ભારતીય મૂળના બ્રિટિશ અબજોપતિ લક્ષ્મી એન. મિત્તલ અને આદિત્ય મિત્તલે રમતગમતની દુનિયામાં એક મોટો ધડાકો કર્યો છે. 3 મેના રોજ કરવામાં આવેલી જાહેરાત મુજબ, મિત્તલ પરિવારે આઈપીએલ (IPL) ફ્રેન્ચાઈઝી રાજસ્થાન રોયલ્સ (RR) ને ખરીદવા માટે અંતિમ કરાર કર્યો છે. આ સોદો સીરમ ઇન્સ્ટિટ્યૂટ ઓફ ઇન્ડિયાના માલિક અદાર પૂનાવાલા સાથે મળીને મનોજ બડાલે અને તેમના કન્સોર્ટિયમ પાસેથી કરવામાં આવ્યો છે.

હિસ્સેદારીનું નવું ગણિત

આ ડીલ પૂર્ણ થયા બાદ ટીમની માલિકીનું માળખું સંપૂર્ણપણે બદલાઈ જશે:

• મિત્તલ પરિવાર: આશરે 75% હિસ્સેદારી સાથે મુખ્ય માલિક બનશે.
• અદાર પૂનાવાલા: અંદાજે 18% હિસ્સો ધરાવશે.
• વર્તમાન રોકાણકારો (મનોજ બડાલે સહિત): બાકીના 7% હિસ્સાના માલિક રહેશે.

નોંધનીય છે કે, મનોજ બડાલે ટીમ સાથે જોડાયેલા રહેશે અને જૂના અને નવા મેનેજમેન્ટ વચ્ચે કડી તરીકે કામ કરશે. નવા માલિકો ટીમને આગળ વધારવા માટે તેમના અનુભવનો લાભ લેશે.

ડીલની કિંમત અને મંજૂરીઓ

આ ઐતિહાસિક સોદાની કુલ કિંમત આશરે 1.65 અબજ ડોલર (આશરે ₹15,660 કરોડ) હોવાનું કહેવાય છે. આ કિંમતમાં માત્ર રાજસ્થાન રોયલ્સ જ નહીં, પરંતુ તેમની અન્ય ટીમો પાર્લ રોયલ્સ (દક્ષિણ આફ્રિકા) અને બાર્બાડોસ રોયલ્સ (કેરેબિયન) પણ સામેલ છે. આ ડીલ 2026 ના ત્રીજા ક્વાર્ટર સુધીમાં પૂર્ણ થવાની અપેક્ષા છે, જે માટે BCCI, CCI, IPL ગવર્નિંગ કાઉન્સિલ અને અન્ય નિયમનકારી મંજૂરીઓ લેવાની બાકી છે.

ટીમ બોર્ડમાં કોણ હશે સામેલ?

ડીલ બાદ ટીમના બોર્ડમાં નીચેના દિગ્ગજો સામેલ થશે:

• લક્ષ્મી મિત્તલ
• આદિત્ય મિત્તલ
• વનિષા મિત્તલ-ભાટિયા
• અદાર પૂનાવાલા
• મનોજ બડાલે

કેમ ખાસ છે આ જોડાણ?

લક્ષ્મી મિત્તલે જણાવ્યું હતું કે, "મને ક્રિકેટ પ્રત્યે ઘણો લગાવ છે અને રાજસ્થાન સાથે મારો ઊંડો સંબંધ છે, તેથી રાજસ્થાન રોયલ્સનો ભાગ બનવું મારા માટે ખાસ છે." આદિત્ય મિત્તલે IPL ને વિશ્વની સૌથી મોટી લીગ ગણાવી હતી, જ્યારે વનિષા મિત્તલે આ જોડાણને ગર્વની વાત ગણાવી હતી. અદાર પૂનાવાલાએ પણ આ રોકાણને લઈને ઉત્સાહ વ્યક્ત કર્યો હતો અને ટીમના ભવિષ્યને મજબૂત કરવાની ખાતરી આપી હતી.

રાજસ્થાન રોયલ્સનો ઈતિહાસ

રાજસ્થાન રોયલ્સ IPL ની પ્રથમ સીઝન (2008) થી જ લીગનો ભાગ છે અને શેન વોર્નની આગેવાનીમાં પ્રથમ ટાઈટલ જીત્યું હતું. હાલમાં IPL 2026 માં પણ વૈભવ સૂર્યવંશી અને જોફ્રા આર્ચર જેવા ખેલાડીઓના દમ પર ટીમ શાનદાર પ્રદર્શન કરી રહી છે અને ટોપ 4 માં યથાવત છે.

કોણ છે લક્ષ્મી મિત્તલ?

