યોગ અને આયુર્વેદ પછી, રામદેવ હવે વીમા ઉદ્યોગમાં પ્રવેશ કરી રહ્યા છે. વીમા નિયમનકારી અને વિકાસ સત્તામંડળ (IRDAI)એ પતંજલિ આયુર્વેદ અને ધર્મપાલ સત્યપાલ ગ્રુપ (DS ગ્રુપ)ને વીમા કંપની ખરીદવા માટે મંજૂરી આપી છે. મીડિયા સૂત્રોના એક અહેવાલ મુજબ, IRDAIએ આશરે 4,500 કરોડ રૂપિયામાં મેગ્મા જનરલ ઇન્શ્યોરન્સના સંપાદનને મંજૂરી આપી છે. આનાથી રામદેવના પતંજલિ આયુર્વેદ માટે નાણાકીય સેવા ક્ષેત્રમાં પ્રવેશવાનો માર્ગ મોકળો થયો છે.

હર્બલ અને અન્ય FMCG ઉત્પાદનોનું ઉત્પાદન અને માર્કેટિંગ કરતી કંપની પતંજલિ, બિન-જીવન વીમા કંપનીમાં 73.6 ટકા ભાગીદારી હિસ્સો મેળવશે.

રજનીગંધા પાન મસાલાના નિર્માતા DS ગ્રુપ, મેગ્મામાં આશરે 24.5 ટકા હિસ્સો હસ્તગત કરશે. અદાર પૂનાવાલાની માલિકીની સનોતી પ્રોપર્ટીઝ, સેલિકા ડેવલપર્સ અને જગુઆર એડવાઇઝરી સર્વિસીસ સહીત શેર વેચનારા શેરધારકો પાસેથી DS ગ્રુપ હિસ્સો હસ્તગત કરશે. આ વ્યવહાર પહેલા, સનોતીની પાસે મેગ્મામાં 72.4 ટકા હિસ્સો હતો.

28 જુલાઈના રોજ મળેલી મંજૂરીની શરતો અનુસાર, પતંજલિ બિન-જીવન વીમા કંપનીના પ્રમોટર બનશે અને કંપનીની નાણાકીય સ્થિરતા અને વૃદ્ધિને ટેકો આપવા માટે મૂડી રોકાણ કરવાનું ચાલુ રાખશે. DS ગ્રુપ સહ-રોકાણકાર તરીકે હસ્તગત કરનાર કન્સોર્ટિયમમાં જોડાયું છે.

કેરએજ રેટિંગ્સે માર્ચમાં જણાવ્યું હતું કે, મેગ્માનું કુલ ડાયરેક્ટ પ્રીમિયમ નાણાકીય વર્ષ 21 અને નાણાકીય વર્ષ 25 વચ્ચે 22 ટકાના ચક્રવૃદ્ધિ વાર્ષિક વૃદ્ધિ દરે વધીને રૂ. 3,334 કરોડ થયું છે. બીજી બાજુ, સામાન્ય વીમા ઉદ્યોગનો વાર્ષિક વિકાસ દર 10 ટકા હતો.

વીમા કંપનીએ નાણાકીય વર્ષ 2025માં રૂ. 1 કરોડનો નફો નોંધાવ્યો હતો, જ્યારે નાણાકીય વર્ષ 2024માં રૂ. 141 કરોડનું નુકસાન થયું હતું. કંપનીએ નાણાકીય વર્ષ 2026ના પ્રથમ 9 મહિનામાં રૂ. 27 કરોડનો ચોખ્ખો નફો નોંધાવ્યો હતો. વિવિધ શ્રેણીઓમાં 70થી વધુ ઉત્પાદનો સાથે, કંપની સામાન્ય વીમા ક્ષેત્રના તમામ મુખ્ય જોખમોને આવરી લેવા માટે વીમો ઓફર કરે છે.

આગળ જતાં, પતંજલિ આયુર્વેદ વીમા કંપની તેના ઉત્પાદન પોર્ટફોલિયોનું વિસ્તરણ કરશે અને સમગ્ર ભારતમાં, ખાસ કરીને શહેરી અને ગ્રામીણ બજારોમાં તેની પહોંચ વધારશે તેવી અપેક્ષા છે. પતંજલિ પાસે ગ્રામીણ બજારો સુધી પહોંચ સહિત વિશાળ વિતરણ નેટવર્ક છે. કંપનીના ઉત્પાદનો દેશભરમાં આશરે 2 લાખ કાઉન્ટર પર ઉપલબ્ધ છે.

E20 પેટ્રોલ જૂના કે નવા વાહનોને કોઈ નુકસાન પહોંચાડતું નથી. સરકાર આ મુદ્દા પર પોતાનો દાવો મજબૂતીથી રજૂ કરી રહી છે. ઇથેનોલ મિશ્રિત પેટ્રોલ (E20 પેટ્રોલ) માટે દલીલ કરતી કેન્દ્ર સરકારે જણાવ્યું હતું કે, જ્યારે મધ્ય પૂર્વ કટોકટીને કારણે વૈશ્વિક સ્તરે ક્રૂડ ઓઇલના ભાવ આસમાને પહોંચી રહ્યા હતા, ત્યારે ભારત સરકાર દ્વારા લાગુ કરાયેલ ઇથેનોલ નીતિએ મોંઘા પેટ્રોલની અસરથી સામાન્ય માણસને બચાવવામાં મહત્વપૂર્ણ ભૂમિકા ભજવી હતી.

આ આંકડા પેટ્રોલિયમ અને કુદરતી ગેસ રાજ્યમંત્રી સુરેશ ગોપી દ્વારા લોકસભામાં DMK સાંસદ દ્વારા પૂછવામાં આવેલા લેખિત પ્રશ્નના જવાબમાં રજૂ કરવામાં આવ્યા હતા. તેમણે જણાવ્યું હતું કે, મધ્ય પૂર્વ સંઘર્ષ દરમિયાન, જ્યારે ભારતીય ક્રૂડ બાસ્કેટની કિંમત પ્રતિ બેરલ 135 ડૉલરની આસપાસ પહોંચી હતી, ત્યારે દેશમાં પેટ્રોલની કિંમત પ્રતિ લિટર રૂ. 125 સુધી પહોંચી શકી હોત. જોકે, સરકારી નિર્ણયો, ક્રૂડ ઓઇલની સતત ઉપલબ્ધતા અને તેલ કંપનીઓ દ્વારા પ્રતિ લિટર રૂ. 70ના ભાવે ખરીદવામાં આવતા ઇથેનોલને કારણે, પેટ્રોલની કિંમત પ્રતિ લિટર માત્ર રૂ. 94.77 હતી.

