છેલ્લા કેટલાક સમયથી અમદાવાદ ટ્રાફિક પોલીસ અવનવા પ્રયોગો કરી વાહનચાલકોને ટ્રાફિકના નિયમનું પાલન કરાવી રહી છે જેને લઈ હવે ટ્રાફિકના નિયમ તોડવાનું પ્રમાણ પણ ઓછું થયું છે તો હવે ટ્રાફિક પોલીસે આ કાર્યવાહીને વધુ મજબૂત બનાવી ઈ-મેમો નહિ ભરનારાઓ સામે સ્થળ પર જ કાર્યવાહી કરવાની શરૂઆત કરી છે.

વર્ષ 2018 એપ્રિલથી અમદાવાદમાં ફરીથી ઈ-મેમોની શરૂઆત કરાઈ હતી. સ્માર્ટ સિટી પ્રોજેક્ટ હેઠળ 1500થી વધુ કેમેરા દ્વારા ટ્રાફિક અંગે મોનિટરિંગ કરવામાં આવી રહ્યું છે. તો અમદાવાદ હજી પણ કેટલાક વાહનચાલકો આ નિયમોને ઘોળીને પી જતા હોય તેમ બિન્દાસપણે રોડ રસ્તે નીકળી જાય છે તેમજ અનેક ઈ-મેમો મળ્યા હોવા છતાં તે ભરવામાં આવતા નથી.

ત્યારે પોલીસે હવે એક નવતર પ્રયોગ અમલમાં મૂક્યો છે. જે મુજબ ઈ-મેમો નહીં ભરનાર વાહનચાલકોને રોડ પર જ અટકાવીને બાકી નીકળતા તમામ દંડની રકમ વસૂલ કરવામાં આવશે. છેલ્લા એક મહિનાથી પોલીસે ટ્રાફિક ડ્રાઈવ કરીને બાકી તમામ ઈ-મેમો ભરાવવા કામગીરી શરૂ કરી છે અને કરોડો રૂપિયાના બાકી મેમોનું વસૂલાત કરી રહી છે. છેલ્લા એક માસની વાત કરીએ તો ડિસેમ્બર 2018મા જ 23 લાખ રૂપિયાની વસૂલાત કરી છે. તો અગામી દિવસોમાં ટ્રાફિક પોલીસ અનેક જગ્યાઓ પર બાકી દંડની વસૂલાત કરવા પોલીસની ટીમો તૈનાત રાખશે.

રાજકોટ મહાનગરપાલિકાની વોર્ડ નંબર 13ની પેટા ચૂંટણી યોજાવાની છે જેને લઈને બંને પક્ષના ઉમેદવાર કોણ જાહેર થાય તેના પર બધાની નજર મંડાયેલી છે. તે પહેલા જ બગાવત કરનાર નીતિન રામાણી ફરી એકવાર વિવાદમાં આવ્યાં છે. નીતિન રામાણીએ પક્ષથી ઉપર જઈને એક જાહેરાત કરી છે.

રાજકોટ મહાનગરપાલિકાના વોર્ડ નં.13ની પેટા ચૂંટણી આગામી 27મીના રોજ યોજાવાની છે. ત્યારે પેટા ચૂંટણી યોજાવા પાછળનું મહત્ત્વનું કારણ છે. કોંગ્રેસના કોર્પોરેટર નીતિન રામાણીએ બગાવત કરીને ભાજપમાં જોડાયા હતા. પેટા ચૂંટણીને લઈને બંને પક્ષો ઉમેદવારોને લઈને મંથન કરી રહ્યા છે ત્યાં જ કોર્પોરેટર નીતિન રામાણીએ પક્ષથી ઉપર જઈને પોતે ઉમેદવાર હોવાની જાહેરાત કરી હતી. જેને લઈને આગામી 10 તારીખના રોજ ભાજપમાંથી ઉમેદવારી ફોર્મ ભરશે.

ભાજપ પક્ષની પરંપરા રહેલી છે કે કોર્પોરેશનની ચૂંટણીમાં શહેર ભાજપ કાર્યલય ખાતેથી જ ઉમેદવારની જાહેરાત કરવામાં આવતી હોય છે અને શહેર ભાજપ પ્રમુખ જાહેરાત કરતા હોય છે પરંતુ પેટા ચૂંટણીમાં કોઈ જુદા જ સૂર જોવા મળ્યા હતા. કોંગ્રેસમાંથી બળવો કરીને આવેલા નીતિન રામાણીએ પક્ષના તમામ નિયમનોને નેવે મૂકી પોતે ઉમેદવાર હોવાની જાહેરાત કરતા શહેર ભાજપમાં કચવાટ શરૂ થઈ ગયો છે. ત્યારે નીતિન રામાણી સામે અનેક સવાલો ઊભા થયા છે કે તેઓ શું સુપર કોર્પોરેટર હોવાનું સાબિત કરવા માગે છે? શું નીતિન રામાણી પક્ષથી અને શહેર પ્રમુખથી ઉપર છે?