રાજસ્થાનના સાદુલપુરમાં જન્મેલા લક્ષ્મી એન. મિત્તલ વિશ્વના સૌથી મોટા સ્ટીલ ઉદ્યોગપતિઓમાંના એક છે. તેઓ ArcelorMittal ના ચેરમેન અને CEO છે. 2006 માં આર્સેલર અને મિત્તલ સ્ટીલના વિલીનીકરણ દ્વારા તેમણે વિશ્વનું સૌથી મોટું સ્ટીલ સામ્રાજ્ય ઊભું કર્યું હતું. તેઓ લાંબા સમયથી વિશ્વના સૌથી ધનિક વ્યક્તિઓની યાદીમાં સામેલ છે અને બ્રિટનના સૌથી ધનિક એશિયન છે.

આ ડીલમાં Latham & Watkins, Goldman Sachs, Deloitte અને EY જેવી પ્રતિષ્ઠિત કંપનીઓએ સલાહકાર તરીકે ભૂમિકા ભજવી હતી.

મે મહિનો આવી ગયો. આનો અર્થ એ કે IPL તેના બીજા ભાગમાં પ્રવેશી ગઈ છે. આમ જોવા જઈએ તો, મે મહિનો આવતા સુધીમાં IPLનો ઉત્સાહ તેની ચરમસીમાએ પહોંચી જાય છે. પરંતુ હવે તમે મને કહો કે, શું આ વખતે આ મેચો જોઈને તમને કંટાળો નથી આવી રહ્યો?

જો તમારો જવાબ હા હોય તો, અહીં તમે એકલા નથી કે જેને કંટાળો આવી રહ્યો હોય. IPL 2026 સીઝન શરૂઆતથી જ ઘણા ક્રિકેટ ચાહકો માટે એક લાંબી અને કંટાળાજનક વેબ સિરીઝ જેવી લાગી રહી છે, જેના ક્લાઇમેક્સની પહેલાથી જ ખબર પડી જતી હોય છે. છેવટે આ વર્ષે વિશ્વની સૌથી મોટી ક્રિકેટ લીગનો ઉત્સાહ કેમ ખતમ થઇ ગયો છે? આમ તો તેના ઘણા કારણો છે, તો પછી ચાલો આપણે તેને એક પછી એક જોઈ લઈએ.

IPL 2026 સીઝન ઉત્સાહજનક ન હોવા પાછળ MS ધોની અને રોહિત શર્મા વાળું પરિબળ પણ જવાબદાર છે. IPLના બે સૌથી મોટા કેપ્ટન આ સીઝનમાં ઈજાગ્રસ્ત છે. ધોની તો હજુ આ સીઝનમાં દેખાયો જ નથી. જ્યારે રોહિત શર્મા પણ છેલ્લી 4 મેચથી નથી રમી રહ્યો.

બે સૌથી સફળ ટીમો, મુંબઈ અને ચેન્નાઈની પણ આવી જ સ્થિતિ છે. તેમના ચાહકો માટે તો આ સીઝન પૂરી થઈ ગઈ છે. કોલકાતા માટે પણ વાર્તા અલગ નથી. ચાહકોએ તો એ સ્વીકારી લીધું છે કે, તેઓ આ સિઝનમાં ધોનીને રમતો નહીં જોઈ શકે.

જોકે, ઘણા બધા પરિબળો આ રમતમાં છે. આ ફક્ત એક કે બે ખેલાડીઓ પૂરતું મર્યાદિત નથી. તેની પાછળ ઘણા ક્રિકેટના કારણો પણ છે.

એક સમય હતો જ્યારે ક્રિકેટમાં બેટ અને બોલ વચ્ચે બરાબરની સ્પર્ધા થતી હતી. પરંતુ જ્યારથી આ ઇમ્પેક્ટ પ્લેયરનો નિયમ લાગુ થયો છે, ત્યારથી ક્રિકેટની સાચી મજા જ ગાયબ થઇ ગઈ છે. ટીમો જાણે છે કે તેમની પાસે 8 કે 9 નંબર સુધી બેટિંગ વિકલ્પો છે. પરિણામ શું આવ્યું? ઓપનરો કોઈ પણ ડર વિના પહેલી ઓવરથી જ બેટને આંધળી રીતે ફેરવે છે.

આનાથી પાવરપ્લે પર પણ અસર પડી છે. પાવરપ્લે હવે એકદમ પ્રિડિકટેબલ બની ગયો છે. જો વિકેટ એક પછી એક પડવા લાગી તો ટીમ કેવી રીતે તેને સંભળાશે તે અંગે કોઈ સસ્પેન્સ જ બાકી નથી રહ્યું. બોલરો બિચારા ફક્ત એક બોલિંગ મશીન બની ગયા છે, તેઓ જાણતા હોય છે કે તેમના દરેક બોલ પર ફટકા પડવાના જ છે.

તે દિવસો યાદ કરો જ્યારે સ્કોરબોર્ડ પર એક ટીમના 160-170 રન થઇ જતા તો બીજી ટીમને પરસેવો થઇ જતો હતો. 180+નો ટાર્ગેટ એટલે મેચ તેમની મુઠ્ઠીમાં હોય. પરંતુ IPL 2026એ ક્રિકેટના આ સમીકરણને સંપૂર્ણપણે તોડી નાખ્યું છે.