સરકારે એવી ચિંતાઓ અને દાવાઓને પણ ફગાવી દીધા હતા કે, પેટ્રોલમાં વધુ પડતું ઇથેનોલ ભેળવવાથી જૂના વાહનોના એન્જિનને નુકસાન થઈ રહ્યું છે. બજારમાં E20 ઇંધણ રજૂ કરતા પહેલા, મંત્રાલયે ઓટોમોટિવ રિસર્ચ એસોસિએશન ઓફ ઇન્ડિયા (ARAI), સોસાયટી ઓફ ઇન્ડિયન ઓટોમોબાઇલ મેન્યુફેક્ચરર્સ (SIAM), ઇન્ડિયન ઓઇલ અને વાહન ઉત્પાદકો સાથે મળીને ટ્રાયલ કર્યા હતા. આ અભ્યાસો સાબિત કરે છે કે, E20 ઇંધણ જૂની કારના પ્રદર્શન અથવા ભાગોને અસર કરતું નથી.

મૂળ ડેટા સાથે દાવાઓને સમર્થન આપતા, મંત્રાલયે જણાવ્યું હતું કે, દેશમાં છેલ્લા સાડા ત્રણ વર્ષથી E15 પેટ્રોલનો ઉપયોગ થઈ રહ્યો છે, અને અઢી વર્ષથી વધુ સમયથી E19-E20 ઇંધણનો ઉપયોગ થઈ રહ્યો છે. હાલમાં, 20 કરોડથી વધુ ટુ-વ્હીલર અને 3 કરોડથી વધુ પેટ્રોલ કાર ઇથેનોલ-મિશ્રિત ઇંધણ પર ચાલી રહી છે. આટલા વ્યાપક ઉપયોગ છતાં, એન્જિન નિષ્ફળતાના કોઈ કેસ નોંધાયા નથી.

કાર ઉત્પાદકોના ડેટાનો ઉલ્લેખ કરીને, સરકારે એવો પણ દાવો કર્યો હતો કે વાહન જાળવણી ડેટામાં E20 ઇંધણને કારણે કાટ લાગવો, ઘસારો થવો અથવા વાહનના લાઈફ ટાઈમમાં ઘટાડો થવાની કોઈ ફરિયાદ બહાર આવી નથી. નાણાકીય વર્ષ 2025-26 દરમિયાન, એક મુખ્ય ઓટોમોબાઈલ ઉત્પાદકે આશરે 2.84 કરોડ વાહનોની સર્વિસિંગ કરી હતી. આમાંથી, 15 મિલિયન વાહનો E20 સુસંગત નહોતા. તેમ છતાં, કંપનીએ E20 સંબંધિત કોઈ ખામી, કાટ અથવા ભાગો પર ઘસારો નોંધાવ્યો નથી.

ઇથેનોલ ઉત્પાદન અંગેના પ્રશ્નોના જવાબમાં, પેટ્રોલિયમ મંત્રીએ જણાવ્યું હતું કે, જાહેર ક્ષેત્રની તેલ કંપનીઓ નફા માટે નહીં, પરંતુ દેશમાં પૂરતો પુરવઠો જાળવવા અને કૃષિ ક્ષેત્રને ટેકો આપવા માટે ઇથેનોલ ખરીદે છે. હાલમાં, 2025-26 ઇથેનોલ સપ્લાય વર્ષ (નવેમ્બર 2025થી ઓક્ટોબર 2026) માટે ઇથેનોલનો સરેરાશ ભાવ રૂ. 66.61 પ્રતિ લિટર નક્કી કરવામાં આવ્યો છે. GST અને પરિવહન ખર્ચ સહિત, તેલ કંપનીઓ માટે આ ખર્ચ આશરે રૂ. 71.1 પ્રતિ લિટર થાય છે.

જુલાઈ મહિનો પૂરો થવામાં ફક્ત એક દિવસ બાકી છે, અને ઓગસ્ટ મહિનાની શરૂઆત દેશભરમાં અનેક મોટા ફેરફારો સાથે થવાની છે. આ ફેરફારો રસોડાથી લઈને રોજિંદા વસ્તુઓની ખરીદી અને વેચાણ સુધીની દરેક વસ્તુને અસર કરશે.

જ્યાં એક બાજુ ઓઇલ માર્કેટિંગ કંપનીઓ 1 ઓગસ્ટે સુધારેલા LPG સિલિન્ડરના ભાવ જાહેર કરશે, ત્યારે TV, રેફ્રિજરેટર અને વોશિંગ મશીન સહિત વિવિધ FMCG ઉત્પાદનો વધુ મોંઘા થઈ શકે છે. એટલું જ નહીં, બેંકો અને રેલ્વે સંબંધિત મહત્વના નિયમોમાં પણ મોટા ફેરફારો જોવા મળશે.

દર મહિનાની પહેલી તારીખની જેમ, 1 ઓગસ્ટ, 2026ના રોજ, ઓઇલ માર્કેટિંગ કંપનીઓ સુધારેલા LPG સિલિન્ડરના ભાવ જાહેર કરશે. જુલાઈની શરૂઆત સાથે, કંપનીઓએ LPG સિલિન્ડરના ભાવમાં ઘટાડો જાહેર કર્યો હતો, પરંતુ આ ભાવ ફક્ત 19 કિલોગ્રામના કોમર્શિયલ LPG સિલિન્ડર માટે ઘટાડવામાં આવ્યા હતા. 14 કિલોગ્રામના LPG સિલિન્ડરના ભાવ એ જ રાખવામાં આવ્યા હતા, લોકો ઓગસ્ટની શરૂઆત સાથે ઘરેલુ સિલિન્ડરના ભાવમાં ફેરફારની અપેક્ષા રાખી રહ્યા છે.

LPG સિલિન્ડરના ભાવમાં ફેરફાર ઉપરાંત, ઓઇલ માર્કેટિંગ કંપનીઓ દર મહિનાની પહેલી તારીખે એવિએશન ટર્બાઇન ફ્યુઅલ (ATF) માટે પણ નવા ભાવ જાહેર કરે છે. ATFના ભાવમાં ફેરફારની સીધી અસર હવાઈ મુસાફરીના ખર્ચ પર પડે છે. તેથી, 1 ઓગસ્ટના રોજ ખબર પડશે કે આ ઘટાડાથી હવાઈ મુસાફરીના ખર્ચમાં ઘટાડો થશે કે ભાવ વધારાને કારણે તેમાં વધારો થશે.

આગામી ફેરફાર, 1 ઓગસ્ટ, 2026થી અમલમાં આવશે, તે રેલ મુસાફરો માટે છે. ભારતીય રેલ્વે તત્કાલ ટિકિટ બુકિંગ સંબંધિત નિયમોમાં ફેરફાર કરી રહી છે. આ ફેરફાર હેઠળ, ટોકન આપવાનો સમય હવે તત્કાલ ટિકિટ બુકિંગ ખુલવાની સાથે જોડાયેલો રહેશે, જેનાથી રિઝર્વેશન કાઉન્ટર પર ભીડ ઓછી થશે. આનાથી મુસાફરો માટે ટિકિટ બુકિંગ પણ સરળ બનશે. આ અગાઉ, મુસાફરોને ટોકન મેળવવા અને પછી ટિકિટ બુક કરવા માટે અલગ અલગ સમયે કાઉન્ટર પાસે જવું પડતું હતું.

