ઈરાન સાથે વધતા યુદ્વ વચ્ચે પોતાને સૌથી તાકતવર દેશ કહેનારા અમેરિકાની પણ હવા ટાઇટ થવા લાગી છે. અમેરિકન રાષ્ટ્રપતિ ડોનાલ્ડ ટ્રમ્પે વિદેશોમાં રહેતા તેમના નાગરિકોના જીવની ચિંતા થઇ રહી છે. આ જ કારણ છે કે અમેરિકાએ એક-બે નહીં, પરંતુ 10 દેશો માટે ઇમરજન્સી એલર્ટ જાહેર કરી દીધું છે. નાગરિકોને સ્પષ્ટ કહેવામાં આવ્યું છે કે જો તેઓ આ વિસ્તારોમાં છે તો તાત્કાલિક બિસ્તરો-પોટલો બાંધે અને ત્યાંથી ભાગી નીકળે. આ યાદીમાં એક દેશનો સમાવેશ થાય છે જેણે તમામને આશ્ચર્યચકિત કરી દીધા છે.

UAE, કતાર, ઓમાન, ઇરાક, જોર્ડન, ઇઝરાયલ, કુવૈત, સાઉદી અરેબિયા, બહેરીન અને હવે ઇજિપ્તમાં સ્થેત દૂતાવાસોએ અમેરિકનોને તાત્કાલિક દેશ છોડવાની સલાહ આપતા સુરક્ષા ચેતવણીઓ જાહેર કરી છે. અધિકારીઓએ સ્પષ્ટપણે જણાવ્યું છે કે કોઈપણ ક્ષણે ફ્લાઇટ રદ થવાની, એરસ્પેસ બંધ થવાની અને પ્રદેશમાં અચાનક યુદ્ધ ફાટી નીકળવાની પૂરી સંભાવના છે.

આ આખ મામલે સૌથી ચૌકાવનારી વાત ઇજિપ્તનું નામ છે. આ પહેલી વાર છે જ્યારે ઇજિપ્તને એવા દેશોની યાદીમાં મૂકવામાં આવ્યું છે જ્યાંથી અમેરિકન નાગરિકોને તાત્કાલિક દેશ છોડવાની વાત કહેવામાં આવી છે. માનવામાં આવ રહ્યું છે કે આ પગલું ત્રણ દિવસ પહેલા બનેલી એક મોટી ઘટના બાદ ઉઠાવવામાં આવ્યું છે. ત્રણ દિવસ અગાઉ, ઇજિપ્તમાં એક શંકાસ્પદ ઇરાની હુમલામાં અમેરિકન માલિકીના 'ફ્લોટિંગ પ્લેટફોર્મ'ને નિશાન બનાવ્યું હતું. ત્યારથી સમગ્ર પ્રદેશમાં ભય ફેલાયો છે કે આગામી લશ્કરી હુમલાઓમાં ઇજિપ્ત પણ સીધું યુદ્ધનું મેદાન બની શકે છે.

સપ્ટેમ્બર 2024માં એક સવારે, એલિસ વેબ ભાડાના બ્યુટી સલૂનમાં સ્થાપિત એક કામચલાઉ ક્લિનિકમાં પહોંચી. તે નોન-સર્જિકલ બ્રાઝિલિયન બટ લિફ્ટ (BBL) પ્રક્રિયા કરાવવા માંગતી હતી.

આ પ્રક્રિયામાં નિતંબમાં મોટી માત્રામાં ડર્મલ ફિલર ઇન્જેક્ટ કરવાનો સમાવેશ થાય છે. એલિસને આશા હતી કે તેની સારવાર બપોર સુધીમાં પૂર્ણ થઈ જશે અને તે તેના બાળકોને શાળાએથી ઘરે લઈ જઈ શકશે.

પરંતુ 33 વર્ષીય એલિસ ક્યારેય ઘરે પાછી ફરી નહીં. 5 બાળકોની માતા, એલિસનું પ્રક્રિયાના 24 કલાકની અંદર જ મૃત્યુ થયું. તે બ્રિટનમાં નોન-સર્જિકલ BBL પ્રક્રિયા પછી મૃત્યુ પામનાર પ્રથમ વ્યક્તિ બની. તેના મૃત્યુનું કારણ નક્કી કરવા માટે ઔપચારિક તપાસ કરવામાં આવશે.

એલિસનો કેસ હવે બ્રિટનના ઝડપથી વિકસતા સૌંદર્ય ઉદ્યોગ વિશે ચર્ચાનું કેન્દ્ર બની ગયો છે. શરીરના આકારમાં ફેરફાર કરતા કોસ્મેટિક ઇન્જેક્શન હવે સરળતાથી ઉપલબ્ધ છે.

આ સેવાઓ ઉચ્ચ કક્ષાના બ્યુટી સલુન્સથી લઈને ભાડાની ઓફિસો અને હોટેલ રૂમ સુધીના સ્થળોએ આપવામાં આવે છે. છેલ્લા બે વર્ષથી આ ઉદ્યોગની તપાસ થઇ રહી છે.

આ ક્લિનિક્સના બંધ દરવાજા પાછળ શું ચાલી રહ્યું છે તે જાણવા માટે ઓળખ છુપાવી, કામચલાઉ સારવાર રૂમમાં મારા શરીરમાં સેંકડો મિલીલીટર ફિલર ઇન્જેક્ટ કરવા તૈયાર લોકો સામેથી મળ્યા.

કેટલાક લોકોએ મને યોગ્ય તબીબી સલાહ વિના પ્રિસ્ક્રિપ્શન-માત્ર દવાઓ ઓફર કરી. માત્ર એટલું જ નહીં, પરંતુ સોશિયલ મીડિયા દ્વારા મને લેબલ વગરના વજન ઘટાડવાના ઇન્જેક્શન વેચવાનો પણ પ્રયાસ કરવામાં આવ્યો.

મેં ડઝનેક મહિલાઓ સાથે વાત કરી. તેઓએ કોસ્મેટિક ઇન્જેક્શનથી ગંભીર પીડા અનુભવવાની જાણ કરી જે ઓછા જોખમી અને વર્ચ્યુઅલ રીતે પીડારહિત હોવાનું કહેવાય છે. કેટલીકને ચેપ લાગ્યો અને ત્યારપછી તેમને હોસ્પિટલમાં દાખલ કરવામાં આવ્યા.

સેવ ફેસ, એક સંસ્થા જે કોસ્મેટિક સારવારને માન્યતા આપે છે, કહે છે કે તેને ગંભીર નુકસાનના અસંખ્ય કિસ્સાઓનો સામનો કરવો પડ્યો છે. આમાં એક એવા દર્દીનો સમાવેશ થાય છે જેની આંખના પોપચાંની સર્જરી ખોટી રીતે કરવામાં આવી હતી. ત્યાર પછી તે તેની આંખો પુરી રીતે બંધ કરી શકતી નથી.

બીજા કિસ્સામાં, શરીરની વધારાની ચરબી દૂર કરવા માટે કોસ્મેટિક સર્જરી, લિપોસક્શન દરમિયાન દર્દીના આંતરડામાં કાણું પડી ગયું હતું.

સેવ ફેસના ડિરેક્ટર એશ્ટન કોલિન્સ કહે છે, 'આ બધું કોઈ હોરર ફિલ્મ જેવું લાગે છે.' તેમનું કહેવું છે કે, આવી પ્રક્રિયાઓ મુખ્ય બજારોમાં ખુલ્લેઆમ કરવામાં આવી રહી છે. કોસ્મેટિક ઇન્જેક્શનની વાત આવે ત્યારે બ્રિટન યુરોપમાં સૌથી ઓછા નિયંત્રિત બજારોમાંનું એક છે.

ઘણા યુરોપિયન દેશોની તુલનામાં, UKના નિયમો ખૂબ જ ઢીલા છે. તાલીમ પછી કોઈપણ વ્યક્તિ કાયદેસર રીતે ડર્મલ ફિલર ઇન્જેક્શન આપી શકે છે. તે પછી, તેઓ સામાન્ય લોકોને આ સારવાર આપી શકે છે.

સ્કોટલેન્ડ અને ઇંગ્લેન્ડની સરકારો કહે છે કે તેઓ આ બહુ-અબજ પાઉન્ડના ઉદ્યોગ પર નિયમો કડક કરી રહ્યા છે. પરંતુ પ્રશ્ન એ છે કે શું આ પગલાં પૂરતા હશે?

નિષ્ણાતો એક દાયકાથી વધુ સમયથી ડર્મલ ફિલરના સંભવિત જોખમો વિશે ચેતવણી આપી રહ્યા છે. છતાં લોકો હજુ પણ ટાળી શકાય તેવા નુકસાનથી કેમ પીડાઈ રહ્યા છે?

ડર્મલ ફિલર એવા ઇન્જેક્શન છે જે કરચલીઓ ઘટાડે છે અને ચહેરાની ઢીલી ત્વચાને કરચલી વગરની કરી દે છે.

આ ઘટના એલિસના મૃત્યુ પહેલાની છે. જૂન 2024માં, જોઆન નામની એક મહિલા નોન-સર્જિકલ BBL પ્રક્રિયા કરાવવા માટે એસેક્સના એક ફ્લેટમાં એક કામચલાઉ ક્લિનિકમાં ગઈ હતી. જોઆન, જે ફક્ત તેના પહેલા નામનો જ ઉપયોગ કરવા માંગે છે, તે માનતી હતી કે આ પદ્ધતિ સર્જિકલ BBL પ્રક્રિયા માટે તુર્કી જઈને કરાવવી તેના કરતાં ઓછી જોખમી હશે.

સાઉથ વેલ્સમાં રહેતી બે બાળકોની માતા જોઆન કહે છે, 'હું ફક્ત મારા નિતંબને વધુ ભરાવદાર બનાવવા માંગતી હતી.'

તે કહે છે, 'મારે તાત્કાલિક પાછા ફરવું જોઈતું હતું.' સારવાર દરમિયાન, તેના શરીરમાં એક લિટર ફિલરનું ઇન્જેક્શન આપવામાં આવ્યું. ત્યાર પછી તેને સેપ્સિસ થઇ ગયું.