આ સિઝનમાં અત્યાર સુધીમાં 20થી વધુ એવી મેચો એવી બની છે, જેમાં ટીમોએ 200થી વધુ રનનો પહાડ જેવો સ્કોર રમત રમતમાં પૂરો કરી લીધો હોય. હવે, આ ઉચ્ચ સ્કોરવાળી ગેમ રોમાંચક ઓછી અને કોપીબુક ક્રિકેટ જેવી લાગે છે, જ્યાં દરેક પાના પર ફક્ત ચોગ્ગા અને છગ્ગા જ લખેલા હોય છે. જો દરેક મેચમાં 250 રન બનવા લાગ્યા તો તેની કિંમત જ શું રહી જશે?

IPLની વાસ્તવિક TRP છેલ્લી ઓવરનો રોમાંચ હતો. તે નેલ બાઇટિંગ ફિનિશ, જેમાં TV સામે બેઠેલા દર્શકો તેમના નખ ચાવી નાખતા હતા. આ વખતે શું થઈ રહ્યું છે? કાં તો એક ટીમ બીજી ટીમને આરામથી હરાવી રહી છે, અથવા ટાર્ગેટનો પીછો કરતી ટીમ 18મી ઓવર સુધીમાં મેચ પૂરી કરીને પેવેલિયન પરત ફરી રહી હોય છે. દિલની ધડકન વધારનારો રોમાંચ આ વખતે જાણે ગાયબ જ થઇ ગયો છે.

આ સિઝનમાં, ફક્ત થોડીક મેચોમાં જ એવી હતી જેમાં નજીકની સ્પર્ધા જોવા મળી છે. જેમ કે, લખનઉ-કોલકાતા મેચ. જેમાં મુકુલ ચૌધરી પહેલી વાર હીરો બન્યો. બીજી વખત, મેચ સુપર ઓવરમાં પહોંચી. જોકે, સુપર ઓવર પણ એકતરફી રહી હતી. દિલ્હી અને ગુજરાત વચ્ચેના છેલ્લા બોલના રોમાંચ સિવાય, બાકીની મેચો એકતરફી રહી છે.

IPLની ટેગલાઈન છે, જ્યાં પ્રતિભાને તક મળે છે. એ જ તેની સુંદરતા પણ હતી. એક અંડરડોગ ક્રિકેટર અથવા ટીમ રાતોરાત હીરો બની જાય છે. એક નવો ખેલાડી આવતો અને અનુભવી ખેલાડીઓની વિકેટ લઇ જતો.

અત્યાર સુધી, આ સિઝનમાં આવા અંડરડોગ પ્રદર્શન ભાગ્યે જ જોવા મળ્યા છે. પ્રફુલ હિંગે અને શાકિબ હુસૈનના અપવાદ સિવાય, નવા બોલરો ખાસ સારું પ્રદર્શન કરી શક્યા નથી. જ્યારે, મુકુલ ચૌધરી અને સલિલ અરોરાએ એક બે ઇનિંગ્સમાં જ બધાનું ધ્યાન ખેંચ્યું છે. નહિંતર, બધું પૂર્વ-આયોજિત સ્ક્રિપ્ટ જેવું અને કંટાળાજનક લાગી રહ્યું છે.

એકંદરે વાત એમ છે કે, T20 ક્રિકેટ એટલે બોલને ફક્ત સ્ટેન્ડમાં મારવું જ એવું નથી. જ્યાં સુધી બોલ બેટની ધારથી છટકી ન જાય. યોર્કર બોલથી સ્ટમ્પ ઉડી ન જાય. મેચની છેલ્લી બોલ પર 4 રન બચાવવાનું દબાણ રહેશે નહીં. ત્યાં સુધી, IPLનો જૂનો ઉત્સાહ પાછો નહીં આવે. ફક્ત રનનો વરસાદ કરવાથી દર્શકોની તરસ નથી સંતોષાતી. તેઓને ક્રિકેટની અસલી સ્પર્ધા જોઈએ છે.

મુંબઈ ઈન્ડિયન્સ ટીમે 2026 ઈન્ડિયન પ્રીમિયર લીગમાં સુપર ફ્લોપ રહી છે. હાર્દિક પંડ્યાની કેપ્ટનશીપ હેઠળ મુંબઈએ આ સીઝનમાં અત્યાર સુધીમાં કુલ 8 મેચ રમી છે, જેમાંથી 6 મેચમાં હારનો સામનો કરવો પડ્યો છે. આ નિરાશાજનક પ્રદર્શન બાદ હવે હાર્દિકના નેતૃત્વ પર પ્રશ્નો ઉભા થઈ રહ્યા છે. ખાસ કરીને સનરાઈઝર્સ હૈદરાબાદ સામેની મેચ દરમિયાન તેની કેપ્ટનશીપ કોઈને સમાજ ન આવી.