ઓગસ્ટ મહિનાની શરૂઆત મોંઘવારીની અસર સાથે પણ થઈ શકે છે. તહેવારોની મોસમ દરમિયાન સવારની ચાથી લઈને કપડાં, TV, રેફ્રિજરેટર અને વોશિંગ મશીન સુધીની દરેક વસ્તુના ભાવ વધી શકે છે. બજાર નિષ્ણાતોના મતે, આગામી મહિનાથી અનેક ક્ષેત્રોમાં ભાવ વધવાની ધારણા છે. ચા, વાળનું તેલ અને સાબુ સહિત FMCG ઉત્પાદનોમાં 6-8 ટકાનો વધારો થઈ શકે છે. રેફ્રિજરેટર, વોશિંગ મશીન અને TV જેવી ઇલેક્ટ્રોનિક્સ વસ્તુઓ પણ 4-6 ટકા મોંઘી થઈ શકે છે. મેમરી ચિપ્સની વધેલી કિંમતને કારણે સ્માર્ટફોનના ભાવ પણ વધી શકે છે. આ ઉપરાંત, ઓટોમોબાઈલ કંપનીઓ કારના ભાવ વધારીને વધેલા ઇનપુટ ખર્ચનો બોજ તેમના ગ્રાહકો પર નાખી શકે છે.

ઘણી બેંકો 1 ઓગસ્ટ, 2026થી લાગુ થતી તેમની સેવા ફીમાં પણ સુધારો કરશે. તેમાંથી, ઉજ્જીવન સ્મોલ ફાઇનાન્સ બેંક 1 ઓગસ્ટથી તેના ગ્રાહકો માટે SMS ચેતવણી ચાર્જમાં ફેરફાર લાગુ કરી રહી છે. ફી હવે માસિક મર્યાદા સાથે 30 પૈસા પ્રતિ SMS હશે. આ દરમિયાન, બેંક ગ્રાહકોને સલાહ આપે છે કે, તેઓ ડેબિટ કાર્ડ જાળવણી ફી અથવા અન્ય સેવા શુલ્કમાં કોઈપણ ફેરફાર માટે તેમની બેંકમાં જઈને તપાસ કરી શકે છે.

બેંક ઓફ બરોડાના ગ્રાહકોનો પર્સનલ ડેટા અને બેંકના આંતરિક દસ્તાવેજો ડાર્ક વેબ પર લીક થઈ ગયા છે. દિવ્ય ભાસ્કરના અહેવાલમાં જણાવ્યા મુજબ કેશલેસ કન્ઝ્યુમરના સ્થાપક અને સાયબર સિક્યોરિટી રિસર્ચર શ્રીકાંત એલ અનુસાર, લીક થયેલા ડેટામાં ગ્રાહકોની પર્સનલ ડિટેલ્સ, ઓળખના દસ્તાવેજો, લોન સંબંધિત પેપર્સ અને બેંકના આંતરિક ઓડિટ રેકોર્ડ્સ શામેલ છે.

જો કે બેંક ઓફ બરાડો કે રિર્ઝવ બેંક ઓફ ઇન્ડિયાએ સત્તાવાર નિવેદન જારી કર્યા નથી. બેકં ઓફ બરોડાએ શેરબજારને પણ જાણકારી આપી નથી.

ડેટા લીકને કારણે ગ્રાહકો પર ગઠીયાઓના નકલી નામથી ફોન આવી શકે, દસ્તાવેજાને આધારે નકલી ખાતું કે નકલી લોન શકે છે.ગ્રાહકોએ મોબાઇલ બેકીંગ અને નેટ બેન્કિંગના પાસવર્ડ તાત્કાલિક બદલી નાંખવા જોઇએ.

ફેસ્ટિવ સીઝન ખાસ કરીને રક્ષાબંધન અગાઉ ભારતીય પોસ્ટ વિભાગે લાખો ગ્રાહકો માટે તેની સ્પીડ પોસ્ટ સેવાઓને સંચાલિત કરતા નિયમો અને દરોમાં મોટા ફેરફારો કર્યા છે. વિભાગે હવે સ્પષ્ટ કર્યું છે કે કયા સામાનને 'દસ્તાવેજો' માનવામાં આવશે   અને કોને  'પાર્સલ' શ્રેણીમાં રાખવામાં આવશે. આ સાથે જ, સ્પીડ પોસ્ટ સેવાઓ માટે એક નવી રેટ લિસ્ટ (ટેરિફ માળખું) સૂચિત કરવામાં આવી છે. જો તમે વારંવાર પોસ્ટ દ્વારા પત્રો, સત્તાવાર દસ્તાવેજો અથવા સામાન મોકલો છો, તો શિપમેન્ટ બુક કરતા પહેલા આ નવા નિયમોને સમજવા ખૂબ જરૂરી છે. આવો તમને પણ જણાવીએ કે આખરે ભારતીય પોસ્ટ દ્વારા કયા પ્રકારની માહિતીનું આપવામાં આવી છે.

પોસ્ટ વિભાગે પ્રથમ વખત 'દસ્તાવેજો'ની વ્યાખ્યા અધિસૂચિત કરી છે, જેમાં પત્રો, છાપેલી સામગ્રી અને સહાયક વસ્તુઓનો સમાવેશ થાય છે જેનું કોઈ પુનર્વેચાણ મૂલ્ય નથી. આવી વસ્તુઓ પર ઓછો પોસ્ટલ શુલ્ક લાગશે, જ્યારે અન્ય તમામ વસ્તુઓ 'પાર્સલ' શ્રેણી હેઠળ આવશે. આ સાથે જ વિભાગે છૂટક અને જથ્થાબંધ ગ્રાહકો માટે ‘સ્પીડ પોસ્ટ 24’ અને ‘સ્પીડ પોસ્ટ 48’ સેવાઓ માટેના દરો પણ અધિસૂચિત કર્યા છે; આ સેવાઓ અનુક્રમે 24 કલાક અને 48 કલાકની અંદર ડિલિવરીનું વચન આપે છે.

સૂચના અનુસાર, બેંકિંગ, નાણાકીય સેવાઓ અને વીમા (BFSI) ક્ષેત્ર સાથે સંબંધિત ઉત્પાદનો- જેમ કે વેલકમ કીટ, પત્રો, પાસબુક, ચેકબુક, બેંક સ્ટેટમેન્ટ, પ્લાસ્ટિક કાર્ડ અને ડેબિટ/ક્રેડિટ કાર્ડને દસ્તાવેજો તરીકે વર્ગીકૃત કરવામાં આવશે. આ ઉપરાંત PAN કાર્ડ, આધાર કાર્ડ, મતદાર ID કાર્ડ, પાસપોર્ટ અને ડ્રાઇવિંગ લાઇસન્સ જેવા સરકારી દસ્તાવેજો પણ આ શ્રેણીમાં આવશે. રાખડીના પરબિડીયા, પેકેટ અને શુભેચ્છા કાર્ડ જેવા 500 ગ્રામ સુધીના બિન-વાણિજ્યિક પેકેટોને પણ દસ્તાવેજો ગણવામાં આવશે. અધિસૂચના મુજબ, ‘નોટ-1’માં ઉલ્લેખિત વસ્તુઓ સિવાયની બધી વસ્તુઓ પાર્સલ શ્રેણી હેઠળ મોકલવામાં આવશે.