પેટા ચૂંટણીમાં ભાજપના ઉમેદવાર જાહેર કરવા બાબતે શહેર ભાજપ પ્રમુખ કમલેશ રામાણી સાથે વાત કરતા તેમણે જણાવ્યું હતું કે, ભાજપના ઉમેદવાર આગામી 10 તારીખે ફોર્મ ભરશે. ત્યારે ભાજપની પરંપરા તોડનાર અને ભાજપમાં આવતા ફરી બગાવતના સૂર ઉઠાવનાર નીતિન રામાણી સામે શિસ્તભંગ કરવા બદલ પક્ષ કેવા પ્રકારની કાર્યવાહી કરે છે તે જોવું રહ્યું.

રાજ્ય સરકાર દ્વારા પાણીની વિકટ પરિસ્થિતિને પહોંચી વળવા માટે સૌની યોજના હેઠળ ફેઝ-1માં ડેમો પાણીથી ભરવાનો પ્રારંભ કર્યો હતો. ત્યારે હવે મુખ્યમંત્રી દ્વારા ફેઝ-2ને અમલી બનાવી વિવિધ જળાશયોને ભરવાની તૈયારી હાથ ધરી છે. જે અંગે ભાવનગર ખાતે જિતુભાઈ વાઘાણીએ ફેઝ-2માં ભાવનગર જિલ્લાના બોરતળાવ અને શેત્રુંજી ડેમમાં 158 કરોડના ખર્ચે નર્મદાના નીર ભરવામાં આવશે તેવી જાહેરાત કરી હતી.

આ યોજના રાજ્ય સરકાર દ્વારા ખેડૂતોને અને શહેરીજનોને પાણીની સમસ્યાઓનો સામનો કરવો ના પડે તે માટે ગત વર્ષે અમલી બનાવી છે અને જેમાં ફેઝ-1માં સૌની યોજના હેઠળ અનેક જિલ્લાના જળાશયોમાં નર્મદાના નીર ઠાલવ્યા હતા. ત્યારે હવે જયારે મુખ્યમંત્રી દ્વારા ફેઝ-2ની તૈયારીઓ કરવામાં આવી રહી છે. ત્યારે તેમાં અન્ય જિલ્લાની સાથે ભાવનગર જિલ્લાનો પણ સમાવેશ કરવામાં આવ્યો છે. જેમાં 158 કરોડ રૂપિયાના ખર્ચે બોરતળાવ અને શેત્રુંજી ડેમમાં પાણી ભરવામાં આવશે. ભાવનગર શહેર અને આસપાસના ગ્રામ્ય વિસ્તારોમાં વસતા લોકો અને ખેડૂતોને પીવાના અને ખેતી માટે જરૂરી પાણીની મુશ્કેલીના પડે તે માટે સરકાર દ્વારા સૌની યોજના હેઠળ ખાસ ટૂંક સમયમાં હાથ ધરવામાં આવશે.

ભાવનગર શહેર અને જિલ્લા માટે ગુજરાત ભાજપ પ્રદેશ પ્રમુખની જાહેરાત મહત્વની બની રહી હતી અને જેનો લાભ આવનારા સમયમાં  આસપાસના ગામોને મળતા પીવાના પાણીની સમસ્યા હલ થશે તેમજ ખેતીમાં પણ પાણી પૂરતું મળી રહેશે.

વાંકાનેરના કેરાળા ગામે આવેલ કાચો રસ્તો ફરી શરૂ કરવા બાબતે કેરાળા ગામની આસપાસના ગામોના સ્થાનિકો દ્વારા આત્મવિલોપન નિ ચીમકી આપતા તંત્રમાં દોડધામ મચી ગઈ હતી. છેલ્લા દોઢ વર્ષથી કેરાળા નદીમાંથી પસાર થતો કાચો રસ્તો સ્થાનિક દ્વારા રજૂઆતો કરી બંધ કરાવવામાં આવતા આ રસ્તો શરૂ કરાવવા માટે આસપાસના બાર ગામના લોકો દ્વારા અનેક વખત રજૂઆતો કરવામાં આવી હતી. પોલીસે પાંચે લોકોની અટકાયત કરી હતી.

