આવકવેરા વિભાગે મંગળવારે તેના પોર્ટલ પર ઇ-પે ટેક્સ સુવિધા શરૂ કરી. તેના શરૂઆત થવાથી કરદાતાઓ માટે કર ચૂકવવાનું ખૂબ સરળ બનશે. પીટીઆઈના સમાચાર અનુસાર, આવકવેરા વિભાગે એક નિવેદનમાં જણાવ્યું હતું કે વિભાગ દ્વારા શરૂ કરાયેલ 'ઇ-પે ટેક્સ' સુવિધા તમારી કર જવાબદારીઓને પૂર્ણ કરવા માટે એક સુંદર, કાર્યક્ષમ અને મુશ્કેલી-મુક્ત રીત છે.

કરદાતાઓને ડિજિટલી સશક્ત બનાવવાના પ્રયાસો

સમાચાર મુજબ, બેંકોમાં લાંબી કતારો, કંટાળાજનક ફોર્મ ભરવા અને છેલ્લી ઘડીએ કર ચુકવણીની ચિંતાઓના દિવસો હવે પૂરા થઈ ગયા છે. સરળ અને વધુ સુલભ ચુકવણી પદ્ધતિઓની જરૂરિયાતને ઓળખીને અને કરદાતાઓને ડિજિટલી સશક્ત બનાવવા તરફ વધુ એક પગલું ભરતા, આવકવેરા વિભાગે તેના સત્તાવાર ઓનલાઈન પોર્ટલ પર 'ઈ-પે ટેક્સ' સુવિધા શરૂ કરી છે.

આવકવેરા વિભાગે જણાવ્યું હતું કે આ સુવિધા કર ચુકવણી પ્રક્રિયામાં ઘર્ષણને દૂર કરીને સમયસર પાલનની સંસ્કૃતિને પણ પ્રોત્સાહન આપે છે. તે કર વહીવટને નાગરિકોની નજીક લાવે છે, ખાસ કરીને વ્યક્તિઓ અને નાના વ્યવસાયો માટે, તેમના માટે એક સીધો ડિજિટલ માર્ગ પૂરો પાડે છે.

નવા નાણાકીય વર્ષમાં કઈ કર વ્યવસ્થા વધુ સારી

નવા નાણાકીય વર્ષમાં, કરદાતાઓએ નવી અને જૂની કર વ્યવસ્થા વચ્ચે પસંદગી કરવાની જરૂર પડશે. આવી સ્થિતિમાં, નવી કર વ્યવસ્થામાં છૂટ મર્યાદા વધવાની સાથે, તેમના માટે કઈ કર વ્યવસ્થા વધુ સારી છે તે જાણવું મહત્વપૂર્ણ છે. નિષ્ણાતોના મતે, 12 લાખ રૂપિયા (પગારદાર વ્યક્તિઓ માટે 12.75 લાખ રૂપિયા) સુધીની વાર્ષિક આવક ધરાવતા કરદાતાઓ માટે નવી કર પ્રણાલી યોગ્ય છે પરંતુ આનાથી વધુ આવક ધરાવતા વ્યક્તિઓ માટે કઈ સિસ્ટમ વધુ સારી રહેશે તે એ વાત પર નિર્ભર કરે છે કે કરદાતા કર જવાબદારી ઘટાડવા માટે કોઈ બચત અને રોકાણનું આયોજન કરી રહ્યા છે કે નહીં.

આજે માર્ચ મહિનાનો છેલ્લો દિવસ છે અને આવતીકાલે એટલે કે 1લી એપ્રિલ 2025થી નવું ટેક્સવર્ષ શરૂ થવા જઈ રહ્યું છે. દર મહિનાની જેમ મહિનાના પહેલા દિવસથી દેશમાં પણ ઘણા મોટા ફેરફારો (1 એપ્રિલથી નિયમમાં ફેરફાર) લાગુ થશે, જેની અસર દરેક ઘર અને દરેક ખિસ્સામાં જોવા મળશે. આ ફેરફારો એલપીજી સિલિન્ડરની કિંમતો, તમારા બેંક ખાતા, ડેબિટ કાર્ડથી લઈને ક્રેડિટ કાર્ડ પર દેખાશે. એટલું જ નહીં, હાઈવે પર મુસાફરી કરવી પણ મોંઘી થઈ શકે છે, કારણ કે ઘણા રૂટ પર ટોલ ટેક્સ વધવા જઈ રહ્યો છે. ચાલો જાણીએ આવા 10 મોટા ફેરફારો વિશે...