ચાર્જમાં કર્યો ફેરફાર

છૂટક ગ્રાહકો માટે હાલના દરોમાં કોઈ ફેરફાર કરવામાં આવ્યો નથી; જોકે, ‘દસ્તાવેજ’ શ્રેણીમાં જથ્થાબંધ બુકિંગ માટે નવા દરો અધિસૂચિત કરવામાં આવ્યા છે.

1 ઓગસ્ટથી, છૂટક ગ્રાહકો માટે '24 કલાક સ્પીડ પોસ્ટ' સેવા માટે ચાર્જ વજન અને અંતરના આધારે પ્રતિ પેકેટ ₹38 થી ₹186 સુધી થશે.

તો, 50 ગ્રામથી ઓછા વજનવાળા પેકેટ માટે સ્થાનિક પોસ્ટલ ચાર્જ ₹38 હશે, જ્યારે દેશવ્યાપી દર ₹94 (વત્તા GST) હશે.

અધિસૂચના અનુસાર, 51-250 ગ્રામ માટે પ્રતિ પેકેટ ₹118–₹154 અને 251-500 ગ્રામ માટે પ્રતિ પેકેટ ₹140–₹186 પોસ્ટલ ચાર્જ નક્કી કરવામાં આવ્યો છે.

તો, જથ્થાબંધ ગ્રાહકો માટે, 24 કલાક સ્પીડ પોસ્ટ સેવા માટે ચાર્જ ₹38 થી ₹100 અને 48 કલાક સેવા માટે, તે ₹48 થી ₹72 સુધીનો રહેશે.

ટપાલ વિભાગે જણાવ્યું હતું કે '48 કલાક સ્પીડ પોસ્ટ' સેવા હેઠળ, છૂટક ગ્રાહકો પાસેથી વજન અને ગંતવ્ય સ્થાનના આધારે પ્રતિ પેકેટ ₹61 થી ₹121 સુધીનો ચાર્જ લેવામાં આવશે.

હાલમાં, 24 કલાક અને 48 કલાકની સ્પીડ પોસ્ટ સેવાઓ દેશના માત્ર છ શહેરો દિલ્હી, મુંબઈ, ચેન્નાઈ, કોલકાતા, બેંગલુરુ અને હૈદરાબાદમાં જ ઉપલબ્ધ છે.

ભારતીય પોસ્ટનો ઉદ્દેશ

ટપાલ વિભાગની આ પહેલનો હેતુ સ્પીડ પોસ્ટ સેવાને વધુ આધુનિક, પારદર્શક અને કાર્યક્ષમ બનાવવાનો છે. હવે, જ્યારે પણ તમે સ્પીડ પોસ્ટ દ્વારા કોઇ ટપાલ મોકલો છો, ત્યારે એ ધ્યાનમાં રાખો કે જો પરબિડીયુંમાં કાગળ સિવાયની કોઈપણ વસ્તુ હશે, તો તેની બુકિંગ પાર્સલ તરીકે થશે. સચોટ માહિતી અને યોગ્ય શ્રેણી સાથે બુકિંગ કરાવવાથી તમારી ટપાલ કોઈપણ વિક્ષેપો વિના સમયસર તેના ગંતવ્ય સ્થાને પહોંચશે.

જ્યારે ભારતીય IPO બજારમાં એક બાદ એક ઇશ્યૂ લોન્ચ થઈ રહ્યા છે, ત્યારે વિદેશમાં પણ તમામ IPO શેરબજારમાં રોકાણકારોને માલામાલ કરી રહ્યા છે. આ વચ્ચે, એક IPO ચર્ચામાં છે, જે સોમવારે શાંઘાઈ સ્ટોક એક્સચેન્જમાં લિસ્ટ થયો, અને મજબૂત શરૂઆત પછી, કંપનીના શેરના ભાવમાં અચાનક લગભગ 500% વધારો થયો. આ રોકેટ તેજીને કારણે ચીની કંપનીમાં નાણાં રોકાણકારોની સંપત્તિમાં એક ઝટકામાં માલામાલ થઇ રહ્યા છે.

રોઇટર્સના અહેવાલ મુજબ, ચીની ચિપમેકર કંપની CXMT કોર્પે તેના IPO માટે 8.66 યુઆનનો પ્રાઇસ બેન્ડ નક્કી કર્યો હતો, અને શાંઘાઈ સ્ટોક એક્સચેન્જમાં તેની લિસ્ટિંગ જોરદાર પ્રીમિયમ પર થઇ. માત્ર એટલું જ નહીં, પરંતુ CXMT શેર લિસ્ટિંગ પછી રોકેટની જેમ ઉછળ્યા અને ઝડપથી ભાગતા, લગભગ 500 ટકાના ઉછાળા સાથે તેઓ 55.02 યુઆનની ઊંચી સપાટીએ પહોંચ્યા હતા. અંતે ગતિ થોડી ધીમી પડી હોવા છતા, ચિપ કંપનીનો શેર 465.82%ના વધારા સાથે 49 યુઆન પર બંધ થયો હતો.

ચાંગક્સિન મેમરી ટેક્નોલોજીસ (CXMT)ના લિસ્ટિંગ સાથે તેમાં રોકાણ કરનારાઓ પર પૈસાઓનો વરસાદ થયો. આનાથી અંદાજો લગાવી શકાય છે કે ચીનના સૌથી મોટા મેમરી ચિપ ઉત્પાદકનું બજાર મૂલ્યાંકન આશરે 3.3 ટ્રિલિયન યુઆન ($487 બિલિયન) સુધી પહોંચ્યું છે, આ સાથે જ તેને મુખ્ય ભૂમિ ચીનમાં સૌથી મૂલ્યવાન લિસ્ટેડ કંપની બની  ગઇ છે. ખાસ વાત એ છે કે, છેલ્લા કેટલાક દિવસોમાં વિશ્વભરમાં IT કંપનીઓના શેરમાં અસ્થિરતા જોવા મળી છે, આમ છતા CXMTને મજબૂત શરૂઆત મળી છે.

હાલમાં, બેંકો અને વીમા કંપનીઓ પાસે અલગ અલગ ગ્રાહક ID હોય છે. તે બધાને યાદ રાખવા અને તેનું સંચાલન કરવું પડકારજનક છે. જોકે, આવતા મહિનાથી, દેશની બેંકો અને વીમા કંપનીઓ લાખો ગ્રાહકો માટે નવી કોમન કસ્ટમર આઇડેન્ટિફિકેશન સિસ્ટમ (CKYC) પર કામ કરવાનું શરૂ કરશે. આનાથી બેંક ખાતા, વીમા પૉલિસી અથવા અન્ય સેવાઓ જેવા વિવિધ નાણાકીય ઉત્પાદનો માટે વારંવાર KYC દસ્તાવેજો સબમિટ કરવાની જરૂરિયાત દૂર થશે. એક સમાચાર એજન્સીના જણાવ્યા અનુસાર, સૂત્રો કહે છે કે, મ્યુચ્યુઅલ ફંડ્સ પણ ટૂંક સમયમાં આ સિસ્ટમમાં એકીકૃત કરવામાં આવશે.

