જો તમારી ખેતીની જમીનની માપણીમાં કોઈ ભૂલ રહી ગઈ હોય અને સરકારી કચેરીઓના ધક્કા ખાઈને તમે પરેશાન હોવ, તો હવે તમારા માટે રાહતના સમાચાર છે. ગુજરાતના મુખ્યમંત્રી શ્રી ભૂપેન્દ્ર પટેલે ખેડૂતો અને ગ્રામીણ નાગરિકોના હિતમાં એક ક્રાંતિકારી નિર્ણય લીધો છે. રાજ્યના જે ગામોમાં જમીનની માપણી (પ્રમોલગેશન) બાદ ક્ષતિઓ રહી ગઈ છે, તે સુધારવા માટે હવે સમગ્ર રાજ્યમાં 'ભૂમિ સીમાંકન' નામની એકસમાન પદ્ધતિ અમલી બનાવવામાં આવશે.

આ નિર્ણયથી ખેડૂતોની વાંધા અરજીઓનો ઝડપી અને પારદર્શક ઉકેલ આવશે, જેનાથી 'ગુડ ગવર્નન્સ' અને 'ઈઝ ઓફ ડુઈંગ બિઝનેસ'ને નવો વેગ મળશે.

જિલ્લા કક્ષાએ 'ભૂમિ સીમાંકન સમિતિ'ની રચના

મુખ્યમંત્રીએ મહેસૂલ વિભાગની ઉચ્ચસ્તરીય બેઠકમાં આદેશ આપ્યો છે કે દરેક જિલ્લામાં કલેક્ટરની અધ્યક્ષતામાં એક વિશેષ સમિતિ બનાવવામાં આવે. આ સમિતિ જમીન માપણી અને ક્ષતિ સુધારણાની કામગીરી પર સીધી દેખરેખ રાખશે. આ સમિતિમાં નીચે મુજબના અધિકારીઓનો સમાવેશ થશે:

• નિવાસી અધિક કલેક્ટર અને જમીન દફતરના નાયબ નિયામક (SLR)
• પ્રાંત અધિકારી અને DILR
• મામલતદાર અને તાલુકા વિકાસ અધિકારી (TDO)
• જમીન સંપાદન અધિકારી અને સરદાર સરોવર પુન:વસવાટ એજન્સીના પ્રતિનિધિ

અરજીઓના વર્ગીકરણ માટે 7 કેટેગરી નક્કી કરાઈ

જમીન માપણીમાં રહેલી ભૂલોના વ્યવસ્થિત નિકાલ માટે મહેસૂલ વિભાગે અરજીઓને 7 અલગ-અલગ શ્રેણીમાં વહેંચી છે:

'મોબાઈલ મેજિસ્ટ્રેટ કોર્ટ' દ્વારા સ્થળ પર જ નિકાલ

આ નિર્ણયની સૌથી મહત્વની બાબત એ છે કે હવે ખેડૂતોએ કચેરીએ જવાની જરૂર નહીં પડે. મુખ્યમંત્રીએ TDO અને મામલતદારોને વધુ સત્તા આપી છે. હવે 'મોબાઈલ મેજિસ્ટ્રેટ કોર્ટ સમિતિ' બનાવવામાં આવશે, જે ગુજરાત જમીન મહેસૂલ કાયદાની કલમ 119, 120 અને નિયમ 21 મુજબ સીધા ખેતર કે સ્થળ પર જઈને કાયદેસરની કાર્યવાહી કરી પ્રશ્નનો નિકાલ લાવશે.

સરકારે કહ્યું હતું કે, આ નવી વ્યવસ્થાથી લોકોના સમય અને શક્તિની બચત થશે અને વહીવટી પ્રક્રિયામાં વધુ પારદર્શિતા આવશે.

રાજ્ય સરકારે કાયદો અને વ્યવસ્થાની સ્થિતિને વધુ મજબૂત બનાવવાના હેતુથી ગુજરાત પોલીસ બેડામાં મોટો ફેરફાર કર્યો છે. મધ્યરાત્રિએ જાહેર કરાયેલા એક નોટિફિકેશન મુજબ, રાજ્યના 37 જેટલા IPS અધિકારીઓની બદલી અને નિમણૂક કરવામાં આવી છે. આ બદલાવમાં સ્ટેટ મોનિટરિંગ સેલ (SMC)ના વડા નિર્લિપ્ત રાયને રાજકોટ રેન્જ IG તરીકે નવી જવાબદારી સોંપાઈ છે, જ્યારે CBIનો બહોળો અનુભવ ધરાવતા રાઘવેન્દ્ર વત્સને અમદાવાદ રેન્જ IG અને ગગનદીપ ગંભીરને SMCનો વધારાનો ચાર્જ સોંપવામાં આવ્યો છે.

