયિક એકમોમાં પાણી ભરાવાથી માલસામાનને ભારે નુકસાન થયું છે. આવા વેપારીઓને વ્યાજમુક્ત અથવા રાહત દરે લોન તેમજ આર્થિક સહાય ઉપલબ્ધ કરાવવામાં આવે.

(3) આરોગ્ય અને સ્વચ્છતા માટે વિશેષ વ્યવસ્થા: પૂરનું પાણી ઓસર્યા બાદ રોગચાળો ફેલાય નહીં તે માટે અસરગ્રસ્ત વિસ્તારોમાં તાત્કાલિક આરોગ્ય કેમ્પો, પશુ આરોગ્ય કેમ્પો, જંતુનાશક દવાઓનો છંટકાવ, શુદ્ધ પીવાના પાણીની વ્યવસ્થા તથા સ્વચ્છતા અભિયાન હાથ ધરવામાં આવે.

(4) રસ્તા, વીજળી અને અન્ય જાહેર સુવિધાઓનું પુનઃસ્થાપન: નુકસાનગ્રસ્ત માર્ગો, વીજ પુરવઠો, પીવાના પાણીની વ્યવસ્થા તથા અન્ય આવશ્યક જાહેર સુવિધાઓને યુદ્ધના ધોરણે પુનઃસ્થાપિત કરવા માટે વિશેષ ગ્રાન્ટ ફાળવવામાં આવે.

હાર્દિક પટેલે અંતે મુખ્યમંત્રી પાસે માંગ કરી છે કે, પુરગ્રસ્ત નાગરિકોની આ વિકટ પરિસ્થિતિને માનવતાના ધોરણે ધ્યાનમાં લઈ અસરગ્રસ્ત વિસ્તારોમાં તાત્કાલિક સર્વે કરાવી ઉદાર અને સર્વગ્રાહી વિશેષ પૂર રાહત પેકેજ જાહેર કરવામાં આવે, જેથી અસરગ્રસ્ત પરિવારોને ઝડપથી રાહત મળી શકે અને જનજીવન ફરીથી સામાન્ય બની શકે.

શ્રીરામ જન્મભૂમિ તીર્થ ક્ષેત્ર ટ્રસ્ટે સંગઠનાત્મક પુનર્ગઠનમાં મોટો ફેરફાર કરતા જગદીશ આફલે ટ્રસ્ટના પ્રથમ સચિવ તરીકે નિમણૂક કરી છે. તેમની નિમણૂક પર ઔપચારિક મંજૂરી 2 સપ્ટેમ્બરના રોજ યોજાનારી ટ્રસ્ટની બેઠકમાં આપવામાં આવશે. જો કે, પહેલાથી જ ટ્રસ્ટ માટે તેમની નિમણૂક અધિકૃત સહીકર્તા (Authorized Signatory) તરીકે કરવામાં આવી છે, અને આ અંગેનો એક નવો પ્રસ્તાવ સ્ટેટ બેંક ઓફ ઈન્ડિયા (SBI) ને મોકલવામાં આવ્યો છે.

ટ્રસ્ટના મહાસચિવ ચંપત રાય અને ખજાનચી ડૉ. અનિલ મિશ્રાના રાજીનામા બાદ આ નિર્ણય લેવામાં આવ્યો છે. બંનેએ પદ છોડતા ટ્રસ્ટના બેંક ખાતાઓના સંચાલન અને અધિકૃત સહીકર્તાઓ અંગે મડાગાંઠ સર્જાઈ હતી. ટ્રસ્ટના નવા પ્રસ્તાવ બાદ, SBIએ ખાતાઓનું સંચાલન ફરી શરૂ કર્યું છે, જેનાથી ટ્રસ્ટનું નાણાકીય કામકાજ સામાન્ય થઈ ગયું છે. અધિકૃત સહીકર્તા ન હોવાને કારણે આશરે 1,000 કર્મચારીઓના પગાર અને વિવિધ બાંધકામ એજન્સીઓ અને સેવા પ્રદાતાઓને ચૂકવણી પ્રભાવિત થઇ રહી હતી. હવે નવી દરખાસ્ત લાગૂ થતા આ ચુકવણી પ્રક્રિયાઓ હવે ફરી શરૂ થઈ શકે છે.