પ્રથમ ફેરફાર- એલપીજીના ભાવ

દર મહિનાની પહેલી તારીખે, તેલ અને ગેસ વિતરણ કંપનીઓ એલપીજી સિલિન્ડરની કિંમતોમાં સુધારો કરે છે અને 1 એપ્રિલ, 2025ના રોજ પણ ફેરફાર જોવા મળી શકે છે. છેલ્લા કેટલાક સમયમાં 19 કિલોના એલપીજી સિલિન્ડરના ભાવમાં વધઘટ જોવા મળી રહી છે, ત્યારે લાંબા સમયથી એલપીજી સિલિન્ડરની કિંમતો યથાવત છે. આવી સ્થિતિમાં, નવા નાણાકીય વર્ષની શરૂઆત સાથે, લોકોને 14 કિલોના સિલિન્ડરના ભાવમાં રાહતની અપેક્ષા છે. 

બીજો ફેરફાર- CNG-PNG અને ATFના ભાવ

એલપીજી સિલિન્ડરની કિંમતો ઉપરાંત સીએનજી અને પીએનજીની કિંમતોમાં પણ પહેલી તારીખથી ફેરફાર થઈ શકે છે.તો કંપનીઓ  એર ટર્બાઇન ઇંધણ એટલે કે ATFની કિંમતમાં પણ 1 એપ્રિલ, 2025 ના રોજ ફેરફાર કરી શકે છે. CNGના ભાવમાં વધઘટ જ્યારે તમારા વાહનના ખર્ચમાં વધારો કરી શકે છે અથવા રાહત આપી શકે છે, ત્યારે ATFના ભાવમાં વધારો હવાઈ મુસાફરી મોંઘી બનાવી શકે છે. 

ત્રીજો ફેરફાર- UPI ID થશે બંધ 

1 એપ્રિલ, 2025 થી આગામી ફેરફાર યુનિફાઇડ પેમેન્ટ્સ ઇન્ટરફેસ એટલે કે UPI સાથે સંબંધિત છે અને જે મોબાઇલ નંબર સાથએ જોડાયેલ UPI એકાઉન્ટ્સ લાંબા સમયથી એક્ટિવ નથી, બેંક રેકોર્ડમાંથી હટાવવામાં આવશે. જો તમારો ફોન નંબર UPI એપ સાથે લિંક છે અને તમે લાંબા સમયથી તેનો ઉપયોગ કર્યો નથી, તો તેની સેવાઓ બંધ કરવામાં આવી શકે છે. 

ચોથો ફેરફાર- ડેબિટ કાર્ડના નવા નિયમો 

RuPay ડેબિટ સિલેક્ટ કાર્ડમાં કેટલાક મોટા અપડેટ્સ કરવા જઈ રહ્યા છે, જે 1 એપ્રિલ, 2025 થી લાગુ કરવામાં આવશે. આમાં ફિટનેસ, વેલનેસ, મુસાફરી અને મનોરંજનનો સમાવેશ થાય છે. અપડેટ્સ વિશે વાત કરીએ તો, એક ક્વાર્ટરમાં મફત ડોમેસ્ટિક લાઉન્જ વિઝિટ અને સિલેક્ટેડ લાઉન્જમાં એક વર્ષમાં બે ઇન્ટરનેશનલ લાઉન્જ વિઝિટની સુવિધા મળશે. આ સિવાય આકસ્મિક મૃત્યુ અથવા કાયમી વિકલાંગતા માટે રૂ. 10 લાખ સુધીનું વ્યક્તિગત અકસ્માત કવર મળશે. દર ક્વાર્ટરમાં ફ્રી જિમ મેમ્બરશીપની સુવિધા મળશે. 