નવી સિસ્ટમને સેન્ટ્રલ નો-યોર-કસ્ટમર 2.0 (CKYC 2.0)નામ આપવામાં આવ્યું છે. ગ્રાહકોએ નવું ખાતું ખોલવા અથવા તેમની માહિતી અપડેટ કરવા માટે ફક્ત એક જ વાર તેમની સંમતિ આપવાની જરૂર પડશે. એકવાર સંમતિ આપવામાં આવ્યા પછી, બેંક અથવા વીમા કંપની સેન્ટ્રલ રજિસ્ટ્રીમાં પહેલાથી જ સંગ્રહિત ડેટામાંથી ગ્રાહકની માહિતી આપમેળે મેળવશે. આનાથી ગ્રાહકોનો સમય જ નહીં બચે, પરંતુ છેતરપિંડી અને બનાવટી કાર્યવાહીને રોકવામાં પણ મદદ મળશે.

ભારતમાં છેલ્લા 10 વર્ષથી આવા સંકલિત ડિજિટલ ઓળખ માળખા પર કામ ચાલી રહ્યું છે. સિંગાપોર અને ઘણા યુરોપિયન દેશોમાં આ પ્રકારની સિસ્ટમો પહેલાથી જ કાર્યરત છે, જ્યાં લોકો એક જ ડિજિટલ ચકાસણીના આધારે નાણાકીય સેવાઓનો ઉપયોગ કરી શકે છે. RBI, SEBI અને વીમા નિયમનકાર IRDAI આ પ્રોજેક્ટ પર કામ કરી રહ્યા છે. સૂત્રોનો દાવો છે કે મ્યુચ્યુઅલ ફંડ હાઉસ અને બ્રોકરેજ કંપનીઓ આ વર્ષના અંત સુધીમાં આ સિસ્ટમમાં જોડાઈ શકે છે.

2024 માટે વિશ્વ બેંકના ડેટા અનુસાર, ભારતમાં લગભગ 89 ટકા યુવાનો પાસે બેંક ખાતા છે. જો કે, વીમા, મ્યુચ્યુઅલ ફંડ અને પેન્શન જેવા નાણાકીય ઉત્પાદનોમાં યુવાનોનું પ્રમાણ ઓછું છે. નવી સિસ્ટમ પછી દરેક નાગરિક માટે નાણાકીય સેવાઓ સુલભ બનાવશે.

દેશમાં પહેલાથી જ એક કેન્દ્રીય રજિસ્ટ્રી અમલમાં છે, જેમાં 120 કરોડ ગ્રાહકોના રેકોર્ડ છે. જો કે, ડેટા ગુણવત્તા, ડુપ્લિકેશન અને અપૂર્ણ માહિતી જેવા મુદ્દાઓએ તેનો સંપૂર્ણ ઉપયોગ કરી શકતો નથી. RBI આ રજિસ્ટ્રીમાંથી રેકોર્ડ પણ સ્વીકારતું નથી, જેના કારણે રોકાણકારોને દરેક નવા નાણાકીય ઉત્પાદન માટે ફરીથી તે જ દસ્તાવેજો સબમિટ કરવાની ફરજ પડે છે. CKYC 2.0 સિસ્ટમ દરેક રેકોર્ડને ડેટાના 'વિશ્વાસ સ્કોર' સાથે લિંક કરશે. આનાથી ઓળખ થશે કે કઈ બેંક કે વીમા કંપનીએ ડેટા ચકાસ્યો છે. જ્યારે પણ કોઈ ગ્રાહક નવું ખાતું ખોલશે, ત્યારે સંસ્થા OTP દ્વારા ડેટા ચકાસી શકશે.

SBI ફંડ્સ મેનેજમેન્ટના જોઈન્ટ CEO DP સિંહ કહે છે કે, આ સિસ્ટમથી મ્યુચ્યુઅલ ફંડ ઉદ્યોગમાં રોકાણકારોની સંખ્યામાં ખુબ મોટો વધારો થવાની અપેક્ષા છે. ઉદાહરણ તરીકે, SBI પાસે 50 કરોડથી વધુ બેંક ખાતા છે. જો આ સરળ પ્રક્રિયા પછી આ ગ્રાહકોનો એક નાનો ભાગ પણ રોકાણ કરવાનું શરૂ કરે છે, તો તેનાથી બજારને ઘણો સારો ફાયદો થશે. આ નવી સિસ્ટમ ગ્રાહક રેકોર્ડને તાત્કાલિક અપડેટ કરશે, એટલે કે, તેની સમય મર્યાદામાં અપડેટ થઇ જશે.

શુક્રવાર, 24 જુલાઈના રોજ સવારે ભારતીય શેરબજારમાં ભારે વેચવાલી જોવા મળી. સેન્સેક્સ અને નિફ્ટી 50 બંને 1 ટકાથી વધુ ઘટ્યા. શરૂઆતના ટ્રેડિંગમાં ઇન્ડેક્સ 900થી વધુ પોઇન્ટ ઘટીને 75,474ની નીચી સપાટીએ પહોંચ્યો. તેવી જ રીતે, NSE નિફ્ટી 50 ઇન્ડેક્સ 260થી વધુ પોઇન્ટ ઘટીને 23,606ની એક દિવસની નીચી સપાટીએ પહોંચ્યો.

મીડિયા સૂત્રો તરફથી મળતી માહિતીમાં ભારતીય શેરબજારમાં આજના તીવ્ર ઘટાડા માટે 4થી 5 મુખ્ય કારણો દર્શાવવામાં આવ્યા છે. ચાલો તે કારણ શું છે જાણી લઈએ.

ક્રૂડ ઓઇલમાં ઉછાળો: શેરબજારમાં ઘટાડાનું મુખ્ય કારણ ક્રૂડ ઓઇલના ભાવમાં થયેલો તીવ્ર વધારો છે. ક્રૂડ ઓઇલના ભાવ ફરી એકવાર પ્રતિ બેરલ 100 ડૉલરથી ઉપર પહોંચી ગયા છે. શુક્રવારે, સપ્ટેમ્બરમાં બ્રેન્ટ ક્રૂડ ઓઇલ માટે ફ્યુચર્સ 101 ડૉલર પ્રતિ બેરલને સ્પર્શી ગયા. જુલાઈની શરૂઆતથી બ્રેન્ટ ક્રૂડ લગભગ 40 ટકા વધ્યું છે.

અમેરિકા-ઈરાન તણાવ ફરી ગરમાયો: અમેરિકા-ઈરાન સંઘર્ષ વધવાના કોઈ સંકેત દેખાતા નથી, તેથી શેરબજારમાં ચિંતાનો માહોલ છે. મીડિયા રિપોર્ટ્સ અનુસાર, અમેરિકાના રાષ્ટ્રપતિ ડોનાલ્ડ ટ્રમ્પ ઈરાન સામે નવી મોટી લશ્કરી કાર્યવાહી શરૂ કરવાનું વિચારી રહ્યા છે.