કોણ છે જગદીશ આફલે?

જગદીશ આફલે લાંબા સમયથી રામ મંદિર બાંધકામ પ્રોજેક્ટના પ્રોજેક્ટ મેનેજર તરીકે જોડાયેલા રહ્યા છે. અત્યાર સુધી, તેઓ પગાર લીધા વિના આ જવાબદારી નિભાવી રહ્યા હતા. આફલે બાળપણથી રાષ્ટ્રીય સ્વયંસેવક સંઘ (RSS) સાથે સંકળાયેલા રહ્યા છે. વ્યવસાયે ઇલેક્ટ્રિકલ એન્જિનિયર છે અને તેમણે IIT મુંબઇથી B.Tech અને M.Techની ડિગ્રી હાંસલ કરી છે. તેઓ વિદેશોમાં વિવિધ મલ્ટીનેશનલ કંપનીઓમાં પણ સેવા આપી ચૂક્યા છે. તેમણે યુરોપ અને અમેરિકમાં નોકરી કરી છે અને નિવૃત્તિ પછી ભારત પાછા ફર્યા. તેઓ તેમની પત્ની સાથે અયોધ્યા તીર્થક્ષેત્રમાં જ રહે છે.

ટ્રસ્ટના વચગાળાના મહાસચિવ કૃષ્ણ મોહને જણાવ્યું હતું કે, પ્રવક્તાની નિમણૂકની પ્રક્રિયા અંતિમ તબક્કામાં છે, અને ટૂંક સમયમાં નામની જાહેરાત થઈ શકે છે. મુખ્ય કાર્યકારી અધિકારી (CEO)ની પસંદગીમાં થોડો સમય લાગી શકે છે. આ કારણે, ટ્રસ્ટના વહીવટી અને નાણાકીય કામગીરીને સરળ રીતે ચલાવવા માટે સચિવનું નવું પદ બનાવવામાં આવ્યું છે.

સુપ્રીમ કોર્ટે સોલિસિટર જનરલને કહ્યું કે તેઓ ઉત્તર પ્રદેશ સરકારને પૂછીને જણાવે કે શું રામ મંદિર દાન કેસની તપાસ માટે રચાયેલી સ્પેશિયલ ઇન્વેસ્ટિગેશન ટીમ (SIT)ની પુનર્ગઠન કરી શકાય છે?. CJI સૂર્ય કાંતે જણાવ્યું હતું કે સુપ્રીમ કોર્ટ ઇચ્છશે કે આ તપાસનું નેતૃત્વ કોઇ એવા વરિષ્ઠ IPS અધિકારી કરે, જેમને આ પ્રકારની તપાસ કરવાનો અનુભવ હોય.

કોમનવેલ્થ ગેમ્સમાં વેઈટલિફ્ટિંગમાં ભારતનો મેડલ જીતવાનો સિલસિલો ચાલુ છે, આ યાદીમાં એક નવું નામ ઉમેરાયું છે. નામ છે હરજિંદર કૌર. તે ખેલાડી છે જેણે આ વખતે તેના અગાઉના કોમનવેલ્થ ગેમ્સના બ્રોન્ઝ મેડલને સિલ્વરમાં અપગ્રેડ કર્યો છે. જોકે, આ સિલ્વર મેડલ જીતવા માટે હરજિંદર કૌરને ભારે પીડા સહન કરવી પડી હતી અને ખૂબ મુશ્કેલીઓનો સામનો કરવો પડ્યો હતો. અહીં સુધી કે તે પોતાના ડૉક્ટરની સલાહ વિરુદ્ધ ગણ ગઇ. આ બધું માત્ર એટલે કર્યું કારણ કે આ વખતે તેને નસીબ પર આધારે નહીં, મહેનતના દમ પર મેડલ જીતવા માંગતી હતી.

ચાર વર્ષ અગાઉ હરજિંદરે 71 કિગ્રા કેટેગરીમાં ભાગ લીધો હતો. જે તેનો કોમનવેલ્થ ડેબ્યૂ હતું. તે છેલ્લી લિફ્ટ સુધી ચોથા સ્થાને હતી. જો કે, ઇવેન્ટમાં ટોપમાં રહેલી નાઇજિરિયન એથ્લીટ ક્લીન એન્ડ જર્ક રાઉન્ડમાં એક પણ ક્લીન લિફ્ટ ન કરી શકી, જેના કારણે હરજિંદર ચોથા સ્થાનેથી ત્રીજા સ્થાને પહોંચી ગઈ.