મુંબઈના વાનખેડે સ્ટેડિયમમાં રમાયેલી મેચમાં હાર્દિક પંડ્યાએ ટોસ જીતીને પહેલા બેટિંગ કરવાનો નિર્ણય લીધો હતો. હાર્દિકે ટીમમાં બે ફેરફાર કર્યા, જેમાં રાયન રિકેલ્ટન અને રોબિન મિન્ઝને પ્લેઈંગ ઈલેવનમાં સામેલ કરવામાં આવ્યા. રાયન રિકેલ્ટન ઇજાગ્રસ્ત ક્વિન્ટન ડી કોકની જગ્યાએ આવ્યો હતો અને તેણે 123 રનની શાનદાર અણનમ ઇનિંગ રમી; જોકે રોબિન મિન્ઝ મેચમાં કોઈ યોગદાન આપી શક્યો નહીં. હકીકતમાં, યુવા વિકેટકીપર-બેટ્સમેનની બેટિંગ જ ન આવી.

મુંબઈની બોલિંગ દરમિયાન જ્યારે સનરાઈઝર્સના બેટ્સમેન બધા બોલરોને ધોઈ રહ્યા હતા, ત્યારે હાર્દિક પંડ્યાએ રોબિન મિંઝની જગ્યાએ શાર્દુલ ઠાકુરને 'ઈમ્પેક્ટ સબ' તરીકે મેદાનમાં બોલાવ્યો. આ સીઝનમાં શાર્દુલે મુશ્કેલ ક્ષણોમાં મુંબઈને મહત્ત્વપૂર્ણ વિકેટ અપાવવાનું કામ કર્યું; પરંતુ હેરાનીની વાત એ છે કે, કેપ્ટન હાર્દિકે શાર્દુલને એક પણ ઓવર ફેંકવા માટે આપી નહોતી. આ પ્રકારે, શાર્દુલ ઠાકુર IPL ઇતિહાસમાં પ્રથમ 'ઈમ્પેક્ટ સબ' ખેલાડી બન્યો જેને ન તો બેટિંગ કરવાની તક મળી કે ન તો બોલિંગ કરવાની તક આપવામાં આવી.

નોંધનીય છે કે 'ઈમ્પેક્ટ સબ' ખેલાડીઓ IPL મેચોમાં મુખ્ય ભૂમિકા ભજવે છે. ઘણી વખત આવા ખેલાડીઓ તેમની ટીમો માટે જીતના સૂત્રધાર બને છે; જો કે, હવે પ્રશ્નો ઉભા થઈ રહ્યા છે કે હાર્દિક પંડ્યાએ 'ઈમ્પેક્ટ સબ' વિકલ્પનો ઉપયોગ કરવા છતા સનરાઈઝર્સ હૈદરાબાદ સામેની મેચ દરમિયાન ખેલાડીનો ઉપયોગ કેમ ન કર્યો?

સનરાઇઝર્સ સામેની મેચમાં મુંબઈ ઇન્ડિયન્સે રિકલટનની સદીની મદદથી 243 રનનો જબરદસ્ત સ્કોર બનાવ્યો હતો; જોકે, જસપ્રીત બૂમરાહ અને ટ્રેન્ટ બોલ્ટ જેવા દિગ્ગજ બોલરો હોવા છતા ટીમ તેને ડિફેન્ડ ન કરી શકી. IPLમાં આ બીજી ઘટના છે જ્યાંરે મુંબઈની ટીમ 200 કે તેથી વધુ રન બનાવ્યા પછી પણ હારી ગઈ છે. બંને વખત હાર્દિક પંડ્યાના નેતૃત્વમાં આવું બન્યું.

મુંબઈ ઇન્ડિયન્સને પાંચ ટાઇટલ અપાવનાર રોહિત શર્માની કેપ્ટનશીપ હેઠળ MIએ 200થી વધુ રન બનાવ્યા પછી ક્યારેય એક પણ મેચ હારી નહોતી. આ જ કારણ છે કે હાર્દિક પંડ્યાની કેપ્ટનશીપ પર હવે તલવાર લટકી રહી છે. નોંધનીય છે કે જ્યારે રોહિત શર્માને કેપ્ટનશીપ પરથી હટાવવામાં આવ્યો અને આ જવાબદારી હાર્દિકને સોંપવામાં આવી, ત્યારે મુંબઈ ઇન્ડિયન્સના ફેન્સે મેચ દરમિયાન ટીમના નિર્ણયને લઈને હૂટિંગ પણ કરી હતી. એવામાં, જો ટીમ આ સીઝનમાં પ્લેઓફ માટે ક્વોલિફાય થવામાં નિષ્ફળ જાય, તો મુંબઈ ઇન્ડિયન્સના નેતૃત્વમાં મોટો ફેરફાર થઈ શકે છે.