US બોન્ડ યીલ્ડમાં વધારો: અમેરિકામાં બોન્ડ યીલ્ડ વધી રહી છે, જેના કારણે ભારત જેવા ઉભરતા બજારોમાંથી વિદેશી રોકાણકારો દ્વારા મોટા પાયે નાણાં ઉપાડનું જોખમ વધી રહ્યું છે. આ મહિને અત્યાર સુધીમાં બેન્ચમાર્ક US 10-વર્ષના બોન્ડ યીલ્ડ 6.5 ટકા વધીને 4.711 ટકા થઈ ગઈ છે.

જ્યારે US બોન્ડ પર વ્યાજ દર વધે છે, ત્યારે વિદેશી રોકાણકારો ઉભરતા બજારના શેરોમાંથી ભંડોળ ઉપાડવાનું અને તેમના વતનમાં સુરક્ષિત સાધનોમાં રોકાણ કરવાનું વલણ ધરાવે છે.

ટ્રમ્પનું વેપાર યુદ્ધ ફરી શરૂ થયું: ટ્રેડિંગ ભાગીદારો સામે ડોનાલ્ડ ટ્રમ્પનું ટેરિફ આક્રમણ ફરી શરૂ થયું છે. છેલ્લા બે અઠવાડિયામાં, US વહીવટીતંત્રે બ્રાઝિલ પર 25 ટકા, કેનેડા પર 50 ટકા અને જેનેરિક દવાઓ પર 200 ટકા સુધીના ટેરિફની જાહેરાત કરી છે. ગુરુવારે, 60 ટ્રેડિંગ ભાગીદારો પર 10 ટકાથી 12.5 ટકા સુધીના નવા ટેરિફની જાહેરાત કરવામાં આવી હતી. અમેરિકાએ કલમ 301 હેઠળ અનેક દેશો પર 10 ટકા અને 12.5 ટકા​​ના નવા ટેરિફ દરોની જાહેરાત કરી. તેમાં ભારતને નીચલી 10 ટકા શ્રેણીમાં મૂકવામાં આવ્યું છે.

વિદેશી સંસ્થાકીય રોકાણકારો (FII) ભારતમાંથી નાણાં ઉપાડી રહ્યા છે: એક વ્યાપારને લગતા અખબારમાં છપાયેલા અહેવાલમાં જણાવાયું છે કે, વિદેશી સંસ્થાકીય રોકાણકારો (FII)એ ગુરુવાર, 23 જુલાઈના રોજ રૂ. 2,999.23 કરોડના શેર વેચ્યા હતા. FII દ્વારા સતત વેચાણ સ્થાનિક શેરો પર દબાણ લાવે છે, બજારની ભાવના નબળી પાડે છે અને બેન્ચમાર્ક સૂચકાંકો પર દબાણ લાવે છે.

શુક્રવારે શેરબજારમાં કડાકાને કારણે શેરબજારમાં રોકાણ કરનારા રોકાણકારોને આશરે રૂ. 6 લાખ કરોડનું નુકસાન થયું છે. મીડિયા સૂત્રોના અહેવાલ મુજબ BSE પર સૂચિબદ્ધ કંપનીઓનું કુલ બજાર મૂડીકરણ પાછલા સત્રમાં આશરે રૂ. 477 લાખ કરોડથી ઘટીને રૂ. 471 લાખ કરોડ થઇ ગયું છે.

છેલ્લા એક મહિનામાં એક્સ-ફેક્ટરી ખાંડના ભાવમાં આશરે 15 ટકાનો વધારો થયો છે, જેના કારણે બજારમાં અછતની આશંકા વ્યક્ત કરવામાં આવી રહી હતી. જોકે, ઓલ ઈન્ડિયા સુગર ટ્રેડ એસોસિએશન (AISTA)એ જણાવ્યું છે કે દેશમાં સ્થાનિક માંગને પહોંચી વળવા માટે ખાંડનો પૂરતો સ્ટોક છે.

દેશમાં ખાંડની અછત અંગે ચાલી રહેલી અટકળો વચ્ચે ઓલ ઈન્ડિયા સુગર ટ્રેડ એસોસિએશન (AISTA)એ સ્પષ્ટતા કરી છે કે આવી આશંકાઓ પાયાવિહોણી છે. સંગઠને કહ્યું કે, છેલ્લા એક મહિનાથી પણ ઓછા સમયમાં એક્સ-ફેક્ટરી ખાંડના ભાવમાં લગભગ 15 ટકાનો વધારો જરૂર થયો છે, પરંતુ તેનો અર્થ એ નથી કે આ પુરવઠાની અછત છે. તાજેતરના અઠવાડિયામાં ખાંડના ભાવમાં વધારા બાદ બજારમાં પુરવઠા અંગે ચિંતા વધી ગઈ હતી.

AISTAએ તેના 700 સંલગ્ન સભ્યો અને સંગઠનોને મોકલેલા સંદેશમાં કહ્યું કે ઇન્ડિયન સુગર એન્ડ બાયો-એનર્જી મેન્યુફેક્ચરર્સ એસોસિએશન (ISMA) અને નેશનલ ફેડરેશન ઓફ કોઓપરેટિવ સુગર ફેક્ટરીઝ (NFCSF) એ 17 જુલાઈના રોજ સંયુક્ત રીતે સ્પષ્ટતા કરી હતી કે દેશમાં સ્થાનિક માંગને સંતોષવા માટે પૂરતો ખાંડનો સ્ટોક છે. સાથે જ, ખાંડ ઉદ્યોગ કૃષિ-આબોહવાની પરિસ્થિતિઓને આધારે 2026-27 ક્રશિંગ સીઝનની શરૂઆત અગાઉથી કરવા સંમત થયો છે, જેનાથી બજારમાં તાજી ખાંડની ઉપલબ્ધતામાં વધારો થવાની ધારણા છે.

AISTAના ચેરમેન પ્રફુલ્લ વિઠલાણીએ જણાવ્યું હતું કે એક્સ-ફેક્ટરી ખાંડના ભાવમાં તાજેતરના વધારાથી બજારમાં અછતની બિનજરૂરી ધારણા ઉભી થઈ છે, જ્યારે વાસ્તવિકતા તેનાથી તદ્દન વિપરીત છે. તેમણે ખાંડ મૂલ્ય શૃંખલાના તમામ પક્ષો, ખાંડની મિલો, ટ્રેડિંગ હાઉસ, જથ્થાબંધ વેપારીઓ, વિતરકો અને સંસ્થાકીય ગ્રાહકોને અપીલ છે કે તેઓ દેશભરમાં ખાંડની સરળ ઉપલબ્ધતા સુનિશ્ચિત કરવા માટે સકારાત્મક પગલાં ઉઠાવે.  વિઠલાણીએ COVID-19 મહામારી દરમિયાન ઉલ્લેખ પણ કર્યો, જ્યારે ઉદ્યોગે પુરવઠો અવિરત રહે તે સુનિશ્ચિત કર્યું હતું અને સરકારે પણ આ પ્રયાસની પ્રશંસા કરી હતી. તેમનું કહેવું છે કે ઉદ્યોગે અત્યારે પણ એ જ રીતે જવાબદાર અભિગમ અપનાવવાનું જોઈએ.