તેની સ્થિતિ એટલી ગંભીર થઈ ગઈ કે તેને હોસ્પિટલમાં દાખલ કરવી પડી. જોન કહે છે કે બે વર્ષ પછી પણ, આ સારવારના નિશાન તેના જાંઘ અને નિતંબ પર રહેલા છે.

આ ક્ષેત્રમાં કામ કરતા લોકો માટે કોઈ કેન્દ્રિય સિસ્ટમ નથી. આ ઉપરાંત, ઉદ્યોગના વિકાસને ટ્રેક કરવા માટે કોઈ સત્તાવાર ડેટાબેઝ પણ નથી. આને કારણે, આ બજારનું સાચું કદ અસ્પષ્ટ રહે છે. UKની નેશનલ હેલ્થ સર્વિસ (NHS)ના પ્લાસ્ટિક સર્જન અને યુનિવર્સિટી કોલેજ લંડનના સંશોધક, ડૉ. એલેક્ઝાન્ડર જરગરાનને આ બજારના મુખ્ય ક્ષેત્ર, બોટોક્સ ક્ષેત્રના કદને સમજવાનો પ્રયાસ કર્યો.

તેમના વિશ્લેષણથી જાણવા મળ્યું કે 2025 સુધીમાં, સમગ્ર UKમાં આશરે 20,000 લોકો આ પ્રક્રિયામાંથી પસાર થશે, જે 2023માં ફક્ત 3,500થી વધુ હતી.

ડૉ. જરગરાન કહે છે કે, 'અમે જાણીએ છીએ કે આ ઉદ્યોગ સતત વધી રહ્યો છે.' જોકે, આનું એક કારણ એ પણ હોઈ શકે છે કે ઑનલાઇન અને સોશિયલ મીડિયા જાહેરાતકર્તાઓને હવે પહેલા કરતાં વધુ વ્યવસ્થિત રીતે ઓળખવામાં આવી રહ્યા છે.

છતાં, માત્ર બે વર્ષમાં આ વધારો ખુબ મોટો છે. સંશોધકોએ એ પણ શોધી કાઢ્યું કે બોટોક્સ જેવી સેવાઓ સૌથી પછાત વિસ્તારોમાં વધુ ઉપલબ્ધ છે.

ડૉ. જરગરાનના મતે, આ ક્ષેત્રના વિસ્તરણનું એક કારણ એ છે કે, તબીબી લાયકાત વિના પણ મોટી સંખ્યામાં લોકો તેમાં કામ કરી રહ્યા છે.

અભ્યાસ મુજબ, 2023 અને 2025ની વચ્ચે, તબીબી લાયકાત વિના સૌંદર્યલક્ષી સારવાર આપનારા લોકોનું પ્રમાણ 12 ટકાથી વધીને 24.8 ટકા થશે, એટલેકે આ સંખ્યા લગભગ બમણી થઇ જશે.

અભ્યાસમાં એ પણ જાણવા મળ્યું કે, સૌથી વધુ વંચિત સમુદાયોમાં બોટોક્સ સેવાઓ વધુ સરળતાથી ઉપલબ્ધ હતી.

સૌથી વધુ પછાત વિસ્તારોમાં પ્રદાતાઓની સંખ્યા સૌથી ઓછા પછાત વિસ્તારો કરતા 6 ગણાથી વધુ હતી.

પરંતુ આનાથી બીજી સમસ્યા પણ ઉભી થઈ, સૌથી વધુ પછાત વિસ્તારોમાં રહેતા લોકોને તબીબી રીતે લાયક નિષ્ણાતોની સેવાઓની પ્રમાણમાં ઓછી પહોંચ હતી.

આ પરિસ્થિતિ એક મહત્વપૂર્ણ પ્રશ્ન ઊભો કરે છે. જો આજે સમગ્ર UKમાં હજારો લોકો કોસ્મેટિક ઇન્જેક્શન આપી રહ્યા છે, તો શું કોઈ સંસ્થા અથવા સરકારી સંસ્થા આ ક્ષેત્રને નિયંત્રિત કરવા માટે જવાબદાર ન હોવી જોઈએ?

આ દરમિયાન, જેનેટ તેની પુત્રી માટે ન્યાય મેળવવાનો પ્રયાસ કરી રહી હતી. જ્યારે, મેં મારી ઓળખ છુપાવીને ગ્રાહક તરીકે ગઈ હતી.

મેં લંડનની બહાર એક ઓફિસ બિલ્ડિંગમાં કાર્યરત એક કામચલાઉ ક્લિનિકની મુલાકાત લીધી. રિકી સોયર હજુ પણ ત્યાં સારવાર આપી રહ્યા હતા.

અમારી મુલાકાત દરમિયાન, તેમણે મારા શરીરમાં એક લિટર સુધી ફિલર ઇન્જેક્શન આપવાની ઓફર કરી. તેમણે એવી દવાઓ પણ આપવાની ઓફર કરી જે ફક્ત પ્રિસ્ક્રિપ્શન પર જ ઉપલબ્ધ હોવી જોઈએ.

પ્રિસ્ક્રિપ્શન લખવા માટે અધિકૃત કોઈ પણ વ્યક્તિ તે સમયે હાજર નહોતું. આ હોવા છતાં, તેમણે સ્થાનિક એનેસ્થેસિયા આપવાની ભલામણ કરી.

પ્લાસ્ટિક સર્જન દલ્વી હુમઝાએ આ દ્રશ્યોની સમીક્ષા કરી. તેમણે આ પગલાંને 'આઘાતજનક' અને 'અત્યંત ખતરનાક' ગણાવ્યા. ફેબ્રુઆરી 2025માં અહેવાલ બહાર આવ્યા પછી સોયર સામે કાર્યવાહી કરવામાં આવી હતી.

ટ્રેફોર્ડ કાઉન્સિલ દ્વારા લાવવામાં આવેલા કાનૂની મનાઈ હુકમ હેઠળ તેમને પ્રેક્ટિસ કરવાથી પ્રતિબંધિત કરવામાં આવ્યા હતા. તેઓ તાજેતરમાં આ પ્રતિબંધનું ઉલ્લંઘન કરવા બદલ કોર્ટમાં હાજર થયા હતા, પરંતુ કોર્ટે તેમને નિર્દોષ જાહેર કર્યા હતા. તેમની જુબાની દરમિયાન, તેમણે સ્વીકાર્યું કે તેઓ આ પ્રક્રિયાઓના કારણે થનારા જોખમોથી વાકેફ હતા. હવે, સોયર ઇંગ્લેન્ડ અને વેલ્સમાં ક્યાંય પણ આવી સારવાર આપી શકતા નથી. જોકે આ પ્રતિબંધ લગાવવામાં ઘણા વર્ષો લાગ્યા હતા.

વિશ્વના સૌથી શક્તિશાળી પાસપોર્ટની રેન્કિંગ બતાવનાર હેનલી પાસપોર્ટ ઇન્ડેક્સ 2026 મા અમેરિકાને મોટો ઝટકો લાગ્યો છે. આ વખતે અમેરિકન પાસપોર્ટ છેલ્લા એક દાયકામાં તેના સૌથી નીચલા ક્રમે આવી ગયો છે. હવે 30 થી વધુ દેશોના પાસપોર્ટ અમેરિકાથી આગળ નીકળી ગયા છે. જો કે, આનો અર્થ એ નથી કે અમેરિકન પાસપોર્ટ નબળો બની ગયો છે. વાસ્તવિક કારણ એ છે કે ઘણા અન્ય દેશોએ તેમના નાગરિકો માટે વધુ દેશોમાં વિઝા-મુક્ત અથવા વિઝા-ઓન-અરાઇવલની સુવિધા હાંસલ કરી છે.

ભારતની વાત કરીએ તો, તે હેનલી પાસપોર્ટ ઇન્ડેક્સ 2026માં 81મા સ્થાને છે. ભારતીય પાસપોર્ટ ધારકો 55 દેશોમાં વિઝા વિના પહેલાથી જ મુસાફરી કરી શકે છે. ગયા વર્ષે ભારત 85મા ક્રમે હતું, એટલે કે આ વખતે તેના રેન્કિંગમાં સુધરો થયો છે. જો કે, વિઝા-મુક્ત સ્થળોની સંખ્યા 57 થી ઘટીને 55 થઈ ગઈ છે; આનું કારણ માટે કેટલાક દેશોની વિઝા નીતિઓમાં થયેલો ફેરફાર છે.

હેનલી પાસપોર્ટ ઇન્ડેક્સ વિશ્વના સૌથી અગ્રણી પાસપોર્ટ રેન્કિંગમાંનો એક છે. તે 199 દેશો અને 227 પ્રવાસ સ્થળોના પાસપોર્ટનું મૂલ્યાંકન કરે છે. આ રેન્કિંગ એ આધારે નક્કી થાય છે કે કોઈ દેશના નાગરિકો વિઝા વિના અથવા વિઝા-ઓન-અરાઇવલ સુવિધાઓ સાથે કેટલા દેશમાં જઇ શકે છે.

અહેવાલ મુજબ, તાજેતરના વર્ષોમાં ઘણા દેશોએ નવા કરારો કર્યા છે અને અન્ય દેશો સાથે સંબંધો મજબૂત કર્યા છે. જેના કારણે, તેમના નાગરિકો વધુ દેશોમાં વિઝા-મુક્ત મુસાફરીનો આનંદ માણે છે. આ કારણે ઘણા દેશો અમેરિકાનેને પાછળ છોડીને આગળ નીકળી ગયા છે. અમેરિકન નાગરિકોને હવે પહેલા કરતાં વધુ સ્થળો માટે અગાઉથી વિઝા અથવા મુસાફરી ઓથોરાઇઝેશન લેવાની જરૂર પડે છે. આ રેન્કિંગ કોઇ દેશની આર્થિક શક્તિ અથવા રાજકીય પ્રભાવને બદલે મુસાફરી સ્વતંત્રતાને દર્શાવે છે.