મુખ્ય બદલીઓ અને નિમણૂકો:

શમશેર સિંઘ: સિનિયર IPS અધિકારી શમશેર સિંઘને નવી જવાબદારી સોંપવામાં આવી છે. તેમને સિવિલ ડિફેન્સ અને હોમગાર્ડના ચીફ તરીકે નિયુક્ત કરવામાં આવ્યા છે.

નિર્લિપ્ત રાય: કડક છબી ધરાવતા અધિકારી નિર્લિપ્ત રાયને રાજકોટ રેન્જની મહત્વની જવાબદારી સોંપવામાં આવી છે. તેઓ અગાઉ સ્ટેટ મોનિટરિંગ સેલ (SMC)માં કાર્યરત હતા.

ગગનદીપ ગંભીર: તેમને સ્ટેટ મોનિટરિંગ સેલ (SMC) ના વડા તરીકે નિયુક્ત કરવામાં આવ્યા છે.

પરિક્ષિતા રાઠોડ: તેમને નવી રચાયેલી બનાસકાંઠા રેન્જના આઈજી (IG) તરીકે મોટી જવાબદારી સોંપાઈ છે.

વિધિ ચૌધરી: અમદાવાદ શહેરના એડિશનલ કમિશનર પદેથી તેમને પંચમહાલ-ગોધરા રેન્જના ડીઆઈજી (DIG) તરીકે મૂકવામાં આવ્યા છે.

નવી રેન્જની રચના

રાજ્ય સરકારે વહીવટી સરળતા માટે બનાસકાંઠાને નવી રેન્જ તરીકે જાહેર કરી છે, જેનાથી હવે ગુજરાતમાં કુલ 10 પોલીસ રેન્જ કાર્યરત થશે.

આ ફેરફારો આગામી સ્થાનિક સ્વરાજ્યની ચૂંટણીઓ અને વહીવટી કાર્યક્ષમતા વધારવા માટે લેવામાં આવ્યા હોવાનું મનાય છે.