સંગઠને તેના સભ્યોને ગભરાટમાં ખરીદી ન કરવા અને સટ્ટાકીય હેતુઓ માટે સ્ટોક જમા ન કરવાની અપીલ કરી છે. સાથે જ તમામ પક્ષોને સરકારી નિયમોનું પાલન કરવા અને કોઈપણ ભ્રામક માહિતી અથવા અફવાઓ પર ધ્યાન ન આપવા કહેવામાં આવ્યું છે. સંબંધિત પક્ષોને મોકલવામાં આવેલા એક અલગ ખુલ્લા પત્રમાં પણ AISTAએ ખાંડની ઉપલબ્ધતા અંગે વિશ્વાસ વ્યક્ત કર્યો છે.

સંગઠને જણાવ્યું હતું કે ઉદ્યોગ તરફથી પૂરતા પ્રમાણમાં ખાંડના સ્ટોકની ઉપલબ્ધતા છે અને પિલાણ કામગીરી ટૂંક સમયમાં શરૂ થવાની સંભાવના છે. સંગઠનને અપેક્ષા છે પાકની કાપણીના શરૂઆતી સમયમાં હવામાન અનુકૂળ રહેશે અને વધારે વરસાદ નહીં પડે, જેથી શેરડીની કાપણી અને અને પિલાણમાં કોઇ વિક્ષેપ વિના ચાલુ રહેશે. AISTAએ ફરી એકવાર ખાંડ મિલો, વેપારીઓ અને સંસ્થાકીય ખરીદદારોને સરકારી ધોરણોનું કડક પાલન કરવા, સુગમ કામગીરી ચલાવવવા અને ઉદ્યોગ સંગઠનો દ્વારા આપવામાં આવેલા આશ્વાસનો પર વિશ્વાસ જાળવવા અપીલ કરી છે.

જો તમે ઘરે રાખેલા સોનાના દાગીના, વારસામાં મળેલું સોનું, સિક્કા અથવા બિસ્કિટ વેચવાનું વિચારી રહ્યા છો, તો માત્ર સોનાની કિંમત કેટલી છે તેની કોઈ જરૂરી નથી. એ પણ મહત્વનું છે કે તમે સોનું જાતે ખરીદ્યું છે, કોઈની પાસેથી ભેટ તરીકે મેળવ્યું છે કે વારસામાં મળ્યું છે. આ ત્રણેય કેસોમાં ટેક્સ નિયમો અલગ અલગ હોઈ શકે છે. આવી સ્થિતિમાં, સોનું વેચતા પહેલા આ નિયમોને સમજવું જરૂરી છે, જેથી પછીથી ટેક્સને લઈને કોઈ સમસ્યા ન આવે.

જો તમે જાતે સોનાના દાગીના, સિક્કા અથવા બિસ્કિટ ખરીદ્યા હોય અને ખરીદીના 24 મહિના પછી તેને વેચો, તો તેના પર થયેલો નફો 12.5 ટકા લોંગ ટર્મ કેપિટલ ગેઇન (LTCG) પર કરપાત્ર રહેશે. જો કે, જો તમે 24 મહિના પૂરા થયા પહેલા વેચાણ કરો છો, તો નફો તમારી આવકમાં ઉમેરવામાં આવશે અને તમારા આવકવેરા સ્લેબ મુજબ તેના પર ટેક્સ ચૂકવવો પડશે.

જો તમને વારસામાં સોનું મળ્યું હોય તો માત્ર વારસામાં મળવા પર કોઈ ટેક્સ લાગતો નથી. પરંતુ જ્યારે તમે તેને વેચો છો, ત્યારે તમારે ટેક્સ ચૂકવવો પડશે. ખાસ વાત એ છે કે ટેક્સની ગણતરી કરતી વખતે, પ્રથમ માલિકે ક્યારે અને કેટલામાં સોનું ખરીદ્યું, તે જ આધાર તરીકે ગણવામાં આવશે. તેનો અર્થ એ કે, જો તમારા માતા-પિતા અથવા દાદા-દાદીએ ઘણા વર્ષો પહેલા સોનું ખરીદ્યું હોય, તો તેમનો હોલ્ડિંગ પિરિયડ પણ તમારામાં ઉમેરવામાં આવશે. આને કારણે, ઘણા કિસ્સાઓમાં તેને સીધી લાંબા ગાળાની મૂડી સંપત્તિ તરીકે ગણવામાં આવે છે.

ભેટ તરીકે મળેલા સોનાના કિસ્સામાં નિયમો અલગ છે. જો માતા-પિતા, પતિ-પત્ની, ભાઈ-બહેન અથવા અન્ય નજીકના સંબંધીઓ પાસેથી સોનું પ્રાપ્ત થયું હોય, તો તે મળવા પર કોઈ ટેક્સ ચૂકવવો પડતો નથી. પરંતુ જો 50,000 રૂપિયાથી વધુની કિંમતનું સોનું નાણાકીય વર્ષમાં બિન-સંબંધી પાસેથી ભેટ તરીકે પ્રાપ્ત થાય છે, તો તેની સંપૂર્ણ કિંમત અન્ય સ્ત્રોતોની આવક હેઠળ કરપાત્ર થઈ શકે છે. પાછળથી, જ્યારે આ સોનું વેચવામાં આવશે, ત્યારે અગાઉના માલિકની ખરીદી કિંમત અને હોલ્ડિંગ અવધિના આધારે ટેક્સની ગણતરી કરવામાં આવશે.

ટેક્સ બચાવવા માટે તમામ ખરીદીના બિલો સુરક્ષિત રાખવા પણ જરૂરી છે. જ્વેલરી ખરીદતી વખતે ચૂકવવામાં આવેલ 3 ટકા GST, મેકિંગ ચાર્જિસ અને તેના પર ચૂકવવામાં આવેલ GST પણ ખરીદી ખર્ચમાં સામેલ કરી શકાય છે. તેનાથી કેપિટલ ગેઈન ઘટશે અને ટેક્સ બોજ પણ ઘટી શકે છે. એ જ રીતે, સોનું વેચતી વખતે દલાલી, પ્લેટફોર્મ ફી અથવા અન્ય ટ્રાન્સફર ખર્ચ પણ અમુક કિસ્સાઓમાં બાદ કરી શકાય છે.