સિંગાપોર આ વર્ષે પણ વિશ્વના સૌથી શક્તિશાળી પાસપોર્ટ છે. જાપાન, દક્ષિણ કોરિયા અને સંયુક્ત આરબ અમીરાત (UAE) સંયુક્ત રીતે બીજા સ્થાને છે, જ્યારે સ્વીડન ત્રીજા ક્રમે છે. આ ઉપરાંત, બેલ્જિયમ, ડેનમાર્ક, ફિનલેન્ડ, જર્મની, આયર્લેન્ડ, ઇટાલી, લક્ઝમબર્ગ, નેધરલેન્ડ, નોર્વે અને સ્પેન સૌથી મજબૂત પાસપોર્ટ ધરાવતા દેશોમાં સામેલ છે. તો, બ્રિટન, ન્યૂઝીલેન્ડ, કેનેડા, સ્વિટ્ઝર્લૅન્ડ, ઑસ્ટ્રિયા અને ગ્રીસ પણ ટોપ-10 દેશોમાં છે.

હેનલી પાસપોર્ટ ઇન્ડેક્સ 2026 દર્શાવે છે કે, આજના સમયમાં કોઇ દેશના નાગરિકો કેટલા દેશોમાં સરળતાથી મુસાફરી કરી શકે છે, આ તેની વૈશ્વિક પહોંચનું મુખ્ય માપદંડ બની ગયું છે. અમેરિકન પાસપોર્ટ અત્યારે પણ વિશ્વના સૌથી શક્તિશાળી પાસપોર્ટમાંનો એક છે, ત્યારે અન્ય દેશોએ વિઝા-મુક્ત મુસાફરીના વિસ્તરણમાં વધુ ઝડપથી પ્રગતિ કરી છે.

ગત અઠવાડિયામાં મોરોક્કોથી હજારો સ્થળાંતર કરનારા સ્પેનના ઉત્તર આફ્રિકન વિસ્તાર સેઉટામાં પહોંચ્યા છે, જેના કારણે સ્પેને તેના સશસ્ત્ર દળો તૈનાત કર્યા છે. સ્પેનિશ ગૃહ મંત્રાલયે જણાવ્યું હતું કે, છેલ્લા 24 કલાકમાં 49,000થી વધુ લોકો સેઉટામાં પ્રવેશ્યા છે. આ વિશાળ સંખ્યામાં આવેલા પ્રવાસીઓને કારણે સ્થાનિક અધિકારીઓ પરેશાન થઇ ગયા છે અને સ્વાગત કેન્દ્રો પર દબાણ વધી ગયું છે.

સ્પેનિશ સરહદ પાર કરવાનો પ્રયાસ કરતા ઓછામાં ઓછા 18 લોકો મૃત્યુ પામ્યા છે, જેમાંથી મોટાભાગના લોકો સરહદ બેરિકેડ્સ પાર કરવાનો પ્રયાસ કરતી વખતે ડૂબી ગયા છે. સ્પેનિશ અધિકારીઓએ વધતી ભીડનો સામનો કરવા માટે લશ્કરી દળો તૈનાત કર્યા છે, જ્યારે યુરોપિયન યુનિયને સરહદ પર વ્યવસ્થા પુનઃસ્થાપિત કરવા માટે સહાયની ઓફર કરી છે. સેઉટાના પ્રમુખ, જુઆન જીસસ વિવાસે, મેડ્રિડને રાષ્ટ્રીય કટોકટી જાહેર કરવા વિનંતી કરી, કહ્યું કે સેંકડો સ્થળાંતર કરનારાઓ સડકો પર સૂઈ રહ્યા છે. તેમણે વધુ સુરક્ષા કર્મચારીઓ, માળખાગત સુવિધાઓ અને સંસાધનોની માંગ કરી.

તારાજલ બીચના વીડિયોમાં સ્થળાંતર કરનારાઓ પાળાની આસપાસ તરીને, ટ્યુબ પર ઝૂલતા અને પછી સ્પેનિશ પ્રદેશમાં કિનારા તરફ ભાગી જતા દેખાય છે. જેમાં મોટાભાગના યુવાનો હતા, પરંતુ સરહદ પાર કરનારાઓમાં મહિલાઓ અને બાળકો સહિતના પરિવારો પણ હતા. કેટલાકે 'વિવા એસ્પાના' અને 'સ્પેન જિંદાબાદ'ના નારા લગાવ્યા હતા.

https://twitter.com/AP/status/2082976467202277849

સ્પેનિશ અધિકારીઓએ એવા દાવાઓને નકારી કાઢ્યા છે કે, સ્થળાંતર કરનારાઓનો ધસારો મેડ્રિડની તાજેતરની યોજનાને કારણે થયો હતો, જેમાં આશરે 500,000 ગેરકાયદેસર ઇમિગ્રન્ટ્સને રેગ્યુલર કરવામાં આવ્યા હતા. સરકારે કહ્યું કે આ ઘટના સુપ્રીમ કોર્ટના ચુકાદાનું પરિણામ હોઈ શકે છે જે સમુદ્રમાં પકડાયેલા સ્થળાંતર કરનારાઓને મોરોક્કો પાછા ન મોકલવાનું કહેવાય છે. એક સમાચાર એજન્સીએ સરકારી પ્રવક્તાનો ઉલ્લેખ કરીને જણાવ્યું હતું કે, ગુનાહિત ટ્રાફિકિંગ નેટવર્ક્સે આ ચુકાદાનો લાભ લઈને સ્થળાંતર કરનારાઓને સમુદ્ર માર્ગે સ્પેન મોકલ્યા હતા.

ઘણા સ્થળાંતર કરનારાઓ માટે, સેઉટા યુરોપિયન યુનિયનમાં પ્રવેશવા માટેના સૌથી ટૂંકા માર્ગોમાંથી એક છે. સરહદ પાર કરવાનો પ્રયાસ કરનારાઓ ઘણીવાર નજીકના મોરોક્કન શહેરો જેમ કે ફનિડેક અને બેલાઉનેચથી સરહદની વાડ તરીને પાર કરવાનો પ્રયાસ કરે છે. કેટલાક લોકો દેખરેખ પ્રણાલી, પેટ્રોલિંગ અને સુરક્ષા અવરોધો હોવા છતાં, સરહદ પર બાંધેલી વાડ પર ચઢીને અથવા કાપીને પાર કરવાનો પ્રયાસ કરે છે. સેઉટામાં પ્રવેશતા સ્થળાંતર કરનારાઓ સ્પેનમાં આશ્રય માંગી શકે છે, જોકે ઘણાને દ્વિપક્ષીય કરારો હેઠળ તરત જ મોરોક્કો પાછા મોકલવામાં આવે છે.

સેઉટા લાંબા સમયથી મેડ્રિડ અને રબાત વચ્ચે રાજદ્વારી તણાવનું કારણ રહ્યું છે. મોરોક્કો દ્વારા સરહદ નિયંત્રણ હળવા કર્યાના બે દિવસમાં લગભગ 8,000 સ્થળાંતર કરનારાઓ મે 2021માં સેઉટામાં પ્રવેશ્યા ત્યારે સૌથી ગંભીર કટોકટી સર્જાઈ હતી. આ પગલાને સ્પેન સામે બદલો લેવા તરીકે વ્યાપકપણે જોવામાં આવતું હતું, કારણ કે સ્પેને પશ્ચિમ સહારા સ્વતંત્રતા ચળવળના નેતાને સ્પેનિશ હોસ્પિટલમાં તબીબી સારવાર લેવાની મંજૂરી આપી હતી. સ્પેને પશ્ચિમ સહારા પર પોતાનું વલણ બદલ્યું અને સરહદ વ્યવસ્થાપન પર મોરોક્કો સાથે સહયોગ મજબૂત કર્યા પછી જ સંબંધોમાં સુધારો થયો.

હાલમાં આવેલા લોકોથી સ્પેનમાં રાજકીય વિભાજન વધુ ગાઢ બન્યું છે. રૂઢિચુસ્ત અને દૂર-જમણેરી પક્ષોએ સરકાર પર દેશની સરહદોનું રક્ષણ કરવામાં નિષ્ફળ રહેવાનો આરોપ લગાવ્યો છે. કેટલાક દાવો કરે છે કે ગેરકાયદેસર સ્થળાંતર કરનારાઓને નિયમિત કરવાના તાજેતરના પ્રસ્તાવોએ વધુ ગેરકાયદેસર સરહદ ક્રોસિંગને પ્રોત્સાહન આપ્યું છે. સરકાર આ આરોપોને નકારી કાઢે છે અને કહે છે કે, સરહદ સુરક્ષા પુનઃસ્થાપિત કરવી એ પ્રાથમિકતા રહે છે, તેમજ સ્થળાંતર કરનારાઓ અને આશ્રય શોધનારાઓ પ્રત્યે સ્પેનની આંતરરાષ્ટ્રીય જવાબદારીઓને પૂર્ણ કરવી.

અમેરિકામાં ડોનાલ્ડ ટ્રમ્પ સરકાર એક એવા પ્રસ્તાવ પર વિચાર કરી રહી છે, જેમાં અમેરિકાની યુનિવર્સિટીઓમાં અભ્યાસ પૂર્ણ કરનારા વિદેશી વિદ્યાર્થીઓને અમેરિકામાં નોકરી કરવા માટે 100000 US ડૉલર એટલે કે આશરે 96 લાખ રૂપિયા ચૂકવવા પડશે. આ દાવો વોલ સ્ટ્રીટ જર્નલના એક અહેવાલમાં કરવામાં આવ્યો છે. આ સમાચાર બહાર આવ્યા પછી, સોશિયલ મીડિયા પર લોકોએ તેનો સખત વિરોધ કર્યો છે. ટીકાકારોએ તેને એકદમ મૂર્ખ વિચાર ગણાવ્યો છે અને કહ્યું છે કે તે વિશ્વભરના પ્રતિભાશાળી વિદ્યાર્થીઓને અમેરિકા આવતા અટકાવી શકે છે.