અન્ય બદલી/બઢતી

IPS ગૌતમ પરમાર IG CID ક્રાઇમ બન્યા

બિપિન આહિરેને IG સાયબર સેન્ટર ઓફ એક્સલન્સમા મુકાયા

પી.એલ. મલની ACBમાં એડિશનલ ડાયરેક્ટર તરીકે બદલી

નરેન્દ્ર ચૌધરીની સ્ટેટ IBમાં બદલી

એ.જી.ચૌહાણની JCP ટ્રાફિક અમદાવાદમાં બદલી

કે.એન.ડામોરની CID ક્રાઇમમાં બદલી

મકરંદ ચૌહાણ કાયદો અને વ્યવસ્થા ગાંધીનગર DIGP

વિશાલ વાઘેલા DIGP સ્ટેટ મોનીટરીંગ સેલ

લીના પાટીલ પ્રિન્સીપાલ કરાઈ તાલીમ શાળા

દીપક મેઘાણી ACBમા જોઇન્ટ ડાયરેક્ટર બન્યા

મહેન્દ્ર બગરિયા JCP સુરતમા બદલી

હિતેશ જોઈશર IB મા મુકાયા

તરુણ દુગ્ગલ એડિશનલ કમિશનર અમદાવાદ શહેર એડમિન

ચૈતન્ય માંડલિક રાજકોટ શહેર એડિ. કમિ, ક્રાઈમ ટ્રાફિક

સરોજ કુમારી DIG જેલ વડોદરા

રાજેન્દ્રસિંહ ચુડાસમા DIGP જૂનાગઢ

આર પી બારોટ DIGP જેલ અમદાવાદ

જી.એ.પંડ્યા DIGP જેલ રાજકોટ

આર ટી શુશ્રા સ્પેશિયલ બ્રાન્ચ અમદાવાદ

સુધા પાંડે DIGP હથિયારી એકમ વડોદરા

સુજાતા મજમુદાર DIGP હથિયારી એકમ ગાંધીનગર

સુધીર દેસાઈ એડિશનલ કમિશનર વડોદરા શહેર

બલરામ મીણા સ્પેશિયલ કમિશનર સુરત

એસ વી પરમાર જેસીપી ટ્રાફિક સુરત

એ એમ મુનિયા DIGP કોસ્ટલ સિક્યુરિટી

વાબાંગ ઝમીરને વેઇટિંગ ફોર પોસ્ટિંગ

ગુજરાતમાં છેલ્લા કેટલાક સમયથી મંત્રીઓ અને ધારાસભ્યોને સરકારી અધિકારીઓ ગાંઠતા ન હોવાની અને જિલ્લાના પ્રવાસ દરમિયાન માન સન્માન ન જળવાતું હોવાની ફરિયાદો ઉઠી હતી. સરકારે આ બાબતને ગંભીરતાથી લઈ એક પરિપત્ર જાહેર કર્યો છે. સૂચનાઓનો ભંગ કરનાર સામે શિસ્તભંગની કાર્યવાહી કરવાનો પણ ઉલ્લેખ કરવામાં આવ્યો છે.

મંત્રીઓને તેમના જિલ્લા પ્રવાસના કાર્યક્રમ દરમિયાન ગરિમા પૂર્વક આવકાર આપવો, તેમની રજૂઆતોને તાત્કાલિક સાંભળવી, વિવેકપૂર્ણ વહેવાર કરવો અને સરકારી કાર્યક્રમોમાં તેમને આમંત્રણ આપવા.

સવાલ એ છે કે ગુજરાતમાં માલિક કોણ અને સેવક કોણ એ જ ખબર નથી પડતી. સરકારે આવો પરિપત્ર બીજા વખત જાહેર કર્યો છે.

જો કે જે જન પ્રતિનિધીઓ પ્રજાની વચ્ચે જતા નથી એવા લોકોને જ અધિકારીઓ ગાંઠતા નથી.

રાજ્યના સરકારી અધિકારીઓ અને કર્મચારીઓ માટે રાહતના સમાચાર સામે આવ્યા છે. ગુજરાત સરકારના ગૃહ વિભાગ દ્વારા એક મહત્વપૂર્ણ પરિપત્ર જાહેર કરવામાં આવ્યો છે, જે મુજબ હવે કોઈપણ સરકારી કર્મચારી વિરુદ્ધ પ્રાથમિક તપાસ વગર સીધી પોલીસ ફરિયાદ (FIR) નોંધી શકાશે નહીં.

શું છે નવો નિયમ?

ગૃહ વિભાગના આદેશ અનુસાર, જો કોઈ વ્યક્તિ સરકારી કર્મચારી સામે ફરિયાદ કરવા પોલીસ સ્ટેશન પહોંચે, તો પોલીસે તુરંત ગુનો નોંધવાને બદલે પહેલા પ્રાથમિક તપાસ અને ચકાસણી કરવી ફરજિયાત રહેશે. તપાસ દરમિયાન જો પોલીસને પૂરતા પુરાવા મળે અને એવું સાબિત થાય કે ખરેખર ગુનો બને છે, તો જ કાયદેસરની FIR નોંધી શકાશે.

સરકારે કેમ લેવો પડ્યો આ નિર્ણય?

સરકારના ધ્યાનમાં આવ્યું છે કે અનેક કિસ્સાઓમાં અંગત અદાવત અથવા અધિકારીઓને દબાણમાં લાવવા માટે ખોટી ફરિયાદો કરવામાં આવે છે. આ નિર્ણય પાછળના મુખ્ય કારણો નીચે મુજબ છે:

• ખોટી હેરાનગતિ અટકાવવા: અનેક કિસ્સાઓમાં પાયાવિહોણી ફરિયાદો દ્વારા પ્રમાણિક અધિકારીઓને નિશાન બનાવવામાં આવતા હતા.
• નૈતિક મનોબળ જાળવવા: જ્યારે કોઈ અધિકારી સામે ખોટી ફરિયાદ થાય અને તે મીડિયા કે સોશિયલ મીડિયા પર વાયરલ થાય, ત્યારે તેની સામાજિક પ્રતિષ્ઠા અને મોરલ પર નકારાત્મક અસર પડે છે.
• નિર્ભય કામગીરી: ખોટી ફરિયાદોના ડરથી અધિકારીઓ નિર્ણય લેવામાં ખચકાતા હતા, જેના કારણે સરકારી કામકાજમાં ઉદાસીનતા આવતી હતી. હવે અધિકારીઓ આત્મવિશ્વાસ સાથે ફરજ બજાવી શકશે.