જો તમારી પાસે ડિજિટલ સોનું હોય, તો તેના પર ભૌતિક સોનાની જેમ જ ટેક્સ નિયમો લાગુ પડે છે. જ્યારે ગોલ્ડ ETF માટે લોંગ ટર્મ કેપિટલ ગેઇનનો સમયગાળો માત્ર 12 મહિનાનો છે, જેના કારણે તે ટેક્સના દૃષ્ટિકોણથી વધુ ફાયદાકારક બની શકે છે. માત્ર ટેક્સ બચાવવા માટે ઉતાવળમાં અથવા મોડું સોનું વેચવું એ યોગ્ય નિર્ણય નથી. સોનાની કિંમત, તમારી જરૂરિયાત અને રોકાણનો ઉદ્દેશ્ય બાબત. સોનું વેચતા પહેલા, ખાતરી કરો કે તમે તેને ખરીદ્યું છે, ભેટ તરીકે મેળવ્યું છે કે વારસામાં મળ્યું છે, કારણ કે તમારો ટેક્સ આના આધારે નક્કી કરવામાં આવશે.

સોના-ચાંદીના ભાવમાં સતત ચઢાવ ઉતાર જોવા મળી રહ્યા છે. સોનાનો ભાવ 10 ગ્રામ દીઠ અત્યારે 1.41 લાખ અને ચંદીનો કિલોએ ભાવ 1.29 લાખ પર પહોંચ્યો છે. જો કે જાણકારોનું કહેવું છે કે આ વર્ષના અંત સુધીમાં ચાંદીનો ભાવ 2.80 લાખ રૂપિયા સુધી પહોંચી શકે છે.

31 ડિસેમ્બર 2025ના દિવસે ચાંદીનો ભાવ 2.30 લાખ હતો જે 29 જાન્યુઆરીએ સૌથી ઉંચી સપાટી 3.86 લાખ પર પહોંચી ગયો હતો. બજારના નિષ્માત અજય કેડિયાનું કહેવું છે કે, વૈશ્વિક તનાવ અને ડોલર જો થોડો નબળો પડશે તો આ વર્ષના અંતમાં ચાંદીનો ભાવ કિલોએ 2.80 લાખ રૂપિયા સુધી પહોંચી શકે છે.

નોંધ- કોઇ પણ રોકાણ કરતા પહેલા તમારા સલાહકારની સલાહ મુજબ જ રોકાણ કરો

શેરબજારમાં અસ્થિરતા વચ્ચે, SBI ફંડ્સ મેનેજમેન્ટના શેરનું લિસ્ટિંગ સારું થયું નથી, જેટલી અપેક્ષાઓ રાખવામાં આવી રહી હતી. લિસ્ટિંગ પહેલાં કંપનીના શેર ગ્રે માર્કેટમાં 16% થી વધુના પ્રીમિયમ પર ટ્રેડ થઈ રહ્યા હતા; પરંતુ, હવે આ કંપનીના શેરોની લિસ્ટિંગ 7%ના પ્રીમિયમ પર થયું છે.

SBI ફંડ્સ મેનેજમેન્ટના શેર NSE પર ₹613.30 પ્રતિ શેરના ભાવે શરૂ થયા, જે  IPO ભાવ ₹574 કરતા 6.85% વધુ છે. BSE પર શેરોની શરૂઆત ₹610 પ્રતિ શેર પર થઇ છે. આ નબળા લિસ્ટિંગ છતા ઘણી બ્રોકરેજ કંપનીઓએ SBI ફંડ્સ મેનેજમેન્ટ પર કવરેજ શરૂ કર્યું છે અને આ શેરોમાં મજબૂત તેજીનો અંદાજ લગાવ્યો છે.

વિશ્લેષકો કંપનીના મજબૂત નેટવર્ક અને બજાર નેતૃત્વ દ્વારા સંચાલિત શેર માટે 30% ઉછાળાની અપેક્ષા છે. Emkay બ્રોકરેજનું કહેવું છે કે આ કંપનીના ત્રણ મુખ્ય પરિબળો હકારાત્મક બનાવે છે: SBI બ્રાન્ડ અને વિતરણ,; SBI બેંકની અંદર SBI મ્યુચ્યુઅલ ફંડ ઉત્પાદનોનો વર્તમાન ઓછો પ્રવેશ; અને એક્ટિવિટી અને અને વૈકલ્પિક રોકાણો જેવા ફેરફારો એસેટમાં સતત બદલાવ આવકને વેગ આપી શકે છે અને, FY26-29E સમયગાળા દરમિયાન કાર્યકારી કાર્યક્ષમતા અને સ્કેલના અર્થતંત્રો 17% EBITDA CAGRને પ્રોત્સાહન મળવાની અપેક્ષા છે.

બ્રોકરેજનું કહેવું છે કે ભારતીયોમાં બદલાતી બચત અને રોકાણ સંબંધિત જરૂરિયાતોમાં થઇ રહેવા પરિવર્તનને કારણે મધ્યમ વર્ગ વધુને વધુ મ્યુચ્યુઅલ ફંડ્સને પ્રાથમિક રોકાણ વિકલ્પ તરીકે અપનાવી રહ્યો છે. SBI AMC પાસે દરેક ભારતીય માટે એસેટ મેનેજર બનવાની ક્ષમતા છે, જેમ કે તેની પેરેન્ટ કંપની 'દરેક ભારતીય માટે બેંકર' બની ગઈ છે. અમે SBI AMC પર 'બાય' રેટિંગ અને ₹750નો લક્ષ્ય આપીએ છીએ.

નોંધનીય છે કે SBI ફંડ્સ મેનેજમેન્ટનો IPO 14 થી 16 જુલાઈ દરમિયાન સબ્સ્ક્રિપ્શન માટે ખુલ્લો હતો, જેમાં શેરની કિંમત ₹545–574 હતી અને લોટ સાઇઝ 26 ઇક્વિટી શેર હતી. કંપનીએ તેની પ્રારંભિક ઓફર દ્વારા કુલ ₹9,813 કરોડ એકત્ર કર્યા, જે સંપૂર્ણપણે સ્ટેટ બેંક ઓફ ઇન્ડિયા (SBI) અને અમુન્ડી દ્વારા 170,956,631 ઇક્વિટી શેર સુધીના ઓફર-ફોર-સેલ (OFS)નો સમાવેશ થતો હતો.

SBI ફંડ્સ ભારતની સૌથી મોટી એસેટ મેનેજમેન્ટ કંપની (AMC) છે, જે ₹12.6 લાખ કરોડના મ્યુચ્યુઅલ ફંડ ક્વાર્ટરલી એવરેજ એસેટ્સ અંડર મેનેજમેન્ટ (QAAUM) અને 15.1 ટકા બજાર હિસ્સો ધરાવે છે. તે સક્રિય અને નિષ્ક્રિય રોકાણ વ્યૂહરચનાઓ અગ્રણી સ્થાન ધરાવે છે. ઇક્વિરસ સિક્યોરિટીઝ અનુસાર, કંપની ભારતના નાણાકીય ક્ષેત્રમાં તકોનો લાભ લેવા માટે સારી સ્થિતિમાં છે. 2021 નાણાકીય વર્ષ અને જૂન 2026 વચ્ચે તેના ઇક્વિટી QAAUMએ 33 ટકાનો ચક્રવૃદ્ધિ વાર્ષિક વૃદ્ધિ દર (CAGR) નોંધાવ્યો, જ્યારે તેનો બજાર હિસ્સો 10.2 ટકાથી વધીને 12.7 ટકા થઇ ગયો છે.