આ વખતે, હરજિંદર કૌરે તેના પ્રદર્શનમાં કોઈ તક છોડી નહીં. તમે અંદાજો એ વાતથી લગાવી શકો છો કે, તેણીએ સ્પર્ધાના ત્રણેય વિભાગોમાં વ્યક્તિગત શ્રેષ્ઠ પ્રદર્શન કર્યું. તેણે સૌપ્રથમ સ્નેચમાં 101 કિગ્રાનો ભાર ઉપાડ્યો, જે તેનું એક વ્યક્તિગત શ્રેષ્ઠ છે. ત્યારબાદ તેણે ક્લીન એન્ડ જર્કમાં 126 કિગ્રા વજન ઉપાડ્યું. આ પણ તેનું વ્યક્તિગત શ્રેષ્ઠ પ્રદર્શન કર્યું. તેનું કુલ 227 કિગ્રા વજન ઉપાડવું અને આ કુલ સ્કોર પણ તેનું વ્યક્તિગત શ્રેષ્ઠ પ્રદર્શન હતું.

વજન ઉપાડતી વખતે હરજિંદર કૌરના ચહેરા પર સ્મિત હતું, પરંતુ તેની પાછળ ખૂબ પીડા છુપાવી રાખી હતી. તે ઘણા સમયથી સતત કાંડા અને પોતાની કમરમાં દુ:ખાવો અનુભવી રહી હતી. આ વર્ષની શરૂઆતમાં તેણે એક ડૉક્ટર પાસે જવાનો નિર્ણય લીધો. ડૉક્ટરે સલાહ આપી કે શક્ય તેટલો આરામ કરે. જોકે, આ વર્ષ વેઈટલિફ્ટિંગ માટે મહત્ત્વપૂર્ણ છે, કારણ કે કોમનવેલ્થ ગેમ્સ અને એશિયન ગેમ્સ બંને યોજાવાના હતા. હરજિંદર અને તેના ભાઈએ મળીને ડૉક્ટરની સલાહને અવગણીને તેની તાલીમ ચાલુ રાખવાનું નક્કી કર્યું. હરજિંદરે આ વર્ષની એશિયન ચેમ્પિયનશિપમાં બ્રોન્ઝ મેડલ જીત્યો હતો; તે જ મેડલે કોમનવેલ્થ ગેમ્સમાં તેનું સ્થાન નિશ્ચિત કરી દીધું.

હરજિંદર કૌર કોણ છે?

હરજિંદર કૌર પંજાબના નાભાના મહેશ ગામની રહેવાસી છે. તેની રમતની સફર વેઈટલિફ્ટિંગથી નહીં, પરંતુ કબડ્ડીથી શરૂ થઈ હતી. તે શાળાના દિવસોમાં કબડ્ડી રમતી અને દોરડા ખેંચમાં ભાગ લેતી હતી. તેના કોચ પરવિંદર શર્માએ જોયું કે હરજિંદરનો મસસ પાવર ખૂબ સારો હતો. હરજિન્દરે જણાવ્યું કે તે ઘરે ચારો કાપવાના મશીન પર કામ કરતી હતી. આ મશીનમાં લોખંડના બે ભારે પૈડા ફેરવવા પડતા હતા; આનાથી તેનો મસલ પાવરમાં વધારો થયો, જેના કારણે તેનું વેઇટલિફ્ટિંગની શરૂઆતમાં તેને મુશ્કેલી ન થઇ. તેણે આખરે વેઇટલિફ્ટિંગમાં તાલીમ લેવા માટે કબડ્ડી છોડી દીધી. તેણે 2022માં પોતાના પ્રથમ કોમનવેલ્થ ગેમ્સમાં બ્રોન્ઝ મેડલ જીત્યો, પરંતુ તેને સિલ્વરમાં બદલીને તેણે આશા જગાવી છે કે ગોલ્ડ મેડલ દૂર નથી.