IPL 2026માં પંજાબ કિંગ્સ અને રાજસ્થાન રોયલ્સ વચ્ચે રમાયેલી મેચ બાદ કેપ્ટન રિયાન પરાગ ભારે મુશ્કેલીમાં ફસાઈ ગયો છે. મેચ દરમિયાન ડ્રેસિંગ રૂમનો એક વીડિયો સોશિયલ મીડિયા પર ઝડપથી વાયરલ થઈ રહ્યો છે, જેમાં તે ઈ-સિગારેટ પીતો જોવા મળી રહ્યો છે. આ પહેલી વાર નથી જ્યારે રિયાન પરાગ મોટા વિવાદોમાં ફસાઈ ગયો હોય; આ અગાઉ પણ રિયાન પરાગ કંટ્રોવર્સીમાં ફસાઈ ચૂક્યો છે.

28 એપ્રિલના રોજ, રિયાન પરાગ મેચ દરમિયાન ઈ-સિગારેટ પીતા કેમેરામાં કેદ થયો હતો. હવે, તે સોશિયલ મીડિયા પર ચાહકોના નિશાન પર આવી ગયો છે. ભારતમાં ઈ-સિગારેટ પર પ્રતિબંધ છે, એવામાં રિયાન પરાગ પર કેસ પણ થઈ શકે છે.

IPL 2025 દરમિયાન, રિયાન પરાગ તેના જ રાજસ્થાન રોયલ્સના સાથી તુષાર દેશપાંડે સાથે બાખડી પડ્યો હતો.ત્યારબાદ બોલિંગ કોચ શેન બોન્ડે બંનેને અલગ કરવા માટે દરમિયાનગીરી કરવી પડી હતી. આ ઘટનાનો વીડિયો વાયરલ થયા બાદ, પરાગ ચાહકોના નિશાન પર આવી ગયો હતો.

https://twitter.com/McgMadMan/status/2049180195588841483?s=20

2024માં, જ્યારે રિયાન પરાગ તેની યુટ્યુબ ચેનલ પર લાઈવ-સ્ટ્રીમિંગ કરી રહ્યો હતો, ત્યારે ભૂલથી તેની સર્ચ હિસ્ટ્રી દેખાઇ ગઈ હતો. તેમાં જાણવા મળ્યું કે તેણે ‘સારા અલી ખાન હોટ’ અને ‘અનન્યા પાંડે હોટ’ સર્ચ કરી રાખ્યું હતું, આ ખુલાસાને કારણે તે ઘણા દિવસો સુધી ભારે ટ્રોલ થયો હતો.

આ અગાઉ 2022માં માર્કસ સ્ટોઇનિસનો કેચ પકડીને, રિયાન પરાગે ખૂબ જ વિચિત્ર અંદાજમાં ઉજવણી કરી હતી, જેને કારણે જ ભૂતપૂર્વ ક્રિકેટરો અને ચાહકો બંનેએ જ તેને ખૂબ ટ્રોલ કર્યો હતો.

આ ઉપરાંત રિયાન પરાગને તેના કથિત અતિશય આત્મવિશ્વાસને કારણે સોશિયલ મીડિયા પર વારંવાર ટ્રોલનો સામનો કરવો પડ્યો છે. ચાહકો ઘણીવાર રાજસ્થાન રોયલ્સ ટીમ પર તેની તરફેણ કરવાનો આરોપ લગાવે છે. પરાગ ફક્ત એક જ સીઝનમાં સારું પ્રદર્શન કરી શક્યો છે.

જો તમે સફળતાની સીડી ચઢી રહ્યા હોવ, તો લોકો પગ પકડીને તમને નીચે ખેંચવાનો પ્રયાસ કરશે! માત્ર 15 વર્ષની ઉંમરે, વૈભવ સૂર્યવંશી ભારતના ઉભરતા સ્ટાર્સમાંનો એક છે અને હાલમાં ક્રિકેટની દુનિયામાં રાજ કરી રહ્યો છે. ચારેય તરફ તેનું નામ ચર્ચામાં છે. 2026ની IPLમાં ધમાકેદાર સદી ફટકાર્યા પછી, આ ડાબોડી બેટ્સમેન લગભગ દરેક મેચમાં બોલરોને ધોઇ રહ્યો છે. હવે, તેને ઈર્ષ્યા કહીએ કે મૂર્ખતા, એક પાકિસ્તાની ક્રિકેટ નિષ્ણાતે વૈભવ સૂર્યવંશીને AI ચિપથી સજ્જ બેટનો ઉપયોગ કરનારો ખેલાડી કહી દીધો છે.