જો આ નિયમ લાગુ કરવામાં આવે તો, રાષ્ટ્રપતિ ટ્રમ્પના અમેરિકામાં લગભગ તમામ પ્રકારના કાનૂની ઇમિગ્રેશનને મર્યાદિત કરવાના પ્રયાસોને ખુબ મોટો વેગ મળશે.

રિપોર્ટ અનુસાર, ટ્રમ્પની ફીને વૈકલ્પિક પ્રેક્ટિકલ ટ્રેનિંગ (OPT) યોજના સાથે જોડી શકાય છે. OPT એક એવી સિસ્ટમ છે, જેના હેઠળ વિદેશી વિદ્યાર્થીઓ તેમનો અભ્યાસ પૂર્ણ કર્યા પછી વધુમાં વધુ 3 વર્ષ સુધી અમેરિકામાં કામ કરી શકે છે. આ સમયગાળો અભ્યાસના વિષય પર આધારિત છે. જોકે, ટ્રમ્પ વહીવટીતંત્રે હજુ સુધી આ યોજના અંગે કોઈ સત્તાવાર જાહેરાત કરી નથી.

વોલ સ્ટ્રીટ જર્નલ મુજબ, 2024માં, OPT દ્વારા આશરે 4,19,000 વિદેશી વિદ્યાર્થીઓ યુનાઇટેડ સ્ટેટ્સમાં કામ કરી રહ્યા હતા. આ યોજના અમેરિકન કંપનીઓ માટે પ્રતિભાશાળી વ્યક્તિઓને નોકરી પર રાખવાનું એક મુખ્ય માધ્યમ છે, ખાસ કરીને ટેકનોલોજી અને નાણાકીય ક્ષેત્રોમાં. મોટી કંપનીઓ ઘણીવાર OPT હેઠળ અમેરિકન યુનિવર્સિટીઓમાં અભ્યાસ કરતા વિદેશી વિદ્યાર્થીઓને નોકરી પર રાખે છે અને પછી તેમના માટે H-1B વિઝા મેળવે છે.

OPT પર ફી લાદવાની આ ચર્ચા એવા સમયે થઈ છે, જ્યારે ટ્રમ્પ વહીવટીતંત્રને H-1B વિઝા સંબંધિત અન્ય એક કેસમાં કાનૂની ઝટકો લાગ્યો છે. અગાઉ, ટ્રમ્પ વહીવટીતંત્ર કેટલાક H-1B વિઝા અરજદારો પર 100,000 US ડૉલરની ફી લાદવા માંગતું હતું. જો કે, ગયા અઠવાડિયે, બોસ્ટનમાં એક ફેડરલ અપીલ કોર્ટે આ નિર્ણયને અમલમાં મૂકવાથી રોકી દીધો હતો.

ટેકનોલોજી કંપનીઓ દ્વારા આ દરખાસ્તનો સખત વિરોધ કરવામાં આવ્યો હતો, જેમણે દલીલ કરી હતી કે, વધેલા ખર્ચને કારણે કુશળ વિદેશી કર્મચારીઓને નોકરી પર રાખવાનું મુશ્કેલ બનશે. ત્યારપછી, સરકારે H-1B ફીની પર એક મર્યાદા નક્કી કરી, તેને ફક્ત H-1B વિઝા પર સીધા US આવતા વિદેશી નિષ્ણાતો સુધી મર્યાદિત કર્યો. તેનાથી વિપરીત, જો નવો OPT નિયમ લાગુ કરવામાં આવે છે, તો તેની સીધી અસર US યુનિવર્સિટીઓમાં પહેલાથી જ અભ્યાસ કરતા વિદેશી વિદ્યાર્થીઓ પર પડશે.

USમાં અભ્યાસ કરવા આવતા વિદેશી વિદ્યાર્થીઓમાં ભારત સૌથી વધુ સંખ્યા ધરાવે છે. ભારતીય વિદ્યાર્થીઓએ ચીનને પાછળ છોડી દીધું છે. US કોલેજો અને યુનિવર્સિટીઓમાં નોંધાયેલા તમામ વિદેશી વિદ્યાર્થીઓમાંથી લગભગ એક તૃતીયાંશ ભારતીય છે. આ સંખ્યા આશરે 3,30,000 છે. જો ડોનાલ્ડ ટ્રમ્પની સરકાર USમાં રોજગાર માટે વિદેશી વિદ્યાર્થીઓ પાસેથી 100,000 US ડૉલરની ફી વસૂલવાના નિર્ણય સાથે આગળ વધે છે, તો ભારતીય વિદ્યાર્થીઓ સૌથી વધુ પ્રભાવિત થશે.

તમે કદાચ એક કે બે કરોડના વૈભવી ફ્લેટ વિશે ઘણું સાંભળ્યું હશે. આજકાલ, 500 કરોડની આસપાસના ફ્લેટ વિશે ચર્ચા ચાલી રહી છે. 500 કરોડના ફ્લેટની કિંમત જોઈને, દરેકને આશ્ચર્ય થાય છે કે તેની અંદર એવું તે શું હશે. પરંતુ આ ફ્લેટ ભારતમાં નહીં, પરંતુ ન્યુ યોર્ક શહેરમાં વેચાઈ રહ્યો છે. જોકે, ત્યાંના રહેવાસીઓ પણ તેના આટલા વધુ ભાવથી આશ્ચર્યચકિત છે. અહીં તમને બતાવી દઈએ કે, ન્યુ યોર્કમાં ફ્લેટિરન બિલ્ડિંગમાં ઘણા વૈભવી ફ્લેટ બનાવવામાં આવ્યા છે, જેમાં એક એપાર્ટમેન્ટની કિંમત 58.5 મિલિયન ડૉલર અથવા ભારતીય રૂપિયામાં જોઈએ તો તે 500 કરોડ રૂપિયા સુધીનો છે.

ફ્લેટિરન બિલ્ડિંગ એક વિશિષ્ટ ત્રિકોણાકાર આકાર ધરાવે છે અને તે એકદમ ડિઝાઇનર છે. તે કંઈ આજથી જ નહીં, પરંતુ ઘણા વર્ષોથી ન્યુ યોર્ક શહેરના સૌથી પ્રખ્યાત સીમાચિહ્નોમાંનું એક છે અને તે પ્રવાસીઓનું મુખ્ય આકર્ષણ બની રહ્યું છે. છેલ્લા 7 વર્ષથી ફ્લેટિરન બિલ્ડિંગમાં નવીનીકરણનું કામ ચાલી રહ્યું છે. આ પ્રખ્યાત ઇમારતમાં પહેલા ઓફિસો હતી અને હવે તેમાં અતિ-લક્ઝરી એપાર્ટમેન્ટ્સ બનાવવામાં આવ્યા છે. ન્યૂ યોર્કના આ પ્રખ્યાત પર્યટન સ્થળને ત્યારથી રહેણાંક ઇમારતમાં પરિવર્તિત કરવામાં આવ્યું છે.

આ એપાર્ટમેન્ટ્સની કિંમતમાં સૌથી વધારે પૈસા તેના લોકેશનમાં છે. સમગ્ર ફ્લેટિરન બિલ્ડિંગમાં 36 ઓપન-કન્સેપ્ટ એપાર્ટમેન્ટ્સ હશે, કેટલાક અડધા માળના અને કેટલાક સંપૂર્ણ માળના. મીડિયા સૂત્રોના અહેવાલ મુજબ, 3 બેડરૂમના યુનિટ માટે કિંમતો 11 મિલિયન ડૉલરથી લઈને બાલ્કનીવાળા ફુલ-ફ્લોર 5 બેડરૂમના યુનિટ માટે 58.5 મિલિયન ડૉલર સુધીની છે. ઇમારતના બેઝમેન્ટ અને કોમન એરિયામાં 60 ફૂટનો સ્વિમિંગ પૂલ, બિલિયર્ડ્સ રૂમ, વેલનેસ સેન્ટર અને પિયાનો લાઉન્જ જેવી સુવિધાઓ પણ હશે.

https://twitter.com/nyclovesnyc/status/2051648747063439565

આ મોંઘા એપાર્ટમેન્ટ્સ હવે સોશિયલ મીડિયા પર ઘણી વધારે ચર્ચા જગાવી રહ્યા છે. ઘણા વપરાશકર્તાઓ આશ્ચર્યચકિત થાય છે કે, આટલો મોંઘો એપાર્ટમેન્ટ કોણ ખરીદવા માંગશે, જ્યારે અન્ય લોકોના મનમાં સવાલ ઉભો થાય છે કે, આમાં રૂ. 500 કરોડની કિંમત શું.

આટલા વર્ષો પછી લોકો ઇમારતમાં લાઇટિંગ જોઈને ઉત્સાહિત છે. જ્યારે, ઘણા વર્ષોથી બંધ હોવાને કારણે, મુલાકાત લેનારા મોટી સંખ્યામાં પ્રવાસીઓ તેના સુંદર બ્યુક્સ-આર્ટ્સ-શૈલીના બાહ્ય ભાગને જોઈ શક્યા ન હતા. માલિકોનું કહેવું છે કે, નવા રહેવાસીઓ આગામી મહિનાઓથી રહેવા પણ આવી જશે. બધા એકમો અને સુવિધાઓ 2027ની શરૂઆતમાં બનીને તૈયાર થઈ જશે.

મીડિયા સૂત્રોના અહેવાલ મુજબ, ન્યુ યોર્ક શહેરમાં ફક્ત 21 મિલકતો વેચાણ માટે જાહેરમાં ઉપલબ્ધ છે જે આનાથી પણ વધુ મોંઘી છે. આ તો, 120 વર્ષથી વધુ સમયથી આ ઇમારત સ્થાપત્ય શ્રેષ્ઠતા અને એન્જિનિયરિંગ કૌશલ્યનું પ્રતીક રહી છે. 1902માં બનેલી, તે એક સ્થાપત્ય અજાયબી હતી, જેમાં સ્ટીલ-ફ્રેમ બાંધકામ તકનીકનો ઉપયોગ કરવામાં આવ્યો હતો, જેના કારણે તે શહેરના પ્રથમ ગગનચુંબી ઇમારતોમાંનું એક બની ગયું હતું.