પાંચમો ફેરફાર- યુપીએસની શરૂઆત

નવા ટેક્સ વર્ષની શરૂઆત સાથે 1લી એપ્રિલથી કેન્દ્રીય કર્મચારીઓને ખાતરીપૂર્વક પેન્શન પ્રદાન કરવાવાળી યુનિફાઇડ પેન્શન સ્કીમ (UPS) શરૂ થવા જઇ રહી છે. પોર્ટલ પર  1 એપ્રિલથી કેન્દ્ર સરકારના કર્મચારીઓ અરજી કરી શકશે. જો કર્મચારી યુપીએસ હેઠળ પેન્શન મેળવવા માંગે છે તો તેણે યુપીએસનો વિકલ્પ પસંદ કરવા માટે ક્લેમ ફોર્મ ભરવાનું રહેશે. જો તેઓ યુપીએસ પસંદ કરવા માંગતા ન હોય તો તેઓ એનપીએસની પસંદગી કરી શકે છે. આ અંતર્ગત 23 લાખ કેન્દ્રીય કર્મચારીઓએ UPS અને NPS વચ્ચે પસંદગી કરવાની રહેશે. કેન્દ્ર સરકાર UPS વિકલ્પ પસંદ કરતા તમામ કર્મચારીઓને(બેઝિક સેલેરી + મોંઘવારી ભથ્થું) નો અંદાજિત  8.5% વધારાનો ફાળો પણ આપશે. UPS હેઠળ લઘુત્તમ પેન્શન 10,000 રૂપિયા પ્રતિ માસ હશે, જે UPS દ્વારા ઓછામાં ઓછા 10 વર્ષની સેવા પૂર્ણ કરવા પર આપવામાં આવશે. 

છઠ્ઠો ફેરફાર- ટેક્સ સ્લેબ સંબંધિત નિયમો

બજેટ 2025માં, સરકારે મધ્યમ વર્ગને રાહત આપતા ઘણી મોટી જાહેરાતો કરી હતી, જેમાં ટેક્સ સ્લેબમાં બદલાવથી લઈને, TDS, ટેક્સ રિબેટ અને અન્ય બાબતોનો સમાવેશ થાય છે. જૂના આવકવેરા અધિનિયમ 1961ની જગ્યાએ એક નવું આવકવેરા બિલ પ્રસ્તાવિત કરવામાં આવ્યું હતું. આ તમામ ફેરફારો 1 એપ્રિલ 2025થી અમલમાં આવશે. નવા ટેક્સ સ્લેબ હેઠળ વાર્ષિક 12 લાખ રૂપિયા સુધીની કમાણી કરનારા લોકોને ટેક્સ ભરવામાંથી મુક્તિ આપવામાં આવશે. વધુમાં, પગારદાર કર્મચારીઓ રૂ. 75,000ની સ્ટાન્ડર્ડ ડિડક્શન માટે પાત્ર હશે. આનો અર્થ એ થયો કે 12.75 લાખ રૂપિયા સુધીની પગારની આવકને હવે ટેક્સમાંથી મુક્તિ મળી શકે છે. જો કે, આ છૂટ ફક્ત એ લોકોને જ લાગૂ થશે જે નવા ટેક્સ વિકલ્પને પસંદ કરે છે. 

સાતમો ફેરફાર- TDS મર્યાદામાં વધારો

આ ઉપરાંત, TDS નિયમો પણ અપડેટ કરવામાં આવ્યા છે, જેમાં બિનજરૂરી કપાત ઘટાડવા અને કરદાતાઓ માટે કેશ ફ્લોમાં સુધારો કરવા માટે વિવિધ વિભાગોમાં મર્યાદા વધારવામાં આવી છે. ઉદાહરણ તરીકે, વરિષ્ઠ નાગરિકો માટે વ્યાજની આવક પર ટીડીએસ મર્યાદા બમણી કરીને રૂ. 1 લાખ કરવામાં આવી છે, જેનાથી વૃદ્ધો માટે નાણાકીય સુરક્ષામાં વધારો થશે. તેવી જ રીતે, ભાડાની આવક પર મુક્તિ મર્યાદા વધારીને વાર્ષિક રૂ. 6 લાખ કરવામાં આવી છે, જેનાથી મકાનમાલિકો પરનો બોજ ઓછો થયો છે અને શહેરી વિસ્તારોમાં ભાડાના બજારને વેગ મળી શકે છે.

આઠમો ફેરફાર- ક્રેડિટ કાર્ડ સંબંધિત નિયમો

1 એપ્રિલ, 2025થી ક્રેડિટ કાર્ડના નિયમોમાં પણ ફેરફાર થઈ રહ્યો છે, જે તેના પર ઉપલબ્ધ રેવોર્ડ અને અન્ય સુવિધાઓને અસર કરશે. એક તરફ, SBI તેના SimplyCLICK ક્રેડિટ કાર્ડ પર સ્વિગી રિવોર્ડને 5 ગણાથી ઘટાડીને અડધા કરશે. તો એર ઈન્ડિયા સિગ્નેચર પોઈન્ટ્સ 30 થી ઘટાડીને 10 કરવામાં આવશે. આ સિવાય IDFC ફર્સ્ટ બેંક ક્લબ વિસ્તારા માઈલસ્ટોનના લાભો બંધ કરવા જઈ રહી છે. 

