એક પુરુષ એક ગામમાં ફોન કરે છે. અને પછી તે ગામની 3 મહિલાઓ પોતાના માથાના વાળ કઢાવી નાખે છે. કારણ? તેમને કહેવામાં આવ્યું હતું કે, સરકાર તેમને આમ કરવા બદલ 15,000 રૂપિયા આપશે અને તેમને એક ખતરનાક નવા રોગથી પણ બચાવશે. આ જ કારણ છે કે ગામની 3 મહિલાઓએ પોતાના માથાના વાળ કઢાવી નાંખ્યા.

મીડિયા સૂત્રોના અહેવાલ મુજબ, આ ઘટના તમિલનાડુના સલેમ જિલ્લામાં બની હતી. 24 જુલાઈની રાત્રે, પુથુ કોથામપાડી ગામમાં, પલાનિઅમ્મલ નામની એક મહિલાને અત્તુર તાલુકાના તહસીલદારનો ફોન આવ્યો. ફોન કરનારને મહિલાનું નામ અને તેના પરિવારના સભ્યોના નામ ખબર હતા. આનાથી શંકાનો અવકાશ થોડો ઓછો થયો. પછી શરૂ થઈ આ વાર્તા.

ફોન કરનારે દાવો કર્યો હતો કે, કોરોના વાયરસ જેવો જ એક નવો રોગ માથાના વાળ દ્વારા ફેલાઈ રહ્યો છે. વિદેશમાં રહેતા લોકો તેનાથી પોતાને બચાવવા માટે પોતાના માથાના વાળ કઢાવી રહ્યા છે. તમિલનાડુ સરકાર પણ માથું મુંડાવનારી મહિલાઓને 15,000 રૂપિયા આપશે.

આ કથિત યોજનાના ફાયદા અહીં જ સમાપ્ત થતા નથી. એવો દાવો કરવામાં આવ્યો હતો કે, શાળાએ જતી છોકરીઓને 45,000 રૂપિયા અને લેપટોપ મળશે. પુરુષોને 6,000 રૂપિયા મળશે. પરંતુ ઓફરમાં એક ટ્વિસ્ટ હતો, ગામ માટે ફક્ત 18 ટોકન જ ઉપલબ્ધ હતા, અને અધિકારીઓના આગમન પહેલાં જે લોકોએ પોતાના માથાના વાળ કઢાવેલા હશે તેમને જ પૈસા મળશે.

આ કથિત યોજનાની વાત ઝડપથી ગામમાં ફેલાઈ ગઈ. લગભગ 20 લોકોએ પોતાના માથાના વાળ કઢાવવાની તૈયારી શરૂ કરી. 56 વર્ષીય કાવેરી, 58 વર્ષીય રામાયી અને 60 વર્ષીય ચિત્રાએ પોતાના માથાના વાળ કઢાવી પણ નાંખ્યા.

હવે સરકારી અધિકારીઓ આવે અને પૈસા આપે તેની રાહ જોવાઈ રહી હતી. બપોર વીતી ગઈ, પછી સાંજ પણ પડી ગઈ. કોઈ અધિકારી આવ્યો નહીં, કોઈ સરકારી વાહન આવ્યું નહીં, કે ન તો 15,000 રૂપિયા મળ્યા. જ્યારે ફોન કરવામાં આવ્યો, ત્યારે નંબર સ્વિચ ઓફ થઈ ગયો હતો. તમે, સાચું અનુમાન લગાવ્યું, તે એક કૌભાંડનો કોલ હતો. પછી, લોકોને સમજાયું કે આવી કોઈ સરકારી યોજના હતી જ નહીં. આખી યોજના છેતરપિંડી દ્વારા ગોઠવવામાં આવી હતી. હવે પોલીસ તપાસ કરી રહી છે.

પશ્ચિમ બંગાળના બીરભૂમ જિલ્લામાં પોલીસે બુધવારે રાત્રે દરોડા દરમિયાન રૂ. 28.5 કરોડથી વધુ રોકડા અને 15 કિલો સોનું જપ્ત કર્યું. સોનાની કિંમત આશરે રૂ. 21.5 કરોડ હોવાનો અંદાજ છે. એટલે કે કુલ જપ્તી આશરે રૂ. 50 કરોડ હોવાનો અંદાજ છે. નોટોનો ઢગલો એટલો મોટો હતો કે તેને ગણતી વખતે પાંચ ચલણી મશીનો ખરાબ થઈ ગઈ.

પોલીસે આરોપી મીનાર મંડલની ધરપકડ કરી છે. તે અગાઉ રાજ્ય પરિવહન વિભાગ માટે બસ ડ્રાઇવર હતો અને ત્યાર પછી પથ્થરના વેપારમાં જોડાયો હતો. આરોપી ફરાર પથ્થર વેપારી તુલુ મંડલ ઉર્ફે મોહમ્મદ નજીબુદ્દીનનો મેનેજર અને સાળો છે. તુલુ મંડલ એ વ્યક્તિ છે, જેણે 2024માં તેની પુત્રીના ભવ્ય લગ્નમાં આશરે રૂ. 100 કરોડનો ખર્ચ કર્યો હતો.

તુલુ મંડલને ભૂતપૂર્વ TMC નેતા અનુબ્રત મંડલનો નજીકનો માનવામાં આવે છે. અનુબ્રત આ મહિનાની શરૂઆતમાં રૂતબ્રત બેનર્જીના TMC બળવાખોર જૂથમાં જોડાયા હતા. બંગાળના CM સુવેન્દુ અધિકારીએ જણાવ્યું હતું કે, કાયદા અમલીકરણ એજન્સીઓએ પ્રશંસનીય કામ કર્યું છે. તેમણે સોશિયલ મીડિયા પર દરોડાના ફોટા પણ શેર કર્યા હતા.

એક ગુપ્ત માહિતીના આધારે, પોલીસે બુધવારે રાત્રે મીનાર મંડલના ઘરે દરોડો પાડ્યો હતો. શરૂઆતમાં, રૂ. 20 કરોડ રોકડા મળી આવ્યા હતા. આખી રાતની ગણતરી પછી, રિકવર થયેલી રકમ વધીને રૂ. 28.5 કરોડ થઈ ગઈ. રોકડા રૂપિયાને લોખંડની પેટીમાં પેક કરવામાં આવ્યા હતા અને મોહમ્મદ બજાર પોલીસ સ્ટેશનમાં લઈ જવામાં આવ્યા હતા, જ્યાં તેને બેંકમાં જમા કરવામાં આવશે.

પોલીસે ઘરમાંથી 1 કિલો વજનના 14 સોનાના બાર અને 100 ગ્રામ વજનના 10 સોનાના બિસ્કિટ પણ જપ્ત કર્યા હતા. તેમની કુલ બજાર કિંમત આશરે રૂ. 21.5 કરોડ હોવાનો અંદાજ છે. ધરપકડ પછી, મીનાર મંડલે પૂછપરછ દરમિયાન પોલીસને જણાવ્યું હતું કે રોકડ અને સોનું તુલુ મંડલનું છે.

તપાસ એજન્સીઓ હવે એ નક્કી કરવાનો પ્રયાસ કરી રહી છે કે, કરોડો રૂપિયાની રોકડ અને સોનું ક્યાંથી આવ્યું અને તેમાં કોણ કોણ સામેલ છે.

પોલીસને શંકા છે કે જપ્ત કરાયેલી રોકડનો મોટો હિસ્સો પથ્થર વેપારીઓ પાસેથી એકત્રિત કરાયેલ સરકારી આવક છે, જે સરકારી તિજોરીમાં જમા કરાવવાને બદલે ઉચાપત કરવામાં આવી હતી. હકીકતમાં, 2016-17ની આસપાસ, તુલુ મંડલ બીરભૂમની પથ્થર ખાણોમાં DCR (જિલ્લા સંગ્રહ દર) વસૂલવા માટે જવાબદાર હતા.