નૌમન નિયાઝે ‘સ્મેશહિટ’ નામના શૉમાં બોલતા ટિપ્પણી કરી કે, ‘જરા વિચારો. આ છોકરો કોણ છે? તેના બેટની તપાસ કરાવો. જેમ WADA ડોપિંગ ટેસ્ટ કરે છે, તેમ આ બેટને લેબમાં મોકલો. કદાચ તેણે તેના બેટની અંદર AI ચિપનો ઉપયોગ કર્યો હશે. આ તો અવિશ્વસનીય છે. શું ખેલાડી છે! શરૂઆતમાં મને લાગ્યું કે તે થોડો ધીમો રમી રહ્યો હતો. તેનાથી મને આશ્ચર્ય થયું કે, આ છોકરો ખરેખર કોણ છે?

https://twitter.com/sarkarstix/status/2048339734045561283?s=20

તેણે કહ્યું કે, જ્યારે તમે 18 વર્ષના થાવ છો, ત્યારે તમારા શરીરમાં સ્નાયુઓ, બાયસેપ્સ અને ટ્રાઇસેપ્સ બની જાય છે. પરંતુ તે માત્ર 16 વર્ષનો છે. તેનો જન્મ ત્યારે થયો હતો જ્યારે વિરાટ કોહલી વિશ્વ ચેમ્પિયન હતો. તેમાં પાવર ગેમ કરતા વધારે ટેક્નિક છે. તે કાંડાનો ઉપયોગ કરનારો ખેલાડી છે અને જો તમે આર્કને જુઓ તો તેણે સંપૂર્ણ 360 ડિગ્રીનો ઉપયોગ કર્યો છે.

ઉલ્લેખનીય છે કે, વૈભવ સૂર્યવંશીએ વૈશ્વિક ક્રિકેટ મંચ પર પોતાની છાપ છોડી છે, એક પછી એક બેટિંગ રેકોર્ડ પોતાના નામે કર્યા છે. રોયલ ચેલેન્જર્સ બેંગ્લોર સામે માત્ર 26 બોલમાં 78 રન બનાવીને તે IPL ઇતિહાસમાં સૌથી ઝડપી સદી નોંધાવવાની નજીક પહોંચી ગયો હતો, જોકે તે ચૂકી ગયો. પરંતુ, તેનાથી તેનો ઉત્સાહ ઓછો ન થયો; ત્યારબાદની બે મેચમાં 0 અને 8 રન બનાવ્યા પછી એક 46 રનની ઇનિંગ રમીને સૂર્યવંશીએ આખરે શનિવારે સનરાઇઝર્સ હૈદરાબાદ સામે 37 બોલમાં તેની સદી પૂર્ણ કરી.

ટીમ ઈન્ડિયાના ભૂતપૂર્વ ઓલરાઉન્ડર યુવરાજ સિંહના પિતા યોગરાજ સિંહે ફરી એકવાર પોતાના નિવેદનથી મોટો વિવાદ ઉભો કરી દીધો છે, યોગરાજ સિંહે ખેલાડીઓની પત્નીઓ અંગે નિવેદન આપ્યું હતું, જેના કારણે તેઓ ટીકાનો ભોગ બન્યા છે. યોગરાજ સિંહે સ્પષ્ટપણે કહ્યું કે, ઉંમરને ખેલાડીના પ્રદર્શન સાથે જોડવી ખોટી છે. તેમના મતે, ફિટનેસ અને પ્રદર્શન ખેલાડીની કારકિર્દીનું સાચું માપદંડ હોવું જોઈએ, ઉંમર નહીં.

યોગરાજ સિંહે એક સ્પોર્ટ્સ ચેનલ સાથેની મુલાકાતમાં કહ્યું, 'ભારતમાં, લોકો 40 વર્ષની ઉંમર પછી પોતાને વૃદ્ધ માનવા લાગે છે. મહિલાઓ 30 વર્ષ પછી કહે છે કે તેઓ હવે ફિટ રહી શકતી નથી, તેમના બાળકો મોટા થઈ ગયા છે. પરંતુ રમતગમતને ઉંમર સાથે જોડવું સંપૂર્ણપણે ખોટું છે.'

યોગરાજ સિંહે કહ્યું, 'ઘણી વખત, ઘરની મહિલાઓ, પત્નીઓ તમને સમજાવવા લાગે છે કે, હવે નિવૃત્તિ લઇ લો અને તમારા પરિવાર અને બાળકો પર ધ્યાન કેન્દ્રિત કરો. મારું માનવું છે કે મહિલાઓએ ખેલાડી અને તેની કારકિર્દી વચ્ચે ન આવવું જોઈએ. ખેલાડી અને ફકીરનો કોઈ ધર્મ કે વર્ગ હોતો નથી, તેઓ ભગવાનના હોય છે. જ્યાં સુધી તેઓ જીવિત છે, ત્યાં સુધી તેઓ ઘણું બધું કરી શકે છે.'

વિરાટ કોહલી અને રોહિત શર્મા પર નિશાન સાધતા, યોગરાજ સિંહે સ્પષ્ટપણે કહ્યું કે ખેલાડીઓએ તેમના નિર્ણયોનો જવાબ તેમની ઉંમરના આધારે નહીં, તેમના પ્રદર્શનના આધારે આપવો જોઈએ. યોગરાજે પોતાના સ્પષ્ટ અંદાજમાં કહ્યું, 'રોહિત શર્મા અને વિરાટ કોહલી હજુ પણ યુવા ખેલાડીઓ છે અને નિવૃત્તિ લેવાનું વિચારી રહ્યા છે. આવા જીવન પર શરમ આવવી જોઈએ, દુનિયાને બતાવી દો કે તમે સૌથી શ્રેષ્ઠ છો, તમે અનિવાર્ય છો.'