નવમો ફેરફાર- બેંક ખાતા સંબંધિત ફેરફાર

પહેલી એપ્રિલથી, સ્ટેટ બેંક ઓફ ઈન્ડિયા (SBI) અને પંજાબ નેશનલ બેંક (PNB) સહિત ઘણી બેંકો ગ્રાહકોના બચત ખાતામાં લઘુત્તમ બેલેન્સ સંબંધિત નિયમોમાં સુધારો કરવા જઈ રહી છે. બેંક ખાતાધારકના લઘુત્તમ બેલેન્સ માટે સેક્ટર મુજબની નવી મર્યાદા નક્કી કરશે અને ખાતામાં લઘુત્તમ બેલેન્સ જાળવવામાં ન આવે તો દંડ લાદવામાં આવી શકે છે. 

દસમો ફેરફાર- ટોલ ટેક્સમાં વધારો

નેશનલ હાઈવે ઓથોરિટી (NHAI) આજે એટલે કે 31મી માર્ચ મધ્યરાત્રિથી ટોલ ટેક્સના દરમાં વધારો કરી શકે છે, જેની સીધી અસર તમારી હાઈવેની મુસાફરી પર પડી શકે છે. જો અહેવાલોનું માનીએ તો, NHAI એ 1 એપ્રિલથી વિવિધ ટોલ પ્લાઝા પર વધેલા દરો લાગુ કરવાનો આદેશ જારી કર્યો છે. આ મુજબ લખનૌમાંથી પસાર થતા હાઈવે પર હળવા વાહનો માટે ટોલમાં 5 રૂપિયાનો વધારો થઈ શકે છે. જ્યારે ભારે વાહનો માટે આ વધારો 20 થી 25 રૂપિયા હોઈ શકે છે. લખનૌ-કાનપુર, અયોધ્યા, રાયબરેલી, અને બારાબંકી જેવા વ્યસ્ત હાઈવે પર સ્થિત ટોલ પ્લાઝા પર આ નવા દર લાગુ થઈ શકે છે. આ સિવાય દિલ્હી-મેરઠ એક્સપ્રેસ વે, ઈસ્ટર્ન પેરિફેરલ એક્સપ્રેસ વે અને NH-9 પરથી પસાર થતા મુસાફરોને પણ ટોલ ટેક્સ તરીકે વધુ પૈસા ચૂકવવા પડી શકે છે. 

નાણા મંત્રી નિર્મલા સીતારમણે શનિવારે બજેટ રજૂ કર્યું. લોકોને એ જાણવામાં રસ હોય છે કે સસ્તું શું થશે અને મોંઘુ શું થશે. તો આ બજેટમાં ઇલેકટ્રોનિક્સ આઇટમો, 36 જીવન રક્ષક દવાઓ, કેન્સરની દવા, ઇલેકટ્ર્કી વાહન,મોબાઇલ ફોન, મોબાઇલ ચાર્જર, ફિશ પેસ્ટ, લેધર ગૂડસ, LED ટીવી સસ્તા થશે જ્યારે ફલેટ પેનલ ડીસ્પલે અને નીટેડ ફેબ્રિક્સ મોંઘા થશે.

આ ઉપરાંત મિડલ ક્લાસ માટે સૌથી મોટી જાહેરાત નાણા મંત્રીએ કરી છે. હવે 12 લાખ રૂપિયાની વાર્ષિક આવક પર કોઇ ટેક્સ લાગશે નહીં. વરિષ્ઠ નાગરિકો માટે TDSની મર્યાદા 50,000થી વધારીને 1 લાખ રૂપિયા કરવામાં આવી.

હવે તમે છેલ્લાં 4 વર્ષનું રિટર્ન એક સાથે ભરી શકશો.