વહીવટી તંત્રમાં સુરક્ષાનું વાતાવરણ

ગૃહ વિભાગના આ પગલાથી વહીવટી તંત્રમાં કાર્યક્ષમતા વધશે તેવી અપેક્ષા રાખવામાં આવી રહી છે. હવેથી કોઈપણ રજૂઆત પર સીધો ગુનો નોંધવાને બદલે તટસ્થ તપાસ કરવામાં આવશે, જેથી 'દૂધનું દૂધ અને પાણીનું પાણી' થઈ શકે અને કોઈ નિર્દોષ અધિકારીએ ખોટી રીતે પરેશાન થવું ન પડે.

ગુજરાતના મુખ્યમંત્રી ભૂપેન્દ્ર પટેલ કે લોકો તેમને દાદાના નામે પણ ઓળખે છે. દાદાને મૃદુ સ્વભાવના સાવ નિખાલસ અને ધાર્મિક માણસ તરીકે કહેવાય છે. પરંતુ તેમણે રાજ્યના કલેકટરોની બેઠકમાં કડક સ્વભાવનો પરિચય આપ્યો હતો. આ બેઠકમાં મુખ્યમંત્રીએ બેઠક પહેલા તમામ જિલ્લા કલેકટર્સના ફોન મુકાવી દીધા હતા.

દાદાએ કહ્યું કે, સરકાર પાસે પૈસાની કોઇ કમી નથી, પરંતુ  સમય પર લોકોના કામ થતા નથી. તેમણે કલેકટર્સને કહ્યું કે, નાના નાના કામો માટે લોકોને ગાંધીનગર સુધી ધક્કા ન ખવડાવો એ કામો તમારા લેવલ પર પતાવી દો.

તેમણે કહ્યુ કે, એ. સી ચેમ્બરમાંથી બેસીને આદેશો આપવાને બદલે કલેકટર્સ જાતે ગ્રાઉન્ડ લેવલ પર જાય અને લોકોની મુશ્કેલી સમજે.

ગુજરાતમાં વહીવટી તંત્ર અને જનપ્રતિનિધિઓ વચ્ચેનો સંઘર્ષ હવે ચરમસીમાએ પહોંચ્યો છે. વડોદરા જિલ્લાના ભાજપના જ 5 ધારાસભ્યોએ મુખ્યમંત્રી ભૂપેન્દ્ર પટેલને એક તીખો પત્ર લખીને સરકારી અધિકારીઓની મનસ્વી કાર્યપદ્ધતિ સામે ગંભીર સવાલો ઉઠાવ્યા છે. ધારાસભ્યોએ પત્રમાં આક્રોશ વ્યક્ત કરતા લખ્યું છે કે, સરકારી કચેરીમાં સામાન્ય માણસનું કામ કરાવવું એ હવે જાણે યુદ્ધ લડવા સમાન બની ગયું છે.

કોણે લખ્યો પત્ર?

મુખ્યમંત્રીને પાઠવવામાં આવેલા આ પત્રમાં વડોદરા જિલ્લાના પાંચ ધારાસભ્યોની સહી છે:

1. કેતન ઈનામદાર (સાવલી)
2. શૈલેષ મહેતા - સોટ્ટા (ડભોઈ)
3. ધર્મેન્દ્રસિંહ વાઘેલા (વાઘોડિયા)
4. અક્ષય પટેલ (કરજણ)
5. ચૈતન્યસિંહ ઝાલા (પાદરા)

પત્રના મુખ્ય અને આકરા મુદ્દાઓ:

• અધિકારીઓની દાદાગીરી: ધારાસભ્યોએ આરોપ લગાવ્યો છે કે કલેક્ટર, ડીડીઓ અને પોલીસ કમિશનર જેવા ઉચ્ચ અધિકારીઓ જમીની હકીકત જોયા વગર માત્ર એસી ચેમ્બરમાં બેસીને વીડિયો કોન્ફરન્સ દ્વારા સરકારને 'ગુલાબી ચિત્ર' બતાવે છે.
• લોકોને અપમાનિત કરવાનું વલણ: પત્રમાં એવો ચોંકાવનારો ઉલ્લેખ છે કે જ્યારે કોઈ નાગરિક ધારાસભ્યની ભલામણ લઈને જાય છે, ત્યારે અધિકારીઓ પ્રજાને એવું પૂછે છે કે - તમે ધારાસભ્યની મદદ કેમ માંગી? આ પ્રકારની માનસિકતાથી સરકારની છબી ખરડાઈ રહી હોવાનો દાવો કરાયો છે.
• અંધાધૂંધ વહીવટ: ધારાસભ્યોએ રજૂઆત કરી છે કે અધિકારીઓ પોતાને જ 'સરકાર' સમજી રહ્યા છે અને જનપ્રતિનિધિઓનું સાંભળતા નથી. પ્રજાના કામો તંત્રના કાન સુધી પહોંચતા જ નથી.