DCRએ પથ્થર ખાણકામ પરનો સરકારી કર છે, જેની વસૂલી માટે સરકારે એક ખાનગી કંપનીને કામ સોંપ્યું હતું. આ વસૂલીમાં કરોડો રૂપિયાની ગેરરીતિઓ થઈ હોવાનો આરોપ છે. BJPનો દાવો છે કે, સરકાર હવે આમાંથી દર મહિને આશરે રૂ. 83 કરોડની આવક મેળવે છે, જે પહેલા ફક્ત રૂ. 20-30 લાખ જ હતી.

તુલુ મંડલ પહેલા પણ તપાસ એજન્સીઓના રડાર પર હતો. કરોડો રૂપિયાના પશુ દાણચોરીના કેસમાં CBI તપાસમાં તેમનું નામ સામે આવ્યું હતું. ઓગસ્ટ 2022માં, CBIએ મોહમ્મદ બજાર વિસ્તારમાં તેમના ઘર, ઓફિસ અને વેરહાઉસ પર દરોડા પાડ્યા હતા. ત્યારપછી, નવેમ્બર 2022માં, એન્ફોર્સમેન્ટ ડિરેક્ટોરેટ (ED)એ તેને પૂછપરછ માટે દિલ્હી બોલાવ્યો હતો. જોકે, આ આરોપો પર હજુ સુધી કોઈ અંતિમ ન્યાયિક નિર્ણય લેવામાં આવ્યો નથી.

વેસ્ટ ઇન્ડીઝ ક્રિકેટ ટીમે પહેલી ટેસ્ટમાં પાકિસ્તાનને 90 રનથી કારમી હાર આપી હતી. ત્રિનિદાદના બ્રાયન લારા સ્ટેડિયમમાં રમાયેલી મેચમાં પાકિસ્તાનને 211 રનનો લક્ષ્યાંક આપવામાં આવ્યો હતો, પરંતુ બાબર આઝમની ટીમ માત્ર 120 રનમાં જ સમેટાઈ ગઈ હતી. વેસ્ટ ઇન્ડીઝે બે મેચની ટેસ્ટ શ્રેણીમાં 1-0થી લીડ મેળવી લીધી છે.

આ મેચમાં એક રસપ્રદ દ્રશ્ય જોવા મળ્યું, જ્યારે વેસ્ટ ઇન્ડીઝના એક ફિલ્ડરે જાણી જોઈને બાબર આઝમે ફટકારેલા શોટને બાઉન્ડરીની બહાર જવા દીધો હતો. આ ક્લિપ સોશિયલ મીડિયા પર વાયરલ થઈ રહી છે, અને ચાહકો આ પ્રયાસ પર સવાલ ઉઠાવી રહ્યા છે. લોકો પૂછી રહ્યા છે કે વેસ્ટ ઇન્ડીઝના ખેલાડી જેડન સીલ્સે આવું કેમ કર્યું?

આ મજાની ઘટના પાકિસ્તાનની બીજી ઇનિંગની 31મી ઓવરમાં બની હતી. પાકિસ્તાનની 9 વિકેટ પડી ગઈ હતી, અને બાબર આઝમને સાથ આપવા વાળો કોઈ બેટ્સમેન ન હતો. બીજા છેડે નંબર 11નો બેટ્સમેન મોહમ્મદ અબ્બાસ હતો. શમર જોસેફ દ્વારા ફેંકાયેલા છેલ્લા બોલ પર, બાબર આઝમે લેગ સાઈડ તરફ શોટ રમ્યો. તેનો ઈરાદો સિંગલ લેવાનો હતો, જેથી તે આગલી ઓવરમાં સ્ટ્રાઈક લઈ શકે. જોકે, જેડન સીલ્સે બાબરની યોજનાને નિષ્ફળ બનાવી દીધી. તે પહેલેથી જ બોલની નજીક પહોંચી ગયો હતો અને સરળતાથી તેને પકડી શકતો હતો, પરંતુ તેણે જાણી જોઈને બોલને બાઉન્ડરીની બહાર જવા દીધો. તે ઇચ્છતો હતો કે મોહમ્મદ અબ્બાસ આગલી ઓવરમાં સ્ટ્રાઈક પર હોય.

https://twitter.com/nibraz88cricket/status/2082342448764961056

ચાહકો સોશિયલ મીડિયા પર પ્રશ્નો ઉઠાવી રહ્યા છે. પાકિસ્તાની ચાહકો સૌથી વધુ હોબાળો મચાવી રહ્યા છે. તેઓ કહે છે કે જેડન સીલ્સે આ જાણી જોઈને કર્યું અને રમતની ભાવનાનું ઉલ્લંઘન કર્યું. કેટલાક ચાહકો તેની સામે દંડની માંગ પણ કરી રહ્યા છે. જોકે, આવું થવાની શક્યતા ઓછી છે. જેડન સીલ્સે જે કર્યું તેને ક્રિકેટની દ્રષ્ટિએ ટેક્નિકલ ચાલાકી કહેવાય છે. ICCના નિયમો અનુસાર, જો તેણે એવું વર્તન કર્યું હોત કે તે બોલને હાથમાં પકડ્યા વિના ફેંકવાની એકશન કરી હોતે તો તેને દંડ ફટકારવામાં આવ્યો હોત, પરંતુ તેણે બોલને જાણી જોઈને બાઉન્ડરીની બહાર ફોર માટે જવા દીધો. આ દ્રશ્યે ભારતીય ચાહકોને ફિલ્મ 'લગાન'ની યાદ અપાવી. અંગ્રેજ કેપ્ટને ભુવન (આમિર ખાન) સાથે પણ આવું જ કર્યું.

બીજી ઇનિંગમાં, બાબર આઝમે એકલા હાથે વેસ્ટ ઇન્ડીઝના બોલરોનો સામનો કર્યો, અણનમ 58 રન બનાવ્યા. જોકે, તેને કોઈ બેટ્સમેનનો સાથ મળ્યો નહીં, અને પાકિસ્તાન 90 રનથી મેચ હારી ગયું. હવે, બીજી ટેસ્ટમાં, બાબર અને કંપની શ્રેણી બરાબરી કરવાનું લક્ષ્ય રાખીને મેદાન પર આવશે.

પેપર લીક વિરોધી બિલ, 'જાહેર પરીક્ષાઓ (અન્યાયી માધ્યમો નિવારણ) સુધારા બિલ, 2026' પર આજે (29 જુલાઈ) બીજા દિવસે લોકસભામાં ચર્ચા થઈ રહી છે. ચર્ચા દરમિયાન બુધવારે, વિપક્ષના નેતા રાહુલ ગાંધીએ કેન્દ્રીય ગૃહમંત્રી અમિત શાહ પર ગંભીર આરોપો લગાવ્યા, જેના કારણે શાસક પક્ષે જોરદાર વિરોધ કર્યો અને માફીની માંગણી કરી. આનાથી ગૃહના બંને પક્ષોએ હોબાળો મચાવ્યો. પરિણામે, ગૃહ સ્થગિત કરવામાં આવ્યું. આ પહેલા ચર્ચા દરમિયાન, રાહુલ ગાંધીના ભાષણમાં કથિત રીતે બિનસંસદીય ભાષાના ઉપયોગને લઈને શાસક પક્ષ અને વિપક્ષ વચ્ચે ઉગ્ર બોલાચાલી થઈ, જેના કારણે ગૃહમાં મોટો હોબાળો થયો.