UKના ભૂતપૂર્વ ગૃહ મંત્રી પ્રીતિ પટેલે ભાગેડુ ભારતીય હીરા વેપારી નીરવ મોદીના પ્રત્યાર્પણમાં વિલંબ પર નિરાશા વ્યક્ત કરી છે. તેમણે પોતાની સરકાર અને કાનૂની પ્રક્રિયા પર આકરા પ્રહારો કર્યા છે. તેમણે જણાવ્યું હતું કે આ મામલામાં વિલંબથી ભારત અને UK વચ્ચેના સંબંધો પર નકારાત્મક અસર પડી છે. આટલા લાંબા વિલંબથી ભારત સાથેનો વિશ્વાસ ઓછો થયો છે.

ધ ડેઇલી ટેલિગ્રાફના પોડકાસ્ટ 'ધ ડાયમંડ કિંગ'માં વાતચીત કરતા પ્રીતિ પટેલે કહ્યું કે, મને એ જોઇને હેરાની અને નિરાશા થાય છે કે પ્રત્યાર્પણના આદેશ પર હસ્તાક્ષર થયાના વર્ષો પછી પણ નીરવ મોદી UKમાં છે. પ્રીતિ પટેલે એપ્રિલ 2021માં ભાગેડુ હીરા વેપારી નીરવ મોદીના પ્રત્યાર્પણના આદેશ પર હસ્તાક્ષર કર્યા હતા. આ પહેલા, બ્રિટિશ કોર્ટોએ માન્યું હતું કે ભારતમાં તેની સામે કાર્યવાહી કરવા માટે પૂરતા આધાર છે. તેમણે ખૂબ આશ્ચર્ય અને નિરાશા વ્યક્ત કરી હતી કે નીરવ મોદી હજુ પણ UKમાં છે.

તેમણે કહ્યું કે પંજાબ નેશનલ બેંક (PNB) સાથે સંકળાયેલા 2 અબજ ડોલરના છેતરપિંડી અને મની લોન્ડ્રિંગ કેસમાં વોન્ટેડ ઉદ્યોગપતિનું પ્રત્યાર્પણ ન કરી શકવાને કારણે ભારત સરકાર ખૂબ જ નારાજ છે. જો આપણી સિસ્ટમ પ્રક્રિયા અને બહાનાબાજીમાં ગુચવાવાને બદલે સમજદારીપૂર્વક કાર્ય કર્યું હોત અને યોગ્ય પગલાં લીધા હોત તો આજે નીરવ મોદી દેશમાં ન હોત અને તે અત્યાર સુધી ભારત મોકલી દેવામાં આવ્યો હોત. કે આ વિલંબથી ભારતને UK સાથેના સહયોગ અંગે ખૂબ નિરાશા થઈ છે.

પ્રીતિ પટેલે જણાવ્યું હતું કે, કાનૂની પ્રક્રિયા પૂર્ણ થયા પછી, નીરવ મોદીએ ભારતમાં તેની સજા ભોગવવી જોઈતી હતી. તેણે ભારતીય જેલમાં તેની સજા ભોગવી જોઈતી હતી, અને આ બધું કાનૂની પ્રક્રિયા દ્વારા થવું જોઇતું હતું; UKના પ્રત્યાર્પણ કાયદા અને સંધિઓનો આ જ હેતુ છે. તેમણે આ લાંબા વિલંબને બ્રિટિશ સિસ્ટમનો સ્પષ્ટ દુરુપયોગ અને બ્રિટિશ કરદાતાઓનું અપમાન ગણાવ્યું.

તેમણે દાવો કર્યો હતો કે 2019 થી 2022 દરમિયાન ગૃહ મંત્રી તરીકેના તેમના કાર્યકાળ દરમિયાન આ કેસથી રાજદ્વારી પડકારો પણ ઉભા કર્યા હતા. તેમણે જણાવ્યું કે જ્યાં સુધી પ્રત્યાર્પણનો મામલો ઉકેલાઈ ન જાય ત્યાં સુધી, ભારત એવા વ્યક્તિઓના પરત સ્વીકારવામાં સહકાર આપવા તૈયાર નહોતું જેમની આશ્રય અરજીઓ નકારી કાઢવામાં આવી હતી.

તેમણે કહ્યું કે, ભારતને આશ્રય અરજી નામંજૂર થનારા લોકોને પરત ત સ્વીકારવા માટે સમજાવવું મારા માટે એક મોટો પડકાર હતો. મારું માનવું છે કે આ મોટે ભાગે એટલા માટે હતું કારણ કે આપણી પાસે આ હાઇ-પ્રોફાઇલ કેસ (નીરવ મોદીનો) હતો. તે સમયે વધું એક હાઇ-પ્રોફાઇલ કેસ પણ હતો. જ્યાં સુધી તેમણે (ભારત) તે કેસોમાં કાર્યવાહી અથવા પ્રગતિ ન જોઇ, ત્યાં સુધી તેમની પાસે અમારા પર દબાણ બનાવવાનું એક માધ્યમ હતું, જે ખૂબ જ નિરાશાજનક હતું.

નીરવ મોદીએ UKમાં તમામ કાનૂની માર્ગો અપનાવી લીધા છે, અને અહેવાલો છે કે યુરોપિયન માનવ અધિકાર કોર્ટમાં તેમની અંતિમ અપીલ પણ નકારી કાઢવામાં આવી છે. માનવ અધિકારના આધાર પર આધારિત અપીલો અને ગુપ્ત આશ્રય દાવા સહિત વર્ષોના કાનૂની પડકારો પછી તેમનું ભારત પ્રત્યાર્પણ હવે લગભગ નિશ્ચિત માનવામાં આવે છે.

55 વર્ષીય નીરવ મોદી હાલમાં લંડનની પેન્ટનવિલે જેલમાં બંધ છે. ભારતમાં તેમની સામે ત્રણ ફોજદારી કેસ નોંધાયેલા છે. આમાં પંજાબ નેશનલ બેંક (PNB) સાથે સંકળાયેલા આશરે $2 બિલિયનના કથિત છેતરપિંડી સંબંધિત CBI કેસ, એન્ફોર્સમેન્ટ ડિરેક્ટોરેટ (ED) દ્વારા દાખલ કરાયેલ મની લોન્ડરિંગ કેસ અને પુરાવા અને સાક્ષીઓ સાથે છેડછાડ સંબંધિત કેસનો સમાવેશ થાય છે.

અમેરિકામાં ફરી એકવાર રાજકીય નિવેદનબાજી તેજ થઈ ગઈ છે. રાષ્ટ્રપતિ ડોનાલ્ડ ટ્રમ્પના કટ્ટર સમર્થક અને જમણેરી રાજકીય કાર્યકર્તા લૌરા લૂમરે ન્યૂ યોર્ક શહેરના મેયર ઝોહરાન મમદાનીના નિવેદન પર આકરા પ્રહારો કર્યા છે. લૂમરની આ ખૂબ જ વિવાદાસ્પદ ટિપ્પણી મામદાનીએ ઇઝરાયલી PM બેન્જામિન નેતન્યાહૂને 'યુદ્ધ ગુનેગાર' ગણાવ્યા અને તેમનું ન્યૂ યોર્કમાં સ્વાગત ન થવું જોઈએ એવું નિવેદન કર્યા પછી આવી છે.

યહૂદી સમુદાયમાંથી આવતી લૌરા લૂમરે સોશિયલ મીડિયા પ્લેટફોર્મ X પર લખ્યું કે મુસ્લિમોને અમેરિકામાં જાહેર પદ સંભાળવાની મંજૂરી આપવી જોઈએ નહીં. તેમણે એવી પણ માંગ કરી કે રાષ્ટ્રપતિ ટ્રમ્પ 'મુસ્લિમ પ્રતિબંધ' ફરીથી લાગુ કરે. લૂમરે પોતાની પોસ્ટમાં જણાવ્યું હતું કે, જ્યાં સુધી ટ્રમ્પ પહેલાની જેમ મુસ્લિમ પ્રતિબંધ લાગુ ન કરે ત્યાં સુધી 'અમેરિકાને ફરીથી સુરક્ષિત બનાવો'નું લક્ષ્ય પ્રાપ્ત કરી શકાતું નથી. તેમણે એમ પણ કહ્યું હતું કે, આ વખતે પ્રતિબંધ ફક્ત મુસાફરી સુધી મર્યાદિત ન હોવો જોઈએ, પરંતુ સંપૂર્ણપણે મુસ્લિમ પ્રતિબંધ તરીકે લાગુ થવો જોઈએ.

લૂમરે કોઈ પણ જાહેર પુરાવા આપ્યા વિના દાવો કર્યો હતો કે, ઝોહરાન મામદાનીને ઈરાન અને હમાસ પ્રત્યે સહાનુભૂતિ છે અને તે અમેરિકાની રાષ્ટ્રીય સુરક્ષા માટે ખતરો છે. તેમણે લખ્યું હતું કે જો મુસ્લિમોને અમેરિકન રાજકીય વ્યવસ્થામાં સત્તા સંભાળવાની મંજૂરી આપવામાં આવશે, તો મોટા શહેરોનું નેતૃત્વ એવા લોકો કરશે જે ઈરાન અને હમાસને ટેકો આપે છે.

લૂમરે એવો પણ દાવો કર્યો હતો કે, ટ્રમ્પ વહીવટીતંત્રે તેમને કહ્યું છે કે મામદાનીને ક્યારેય FBI સુરક્ષા મંજૂરી મળશે નહીં. એક કથિત વરિષ્ઠ FBI સ્ત્રોતનો ઉલ્લેખ કરીને, તેમણે કહ્યું કે કેટલાક એજન્સી અધિકારીઓને શંકા છે કે મામદાની ઇસ્લામિક આતંકવાદી સંગઠનો સાથે જોડાયેલા હોઈ શકે છે. જો કે, આ દાવાઓને સમર્થન આપવા માટે કોઈ સત્તાવાર દસ્તાવેજો અથવા જાહેર પુરાવા બહાર આવ્યા નથી, અને FBIએ પણ આવી કોઈ માહિતીની પુષ્ટિ કરી નથી.