રાજકોટની સેશન્સ કોર્ટે ગુરુવારે એક મહત્ત્વનો ચુકાદો આપ્યો છે. 2016માં અમદાવાદના રાજમોતી ઓઇલ મીલના બ્રાન્ચ મેનેજર દિનેશભાઇ દક્ષિણીના હત્યા કેસ કોર્ટે રાજમોતી મીલના માલિક સમીર શાહ, સસ્પેન્ડેડ  ASI યોગેશ ભટ્ટ અને ડ્રાઇવર ચુડાસમાને આજીવન કેદની સજા ફટકારી છે. સમીર શાહ સૌરાષ્ટ્ર ઓઇલ મીલર્સ એસો. (સોમા)નો અને રાજકોટ ચેમ્બર ઓફ કોમર્સનો પ્રમુખ રહી ચૂક્યો હતો.

 આ કેસમાં 2022માં વળાંક આવ્યો હતો જ્યારે મુખ્ય આરોપી સમીર ગાંધીએ કોર્ટને તાજના સાક્ષી બનવાની રજૂઆત કરી હતી અને કોર્ટને આખું સત્ય બતાવ્યું હતું.

સમીર ગાંધી 2016માં અમદાવાદ આવ્યો હતો અને દિનેશને બળજબરીથી રાજકોટ લઇ ગયો હતો અને એક જગ્યાએ ગોંધી રાખીને દિનેશભાઇને માર માર્યો હતો. એ પછી રાજકોટના ASI યોગેશ ભટ્ટ પાસે દિનેશભાઇને લઇ જવાયા હતા. ભટ્ટે 5 લાખ રૂપિયા લીધા હતા અને દિનેશને માર માર્યો હતો એ પછી તેનું મોત થયું હતું.

એક RTI એક્વીસ્ટે રિઝર્વ બેંક ઓફ ઇન્ડિયાં  RTI કરીને માહિતી માંગી હતી કે દેશની બેંકોએ કેટલી રકમ માંડવાળ કરી છે. RBIના જવાબમાં કહેવામાં આવ્યું છે કે 2014થી 2024 સુધીના 10 વર્ષમાં કુલ 16 લાખ કરોડ રૂપિયાની રકમ રાઇટઓફ કરી દેવામાં આવી છે અને તેની સામે 2 લાખ કરોડની રકમની વસુલાત થઇ છે. મતલબ કે માત્ર 16 ટકા જ રકમ પાછી આવી છે.

16 લાખ કરોડમાં 12 લાખ કરોડ જાહેર ક્ષેત્રની બેંકોના છે, 4 લાખ કરોડ ખાનગી બેંકોના અને 6,000 કરોડ રૂપિયા અર્બન કો.ઓ. બેંકોના છે. જાહેર ક્ષેત્રની બેંકોમાં સૌથી વધારે રૂપિયા માંડવાળ કરનારી બેંકોમાં પંજાબ નેશનલ, સ્ટેટ બેંક અને યુનિયન બેંક છે જ્યારે ખાનગી બેંકોમાં HDFC, ICICI અને એક્ઝિસ બેંક છે.

બ્રિટનમાં એક માણસે હાઇકોર્ટમાં અરજી કરી કે તેનો 6290 કરોડ રૂપિયાનો ખજાનો કચરાના ઢગલાં ચાલ્યો ગયો છે, તે કાઢવાની મંજૂરી આપવામાં આવે.

બ્રિટનના જેમ્સ હોવેલ્સે હાઇકોર્ટને કરેલી અરજીમાં કહ્યું કે, મારા મિત્રની ભૂલથી મારી હાર્ડ ડ્રાઇવ કચરના ઢગલામાં ચાલી ગઇ છે, જેમાં મારા ક્રિપ્ટોકરન્સીના તમામ ડેટા છે. જેમ્સે કહ્યું કે, તેણે 2013માં બિટકોઇન ખરીદ્યા હતા, તે વખતે કોઇ વેલ્યુ નહોતી, પરંતુ આજે 6290 કરોડ રૂપિયાની વેલ્યુ છે અને ભવિષ્માં બિટકોઇનના ભાવ વધે તો 10,000 કરોડની વેલ્યુ થઇ શકે છે.

કચરાનો ઢગલો ન્યુપોર્ટના લેન્ડફિલમા ડમ્પ કરવામાં આવ્યો છે ત્યાંથી કાઢવાની મંજૂરી આપવામાં આવે.જો કે હાઇકોર્ટે જેમ્સની અરજી મંજૂર કરી નહોતી અને રદ કરી દીધી હતી.