હકીકતમાં, પેપર લીક મુદ્દા પર ચર્ચા દરમિયાન, રાહુલ ગાંધીએ કહ્યું કે તેમણે હાલમાં જ 18 વર્ષના એક વિદ્યાર્થી સાથે વાત કરી હતી. તે વિદ્યાર્થીનો ઉલ્લેખ કરીને તેમણે કહ્યું કે તેમના મતે, દેશમાં 3 પ્રકારના લોકો છે, પ્રથમ, વિદ્યાર્થીઓ, બીજું, જે લોકો બિનસંસદીય ભાષાનો ઉપયોગ કરે છે, અને ત્રીજું, જે લોકો તેમનું પાલન કરે છે તે અંધભક્ત. ત્યારે તરત જ રાહુલ ગાંધી દ્વારા આવા અસંસદીય શબ્દો બોલવા બદલ સંસદીય બાબતોના મંત્રી કિરેન રિજિજુએ દરમિયાનગીરી કરી, અને કહ્યું કે વિપક્ષના નેતા અથવા ગૃહના કોઈપણ સભ્યએ ગૃહમાં આવા બિનસંસદીય શબ્દોનો ઉપયોગ ન કરવો જોઈએ. તેમણે સ્પીકરને આ બાબતની નોંધ લેવાની અને કાર્યવાહીમાંથી આ શબ્દને દૂર કરવાની માંગ કરી.

આનાથી શાસક પક્ષ અને વિપક્ષના સભ્યો વચ્ચે ઉગ્ર બોલચાલ શરૂ થઈ. બંને પક્ષે હંગામો શરુ થઇ ગયો. બંને પક્ષના સભ્યો તેમની બેઠકો પરથી ઉભા થઈને બોલવા લાગ્યા, જેના કારણે ગૃહમાં ઘોંઘાટ અને અરાજકતાભરી પરિસ્થિતિ સર્જાઈ. રિજિજુએ કહ્યું કે રાહુલ ગાંધીએ બિનસંસદીય શબ્દોનો ઉપયોગ ન કરવો જોઈતો હતો. તેમણે કહ્યું કે, રાહુલ ગાંધી બાળકનું નામ નથી કહેતા, પરંતુ તેમણે જે શબ્દનો ઉપયોગ કર્યો હતો તે દૂર કરવો જોઈએ. તેમણે દલીલ કરી કે આ એક અયોગ્ય શબ્દ છે અને નિયમો અનુસાર તેનો ઉપયોગ કરી શકાતો નથી. તેમણે એમ પણ કહ્યું કે, નિયમપુસ્તકમાં આ શબ્દનો ઉપયોગ બિનસંસદીય તરીકે પણ સૂચિબદ્ધ છે. તેમણે કહ્યું કે તેમણે 'અસંસદીય' શબ્દ બનાવ્યો નથી, પરંતુ તે નિયમપુસ્તકમાં છે. આમ છતાં, રાહુલ ગાંધી સતત આવા ખોટા શબ્દો વાપરવાનું ચાલુ રાખ્યું.

કિરેન રિજિજુએ કહ્યું, 'હું તમને વારંવાર વિનંતી કરું છું કે તે શબ્દનો ઉપયોગ ન કરો. અમે તમારી વાત સાંભળવા માટે અહીં છીએ. અમારા પક્ષના લોકો બિનસંસદીય શબ્દોના ઉપયોગથી ઉશ્કેરાઈ ગયા છે, તેથી હું વિપક્ષના નેતાને વિનંતી કરું છું કે તેઓ બિનસંસદીય શબ્દોનો ઉપયોગ ન કરે.' હોબાળો વધતાં, સ્પીકર ઓમ બિરલાએ રાહુલ ગાંધીને કહ્યું કે, તેઓ વિપક્ષના નેતા છે, અને તે પદ ગૌરવ ધરાવે છે. તેમણે કહ્યું કે રાહુલ ગાંધીએ આ પદના ગૌરવનું ધ્યાન રાખીને શબ્દોનો ઉપયોગ કરવો જોઈએ અને બિનસંસદીય શબ્દોનો ઉપયોગ કરવાનું ટાળવું જોઈએ. તેમણે કહ્યું કે, તેઓ ગૃહની કાર્યવાહીમાંથી આવા અસંસદીય શબ્દ દૂર કરશે. બિરલાએ કહ્યું કે, વિપક્ષના નેતાએ ફક્ત બિલ પર જ બોલવું જોઈએ. ત્યાર પછી, લોકસભા સચિવાલયે જાહેરાત કરી કે, ગૃહની કાર્યવાહીમાંથી બિનસંસદીય શબ્દને દૂર કરવામાં આવ્યો છે.

અહીં તમને જણાવી દઈએ કે, આના એક દિવસ પહેલા, મંગળવારે, રાહુલ ગાંધીની બહેન અને વાયનાડના સાંસદ પ્રિયંકા ગાંધીના ભાષણમાંથી પણ એક વાક્ય કાઢી નાખવામાં આવ્યું હતું. તેમણે નવા શિક્ષણ પ્રધાન પર બળાત્કારીઓની મુક્તિને સમર્થન આપવાનો આરોપ લગાવ્યો હતો. મંગળવારે પણ, પ્રિયંકાના આરોપ પર શાસક પક્ષે લોકસભામાં હોબાળો મચાવ્યો હતો. હોબાળા પછી, સ્પીકરે ગૃહની કાર્યવાહીમાંથી તેમનું નિવેદન કાઢી નાખ્યું. બે દિવસમાં આ બીજી વખત છે જ્યારે ભાઈ-બહેનની જોડી (રાહુલ અને પ્રિયંકા)ના નિવેદનો કાઢી નાખવામાં આવ્યા છે. એવી ચર્ચા છે કે રાહુલ ગાંધીનો અમિત શાહ પરનો આરોપ, કે તેમણે વિદ્યાર્થીઓના વિરોધ પ્રદર્શન દરમિયાન ગોળીબાર કરવાનો આદેશ આપ્યો હતો, તે પણ કાઢી નાખવામાં આવી શકે છે.

મધ્યપ્રદેશના ખરગોન જિલ્લામાં 2022માં રામ નવમી શોભાયાત્રા દરમિયાન હિંસા ફાટી નીકળી હતી. સેશન્સ કોર્ટે 27 જુલાઈ, 2026ના રોજ આ કેસમાં ચુકાદો આપ્યો હતો. કોર્ટે 11 આરોપીઓને નિર્દોષ જાહેર કર્યા હતા. 11માંથી 8 સાક્ષીઓ હિંસામાં સંડોવાયેલા કોઈપણ આરોપીને ઓળખી શક્યા ન હતા. આ ઉપરાંત, લેબોરેટરી રિપોર્ટમાં પણ પેટ્રોલ બોમ્બ અથવા કોઈપણ વિસ્ફોટકના કથિત ઉપયોગના પુરાવા સાબિત થઇ શક્યા ન હતા.

એક લીગલ વેબસાઇટમાં પ્રકાશિત થયેલા અહેવાલ મુજબ, ખરગોન (મંડલેશ્વર)ના ચોથા વધારાના સેશન્સ જજ મુકેશ નાથે જણાવ્યું હતું કે, ફરિયાદ પક્ષ વાજબી શંકાથી આગળ આરોપીઓનો ગુનો સાબિત કરવામાં નિષ્ફળ ગયો છે. કોર્ટે એ પણ નોંધ્યું હતું કે આ કેસમાં આરોપીઓને 462થી 827 દિવસ સુધીની લાંબી કેદની સજાનો સામનો કરવો પડ્યો હતો. કોર્ટે આરોપીઓને શંકાનો લાભ આપ્યો અને તેમને નિર્દોષ જાહેર કર્યા.

ફરિયાદ પક્ષે દાવો કર્યો હતો કે, 10 એપ્રિલ, 2022ના રોજ, પથ્થરો, તલવારો અને પેટ્રોલ બોમ્બથી સજ્જ ટોળાએ સાંજે 6 વાગ્યાથી રાત્રે 9 વાગ્યા સુધી ખરગોનના ભટવાડી વિસ્તારમાં હિંસા કરી હતી. તેમણે ફરિયાદીઓના ઘરો, વાહનો અને સામાનમાં આગ લગાવી અને તોડફોડ કરી હતી.