X પર શેર કરાયેલા એક વીડિયોમાં ઝોહરાન મામદાનીએ ઇઝરાયલી PM બેન્જામિન નેતન્યાહૂને 'યુદ્ધ ગુનેગાર' કહ્યા ત્યારે વિવાદ વધુ વધ્યો. તેમણે કહ્યું હતું કે, નેતન્યાહૂનું ન્યૂયોર્કમાં સ્વાગત ન કરવું જોઈએ અને US સરકારે આંતરરાષ્ટ્રીય ગુનાહિત અદાલત (ICC) દ્વારા બહાર પાડવામાં આવેલા ધરપકડ વોરંટનું પાલન કરવું જોઈએ. મામદાનીએ આરોપ લગાવ્યો હતો કે, ગાઝામાં ઇઝરાયલના લશ્કરી કાર્યવાહી દરમિયાન નાગરિકો, બાળકો અને હોસ્પિટલોને મોટા પાયે નિશાન બનાવવામાં આવ્યા હતા. તેમણે માનવતાવાદી સહાય રોકવા અને હજારો પેલેસ્ટિનિયનોને ભૂખમરાનો સામનો કરવા માટે નેતન્યાહુને જવાબદાર ઠેરવ્યા.

મામદાનીએ જણાવ્યું હતું કે, આંતરરાષ્ટ્રીય ફોજદારી અદાલતે નેતન્યાહુ સામે કારણ વગર ધરપકડ વોરંટ જારી કર્યું નથી. તેમણે કહ્યું હતું કે ICC દ્વારા આરોપ મૂકવામાં આવેલા લોકો પર ન્યાયી કાનૂની પ્રક્રિયા હેઠળ કેસ ચલાવવો જોઈએ, અને નેતન્યાહુ પણ તેનાથી અલગ નથી.

લૂમર અને મામદાનીના આ નિવેદનોએ ઇઝરાયલ-પેલેસ્ટાઇન મુદ્દો, ધાર્મિક ઓળખ અને રાષ્ટ્રીય સુરક્ષા જેવા સંવેદનશીલ વિષયો પર USમાં રાજકીય ચર્ચાને વધુ તીવ્ર બનાવી છે. જ્યારે લૂમરના આરોપોની સ્વતંત્ર રીતે પુષ્ટિ થઈ નથી, જ્યારે બીજી બાજુ મામદાનીના નેતન્યાહુ વિરોધી નિવેદનો પણ અમેરિકન રાજકારણમાં તીવ્ર પ્રતિક્રિયાઓ પેદા કરી રહ્યા છે.

'કોકરોચ જનતા પાર્ટી' (CJP)ના નેતૃત્વમાં, સોમવારે દિલ્હીમાં જંતર-મંતરથી સંસદ સુધી કૂચ કાઢવામાં આવી હતી. આ દરમિયાન પ્રદર્શનકારીઓ અને પોલીસ વચ્ચે અનેક વખત અથડામણો થઈ હતી. પોલીસે ટીયર ગેસના શેલ છોડ્યા હતા અને પથ્થરમારાની ઘટનાઓ પણ બની હતી. બંને પક્ષના લોકો ઇજાગ્રસ્ત થયા હતા. ધ ન્યૂ યોર્ક ટાઇમ્સ, ધ ગાર્ડિયન અને BBC સહિત અનેક આંતરરાષ્ટ્રીય મીડિયા આઉટલેટ્સે આ આંદોલનને કવર કર્યું છે. ચાલો જાણીએ ભારતમાં આ યુવા આંદોલન વિશે વિદેશી મીડિયાએ શું લખ્યું છે.

ધ ન્યૂ યોર્ક ટાઇમ્સ: પ્રદર્શનકારીઓનું લોહી વહ્યું, પરંતુ અડગ રહ્યા

અમેરિકન અખબાર ધ ન્યૂયોર્ક ટાઇમ્સએ પોતાના અહેવાલમાં જણાવ્યું હતું કે શિક્ષણ પ્રણાલી અને ભરતી પરીક્ષાઓમાં અનિયમિતતાઓ સામે વિરોધ કરી રહેલા હજારો યુવાનો પોલીસ કાર્યવાહી છતા પાછળ હટ્યા નહીં. અખબારના જણાવ્યા અનુસાર, સંસદ તરફ કૂચ દરમિયાન થયેલી અથડામણો અને પોલીસ કાર્યવાહીના બીજા દિવસે મોટી સંખ્યામાં પ્રદર્શનકારીઓ જંતર-મંતર પરત ફર્યા, સરકારની જવાબદારીની માંગમાં અડગ રહ્યા. અખબારે લખ્યું કે સંસદ તરફ કૂચ દરમિયાન પોલીસે લાઠીચાર્જ કર્યો અને ટીયર ગેસના શેલ છોડ્યા. પ્રદર્શનકારીઓનો આરોપ લગાવ્યો કે તેમને તેમની માંગણીઓ અંગે સરકાર તરફથી કોઈ નક્કર જવાબ મળ્યો નથી.

ધ ન્યૂયોર્ક ટાઇમ્સે લખ્યું કે, વિરોધ પ્રદર્શનનું નેતૃત્વ કરી રહેલા જૂથો અનુસાર, સોમવારે થયેલી અથડામણમાં 150 પ્રદર્શનકારીઓ ઇજાગ્રસ્ત થયા હતા. તો, દિલ્હી પોલીસે 118 પોલીસ કર્મચારીઓ ઇજાગ્ર્સ્ત થવા અને આશરે 70 પ્રદર્શનકારીઓની અટકાયત કરવામાં આવી છે. અહેવાલમાં જણાવાયું છે કે પોલીસ કાર્યવાહી છતા આંદોલનકારીઓએ વિરોધ ચાલુ રાખવાનો નિર્ણય લીધો છે.

ધ ગાર્ડિયન: પ્રદર્શનકારીઓ પીછેહઠ કરવા તૈયાર નથી

ધ ગાર્ડિયને પોતાના અહેવાલમાં જણાવ્યું કે પોલીસ કાર્યવાહી છતા વિદ્યાર્થી આંદોલન ચાલુ છે. અખબાર અનુસાર, સોમવારની અથડામણ પછીના દિવસે હજારો પ્રદર્શનકારીઓ જંતર-મંતર પરત ફર્યા અને આંદોલન ચાલુ રાખવાની વાત કહી.

અહેવાલ મુજબ, સોમવારે વિરોધ પ્રદર્શનમાં 50,000થી વધુ લોકોએ ભાગ લીધો હતો. પ્રદર્શનકારી સંસદ તરફ કૂચ કરી રહ્યા હતા, પરંતુ પોલીસે બેરિકેડનો ઉપયોગ કરીને તેમને અટકાવ્યા હતા. ત્યારબાદ, ઇન્ટરનેટ સેવાઓ સ્થગિત કરવામાં આવી હતી. અખબારે લખ્યું કે, બાદમાં પોલીસે ટીયર ગેસના શેલ છોડ્યા અને લાઠીચાર્જ કર્યો.

ધ ગાર્ડિયને પ્રદર્શનકારીઓ અને પ્રત્યક્ષદર્શીઓને ટાંકીને દાવો કર્યો છે કે પોલીસ કાર્યવાહી દરમિયાન મહિલાઓ અને બાળકોને પણ ઇજાઓ થઈ છે. અહેવાલ મુજબ, લગભગ 60 લોકો ઇજાગ્રસ્ત થયા હતા, અને એક પ્રદર્શનકારીને ગંભીર હાલતમાં ICUમાં દાખલ કરવો પડ્યો હતો. અખબારે લખ્યું કે આંદોલન હવે શૈક્ષણિક સુધારાની માંગણીઓ સુધી મર્યાદિત નથી; મોટી સંખ્યામાં યુવાનો સરકાર સામે પોતાનો ગુસ્સો વ્યક્ત કરવા માટે રસ્તાઓ પર ઉતરી રહ્યા છે. તો, પોલીસે જણાવ્યું હતું કે તેઓએ પ્રદર્શનકારીઓની ગતિવિધિઓના જવાબમાં કાર્યવાહી કરી હતી.

અલ જઝીરા: પોલીસ કાર્યવાહીના બીજા દિવસે વિદ્યાર્થીઓ ફરીથી રસ્તા પર

અલ જઝીરાએ લખ્યું કે સંસદ તરફ કૂચ દરમિયાન પોલીસ કાર્યવાહી છતા વિદ્યાર્થીઓ પાછળ ન હટ્યા. અહેવાલ મુજબ, લાઠીચાર્જ અને ટીયર ગેસના ઉપયોગના બીજા જ દિવસે મોટી સંખ્યામાં પ્રદર્શનકારીઓ જંતર-મંતર પરત ફર્યા હતા, અને આંદોલન ચાલુ રાખવાની જાહેરાત કરી છે.

અહેવાલમાં જણાવાયું છે કે પોલીસે સંસદ તરફ કૂચ કરી રહેલા પ્રદર્શનકારીઓ પર ટીયર ગેસના શેલ છોડ્યા હતા, જેમાં 100 થી વધુ વિદ્યાર્થીઓ ઇજાગ્રસ્ત થયા હતા. અલ જઝીરાએ ઘટનાસ્થળે તૂટેલા બેરિકેડ, વિખેરાયેલા સામાન અને અથડામણના સંકેતોનો પણ ઉલ્લેખ કર્યો છે.

અહેવાલ મુજબ, પ્રવેશ પરીક્ષાઓમાં પેપર લીક અને મૂલ્યાંકન પ્રક્રિયાઓમાં અનિયમિતતાઓને લઈને યુવાનોમાં છેલ્લા બે મહિનાથી નારાજ છે. અખબારે એમ પણ લખ્યું કે વડાપ્રધાન નરેન્દ્ર મોદીએ હજુ સુધી આંદોલન પર જાહેરમાં ટિપ્પણી કરી નથી. તો, વિપક્ષી નેતા રાહુલ ગાંધીએ પ્રદર્શનના સમર્થનમાં અવાજ ઉઠાવ્યો. વિશ્લેષકોના સંદર્ભે અહેવાલમાં કહેવામાં આવ્યું છે કે આ આંદોલનથી સરકારી જવાબદારી અને લોકશાહી સંસ્થાઓ અંગે બહેસ વધુ તેજ કરી દીધી છે.