 રિલાયન્સ Jio ઇન્ફોકોમ પોતાની ક્રિપ્ટોકરન્સી Jio કોઇન લાવવાની તૈયારી કરી રહ્યું છે.મુકેશ અંબાણીના Jio પ્લેટફોર્મ તાજેતરમાં ઇન્ટરનેટ ટેક્નોલોજી કંપની પોલીગોન લેબ્સની સાથે ભાગીદારીની જાહેરાત કરી હતી એ પછી Jio કોઇનની ચર્ચાએ ઇન્ટરનેટ પર તરખાટ મચાવી દીધો છે. આ વાત એવા સમયે આવી છે જ્યારે દુનિયા અને ભારતમાં ક્રિપ્ટોકરન્સી કાયદેસર કે ગેરકાયદેસર છે તેનો વિવાદ ચાલી રહ્યો છે.

બિટનીંગ કંપનીના CEO કશીફ રજાએ X પ્લેટફોર્મ પર લખ્યું છે કે, દુનિયાની સૌથી મોટી મોબાઇલ ઓપરેટર કંપની રિલાયન્સ Jioએ હમણાં જ Jio કોઇનની સત્તાવાર જાહેરાત કરીને ક્રિપ્ટો વર્લ્ડને ચોંકાવી દીધું છે.

જો કે લાયન્સ Jio ઇન્ફોકોમ તરફથી હજુ સુધી કોઇ સત્તાવાર નિવેદન સામે આવ્યું નથી.

ગુજરાતના રાજકોટમાં બ્લોકઓરા કંપનીની ક્રિપ્ટોકરન્સીની સ્કીમમાં લગભગ 8000 લોકોના 300 કરોડ રૂપિયા ફસાયા હોવાનું જાણવા મળ્યું છે. એકના 3 ગણા કરી આપવાની આ યોજનામાં 12 રોકાણકારોએ રાજકોટના પોલીસ કમિશ્નરને રજૂઆત કરી હતી અને એક અરજી આપી છે.

 અરજીમાં કહેવામાં આવ્યું છે કે, 12 લોકોના લગભગ 70 લાખ રૂપિયા લાલચમાં આવીને રોક્યા હતા. કંપનીએ દરરોજ 1 ટકો વ્યાજ આપવાની વાત કરી હતી, પરંતુ સંચાલકો હવે જવાબ આપતા નથી. બ્લોકઓરા એ TABC કોઇન લોંચ કર્યા હતા.

રોકાણકારોએ કહ્યું કે, કંપનીના સંચાલકોએ લિંબડીમાં સામાજિક સંમેલનમાં 7 લાખ રૂપિયા ખર્ચીને લોકોને મફતમાં જમાડ્યા હતા અને સમાજ માટે 25 લાખ રૂપિયાની જાહેરાત કરી હતી એટલે લોકોને વિશ્વાસ આવી ગયો હતો. પરંતુ સમાજને હજુ 25 લાખ પણ આપ્યા નથી.

રોજના 6 કરોડ રૂપિયાનું દાન કરનારા ભારતના એક ઉદ્યોગપતિની સંપત્તિ એક જ દિવસમાં 46485 કરોડ રૂપિયા ધોવાઇ ગઇ હતી. તાજેતરમાં સૌથી વધુ દાનવીર ઉદ્યોગપતિઓની યાદી જાહેર થઇ હતી જેમાં HCL ટેક્નોલોજી કંપનીના ચેરમેન શિવ નાદર સૌથી ટોચ પર હતા. તેમણે 2024માં 2153 કરોડ રૂપિયાનું દાન કરવામાં આવ્યું હતું.

14 જાન્યુઆરીના દિવસે HCL ટેક્નોલોજી કંપનીના શેરનો ભાવ 9 ટકા તુટી ગયો હતો, જેને કારણે નાદરની સંપત્તિમાં 46485 કરોડ રૂપિયાનું ધોવાણ થયુ હતું. કારણ એવું હતુ કે, કંપનીના ત્રિમાસિક પરિણામો પ્રોત્સાહક જાહેર નહોતા થયા.

13 જાન્યુઆરીએ 1989 રૂપિયા પર હતો જે મંગળવારે 1813 પર બંધ રહ્યો અને 17 જાન્યુઆરીએ વધારે ઘટીને 1789 પર આવી ગયો હતો.