ખરગોન હિંસામાં ઇદ્રીસ ખાન નામના એક વ્યક્તિનું મોત થયું હતું. પોલીસે 11 લોકો, ઇબાદત, સાદિક, અબ્દુલ્લા, સાહેબ ઉર્ફે શાહિબ, શેરયાર, ફૈઝલ, આઝમ, શબ્બીર, ઇમરાન, મુસ્તાક અને રઝીક પર રમખાણો, આગચંપી, અતિક્રમણ અને વિસ્ફોટક કાયદા હેઠળ આરોપ મૂક્યા હતા.

https://twitter.com/drnarottammisra/status/1513396634046328834

હિંસાના બીજા દિવસે, વહીવટીતંત્રે બુલડોઝર વડે ઘણા ઘરો તોડી પાડ્યા હતા, અને દાવો કર્યો હતો કે આ ઘર હિંસાના ગુનેગારોના છે. મધ્યપ્રદેશના તત્કાલીન ગૃહમંત્રી નરોત્તમ મિશ્રાએ ચેતવણી આપી હતી કે, જે ઘરમાંથી પથ્થરો આવ્યા હતા તેને પથ્થરોના ઢગલામાં ફેરવી દેવામાં આવશે. મીડિયા સૂત્રો સાથે વાત કરતા, નરોત્તમ મિશ્રાએ જણાવ્યું હતું કે, ઘરો અને દુકાનોનું તોડી પાડવાનું કામ અતિક્રમણને કારણે થયું હતું અને તે કાયદાકીય માળખામાં કરવામાં આવી રહ્યું હતું.

અહેવાલ મુજબ, 13માંથી 8 સાક્ષીઓ કોર્ટમાં આરોપીને ઓળખવામાં નિષ્ફળ ગયા. કોર્ટે નોંધ્યું હતું કે, ફરિયાદ પક્ષની દલીલો ઘટનાના 51 દિવસ પછી નોંધાયેલા માત્ર એક સાક્ષીની જુબાની પર આધારિત હતી. આ માટે કોઈ સ્પષ્ટતા આપવામાં આવી ન હતી.

આ ઉપરાંત, આ સાક્ષીનું નામ FIR કે મૂળ ફરિયાદમાં નહોતું. કોર્ટે એ પણ નોંધ્યું હતું કે આરોપીને ઓળખવા માટે કોઈ પરેડ યોજાઈ ન હતી. લેબોરેટરી રિપોર્ટમાં પેટ્રોલ બોમ્બની અંદર કોઈ પેટ્રોલિયમ ઉત્પાદનો ઉપયોગ કરવામાં આવ્યો હતો તેવું સાબિત થયું ન હતું.

એક વ્યક્તિએ આ ઘટના અંગે રિટ અરજી દાખલ કરી હતી. તેમણે આરોપ લગાવ્યો હતો કે રાજ્ય સરકારે મુસ્લિમ સમુદાય સાથે જોડાયેલા હોવાના બદલામાં તેમની મિલકત તોડી પાડી હતી. આ અરજી હાલમાં હાઈકોર્ટમાં પેન્ડિંગ છે.

હોન્ડાએ ભારતમાં તેની નવી SUV લોન્ચ કરી છે. આમ તો, કંપનીએ પહેલા જ આ SUVનો ખુલાસો કરી દીધો હતો. હવે કંપનીએ તેની કિંમતો જાહેર કરી છે. અમે Honda ZR-V વિશે વાત કરી રહ્યા છીએ, જેણે CBU યુનિટ તરીકે ભારતમાં પ્રવેશ કર્યો છે.

આ SUV ભારતમાં કંપનીની ફ્લેગશિપ કાર છે. કંપનીએ રૂ. 48 લાખ એક્સ-શોરૂમની પ્રારંભિક કિંમતે Honda ZR-V લોન્ચ કરી છે. આ કાર માત્ર એક વેરિઅન્ટમાં આવશે અને તે સંપૂર્ણ લોડ હશે. આ કારનો સીધો મુકાબલો સ્કોડા કોડિયાક, ફોક્સવેગન ટેરોન અને ટિગુઆન સાથે થશે.

Honda ZR-V ભારતમાં મજબૂત હાઇબ્રિડ પેટ્રોલ એન્જિન સાથે આવે છે. તેમાં 2.0 લિટર ફોર સિલિન્ડર ડાયરેક્ટ ઈન્જેક્શન પેટ્રોલ એન્જિન છે. આ એન્જિન અને બેટરી સેટઅપ મળીને 184 HP પાવર અને 315 Nm ટોર્ક જનરેટ કરે છે. કાર ફ્રન્ટ વ્હીલ ડ્રાઇવ સાથે આવે છે અને તેમાં e-CVT ગિયરબોક્સ મળે છે.

હોન્ડા કંપનીનું કહેવું છે કે, આ કાર 7.9 સેકન્ડમાં 0 થી 100 કિલોમીટર પ્રતિ કલાકની ઝડપ પકડી લે છે. કારની ટોપ સ્પીડ ઇલેક્ટ્રિકલી 171 કિલોમીટર પ્રતિ કલાક છે. આ કાર 22.8 કિલોમીટર પ્રતિ લીટરની માઈલેજ આપે છે.

કારમાં ફ્રન્ટ એન્ડ સ્લિમ LED હેડલેમ્પ્સ છે, જે L-આકારના DRL સાથે આવે છે. આ કારની લંબાઈ 4,567 mm, પહોળાઈ 1,840 mm, ઉંચાઈ 1,621 mm અને વ્હીલબેસ 2,655 mm છે. કારમાં 18 ઇંચના ડ્યુઅલ ટોન એલોય વ્હીલ્સ ઉપલબ્ધ છે.

Honda ZR-Vમાં ક્લિયર-લેન્સ ટેલ લેમ્પ ઉપલબ્ધ છે. તેમાં રૂફ માઉન્ટેડ સ્પોઈલર આપવામાં આવ્યું છે. કારમાં ડ્યુઅલ એક્ઝોસ્ટ ટિપ છે, જે સિલ્વર રંગની ફિનિશ સાથે આવે છે. આ કાર 4 કલર વિકલ્પોમાં આવે છે, ટ્વિલાઇટ મિસ્ટ બ્લેક પર્લ, ક્રિસ્ટલ બ્લેક પર્લ, મેટિયોરૉઇડ ગ્રે મેટાલિક અને પ્લેટિનમ વ્હાઇટ પર્લ.

કારમાં 9 ઈંચની ટચસ્ક્રીન ઈન્ફોટેનમેન્ટ સિસ્ટમ આપવામાં આવી છે. આ સિવાય 10 ઈંચનું ડિજિટલ ઈન્સ્ટ્રુમેન્ટ ક્લસ્ટર, ડ્યુઅલ ઝોન ક્લાઈમેટ કંટ્રોલ, 12 સ્પીકર બોસ સાઉન્ડ સિસ્ટમ ઉપલબ્ધ છે. આ કારમાં વાયરલેસ ફોન ચાર્જિંગ, ઈલેક્ટ્રિક ટેલગેટ, ફ્રન્ટ અને રિયર એમ્બિયન્ટ લાઈટ્સ, ઈન્ટીગ્રેટેડ વોશર્સ સાથેના વાઈપર્સ, 8 એરબેગ્સ અને ADAS જેવી સુવિધાઓ આપવામાં આવી છે.

તમે કદાચ એક કે બે કરોડના વૈભવી ફ્લેટ વિશે ઘણું સાંભળ્યું હશે. આજકાલ, 500 કરોડની આસપાસના ફ્લેટ વિશે ચર્ચા ચાલી રહી છે. 500 કરોડના ફ્લેટની કિંમત જોઈને, દરેકને આશ્ચર્ય થાય છે કે તેની અંદર એવું તે શું હશે. પરંતુ આ ફ્લેટ ભારતમાં નહીં, પરંતુ ન્યુ યોર્ક શહેરમાં વેચાઈ રહ્યો છે. જોકે, ત્યાંના રહેવાસીઓ પણ તેના આટલા વધુ ભાવથી આશ્ચર્યચકિત છે. અહીં તમને બતાવી દઈએ કે, ન્યુ યોર્કમાં ફ્લેટિરન બિલ્ડિંગમાં ઘણા વૈભવી ફ્લેટ બનાવવામાં આવ્યા છે, જેમાં એક એપાર્ટમેન્ટની કિંમત 58.5 મિલિયન ડૉલર અથવા ભારતીય રૂપિયામાં જોઈએ તો તે 500 કરોડ રૂપિયા સુધીનો છે.