કડક પગલાની માંગ

ધારાસભ્યોએ મુખ્યમંત્રીને વિનંતી કરી છે કે જે અધિકારીઓ મનસ્વી રીતે વર્તે છે તેમને સ્પષ્ટ સૂચના આપવામાં આવે. જનપ્રતિનિધિઓ દ્વારા સૂચવાયેલા લોકહિતના કામોને પ્રાથમિકતા મળે અને બેજવાબદાર અધિકારીઓ સામે કડક પગલાં ભરવામાં આવે તેવી માંગ કરવામાં આવી છે.

સરકાર માટે ચિંતાનો વિષય

રાજ્યમાં ભાજપની જ સરકાર હોવા છતાં, શાસક પક્ષના જ ધારાસભ્યોએ જ્યારે લેખિતમાં આટલી ગંભીર રજૂઆત કરવી પડી હોય, ત્યારે સચિવાલયથી લઈને સ્થાનિક વહીવટી તંત્રમાં ફફડાટ વ્યાપી ગયો છે. અગાઉ મૌખિક રજૂઆતો છતાં કોઈ ઉકેલ ન આવતા આખરે ધારાસભ્યોએ પરાસ્ત્ર છોડ્યું હોવાનું મનાય છે.

કેન્દ્ર સરકારે કહ્યું કે, 2025માં સરકારે એવા 8 ફેરફારો કર્યા છે જેની લોકોની જિંદગી પર સારી અસર પડી છે.

સરકારે કહ્યું કે, મજૂર કાયદામા 29 જુના કાયદાને બદલીને 4 નવા મજૂર કોડસ લાવવામાં આવ્યા જેને કારણે કામદારોને વળતર, સુરક્ષા અને ફેમિલીને સમય પણ આપી શકે એવો નિર્ણય લીધો. GSTનું સરળીકરણ કર્યું જેને લીધે લોકોને સસ્તી વસ્તુઓ મળી. બજેટમાં આવકવેરાની મર્યાદા 12 લાખની કરી જેને લીધે લોકોની બચત થઇ.

મનરેગાનું નામ બદલીને  VB G RAMJI કર્યું જેમાં કામદારોને 100 કલાકને બદલે 125 કલાકની મર્યાદા કરી જેથી મજૂરોને ફાયદો થશે. બિલ્ડીંગ પરમીટ કલીયરન્સના નિયમો હળવા કર્યા. MSME રોકાણ અને ટર્મઓવર મર્યાદ વધારવામાં આવી. વીમા ક્ષેત્રે 100 ટકા FDIને મંજૂરી આપવામાં આવી જેને લીધે પ્રીમિયમ ઘટશે. અનેક દેશો સાથે કરાર કરવામાં આવ્યા.

ગુજરાત પોલીસે 8 ડિસેમ્બરે સાયબર ક્રાઇમ સામે લડવા માટે ઓપરેશન મ્યુલ હન્ટ લોંચ કર્યુ અને 9 ડિસેમ્બર નવસારી પોલીસે સાયબર ગુના સાથે સંકળાયેલા 5ની ધરપકડ કરી છે.

મ્યુલનો અર્થ થાય છે ગધેડો, ખચ્ચર. મતલબ કે ફ્રોડ કરનારાઓ એવા લોકોને શોધે છે જેમના બેંક ખાતાનો ઉપયોગ કરીને ફ્રોડકરીને જે કરોડોની કમાણી કરી હોય તે નાંખી શકાય. એમાં કેટલાંક લોકો લાલચમાં આવીને પોતાના ખાતા ભાડે આપી દે છે અને કેટલાંક લોકોને તો ખબર જ નથી હોતી કે તેમના ખાતામાં પૈસા જમા થઇને ઉપડી પણ જાય છે.

 છેલ્લાં કેટલાંક સમયથી જુદા જુદા 20 પ્રકારના ફ્રોડ થઇ રહ્યા છે. માત્ર 2025માં જ ગુજરાતમાં 1000 કરોડથી વધુના ફ્રોડ થયા છે અને આ વર્ષમાં 1.42 લાખ લોકોએ સાયબર ફ્રોડની ફરિયાદ નોંધાવી છે.