યોગરાજ સિંહે આગળ કહ્યું, 'જો કોઈ ખેલાડી 50 વર્ષની ઉંમરે પણ બેવડી સદી ફટકારી રહ્યો હોય, તો તેને ટીમમાંથી કોઈ બહાર કરી શકતું નથી. આ દેશમાં ઉંમરનું પરિબળ ખૂબ જ રમુજી છે.' અત્રે ઉલ્લેખનીય છે કે, રોહિત અને કોહલી પહેલાથી જ ટેસ્ટ ક્રિકેટની સાથે T20 આંતરરાષ્ટ્રીય ક્રિકેટમાંથી પણ નિવૃત્તિ લઈ ચૂક્યા છે.

IPL 2026 નજીક આવતાની સાથે, બંને દિગ્ગજોના ભવિષ્ય અંગે ચર્ચાઓ તેજ થઈ ગઈ છે. આ અગાઉ, યોગરાજ સિંહે મહેન્દ્ર સિંહ ધોનીનું સમર્થન કરતા કહ્યું હતું કે, તેને હજુ નિવૃત્તિ લેવાની જરૂર નથી અને તે આવનારા ઘણા વર્ષો સુધી રમી શકે છે.

યોગરાજ સિંહના તાજેતરના નિવેદનોએ ભારતીય ક્રિકેટમાં એક નવી ચર્ચા ઉભી કરી છે. એક તરફ જ્યારે ઉંમર અને નિવૃત્તિની ચર્ચા થઈ રહી છે, ત્યારે તેમના નિવેદનથી ખેલાડીઓના અંગત જીવન અને પરિવારની ભૂમિકા પર પણ પ્રશ્નો ઉભા થયા છે.

IPL 2026ની વાનખેડેમાં રમાયેલી મેચ ફક્ત એક મેચ નહોતી; તે નિયમો, વલણ અને પરિણામ.. ત્રણેયની ટકરાવ બની ગઈ. ગુરુવારે રાત્રે મુંબઈ ઇન્ડિયન્સ (MI) અને ચેન્નાઈ સુપર કિંગ્સ (CSK) વચ્ચેની મેચમાં એક ક્ષણ એવી આવી જ્યારે એવું લાગતું હતું કે મુંબઈ 11 નહીં પણ 13 ખેલાડીઓ સાથે રમી રહી છે... અને અહીંથી શરૂ થઈ વાસ્તવિક કહાની, જેના કારણે મેદાન કરતા ડ્રેસિંગ રૂમના નિર્ણયો વિશે વધુ ચર્ચા થઈ.

મુંબઈએ તેના 11 ખેલાડીઓ સાથે ઇમ્પેક્ટ પ્લેયર તરીકે દાનિશ માલેવરને મેદાનમાં ઉતાર્યો હતો, જેણે અલ્લાહ ગઝનફરની જગ્યા લીધી હતી... પરંતુ આશ્ચર્ય ત્યારે થયું જ્યારે શાર્દુલ ઠાકુર પણ આઠમા નંબરે બેટિંગ કરવા આવ્યો. પ્રશ્નો ઉભા થયા કે, શું અમ્પાયરોએ ભૂલ કરી? કે પછી નિયમોમાં કોઈ છટકબારી મળી આવી?

આ ઘટનાની શરૂઆત થઈ મિશેલ સેન્ટનરના પડી જવાથી. લાઈવ ફૂટેજમાં સ્પષ્ટપણે દેખાયું કે તે ખભો પકડીને મેદાનની બહાર જઇ રહ્યો હતો હતો. ખભા પર આઇસ પેક હતો. અહીંથી મૂંઝવણ ઊભી થઈ. દર્શકો અને કોમેન્ટ્રીનું નેરેટિવ સ્પષ્ટ હતું- જ્યારે ખભામાં ઈજા થાય છે, ત્યારે કન્કશન સબ્સ્ટીટ્યૂટ કેવી રીતે કરી શકાય?

કેચ લેવા દરમિયાન...સેન્ટનરનું માથું પહેલા જમીન પર અથડાયું, પછી તેના ખભા પર અસર થઈ...તેને ડ્રેસિંગ રૂમમાં ચક્કર આવી રહ્યા હતા. એટલે ટીવી પર જે ખભાની ઈજા દેખાતી હતી તે તબીબી તપાસમાં  પોસિબલ કન્કશન હોવાનું બહાર આવ્યું. અને અહીંથી કન્કશન સબ્સ્ટિટ્યૂટનો માર્ગ ખુલ્યો.

તો પછી વિવાદ શા માટે?

ખરી સમસ્યા નિયમોની નહીં, પણ દૃષ્ટિકોણ અને ટાઇમિંગ હતી.