ફ્લેટિરન બિલ્ડિંગ એક વિશિષ્ટ ત્રિકોણાકાર આકાર ધરાવે છે અને તે એકદમ ડિઝાઇનર છે. તે કંઈ આજથી જ નહીં, પરંતુ ઘણા વર્ષોથી ન્યુ યોર્ક શહેરના સૌથી પ્રખ્યાત સીમાચિહ્નોમાંનું એક છે અને તે પ્રવાસીઓનું મુખ્ય આકર્ષણ બની રહ્યું છે. છેલ્લા 7 વર્ષથી ફ્લેટિરન બિલ્ડિંગમાં નવીનીકરણનું કામ ચાલી રહ્યું છે. આ પ્રખ્યાત ઇમારતમાં પહેલા ઓફિસો હતી અને હવે તેમાં અતિ-લક્ઝરી એપાર્ટમેન્ટ્સ બનાવવામાં આવ્યા છે. ન્યૂ યોર્કના આ પ્રખ્યાત પર્યટન સ્થળને ત્યારથી રહેણાંક ઇમારતમાં પરિવર્તિત કરવામાં આવ્યું છે.

આ એપાર્ટમેન્ટ્સની કિંમતમાં સૌથી વધારે પૈસા તેના લોકેશનમાં છે. સમગ્ર ફ્લેટિરન બિલ્ડિંગમાં 36 ઓપન-કન્સેપ્ટ એપાર્ટમેન્ટ્સ હશે, કેટલાક અડધા માળના અને કેટલાક સંપૂર્ણ માળના. મીડિયા સૂત્રોના અહેવાલ મુજબ, 3 બેડરૂમના યુનિટ માટે કિંમતો 11 મિલિયન ડૉલરથી લઈને બાલ્કનીવાળા ફુલ-ફ્લોર 5 બેડરૂમના યુનિટ માટે 58.5 મિલિયન ડૉલર સુધીની છે. ઇમારતના બેઝમેન્ટ અને કોમન એરિયામાં 60 ફૂટનો સ્વિમિંગ પૂલ, બિલિયર્ડ્સ રૂમ, વેલનેસ સેન્ટર અને પિયાનો લાઉન્જ જેવી સુવિધાઓ પણ હશે.

https://twitter.com/nyclovesnyc/status/2051648747063439565

આ મોંઘા એપાર્ટમેન્ટ્સ હવે સોશિયલ મીડિયા પર ઘણી વધારે ચર્ચા જગાવી રહ્યા છે. ઘણા વપરાશકર્તાઓ આશ્ચર્યચકિત થાય છે કે, આટલો મોંઘો એપાર્ટમેન્ટ કોણ ખરીદવા માંગશે, જ્યારે અન્ય લોકોના મનમાં સવાલ ઉભો થાય છે કે, આમાં રૂ. 500 કરોડની કિંમત શું.

આટલા વર્ષો પછી લોકો ઇમારતમાં લાઇટિંગ જોઈને ઉત્સાહિત છે. જ્યારે, ઘણા વર્ષોથી બંધ હોવાને કારણે, મુલાકાત લેનારા મોટી સંખ્યામાં પ્રવાસીઓ તેના સુંદર બ્યુક્સ-આર્ટ્સ-શૈલીના બાહ્ય ભાગને જોઈ શક્યા ન હતા. માલિકોનું કહેવું છે કે, નવા રહેવાસીઓ આગામી મહિનાઓથી રહેવા પણ આવી જશે. બધા એકમો અને સુવિધાઓ 2027ની શરૂઆતમાં બનીને તૈયાર થઈ જશે.

મીડિયા સૂત્રોના અહેવાલ મુજબ, ન્યુ યોર્ક શહેરમાં ફક્ત 21 મિલકતો વેચાણ માટે જાહેરમાં ઉપલબ્ધ છે જે આનાથી પણ વધુ મોંઘી છે. આ તો, 120 વર્ષથી વધુ સમયથી આ ઇમારત સ્થાપત્ય શ્રેષ્ઠતા અને એન્જિનિયરિંગ કૌશલ્યનું પ્રતીક રહી છે. 1902માં બનેલી, તે એક સ્થાપત્ય અજાયબી હતી, જેમાં સ્ટીલ-ફ્રેમ બાંધકામ તકનીકનો ઉપયોગ કરવામાં આવ્યો હતો, જેના કારણે તે શહેરના પ્રથમ ગગનચુંબી ઇમારતોમાંનું એક બની ગયું હતું.

ભારતીય ટીમનો ઝિમ્બાબ્વે પ્રવાસ પૂરો થયો છે. ટીમ ઈન્ડિયા 3-0થી જીતી ગઈ છે. હવે, શ્રીલંકા પ્રવાસની તૈયારીઓ ચાલી રહી છે, જેના માટે ભારતીય ક્રિકેટ કંટ્રોલ બોર્ડ (BCCI)એ ભારતીય ટીમની જાહેરાત કરી છે. 33 વર્ષીય સારાંશ જૈનની ટીમમાં પસંદગી કરવામાં આવી છે. ઘણા ક્રિકેટ ચાહકો માટે આ નામ અજાણ્યું હશે, કારણ કે આ ઓલરાઉન્ડર IPL દ્વારા નહીં પરંતુ ઘરેલુ ક્રિકેટ દ્વારા ટીમ ઈન્ડિયામાં આવ્યો હતો. તો ચાલો તમને જણાવી દઈએ કે તે કોણ છે.

સારાંશ જૈનને વોશિંગ્ટન સુંદરના સ્થાને ભારતીય ક્રિકેટ ટીમમાં સામેલ કરવામાં આવ્યો છે. એક એવા સમયે કે જ્યારે 15થી 20 વર્ષની ઉંમરના યુવાનો ટીમ ઈન્ડિયામાં ડેબ્યૂ કરી રહ્યા છે, ત્યારે સારાંશે 33 વર્ષની ઉંમરે ટીમ ઈન્ડિયામાં સ્થાન મેળવ્યું છે. IPL અને લાઇમલાઇટ વિના ટીમ ઈન્ડિયામાં સ્થાન મેળવવામાં તેને વર્ષો લાગ્યા. ભારતીય ટીમમાં ઈજાની ચિંતાઓ તેના માટે નસીબદાર બ્રેક સાબિત થઈ. નીતીશ કુમાર રેડ્ડી પણ ઈજાને કારણે બહાર છે, જેના કારણે સારાંશ માટે ટીમમાં આવવાનો રસ્તો સાફ થઇ ગયો.

સારાંશ જૈન સ્થાનિક સ્તરે મધ્યપ્રદેશ માટે રમે છે. ટીમ ઈન્ડિયા હંમેશા એક એવા ઓફ સ્પિનરની શોધમાં રહી છે જે નીચેના ક્રમમાં આવીને બેટિંગ પણ કરી શકે. સારાંશ જૈન એક સંપૂર્ણ વિકલ્પ સાબિત થયો. તે બોલને બંને રીતે સ્વિંગ કરે છે અને સારી રીતે બેટિંગ કરે છે. સારાંશનો જન્મ 31 માર્ચ, 1993ના રોજ મધ્યપ્રદેશના ઇન્દોરમાં થયો હતો. ઘરેલુ ક્રિકેટમાં, તે બેટ અને બોલ બંનેથી વિરોધી ટીમો માટે એક દુઃસ્વપ્ન રહ્યો છે. સારાંશે 2025-26 અને 2024-25 સીઝનમાં શાનદાર પ્રદર્શન કર્યું હતું. ગયા સીઝનમાં, તેણે 7 મેચમાં 2.64ના પ્રભાવશાળી ઇકોનોમી રેટથી 30 વિકેટ લીધી હતી. જ્યારે તે પહેલાં, તેણે 8 મેચમાં 35 વિકેટ લીધી હતી. હવે જોવાનું એ રહ્યું કે તે ડેબ્યૂ કરે છે કે નહીં. ભારત અને શ્રીલંકા વચ્ચેની ટેસ્ટ શ્રેણી 15 ઓગસ્ટથી શરૂ થઈ રહી છે.