ગુજરાત સરકારે એક રાજપત્ર બહાર પાડ્યો છે એટલે કે કાયદો બનાવવા પહેલાનું આ પગલું છે. જો આ રાજપત્ર કાયદો બની જશે તો ગામના સરપંચ,તાલુકા, જિલ્લા પંચાયતના સભ્ય અને પ્રમુખોને એક ઝાટકે સસ્પેન્ડ કરી શકાશે. આવા ચૂંટાયેલા પ્રતિનિધિઓ સામે કોઇ પણ ગેરરીતીની ફરિયાદ થશે તો પગલાં લેવાશે. કોઇ પણ સમાજ, સંસ્થા કે રાજ્યનો વ્યક્તિ જો ફરિયાદ કરશે તો પણ અધિકારી પગલા લઇ શકે છે.

સરકાર જિલ્લા વિકાસ અધિકારી એટલે કે DDOને આ સત્તા આપશે. આનો મતલબ એ થાય છે કે ચૂંટાયેલા પ્રતિનિધિઓ સામે પગલા લેવાની અધિકારીઓને સત્તા મળી જશે. આ બાબતે ગણગણાટ અને વિરોધ પણ શરૂ થઇ ગયો છે. અધિકારીઓ મનમાની કરી શકે છે એવી શંકા ઉભી થઇ છે.

ગુજરાતના યુવાનો માટે મોટા અને આનંદના સમાચાર આવ્યા છે. ગુજરાત પોલીસ ભરતી બોર્ડ દ્વારા પોલીસ દળમાં વર્ગ-3ની વિવિધ જગ્યાઓ સીધી ભરતીથી ભરવા માટેની સત્તાવાર જાહેરાત પ્રસિદ્ધ કરવામાં આવી છે. આ જાહેરાત અનુસાર રાજ્યમાં કુલ 13,591 જેટલી ખાલી જગ્યાઓ પર ભરતી કરવામાં આવશે.

કંઈ પોસ્ટ માટે કેટલી જગ્યાઓ?

ભરતી બોર્ડ દ્વારા બે મુખ્ય કેડર માટે જાહેરાત આપવામાં આવી છે: (1) PSI કેડર અને (2) લોકરક્ષક કેડર.

1. PSI કેડર (PSI Cadre): પોલીસ સબ ઇન્સ્પેક્ટર (PSI) કક્ષાની કુલ જગ્યાઓ માટે નીચે મુજબ વર્ગીકરણ છે:

• બિન હથિયારી પોલીસ સબ ઇન્સ્પેક્ટર-659 જગ્યા
• હથિયારી પોલીસ સબ ઇન્સ્પેક્ટર-129 જગ્યા
• જેલર ગ્રુપ 2-70 જગ્યા

2. લોકરક્ષક કેડર (Lokrakshak Cadre): લોકરક્ષક દળમાં કુલ 12,733 જગ્યાઓ પર ભરતી થશે, જેનું વિવરણ નીચે મુજબ છે:

• બિન હથિયારી પોલીસ કોન્સ્ટેબલ: 6,942
• હથિયારી પોલીસ કોન્સ્ટેબલ: 2,458
• હથિયારી પોલીસ કોન્સ્ટેબલ (SRPF): 3,002
• જેલ સિપોઈ (પુરુષ): 300
• જેલ સિપોઈ (મહિલા/મેટ્રન): 31

શૈક્ષણિક લાયકાત:

• PSI કેડર માટે: માન્ય યુનિવર્સિટીમાંથી સ્નાતક (Bachelor's Degree) ની પદવી હોવી જરૂરી છે.
• લોકરક્ષક કેડર માટે: ઉમેદવારે ધોરણ 12 (Higher Secondary School Certificate Examination) પાસ કરેલું હોવું જોઈએ અથવા સરકાર માન્ય સમકક્ષ લાયકાત ધરાવતા હોવા જોઈએ.

મહત્વની તારીખો: ઉમેદવારોએ ખાસ નોંધ લેવી કે આ ભરતી માટેની ઓનલાઈન અરજી પ્રક્રિયા OJAS વેબસાઈટ પર નીચે મુજબના સમયગાળા દરમિયાન કરવાની રહેશે:

• અરજી શરૂ થવાની તારીખ: 03/12/2024 (બપોરે 14:00 કલાકથી)
• અરજી કરવાની છેલ્લી તારીખ: 23/12/2024 (રાત્રે 23:59 કલાક સુધી)

અરજી કંઈ રીતે કરવી?