BBC: પોલીસ કાર્યવાહીના બીજા દિવસે પણ હજારો પ્રદર્શનકારી જંતર-મંતર પહોંચ્યા

BBCએ તેના અહેવાલમાં જણાવ્યું છે કે પોલીસ કાર્યવાહીના બીજા દિવસે પણ હજારો પ્રદર્શનકારીઓ જંતર-મંતર પર એકઠા થયા હતા અને આંદોલન ચાલુ રાખ્યું હતું. અહેવાલ અનુસાર, સંસદ તરફ કૂચ દરમિયાન પોલીસે પ્રદર્શનકારીઓ પર લાઠીચાર્જ અને ટીયર ગેસનો ઉપયોગ કર્યો હતો, જેમાં ઓછામાં ઓછા 60 લોકો ઇજાગ્રસ્ત થયા હતા. દરમિયાન, દિલ્હી પોલીસે તેમના 118 કર્મચારીઓ ઇજાગ્રસ્ત થવા અને 70 પ્રદર્શનકારીની અટકાયત કરવાની વાત કહી.

અહેવાલમાં કહેવામાં આવ્યું છે કે પોલીસે પ્રદર્શન સ્થળ પર બનેલા મંચ અને કામચલાઉ તંબુઓ પણ હટાવી દીધા. ઘણા પ્રદર્શનકારીઓએ BBCને જણાવ્યું હતું કે પોલીસ કાર્યવાહી દરમિયાન મહિલાઓને પણ બક્ષવામાં આવી નહોતી. જોકે, પોલીસે કે કેન્દ્ર સરકારે લાઠીચાર્જ અને ટીયર ગેસના ઉપયોગ અંગે કોઈ ટિપ્પણી કરી નથી.

BBCના અહેવાલમાં વિપક્ષી નેતા રાહુલ ગાંધીના નિવેદનનો પણ ઉલ્લેખ કરવામાં આવ્યો છે. અહેવાલ મુજબ, રાહુલે વિદ્યાર્થીઓની માંગણીઓને કાયદેસર ગણાવતા સરકાર પાસેથી જવાબો માંગ્યા અને કોંગ્રેસના સાંસદો સાથે વડાપ્રધાનના નિવાસસ્થાન તરફ કૂચ કરી.

ડૉન: વિદ્યાર્થી આંદોલનથી વિરોધ પક્ષને મોદી સરકારને ઘેરવાની તક મળી

પાકિસ્તાનના અખબાર  ડૉનએ લખ્યું છે કે વિદ્યાર્થ આંદોલને વિરોધ પક્ષને મોદી સરકાર પર હુમલો કરવાનો નવો મુદ્દો આપી દીધો છે. અહેવાલ મુજબ, પોલીસ કાર્યવાહી બાદ લગભગ તમામ મુખ્ય વિપક્ષી પક્ષો પ્રદર્શનકારીઓના સમર્થનમાં ઉતરી આવ્યા. અહેવાલમાં જણાવાયું છે કે મોટી સંખ્યામાં યુવાનોના રસ્તા પર ઉતરવા હતા અને પોલીસ કાર્યવાહીની તસવીરો સામે આવ્યા બાદ વિપક્ષે આંદોલનને ટેકો આપ્યો હતો.

વિશ્લેષકોના સંદર્ભે અખબારે લખ્યું કે આનાથી વિપક્ષને યુવા મતદારો સુધી પહોંચવાની તક મળી શકે છે, પરંતુ વિદ્યાર્થીઓના મુખ્ય મુદ્દાઓ રાજકીય એજન્ડા પાછળ છૂટવાનો ભય પણ છે. અહેવાલમાં રાહુલ ગાંધીના નિવેદનનો પણ ઉલ્લેખ છે, જેમાં તેમણે વિદ્યાર્થીઓની માંગણીઓને ટેકો આપતા શિક્ષણ પ્રધાનના રાજીનામાની માંગ કરી હતી.

કેનેડા સરકારે ઇમિગ્રેશન નિયમોમાં મોટા ફેરફાર કરતા પેરેન્ટ્સ એન્ડ ગ્રાન્ડપેરન્ટ્સ પ્રોગ્રામ (PGP) માટે નવી અરજીઓ અસ્થાયી રૂપે સ્થગિત કરી દીધી છે. ઇમિગ્રેશન વિભાગ (IRCC)એ જણાવ્યું છે કે, આગામી સૂચના સુધી ન તો નવા 'ઇન્ટરેસ્ટ ટૂ સ્પોન્સર' ફોર્મ સ્વીકારવામાં આવશે અને ન તો નવા અરજદારોને PR સ્પોન્સરશિપ માટે અરજી કરવાની તક મળશે.

કેનેડામાં રહેતા હજારો પરિવારો માટે આ એક મોટો ઝટકો છે. હવે તેઓ તેમના માતા-પિતા અથવા દાદા-દાદી માટે કાયમી રહેઠાણ અપાવવા માટે પેરેન્ટ્સ એન્ડ ગ્રાન્ડપેરન્ટ્સ પ્રોગ્રામ (PGP) હેઠળ નવી અરજીઓ સબમિટ કરી શકશે નહીં.

કેનેડિયન સરકારે 15 જુલાઇ 2026ના રોજ જાહેર કરેલા નિવેદનમાં જણાવ્યું કે PGP હેઠળ નવી અરજીઓની પ્રક્રિયા બંધ કરી દેવામાં આવી છે. ઇમિગ્રેશન વિભાગે સ્પષ્ટતા કરી કે તે નવા 'ઇન્ટરેસ્ટ ટૂ સ્પોન્સર' ફોર્મ સ્વીકારશે નહીં અને ન તો સંભવિત પ્રાયોજકોને અરજી કરવા માટે આમંત્રિત કરશે. જો કે, જે લોકોએ પહેલા જ PGP હેઠળ પહેલાથી જ સબમિટ કરેલી અરજીઓની પ્રક્રિયા ચાલુ રહેશે.

સરકારે જણાવ્યું હતું કે, અગાઉ સબમિટ કરેલી PGP અરજીઓ પર પ્રક્રિયા કરવામાં આવશે. વર્ષ 2026, 2027 અને 2028માં આશરે 15,000 લોકોને આ પ્રોગ્રામ દ્વારા કેનેડિયન કાયમી નિવાસ આપવાનું લક્ષ્ય રાખવામાં આવ્યું છે.

IRCC અનુસાર, PGP કાર્યક્રમ હેઠળ આશરે 50,900 અરજીઓ હાલમાં પ્રક્રિયા હેઠળ છે. આમાંથી, 40,400 અરજીઓ ક્વિબેકની બહાર વસનારા લોકો છે અને જ્યારે 10,500 અરજીઓ ક્વિબેકમાં રહેવાની યોજનાવાળા અરજદારોની છે. સરકારનું કહેવું છે કે જૂની અરજીઓના નીકાલ પર ધ્યાન કેન્દ્રિત કરવામાં આવશે.

કેમ રોકવામાં આવ્યો PGP કાર્યક્રમ?

પેરેન્ટ્સ એન્ડ ગ્રાન્ડપેરેન્ટ્સ પ્રોગ્રામ (PGP) કેનેડાનો કૌટુંબિક રિયુનિફિકેશન પ્રોગ્રામ છે. આ કાર્યક્રમ દ્વારા કેનેડિયન નાગરિકો PR ઘારક પોતાના માતા-પિતા અને દાદા-દાદીને કેનેડા બોલાવીને તેમને કાયમી નિવાસ મેળવવામાં મદદ કરી શકે છે; જોકે, આ કાર્યક્રમમાં માંગ ઉપલબ્ધ જગ્યાઓ કરતા સતત વધી રહી છે. આ કારણે સરકારે તેને લોટરી સિસ્ટમ દ્વારા તેનું સંચાલન કર્યું હતું.

જ્યારે 2020માં નવા અરજદારો પાસેથી ઇન્ટરેસ્ટ ટૂ સ્પોન્સર ફોર્મ છેલ્લે મંગાવવામાં આવ્યા હતા, ત્યારે સરકારને આશરે 2,03,213 સબમિશન મળ્યા હતા. ત્યારબાદ દરવર્ષે અરજદારોને તે જ લોકોમાંથી રેન્ડમ રીતે પસંદગી કરીને અરજીઓ સબમિટ કરવાની તક આપવામાં આવતી હતી.

PGP બંધ થયા પછી સુપર વિઝા વિકલ્પ

સરકારે નવા અરજદારોને પેરેન્ટ્સ એન્ડ ગ્રાન્ડપેરેન્ટ્સ સુપર વિઝા પર વિચાર કરવાની સલાહ આપી છે. આ વિઝા દ્વારા માતા-પિતા અને દાદા-દાદીને લાંબા સમય સુધી કેનેડામાં રહી શકે છે.

સુપર વિઝા હેઠળ:

માતા-પિતા અને દાદા-દાદી એક સમયે પાંચ વર્ષ સુધી કેનેડામાં રહી શકે છે.

વિઝા 10 વર્ષ સુધી માન્ય હોઈ શકે છે.

અરજદારોએ આરોગ્ય વીમો લેવો જરૂરી છે.

કેનેડામાં રહેતા સંબંધીએ નાણાકીય જવાબદારી ઉઠાવવાની હોય છે અને લઘુત્તમ આવકની જરૂરિયાતો પૂરી કરવાની હોય છે.