શ્રીલંકાનો પ્રવાસ તેના માટે સુવર્ણ તક હશે. તેને શ્રીલંકાની પીચો પર ઘણો સારો અનુભવ છે. તેણે તાજેતરમાં જ ઈન્ડિયા-A સાથે શ્રીલંકાનો પ્રવાસ કર્યો હતો. તેણે શ્રીલંકા-A સામે 70 રન બનાવ્યા હતા અને 6 વિકેટ પણ લીધી હતી. 54 ફર્સ્ટ-ક્લાસ મેચોમાં, તેણે 85 ઇનિંગ્સમાં 31.76ની સરેરાશથી 2,223 રન બનાવ્યા છે, જેમાં 2 સદી અને 14 અડધી સદીનો સમાવેશ થાય છે. બોલિંગમાં, તેણે 27.31ની સરેરાશથી 188 વિકેટ લીધી છે.

ટીમ ઇન્ડિયાએ ઝિમ્બાબ્વે સામે T20 શ્રેણી 3-0 થી જીતી લીધી છે, પરંતુ હારનો મુદ્દો હજુ પણ વણઉકેલાયેલો છે. વિદેશમાં ભારતીય બેટ્સમેનોની સતત નિષ્ફળતા અંગે ચર્ચા ચાલુ છે. ઘણા ક્રિકેટ પંડિતોએ IPLને તેના માટે દોષી ઠેરવ્યું, જ્યારે અન્ય લોકોએ ભારતીય બેટ્સમેનોની ફ્લેટ પિચની આદતને જવાબદાર ગણાવી. જોકે, ગાવસ્કરે તેનાથી એક અલગ જ કારણ આપ્યું. હવે, ભારતીય દિગ્ગજ સુનીલ ગાવસ્કરે આ પાછળનું કારણ પણ જણાવ્યું છે, અને તે સમસ્યાનો ઉકેલ પણ બતાવ્યો છે.

ટીમ ઇન્ડિયા આયર્લેન્ડ અને ઇંગ્લેન્ડના પ્રવાસોમાં એક પણ T20 શ્રેણી જીતી શકી નહીં. ટીમ ઇન્ડિયાના IPL સિંહો વિદેશી પિચો પર પુરી રીતે નબળા સાબિત થયા હતા. પરિસ્થિતિ એટલી ખરાબ હતી કે ટીમ ઇન્ડિયાને આયર્લેન્ડ સામે પણ કારમી હારનો સામનો કરવો પડ્યો. ગાવસ્કરે BCCIને વિદેશી પીચો પર બેટિંગ સુધારવા માટે મહત્વપૂર્ણ સલાહ આપી હતી, જે ODI વર્લ્ડ કપ 2027માં ટીમ ઈન્ડિયા માટે ઉપયોગી થઈ શકે છે.

ગાવસ્કરે એક અંગ્રેજી અખબારમાં છપાતા પોતાના લેખમાં લખ્યું હતું કે, 'લોકો વાત કરી રહ્યા છે કે, કેવી રીતે ભારતીય બેટ્સમેન IPLમાં ફ્લેટ પીચો અને ટૂંકી બાઉન્ડ્રી પર કોઈની પણ બોલિંગ પર જોરદાર રમતા હોય છે, અને પછી તેઓની પોલ ઈંગ્લેન્ડમાં અજાણી પરિસ્થિતિઓમાં ખુલ્લી પડી જાય છે. સત્ય એ છે કે ભારતમાં પીચો સપાટ હતી, તે ઠીક છે, પરંતુ ખૂબ જ ટૂંકી બાઉન્ડ્રી બેટ્સમેનોને ફાયદો કરાવે છે, જેના ખરાબ રીતે રમેલા શોટ પણ સીમા પાર કરી શકે છે. મોટા અને લાંબા બાઉન્ડ્રીવાળા દેશોમાં, આ જ શોટ સીમા રેખાની અંદર પકડાય જાય છે.'

તેમણે BCCIને સલાહ આપી હતી કે, 'જ્યારે નવી ભારતીય સીઝન શરૂ થાય છે, ત્યારે બાઉન્ડરીનો વિસ્તાર વધારવો ખૂબ જ મહત્વપૂર્ણ છે, જેથી આવતા વર્ષના વર્લ્ડ કપ પહેલા આપણા બેટ્સમેનને તેની આદત પડી શકે. લગભગ દરેક મેદાનમાં LED જાહેરાત બોર્ડ પાછળ લોકોને ચાલવા માટે પુષ્કળ જગ્યા હોય છે, તેથી જો આ જગ્યાનો ઉપયોગ કરવામાં આવે તો, બાઉન્ડરીનો વિસ્તાર આપમેળે વધશે.'

બોલરો અંગે ગાવસ્કરે કહ્યું, 'આનાથી આપણા સ્પિન બોલરો થોડી ધીમી બોલિંગ કરી શકશે, જેનાથી તેઓ લૂપ કાઢી શકશે અને ધીમા બોલને ટર્ન કરી શકશે. હાલમાં તેઓ જે મધ્યમ ગતિની ઝડપી બોલિંગ કરે છે, તેનાથી બેટ્સમેન બોલની ઝડપી ગતિનો લાભ લઈ શકે છે, બોલને નીચે લઈ જઈને તેને સ્ટેન્ડ્સમાં જોરથી ફટકારી શકે છે. આદિલ રશીદ અને વિલ જેક્સે ભારતીય સ્પિનરો કરતાં લગભગ 8થી 10 Km/hની ઝડપે બોલિંગ કરી હતી અને તેથી તેઓ વધુ અસરકારક સાબિત થયા હતા.'

એક ઘટનાએ AIની દુનિયાના અગ્રણી ટેક નિષ્ણાતોમાં ચિંતા ઉભી કરી છે. ChatGPT બનાવનારી કંપની OpenAIએ સ્વીકાર્યું છે કે, તેમના પરીક્ષણ દરમિયાન ઉપયોગમાં લેવાતો એક સ્વાયત્ત AI એજન્ટ તેની નિયંત્રણ સિસ્ટમથી છટકી ગયો અને ઇન્ટરનેટ સુધી પહોંચી ગયો.

ત્યારપછી તેણે હગિંગ ફેસ નામની કંપનીની સિસ્ટમોને નિશાન બનાવી. OpenAIએ આ ઘટનાને અત્યાર સુધીની સૌથી મોટી AI સુરક્ષાને લગતી ઘટનાઓમાંની એક ગણાવી છે.

રિપોર્ટ અનુસાર, OpenAI તેના સૌથી અદ્યતન AI મોડેલ્સની સાયબર સુરક્ષા ક્ષમતાઓનું પરીક્ષણ કરી રહ્યું હતું. આ માટે, એક AI એજન્ટને નિયંત્રિત વાતાવરણ એટલે કે, સેન્ડબોક્સમાં મૂકવામાં આવ્યો હતો.

પરીક્ષણ દરમિયાન, આ એજન્ટ નિયંત્રણમાંથી છટકી ગયો અને ઇન્ટરનેટ સુધી પહોંચવામાં સફળ રહ્યો. ત્યારપછી તેણે હગિંગ ફેસની સિસ્ટમમાં પ્રવેશવાનો પ્રયાસ કર્યો અને થોડા સમય માટે ત્યાં સક્રિય પણ રહ્યો.