લાયકાત ધરાવતા અને ઈચ્છુક ઉમેદવારોએ https://ojas.gujarat.gov.in વેબસાઈટ પર જઈને ઓનલાઈન અરજી કરવાની રહેશે. ભરતી અંગેની વધુ વિગતવાર સૂચનાઓ અને નિયમો પણ આજ વેબસાઈટ પર તેમજ ભરતી બોર્ડની વેબસાઈટ https://gprb.gujarat.gov.in પર 03/12/2024 ના રોજ મૂકવામાં આવશે.

ખાસ સૂચના: અરજી કન્ફર્મ થયા બાદ તેની પ્રિન્ટ કાઢીને ઉમેદવારે પોતાની પાસે રાખવાની રહેશે. પોસ્ટ કે કુરિયર દ્વારા મોકલેલી અરજીઓ સ્વીકારવામાં આવશે નહીં.

આ ભરતી પ્રક્રિયાના અધ્યક્ષ અને પોલીસ મહાનિદેશક નિરજા ગોટરૂ (IPS) દ્વારા આ જાહેરાત પ્રસિદ્ધ કરવામાં આવી છે. જે ઉમેદવારો પોલીસ વિભાગમાં જોડાઈને દેશસેવા કરવા માંગે છે તેમના માટે આ એક સુવર્ણ તક છે.

8 નવેમ્બરના રોજ ભારતના કેબિનેટ સચિવ  રાજીવ ગૌબાએ ગુજરાતમાં આયોજિત એક કાર્યક્રમમાં જણાવ્યું હતું કે, વર્ષ 2047 સુધીમાં ભારતને વિકસિત રાષ્ટ્ર બનાવવા માટે ગુજરાતની વહીવટી કુશળતા દેશભરમાં અપનાવવી જરૂરી છે. તેમણે કહ્યું, “વિકસિત ભારતનું સ્વપ્ન વિકસિત ગુજરાત વિના પૂરું થઈ શકે નહીં. ગુજરાતે વ્યાપાર સરળતા, મજબૂત ઈન્ફ્રાસ્ટ્રક્ચર અને ઝડપી નિર્ણય લેવાની પ્રક્રિયામાં દેશને આગળ રાખ્યું છે.”

તેમણે વહીવટમાં સુધારા માટે ચાર મુખ્ય સૂચનો આપ્યા:

1. ટેક્નોલોજીનો વધુ ઉપયોગ – ડિજિટલ સિસ્ટમથી કામ ઝડપી થાય.
2. અધિકારીઓની તાલીમ – નવી પદ્ધતિઓ શીખવવી.
3. ફરિયાદ નિવારણ – લોકોની સમસ્યા તરત હલ કરવી.
4. નિયમો સરળ બનાવવા – વ્યાપાર અને રોકાણ માટે અનુકૂળ વાતાવરણ.

તેમણે ગુજરાતના મોડેલને દેશના અન્ય રાજ્યો માટે પ્રેરણારૂપ ગણાવ્યું. તેમણે કહ્યું, “ગુજરાત જેવી વહીવટી કાર્યક્ષમતા દેશભરમાં ફેલાવીએ તો 2047નું લક્ષ્ય સરળતાથી પૂરું થશે.”

દિવાળી અગાઉ જ ગુજરાતના રાજકારણમાં મોટી ઉથાપલાથલ જોવા મળી હતી. ભુપેન્દ્ર પટેલની કેબિનેટમાં મોટાપાયે બદલાવ કરવામાં આવ્યો હતો હતો. મંત્રી મંડળના તમામ મંત્રીઓના રાજીનામાં લઈ લેવાયા હતા અને ત્યારબાદ કેટલાક મંત્રીઓને રિપીટ કરીને નવું કેબિનેટ બનાવાયું હતું. તો હવે એવા સમાચાર મળી રહ્યા છે કે ગુજરાતનાં પ્રશાસન અને પોલીસ તંત્રમાં મોટા ફેરફાર થવાની શક્યતા છે.

કેબિનેટના મંત્રીની માગણી પ્રમાણેના અધિકારીઓ મળવા મુશ્કેલ બની રહ્યા છે, પરંતુ ગુણદોષ અને કામના અનુભવને જોતા વિભાગોના સેક્રેટરીઓના હાલના પોર્ટફોલિયોમાં મોટાપાયે બદલીઓની સંભાવના દેખાઈ રહી છે. ખાસ કરીને નાયબ મુખ્યમંત્રી હર્ષ સંઘવી ઉપરાંત નવા આવેલા મંત્રીઓના વિભાગોમાં પરિવર્તન થઈ શકે છે. આગામી વર્ષે રાજ્યમાં સ્થાનિક સ્વરાજ્યની ચૂંટણી થવાની છે, ત્યારે જિલ્લા પ્રશાસન અને પોલીસ વિભાગમાં બદલાવ થઈ છે. ગૃહ વિભાગના કેટલાક અધિકારીઓ પાસે ડબલ ચાર્જ છે, સીનિયર અધિકારીઓને 3 કે તેથી વધુ વર્ષ થઇ ચૂક્યાં હોય તેમની બદલી થઈ શકે છે.