દેશના 130 વર્ષ જૂના કોર્પોરેટ હાઉસ ફેમિલીની સંપત્તિનો વિવાદ ઘણા સમયથી ચાલે છે, તેમાં હવે સેબીએ હાથ નાંખ્યો છે. સેબીના આદેશને પગલે આ ફેમિલી હવે સેબી સામે કોર્ટના દરવાજા ખટખટાવશે.

કિર્લોક્સકર ગ્રુપ દેશનું સૌથી જૂના ગ્રુપમાંનુ એક છે, જેનો દેશ-વિદેશમા બિઝનેસ છે.કિર્લોસ્કર ગ્રુપના સંપત્તિ વિવાદમાં સેબીએ આદેશ કર્યો છે કે, ફેમિલી સેટલમેન્ટન દસ્તાવેજો જાહેર કરવામાં આવે. આની સામે કિલોર્સ્કરની 4 કંપનીઓએ સેબી સામે કેસ કરવાની માહિતી શેરબજારોને આપી છે.કંપનીનું કહેવું છે કે,  આ કેસ 2018થી દિવાની અદાલતમાં વિચારાધીન છે, સેબીના આદેશમાં કોર્પોરેટ કાયદો અને કંપની કાયદાને અવગણવમાં આવ્યો છે.

કિર્લોક્સર બ્રધર્સ ગ્રુપના સંજય, રાહુલ અને અતુલ વચ્ચ 1.56 લાખ કરોડની સંપત્તિનો વિવાદ છે.

દુનિયામાં સૌથી વધારે પગાર લેનાર CEO કોણ? એવો સવાલ પુછવામાં આવે તો ગૂગલના સુંદર પિચાઇ કે માઇક્રોસોફ્ટના સત્ય નડેલા અથવા એડોહના શાંતનુ નારાયણનું નામ સામે આવે, પરંતુ , તમને જાણીને નવાઇ લાગશે કે ભારતીય મૂળના CEO જગદીપ સિંહનો વર્ષનો પગાર 17,500 કરોડ રૂપિયા હતો, મતલબ કે રોજનો 48 કરોડ રૂપિયા પગાર મળતો હતો.

જગદીપ સિંહ કવોન્ટમ સ્કેપ નામની સંસ્થા ફાઉન્ડર અને CEO હતા. તેમની કંપની રિચાર્જેબલ લિથિયમ મેટલ બેટરી બનાવે છે.જગદીપ સિંહનું જ્યારે CEO તરીકે સેલરી પેકેજ નક્કી થયું ત્યારે તેમના પગારમાં કંપનીના શેર પણ હતા જે અમેરિકાના શેરબજારમાં લિસ્ટેડ છે. આ શેરને કારણે જગદીપ સિંગની સેલરી વર્ષે 17,500 કરોડ રૂપિયા થતી હતી.

માતા-પિતાની સંપત્તિ મેળવી લીધા પછી તેમની કાળજી ન રાખનારા અને તેમને એકલા મુકી દેનારા સંતાનો સામે સુપ્રીમ કોર્ટે લાલ આંખ કરી છે.મધ્ય પ્રદેશ હાઇકોર્ટના એક ચુકાદાને પલટીને સુપ્રીમે કહ્યું કે, હવેથી સંપત્તિ મેળવ્યા પછી જો સંતાનો માતા-પિતાનું ધ્યાન નહીં રાખશે તો  સંપત્તિ રદબાતલ કરી દેવામાં આવશે.

મધ્ય પ્રદેશ હાઇકોર્ટમાં એક મહિલાએ તેના પુત્રને ટ્રાન્સફર કરેલી સંપત્તિ રદબાતલ કરી દેવા  અરજી કરી હતી. હાઇકોર્ટે કહ્યું કે, ગિફ્ટ ડીડમાં એવી કલમ નથી કે જે બાળકોને માતા-પિતાની સંભાળ રાખવા માટે બંધનકર્તા હોય.

સુપ્રીમ કોર્ટે કહ્યું કે, વરિષ્ઠ નાગરિકોના ભરણ પોષણ અને કલ્યાણ કાયદા અધિનિયમ વેલ્ફેર ઓફ ધ પેરેન્ટસ એન્ડ સિનિયર સિટિઝન એક્ટ હેઠળ જો સંતાનો માતા-પિતાને એકલા પાડી દે તો સંતાનોને મળેલી મિલ્કત રદબાતલ કરી દેવામાં આવશે.