અહીં તમને જણાવી દઈએ કે, હગિંગ ફેસ એ વિશ્વના સૌથી મોટા આર્ટિફિશિયલ ઇન્ટેલિજેન્સ ગ્રુપમાનું એક છે. લાખો AI મોડેલ, ડેટાસેટ્સ અને વિકાસકર્તાઓ અહીં જોડાયેલા છે. તેથી, આ પ્લેટફોર્મ પરનો હુમલો સમગ્ર AI ઉદ્યોગ માટે એક મોટો મામલો માનવામાં આવી રહ્યો છે.

એક સમાચાર એજન્સીના અહેવાલ મુજબ, જુલાઈની શરૂઆતમાં AI એજન્ટે કંટ્રોલ સિસ્ટમમાંથી છટકી જવાનો પ્રયાસ કર્યો હતો. ત્યારપછી, 11થી 13 જુલાઈની વચ્ચે હગિંગ ફેસની સિસ્ટમમાં ઘૂસણખોરી કરવામાં આવી હતી.

નવાઈની વાત એ છે કે, OpenAI ઘણા દિવસો સુધી અજાણ રહ્યું કે તેના પોતાના જ AI એજન્ટે હુમલો કર્યો છે. ત્યાર પછી, તપાસ દરમિયાન, બંને કંપનીઓ વચ્ચે ચર્ચા શરૂ થઈ, અને ઘટનાની સંપૂર્ણ વિગતો પ્રકાશમાં આવી.

ઘણા લોકોને આશ્ચર્ય થયું છે કે, શું AIએ પોતાની જાતે હુમલો કર્યો હતો. આ પ્રશ્નનો જવાબ કંઈક અલગ છે.

OpenAI કહે છે કે, AI એજન્ટને સાયબર સુરક્ષા પરીક્ષણ માટે તૈયાર કરવામાં આવ્યો હતો. તેનો હેતુ નિર્ધારિત લક્ષ્ય સુધી પહોંચવાનો હતો. જો કે, પરીક્ષણ દરમિયાન, તેણે અપેક્ષા કરતાં વધુ ક્ષમતાઓ દર્શાવી અને નિયંત્રણ સિસ્ટમમાંથી છટકી જવા અને ઇન્ટરનેટનો ઉપયોગ કરવાનું શરૂ કર્યું.

કંપની કહે છે કે, આ સીધા માનવ આદેશને કારણે નથી થયું, પરંતુ પરીક્ષણ દરમિયાન સુરક્ષા સિસ્ટમમાં ખામીને કારણે થયું હતું.

Hugging Faceના CEO Clement DeLong એ આ ઘટના પછી OpenAI પાસેથી સંપૂર્ણ પારદર્શિતાની માંગ કરી છે. તેમનું કહેવું છે કે, સમગ્ર ઘટના જાહેર થવી જોઈએ, જેથી સંશોધકો સમજી શકે કે AI એજન્ટ કેવી રીતે કામ કરે છે. તેમણે AI સુરક્ષાને મજબૂત બનાવવા માટે વધુ સહયોગની પણ માંગ કરી છે.

આ ઘટનાએ AI સુરક્ષા અંગે ચર્ચાઓને વધુ વેગ આપ્યો છે. માઇક્રોસોફ્ટના AI વડા મુસ્તફા સુલેમાનએ તેને ભવિષ્ય માટે એક મોટી ચેતવણી ગણાવી છે. Nvidiaએ ઘણી મોટી ટેક કંપનીઓ સાથે મળીને ઓપન સિક્યોર AI એલાયન્સની રચનાની જાહેરાત કરી છે. આ એલાયન્સનો ધ્યેય AI સિસ્ટમોને વધુ સુરક્ષિત બનાવવાનો અને ભવિષ્યમાં આવી ઘટનાઓને રોકવાનો છે.

AI એજન્ટો હવે ઇન્ટરનેટ ઍક્સેસ કરી શકે છે, ફાઇલો ખોલી શકે છે, કોડ લખી શકે છે અને ઘણા કાર્યો પોતાની જાતે પુરા કરી શકે છે. આ જ કારણ છે કે, AI જેટલું શક્તિશાળી બને છે, તેની સુરક્ષાનો પડકાર પણ તેટલો જ મોટો થતો જાય છે.

દિલ્હીમાં જંતર-મંતર ખાતે Gen-Z પછી, ઉત્તર પ્રદેશમાં Gen-Alpha પણ રસ્તા પર ઉતરી આવ્યા. પૂર્વી ઉત્તર પ્રદેશના ફતેહપુરમાં, વર્ગોનો બહિષ્કાર કરીને રસ્તા પર ઉતરેલા આ ઇન્ટર-કોલેજ વિદ્યાર્થીઓના રોષે અધિકારીઓને થોડા કલાકોમાં જ પીછેહઠ કરવાની ફરજ પાડી, તેમની લગભગ બધી માંગણીઓ પુરી કરી દીધી. 9મા ધોરણથી 12મા ધોરણમાં અભ્યાસ કરતા આ વિદ્યાર્થીઓ ત્યારે રસ્તા પર ઉતરી આવ્યા હતા, જ્યારે સુપ્રીમ કોર્ટ જંતર-મંતર પ્રદર્શનની સુનાવણી કરી રહી હતી. સુપ્રીમ કોર્ટે જણાવ્યું હતું કે, લોકશાહીમાં દરેકને શાંતિપૂર્ણ વિરોધ કરવાનો અધિકાર છે. વિરોધ પ્રદર્શન પછી સુપ્રીમ કોર્ટે વિદ્યાર્થીઓ સામે કોઈપણ કાર્યવાહી પર પણ રોક લગાવી હતી.

આ કેસ ઉત્તર પ્રદેશના ફતેહપુરમાં કિશનપુરની સર્વોદય ઇન્ટર કોલેજનો છે. ત્યાંના વિદ્યાર્થીઓ લાંબા સમયથી કોલેજમાં ફેલાયેલી અવ્યવસ્થાથી પરેશાન હતા. કેમ્પસમાં વીજળી નહોતી, પંખા નહોતા અને પીવાનું સ્વચ્છ પાણી પણ નહોતું. મધ્યાહન ભોજન અને તેના માટે બેસવા યોગ્ય ટેબલ અને ખુરશીઓ ન હોવાને કારણે પણ દરેક છાત્રો પરેશાન હતા. વિદ્યાર્થીઓ ઘણા સમયથી આચાર્ય અને અન્ય અધિકારીઓને આ અંગે વિનંતી કરી રહ્યા હતા. યોગ્ય વ્યવસ્થાના અભાવે તેમના અભ્યાસ પર પણ અસર પડી રહી હતી. આવી અવ્યવસ્થાથી કંટાળીને, વિદ્યાર્થીઓએ દિલ્હી જેવો જ અભિગમ અપનાવ્યો, વર્ગોનો બહિષ્કાર કર્યો અને પોતાની માંગણીઓ પર દબાણ લાવવા માટે રસ્તાઓ પર ઉતર્યા. દિલ્હીની જેમ, વિદ્યાર્થીનીઓ પણ છોકરાઓ સાથે ખભે ખભા મિલાવીને ઉભી રહી.