ભૂપેન્દ્ર પટેલની કેબિનેટમાં 12 એવા ચહેરા છે કે જેઓ પ્રથમવાર ધારાસભ્ય બન્યા છે અને પહેલી જ ટર્મમાં મંત્રીપદ મળ્યું છે એટલે તેઓ તેમના વિભાગના અધિકારીઓ સાથે સંકલન બનાવી રહ્યા છે. ગુજરાતના વિવિધ વિભાગોમાં ફરજ બજાવતા 5 પ્રિન્સિપલ સેક્રેટરીને ટૂંકસમયમાં એડિશનલ ચીફ સેક્રેટરી (ACS)ના પ્રમોશન થઈ શકે છે. સીનિયર અધિકારીઓની નિવૃત્તિ અને નોકરીનો સમયગાળો જોઈને રાજ્ય સરકાર આ પ્રમોશન આપતી હોય છે.

 આ વખતે 1996ની બેચના મોના ખંધાર, ડૉ. ટી. નટરાજન, રાજીવ ટોપનો, મમતા વર્મા અને મુકેશકુમારને પ્રમોશન મળી શકે છે. જો કે મોના ખંધારનું સેન્ટ્રલ ડેપ્યુટેશન પણ પેન્ડિંગ છે. vtvgujarati.com રિપોર્ટ મુજબ 2026ની શરૂઆતમાં આ અધિકારીઓને પ્રમોશન મળી શકે છે. છેલ્લે જુલાઇ 2025માં નિવૃત્ત થયેલા ACS કક્ષાના અધિકારીઓમાં જેપી ગુપ્તા અને કમલ દાયાણી બાદ હવે નવેમ્બરમાં 1989 બેચના સુનયના તોમર અને ડિસેમ્બરમાં 1991ની બેચના એસ.જે. હૈદર નિવૃત્ત થઇ રહ્યા છે, જેથી પદો પર વધુ જગ્યાઓ ખાલી પડી રહી છે. ACSની જેમ 2001ની બેચના અધિકારીઓને પ્રિન્સિપલ સેક્રેટરીના પ્રમોશન આપવામાં આવે તેવી શક્યતા છે. એટલે કે આગામી 1-2 મહિનામાં રાજ્યના વહીવટી તંત્રમાં મોટા ફેરફારો શક્યતા છે.

ગુજરાતમાં અધિકારીઓના ડેપ્યુટેશનની વાત સામાન્ય છે, પરંતુ રાજ્યમાં અધિકારીઓની ઘટ જોતા ખૂબ ઓછા અધિકારીઓને દિલ્હી દરબારમાં મોકલવાની શક્યતા છે. કેન્દ્રમાં ડેપ્યુટેશન ધરાવતા બે અધિકારી- ઇનસ્પેસ, અમદાવાદમાં જોઇન્ટ સેક્રેટરી લોચન સેહરા અને કેન્દ્રના ડિફેન્સ મંત્રાલયમાં જોઇન્ટ સેક્રેટરી તરીકે ફરજ બજાવતા ડો. અજયકુમાર તો પાછા આવી રહ્યાં છે, તો એલ.એ. જયપ્રકાશ શિવહરેનું પણ ડેપ્યુટેશન નક્કી છે. આ ઉપરાંત શાહમીના હુસેનનો માર્ગ સરળ થઈ રહ્યો છે. અન્ન અને નાગરિક પુરવઠાના પ્રિન્સિપલ સેક્રેટરી મોના ખંધાર ડેપ્યુટેશન પર નવી દિલ્હી જઇ શકે છે. આ અગાઉ પણ તેઓ ડેપ્યુટેશન પર જઇ આવ્યા છે. આ સાથે એવું ચર્ચાઇ રહ્યું છે કે કેન્દ્રમાં ડેપ્યુટેશન માટે ગયેલા અજય ભાદુ અને સંધ્યા ભુલ્લર પણ પાછા આવે તેવી શક્યતાને નકારી શકાય નહીં!