વાંકાનેરના કેરાળા ગામે મચ્છુ નદીમાંથી પસાર થતા કાચા રસ્તા બાબતે કેરાળાનાં સ્થાનિક કેશુભાઈ દ્વારા રસ્તો બંધ કરાવવા માટે ઉચ્ચ કક્ષાએ રજૂઆતો કરી હતી. ગેરકાયદે શરૂ કરેલા રસ્તાને તંત્ર દ્વારા બંધ કરી દેવામાં આવ્યો હતો. આ રસ્તાનો આસપાસના 12 ગામના લોકો ઉપયોગ કરે છે જેથી રસ્તો બંધ હોવાથી તેમને તકલીફ પડતી હોવાની રજૂઆત કરી મુખ્યમંત્રી અને સ્થાનિક કલેકટરને લેખિત અરજી કરી હતી. જો ત્રણ જાન્યુઆરી સુધીમાં રસ્તો શરૂ નહિ કરવામાં આવે તો આત્મવિલોપન કરવાની ચીમકી આપી હતી. આત્મવિલોપન કરવા માટે આવેલા એન.પી. સોલંકી અને સુરેશ ધોળકિયાને પોલીસે આત્મવિલોપન કરતા અટકાવ્યા હતા સાથે સાથે આત્મવિલોપનની ચીમકી આપનાર અન્ય એન.ડી.પરમાર, લખમણ ધોરીયા અને અમીભાઇ ખોરજીયાની પણ અટકાયત કરવામાં આવી છે.

ઉલ્લેખનીય છે કે નદીમાંથી પસાર થતા રસ્તાનો ગેરકાયદે ખનીજનું પરિવહન કરતા લોકો દ્વારા ઉપયોગ કરવામાં આવે છે, જેને લઈને સ્થાનિક આગેવાન દ્વારા આ ગેરકાયદે રસ્તો બંધ કરાવ્યો હતો.

પાલનપુર શહેરમાં રહેતા અને દાંતા તાલુકાના મોટાસડા ગામમાં ફરજ બજાવતા શિક્ષક છેલ્લા ત્રણ માસથી ગુમ થયા છે. જેની પોલીસ ફરીયાદ નોંધાવવા છતાં હજુ કોઈ ભાળ ન મળતાં પરિવારના સભ્યો દ્વારા રેલી યોજી કલેક્ટરને આવેદનપત્ર આપવામાં આવ્યું હતું. પાલનપુર શહેરના જૂના લક્ષ્મીપુરમાં રહેતા દિનેશભાઈ શંકરભાઈ પટેલ દાંતા તાલુકાના મોટાસડા ગામે શિક્ષક તરીકે ફરજ બજાવતા હતા. જેઓ ત્રણ માસ અગાઉ શાળાએ ગયા બાદ ઘરે પરત ન ફરતા પરિવારે ગૂમ થયાની પોલીસ ફરીયાદ નોંધાવી હતી. પરંતુ આજદિન સુધી ગૂમ થયેલા શિક્ષકની ભાળ મળી નથી. ત્યારે ચિંતાતુર પરિવાર આખરે ભાંગી પડ્યો હતો. દરમિયાન, શિક્ષકના પરિવાર દ્વારા શહેરમાં રેલી યોજી કલેક્ટરને આવેદનપત્ર આપી પરીવારના મોભીને શોધી કાઢવા રજૂઆત કરી હતી.

શિક્ષકના પરિવારજનોએ પોલીસની નિષ્ક્રિયતા સામે પણ ઉભરો ઠાલવ્યો હતો. આ રેલીમાં જોડાયેલા ચિંતાગ્રસ્ત પરિવારની આંખોમાંથી આંસુ સરી પડતા ગમગીની છવાઈ ગઈ છે.

છેલ્લા કેટલાક સમયથી રાજ્યમાં યોજાતા ડાયરામાં રૂપિયાનો વરસાદ થઈ રહ્યો છે. આ રૂપિયાના વરસાદના કારણે અનેક સવાલો પણ ઉઠવા પામ્યા છે, ત્યારે રાજકોટમાં યોજાયેલા એક ડાયરામાં ફરી એકવાર રૂપિયાનો વરસાદ થયો છે અને આશ્ચર્યની વાત એ છે કે, આ રૂપિયાના વરસાદ કરવામાં રાજ્યના મંત્રી જયેશ રાદડિયા પણ પોતાને રોકી નહોતા શક્યા.