વર્ગખંડમાં જ તેઓએ પહેલા મોટા કાર્ડ પર રંગબેરંગી પોસ્ટરો બનાવ્યા, તેના પર પોતાની માંગણીઓ લખી અને સૂત્રોચ્ચાર કરીને શાળાની બહાર કૂચ કરી. કેટલાક વિદ્યાર્થીઓએ બાબા સાહેબ ભીમરાવ આંબેડકરનો ફોટો પણ સાથે લઇ લીધો. વિદ્યાર્થીઓએ આરોપ લગાવ્યો કે, જ્યારે પણ તેઓ વીજળી અને પાણી જેવી સુવિધાઓની માંગ કરે છે, ત્યારે તેમને પરીક્ષામાં નાપાસ કરવાની ધમકી આપવામાં આવે છે. વર્ગખંડોમાં પંખા ન હોવાને કારણે ઘણા વિદ્યાર્થીઓ અસહ્ય ઉકળાટ અને ગરમીથી બીમાર પડી જાય છે. તેઓએ આચાર્ય પર અભદ્ર વર્તનનો પણ આરોપ લગાવ્યો.

https://twitter.com/Sachingupta/status/2081976415214559674

વિદ્યાર્થીઓના રસ્તાઓ પર આવવાથી હોબાળો મચી ગયો અને મામલો અધિકારીઓ સુધી પહોંચ્યો. ત્યાંથી, કોલેજના આચાર્યનો સંપર્ક કરવામાં આવ્યો. આચાર્યએ વિદ્યાર્થીઓ સાથે સમજાવટ કરવાનો પ્રયાસ કર્યો, પરંતુ તેઓએ તેમની માંગણીઓ પુરી ન થાય ત્યાં સુધી વર્ગખંડમાં જવાનો ઇનકાર કર્યો. આખરે, અધિકારીઓએ વિદ્યાર્થીઓની માંગણીઓ સામે ઝૂકવું પડ્યું.

https://twitter.com/Sachingupta/status/2081999381289648490

જિલ્લા શાળા નિરીક્ષક રાકેશ કુમારે જાહેરાત કરી કે, વિદ્યાર્થીઓની એક સિવાયની બધી માંગણીઓ પૂર્ણ કરવામાં આવશે. તેમણે કહ્યું કે આવતીકાલ સુધીમાં દરેક વર્ગખંડમાં 4 પંખા લગાવવામાં આવશે. ઇલેક્ટ્રિકલ વાયરિંગનું સમારકામ કરવામાં આવશે. એક મહિનાની અંદર ડેસ્ક અને બેન્ચ ઉપલબ્ધ થશે. એક RO વોટર કુલર લગાવવામાં આવશે. MDM મેનુમાં સુધારો કરવામાં આવશે. DIOSએ જણાવ્યું હતું કે વિદ્યાર્થીઓ સાઇન્સ ક્લાસની પણ માંગ કરી રહ્યા હતા, પરંતુ તેના માટે લેબ અને માન્યતાની જરૂર પડશે. તેથી, તે એક સિવાયની બધી માંગણીઓ સ્વીકારવામાં આવી છે. વિદ્યાર્થીઓને લેખિતમાં આ માંગણીઓ આપવામાં આવ્યા પછી પ્રદર્શન સમાપ્ત કરવામાં આવ્યું હતું.

મંગળવારે લોકસભામાં પેપર લીક વિરોધી બિલ પર ચર્ચા શરૂ થઈ. કોંગ્રેસના સાંસદ ગૌરવ ગોગોઈએ બિલની ટીકા કરતા તેને સરકારની નિષ્ફળતાનું પ્રતીક ગણાવ્યું. તેમણે કહ્યું કે NTA પાસે ફક્ત 34 મંજૂર થયેલા પદો છે, તો 47 લોકો સામે કેવી રીતે કાર્યવાહી કરવામાં આવી? તેમણે સરકાર પાસેથી આ 47 લોકોની સંપૂર્ણ વિગતો માંગી. ગોગોઈએ આરોપ લગાવ્યો કે, NTAના ડિરેક્ટર જનરલને દૂર કરવામાં આવ્યા હતા, પરંતુ ચેરમેનને જાળવી રાખવામાં આવ્યા હતા. તેમણે ચેરમેનને એક ચોક્કસ સંગઠન સાથે જોડ્યા અને કહ્યું કે તેમના કાર્યકાળ દરમિયાન મધ્યપ્રદેશ અને છત્તીસગઢ પબ્લિક સર્વિસ કમિશનમાં પણ ગેરરીતિના આરોપો લગાવવામાં આવ્યા હતા. શિક્ષણ વિભાગમાં સુધારો ન કરવાનું કારણ સમજાવતા તેમણે કહ્યું કે, આ વિભાગ RSS માટે મહત્વપૂર્ણ છે, અને તેથી, યુનિવર્સિટીઓમાં ગુણવત્તાની અવગણના કરવામાં આવી રહી છે.

ઈન્સ્ટાગ્રામ પર PM નરેન્દ્ર મોદીના નિવેદનનો ઉલ્લેખ કરતા, ગોગોઈએ પૂછ્યું કે, બે વર્ષ પહેલાં રચાયેલી રાધાકૃષ્ણન સમિતિનું શું થયું. તેમણે કહ્યું કે જો સારું કામ થયું હોત, તો પેપર લીકની ઘટનાઓ 2 વર્ષ પછી કેમ બની. બિલને માત્ર સંશોધન સુધારો ગણાવતા તેમણે કહ્યું કે, બે વર્ષ પહેલા પણ આવા જ દાવા કરવામાં આવ્યા હતા. 2024ના NEET પેપર લીક કેસનો ઉલ્લેખ કરતા તેમણે કહ્યું કે, ચાર્જશીટમાં નામ આપવામાં આવેલા 46 આરોપીઓમાંથી 44ને જામીન આપવામાં આવ્યા છે. કથિત માસ્ટરમાઇન્ડ સંજીવ મુખિયાની ભાગી છૂટ્યા પછી 11 મહિને ધરપકડ કરવામાં આવી હતી અને હવે તેને ક્લીનચીટ આપવામાં આવી છે. ગોગોઈએ અમિત કુમાર બરુઆ અને અમિત કુમાર સિંહ સહિત અન્ય ઘણા આરોપીઓના નામ આપ્યા અને કહ્યું કે પાછલો કાયદો નિષ્ફળ ગયો હતો, અને નવો કાયદો પણ એ જ હેતુથી રજૂ કરવામાં આવી રહ્યો છે, તે પણ નિષ્ફળ જશે.

જંતર-મંતર પર થયેલા વિરોધનો ઉલ્લેખ કરતા, ગોગોઈએ પોલીસ કાર્યવાહીની ટીકા કરી. તેમણે કહ્યું કે, 20 જુલાઈએ પ્રદર્શનકારીઓ પર લાઠીચાર્જ કરવામાં આવ્યો, પેલેટ ગનનો ઉપયોગ કરવામાં આવ્યો અને એક છોકરીના ગાલ પર થપ્પડ મારવામાં આવી. તેમણે એક છોકરીના જનનાંગ પર હુમલો કરવાનો આરોપ લગાવ્યો અને ગૃહમંત્રી પાસેથી જવાબ માંગ્યો. ગોગોઈએ કહ્યું કે, આ બિલ એટલા માટે રજૂ કરવામાં આવ્યું કારણ કે પોલીસ વિરોધ પ્રદર્શનોને દબાવવામાં અસમર્થ હતી. તેમણે આ દરમિયાન બિહારમાં AK-47ના ઉપયોગનો પણ ઉલ્લેખ કર્યો અને સરકાર પાસેથી જવાબો માંગ્યા.

શિક્ષણ પ્રણાલી પર બોલતા, તેમણે વિદ્યાર્થીઓની આત્મહત્યાનો આંકડો એક લાખથી વધુ હોવાનું જણાવ્યું અને કહ્યું કે ફક્ત સજા વધારવાથી શિક્ષણમાં સુધારો થશે નહીં. ધર્મેન્દ્ર પ્રધાનને માત્ર પ્રતીક ગણાવતા તેમણે કહ્યું કે, યુવાનો રસ્તા પર ઉતરી આવ્યા છે. વસીમ બરેલવીની કવિતાનું પઠન કરતા તેમણે કહ્યું કે ભય ગાયબ થઈ ગયો છે અને લોકશાહીની શક્તિ પ્રદર્શિત થઈ છે. ગોગોઈએ આરોપ લગાવ્યો કે, સરકાર યુવાનોને પડકારો માટે તૈયાર કરવાને બદલે શિક્ષણ દ્વારા પક્ષના મતદારોમાં રૂપાંતરિત કરવા પર વધુ ધ્યાન કેન્દ્રિત કરી રહી છે.