ભારતીય પરિવારો પર સીધી અસર

કેનેડામાં રહેતા ઘણા ભારતીય પરિવારો લાંબા સમયથી PGP દ્વારા તેમના માતા-પિતાને કાયમી ધોરણે લાવવાની રાહ જોઈ રહ્યા હતા. નવી અરજીઓ બંધ થવાથી, આ પરિવારોએ હવે સુપર વિઝા અથવા અન્ય વિકલ્પો પર આધાર રાખવો પડશે. તાજેતરના સમયમાં, કેનેડિયન સરકાર ઇમિગ્રેશન સંખ્યાને નિયંત્રિત કરવા અને હાઉસિંગ સેવાઓ પર વધતા દબાણને ઘટાડવા માટે વિવિધ ફેરફારો કરી રહી છે. PGP પર રોક પણ આ નીતિનો એક ભાગ માનવામાં આવે છે.

અમેરિકાના રાષ્ટ્રપતિ ડોનાલ્ડ ટ્રમ્પે ઈરાન અને તેલ પુરવઠા અંગે એક મહત્ત્વપૂર્ણ નિવેદન આપ્યું છે. ફોક્સ ન્યૂઝને આપેલા ઇન્ટર્વ્યૂમાં ટ્રમ્પે જણાવ્યું હતું કે અમેરિકા હોર્મુઝ સ્ટ્રેટની સુરક્ષાની જવાબદારી સંભાળશે અને તેના બદલે તેને પૈસા ચૂકવવા જોઈએ. અમેરિકા લાંબા સમયથી આ મહત્ત્વપૂર્ણ દરિયાઈ માર્ગને સુરક્ષિત કરવામાં ભૂમિકા ભજવી રહ્યું છે  એટલે તેની, આ જવાબદારી માટે ભરપાઇ પણ થવી જોઈએ.

ઈરાન પર નિશાન સાધતા ટ્રમ્પે કહ્યું કે, તેઓ ખૂબ જ ખરાબ લોકો છે. અમેરિકા અને ઈરાન વચ્ચે એક કરાર થયો હતો, પરંતુ ઈરાને તેનું ઉલ્લંઘન કર્યું. જો અમેરિકા મહત્ત્વપૂર્ણ સ્ટ્રેટઓફ હોર્મુઝને સુરક્ષિત કરે છે, તો તેના માટે ટે વાજબી ચૂકવણી મળવી જોઈએ.

તેમણે કહ્યું કે અમેરિકા આ ​​વ્યૂહાત્મક દરિયાઈ માર્ગનો રક્ષક બનશે, જેથી આંતરરાષ્ટ્રીય દરિયાઈ વેપાર અને તેલ પુરવઠામાં કોઈ વિક્ષેપ ન આવે. ટ્રમ્પના મતે, વિશ્વ માટે આ જળમાર્ગની સુરક્ષા મહત્ત્વપૂર્ણ છે, અને આ જવાબદારી નિભાવતા દેશોને યોગ્ય વળતર મળવું જોઇએ.

પશ્ચિમ એશિયા એક મુખ્ય વ્યૂહાત્મક મોરચો બનીને સામે આવ્યો છે; અહીં વિશ્વના ક્રૂડ ઓઇલનો મોટો હિસ્સો દરિયાઈ માર્ગો દ્વારા આ પ્રદેશમાંથી પસાર થાય છે. અમેરિકા-ઈરાન સંબંધો અને વૈશ્વિક ઉર્જા સુરક્ષાના સંદર્ભમાં ટ્રમ્પના નિવેદનોને મહત્ત્વપૂર્ણ માનવામાં આવી રહ્યા છે.

ટ્રમ્પે જણાવ્યું હતું કે હોર્મુઝ સ્ટ્રેટ ખુલ્લો છે અને ઈરાન ઇચ્છે કે ન ઇચ્છે, તે ખુલ્લો જ રહેશે. અમેરિકાના તથાકથિત ઈરાની નાકાબંધી ફરીથી લાગૂ કરી રહ્યું છે, જે ફક્ત ઈરાની જહાજો અથવા તેના ગ્રાહકોના જહાજોની અવરજવરને અસર કરશે.

એન્ટાર્કટિકાના રહસ્યમય 'બ્લડ ફોલ્સ' (લોહી જેવા લાલ રંગનો ધોધ) વિશે પહેલીવાર માહિતી મળ્યાના 100 કરતાં પણ વધુ વર્ષો પછી, વૈજ્ઞાનિકોનું કહેવું છે કે ટેલર ગ્લેશિયર નીચેથી આ આશ્ચર્યજનક લાલ પાણી કેવી રીતે બહાર આવે છે તેનો અંતિમ જવાબ તેમણે શોધી લીધો છે.

'એન્ટાર્કટિક સાયન્સ' જર્નલમાં પ્રકાશિત થયેલા એક નવા અભ્યાસ અનુસાર, બ્લડ ફોલ્સમાંથી સમયાંતરે વહેતું પાણી ગ્લેશિયરની નીચે દબાણમાં થતા ફેરફારોને કારણે બહાર આવે છે. સંશોધકોએ શોધી કાઢ્યું છે કે જ્યારે ઉપર રહેલો બરફ પોતાની જગ્યા બદલે છે, ત્યારે નીચેનું દબાણ થોડા સમય માટે ઘટી જાય છે. આ કારણે ગ્લેશિયરની ઊંડાણમાં ફસાયેલું આયર્ન (લોહતત્વ)થી ભરપૂર ખારું પાણી છુપાયેલા માર્ગો અને તિરાડો દ્વારા સપાટી પર આવી જાય છે.

આ બ્લડ ફોલ્સ પૂર્વ એન્ટાર્કટિકાના મેકમર્ડો ડ્રાય વેલીઝમાં આવેલા ટેલર ગ્લેશિયરના છેડે આવેલો છે, જે પૃથ્વી પરના સૌથી ઠંડા અને સૂકા વિસ્તારોમાંનો એક છે. વર્ષ 1911માં બ્રિટિશ ટેરા નોવા સંશોધન યાત્રા દરમિયાન ઓસ્ટ્રેલિયન ભૂસ્તરશાસ્ત્રી થોમસ ગ્રીફિથ ટેલરે આ અનોખી ઘટના વિશે પહેલીવાર દુનિયાને જણાવ્યું હતું.

શરૂઆતના સંશોધકો એવું માનતા હતા કે આ અસામાન્ય લાલ રંગ કોઈ ખાસ પ્રકારની લીલ (Algae)ને કારણે છે. જો કે, દાયકાઓ સુધી ચાલેલા વૈજ્ઞાનિક સંશોધનો પછી જાણવા મળ્યું કે આ ધોધનો લાલ રંગ વાસ્તવમાં ગ્લેશિયરની નીચેથી વહેતા આયર્નયુક્ત ખારા પાણીને કારણે છે.

બ્લડ ફોલ્સ લાલ કેમ છે?

વૈજ્ઞાનિકોના મતે, આ પાણી અતિશય ખારું ધરાવતો એક પ્રાચીન સ્ત્રોત છે. આશરે 15 લાખ વર્ષો પહેલાં જ્યારે સમુદ્રનું પાણી આગળ વધતા ગ્લેશિયરની નીચે દબાઈ ગયું, ત્યારે તે લગભગ 400 મીટર બરફની નીચે ફસાઈ ગયું હતું. પાણીમાં મીઠાનું પ્રમાણ ખૂબ વધારે હોવાને કારણે, અતિશય ઠંડા તાપમાનમાં પણ આ પાણી થીજી જતું નથી.

જ્યારે આ આયર્નયુક્ત પાણી સપાટી પર આવે છે, ત્યારે તે હવામાં રહેલા ઓક્સિજન સાથે પ્રતિક્રિયા કરે છે. વિજ્ઞાનની ભાષામાં 'ઓક્સિડેશન' તરીકે ઓળખાતી આ પ્રક્રિયાને કારણે પાણીમાં ઓગળેલું આયર્ન ઘેરા લાલ રંગમાં બદલાઈ જાય છે, જે બ્લડ ફોલ્સને તેનો આ અનોખો દેખાવ આપે છે.

નવા અભ્યાસમાં શું બહાર આવ્યું?

આ નવું સંશોધન આ રહસ્યના ખૂટતા અંકોડાને જોડે છે. વૈજ્ઞાનિકોએ વર્ષ 2018માં બ્લડ ફોલ્સમાંથી વહેલા પાણીના રેકોર્ડને ગ્લેશિયરની સપાટીમાં આવેલા આશરે 15 મિલીમીટરના ઘટાડા અને ગ્લેશિયરની ગતિમાં આવેલા થોડા સમયના ઘટાડા સાથે સરખાવીને જોયો હતો.

આ પરિણામો દર્શાવે છે કે બરફમાં થતા આ સાધારણ ફેરફારો ગ્લેશિયરની નીચેનું દબાણ ઘટાડે છે, જેના કારણે અંદર ફસાયેલું ખારું પાણી જમીનની અંદરના માર્ગો દ્વારા ઉપર તરફ ગતિ કરે છે અને સપાટી પર પ્રગટ થાય છે.

આ શોધ કેમ મહત્વની છે?

અગાઉના રડાર સર્વેક્ષણોમાં ટેલર ગ્લેશિયરની નીચે આ ખારા પાણીને લઈ જતી દબાણયુક્ત ચેનલો પહેલેથી જ મળી આવી હતી, જેનાથી એ સમજવામાં મદદ મળી હતી કે પૃથ્વીના સૌથી ઠંડા ગ્લેશિયર્સમાંના એકની અંદર પ્રવાહી પાણી કેવી રીતે અસ્તિત્વ ધરાવી શકે છે અને વહી શકે છે. નવું સંશોધન ગ્લેશિયરની હિલચાલ અને પાણીના બહાર આવવા વચ્ચે સીધો સંબંધ દર્શાવીને તે દાવાને વધુ મજબૂત કરે છે.

સંશોધકોનું કહેવું છે કે આ વિગતો ગ્લેશિયર્સની નીચે પાણીની વર્તણૂકને વધુ સારી રીતે સમજવામાં મદદ કરે છે અને એન્ટાર્કટિકાની સૌથી અસામાન્ય કુદરતી ઘટનાઓમાંથી એક પરથી પડદો ઉઠાવે છે.