રાજકોટના ધોરાજીમાં ભક્ત શ્રી તેજાબાપા અન્નક્ષેત્ર સહાયક મંડળ ટ્રસ્ટ મંડળ અને રાજકોટ ડિસ્ટ્રિક્ટ કો-ઓપરેટીવ બેંક લિ. રાજકોટના સૌજન્યથી ભવ્ય લોક ડાયરાનું આયોજન કરવામાં આવ્યુ હતું. આ કસુંબલ લોક ડાયરામાં ગાયક ગીતા રબારીમાં ઉપર રૂપિયાનો વરસાદ થયો હતો. ગીતા રબારીએ 'ગરવી રે ગુજરાતમાં પટેલ વટ છે.. ગીત ગાતા લોકોએ તાનમાં આવી જઈને રૂપિયાનો વરસાદ કર્યો હતો. આ પ્રસંગે હાજર રહેલ કેબિનેટ મંત્રી જયેશ રાદડિયાએ પણ ઉભા થઈને ગીતા રબારી પર રૂપિયાનો વરસાદ કર્યો હતો.

અત્રે ઉલ્લેખનીય છે કે, અગાઉ પણ કેબિનેટ મંત્રી જયેશ રાદડિયા દ્વારા ડાયરામાં ખુલ્લેઆમ રૂપિયાનો વરસાદ કરવામાં આવ્યો હોવાના સમાચાર આવ્યા હતા ત્યારે ફરી એકવાર તેમના દ્વારા રૂપિયાનો વરસાદ કરાતાં લોકોમાં સવાલ ઉઠ્યો છે કે, કેબિનેટ મંત્રી દ્વારા જે રીતે રૂપિયા ઉછાળવામાં આવે છે તે કેટલું યોગ્ય છે.

આગામી 17 જાન્યુઆરીએ નવી વીએસ હોસ્પિટલનું વડાપ્રધાન નરેન્દ્ર મોદી લોકાર્પણ કરશે. આ હોસ્પિટલમાં કેટલીક આધૂનિક ટેક્નોલોજી છે જે બહુ ઓછી સરકારી હોસ્પિટલમાં જોવા મળે છે, ત્યારે આ ટેક્નોલોજીનો લાભ અમદાવાદીઓને મળશે.

નવી વીએસ હોસ્પિટલને જેને સરદાર વલ્લભભાઈ પટેલ નામ આપવામાં આવ્યું છે, તે 17 તારીખથી લોકોની સારવાર માટે ખૂલ્લી મૂકવામાં આવશે. 18 માળની 78 મીટરની ઊંચાઈ ધરાવતી આ હોસ્પિટલ ચર્ચાનું કેન્દ્ર બની છે, ત્યારે આ હોસ્પિટલમાં કેટલીક આધૂનિક સુવિધાઓ પણ ઉપલબ્ધ કરવામાં આવી છે. આ ઉપરાંત આ હોસ્પિટલની ખાસિયત એ છે કે, દર્દીને લાઈનમાં ઉભા રહેવાની જરૂર નહીં પડે. કીઓસ્કથી ટોકન લઈ શકશે તેમજ બ્લડ સેમ્પલ, દવા, રિપોર્ટ કે અન્ય ડોક્યુમેન્ટ માટે દર્દીએ ધક્કા ખાવાની જરૂર નહિ પડે. પી ટી એસ સિસ્ટમથી 20 સેકેન્ડમાં સેમ્પલ 18 માળ સુધી પહોંચી જવાય એવી લિફ્ટ પણ મૂકવામાં આવી છે. આ ઉપરાંત, હેલિપેડ છે જેથી કોઈ હોનારત કે સામાન્ય સંજોગોમાં પણ દર્દીઓને ઝડપથી હોસ્પિટલમાં લાવી શકાશે.

નવી વીએસ હોસ્પિટલ આધૂનિક અને સુવિધાયુક્ત બનાવી હોવાથી દર્દીઓને ફાયદો થશે તેવો દાવો તંત્ર કરી રહ્યું છે, પણ તે કેટલો સાચો સાબિત થશે તે જોવું રહ્યું. જો દર્દીઓને સ્સ્તા દરે સારી સેવા ન મળે તો તેનો કોઈ અર્થ નથી.