દર્શકોએ જોયું- ખભાની ઈજા

ટીમ જાણતી હતી- માથામાં ઈજા + ચક્કર

નિર્ણય આવ્યો- કન્કશન સબ્સ્ટિટ્યૂટ

આ જ લોકોને ખટક્યું. પરંતુ જ્યારે શાર્દુલ ઠાકુર જેવા ઉપયોગી ઓલરાઉન્ડરને રિપલ્સમેન્ટ મળ્યું, ત્યારે શંકાઓ વધુ ઘેરી બની કે શું ટીમે ફાયદો ઉઠાવ્યો? તબીબી મૂલ્યાંકન કરવામાં આવ્યું, અને મેચ રેફરી/અમ્પાયરોએ તેને મંજૂરી આપી. આનો અર્થ એ થયો કે પ્રક્રિયા સાચી હતી, પરંતુ તેની રજૂઆતથી વિવાદ થયો.

આ સમગ્ર ઘટના વચ્ચે મેચ વધુને વધુ એકતરફી બની ગઈ. સંજૂ સેમસને શાનદાર સદી ફટકારી અને ચેન્નઈને 207 રન સુધી પહોંચાડી. જવાબમાં મુંબઈની બેટિંગ સારી ન રહી. અકીલ હુસૈનની બોલિંગે તેની કમર તોડી નાખી. પરિણામ: 103 રનની હાર.

આ મેચ ફક્ત હાર કે વિવાદ નહોતી. તે મેદાન પર દેખાતું ચિત્ર અને ડ્રેસિંગ રૂમમાં લેવામાં આવેલા નિર્ણયો વચ્ચેના અંતરની કહાની હતી. ખેલાડીઓની સુરક્ષા માટે કન્કશન સબસ્ટિટ્યૂટ નિયમ લાગૂ કરવામાં આવ્યો છે અને આ કિસ્સામાં સ્થાપિત નિયમો હેઠળ તેનો ઉપયોગ કરવામાં આવ્યો હતો. પરંતુ, એ પણ સ્પષ્ટ થઇ ગયું છે કે જો માહિતી સમયસર અને સ્પષ્ટ રીતે પૂરી પાડવામાં ન આવે, તો સાચો નિર્ણય પણ ખોટો લાગી શકે છે.

ICCના હાલના નિયમો અનુસાર, જ્યારે કોઈ ખેલાડીને મેચ દરમિયાન મેદાન પર માથામાં કે આંખમાં ઈજા થાય છે, ત્યારે કન્કશન સબસ્ટિટ્યૂટ નિયમ લાગુ પડે છે. જોકે, સબસ્ટિટ્યૂટ સમાન હોવો જોઈએ.

વૈભવ સૂર્યવંશી પોતાની આદતથી મજબૂર છે. બીજી નહીં એ જ આદત, જે દરેક ઘરમાં બાળકની કહાની હોય છે. 15 વર્ષીય રાજસ્થાન રોયલ્સના બેટ્સમેને 22 એપ્રિલે એકાના સ્ટેડિયમમાં લખનૌ સુપર જાયન્ટ્સ સામે રમાયેલી મેચ બાદ આ આદત વિશે વાત કરી હતી. વૈભવના મતે, તે અત્યારે પણ કાર્ટૂન જુએ છે; તેને કાર્ટૂન જોવાનું પસંદ છે.

સ્ટાર સ્પોર્ટ્સને આપેલા એક ઈન્ટરવ્યૂમાં, વૈભવ સૂર્યવંશીએ કાર્ટૂન જોવાની પોતાની આદત વિશે ખુલાસો કર્યો હતો. તેને પૂછવામાં આવ્યું કે, ‘જે ઉંમરે મોટાભાગના બાળકો કાર્ટૂન જુએ છે, ત્યારે તમે બોલરોને 'કાર્ટૂન' બનાવી રહ્યા છો. તમે તેને કેવી રીતે કરી લો છો? તમારા મગજમાં શું ચાલે છે?’ આ પ્રશ્નના જવાબમાં વૈભવ સૂર્યવંશીએ જે કહ્યું કે ખૂબ જ આશ્ચર્યજનક હતું. તેણે કહ્યું કે, તેમના મગજમાં કંઈ ચાલતું નથી. આજે પણ, તે દરેક મેચ પહેલાં કાર્ટૂન જુએ છે. કાર્ટૂન જોવાની આદત છે તો અત્યારે પણ હું કાર્ટૂન જાઉં છું. પરંતુ મારું મુખ્ય ફોકસ મેચ પર જ રહે છે.’

ડાબા હાથના બેટ્સમેન વૈભવ સૂર્યવંશીએ વધુમાં કહ્યું કે, આખી ટીમનું ધ્યાન હવે આગામી મેચ પર છે. જીતના બે પોઈન્ટ લઈશું અને પ્લેઓફમાં પહોંચવા તરફ એક પગલું આગળ વધવાનો પ્રયાસ કરીશું.

કાર્ટૂન પ્રત્યેના પ્રેમ બતાવનારા વૈભવ સૂર્યવંશીનો લખનૌ સુપર જાયન્ટ્સ સામેની મેચમાં ખાસ સારું પ્રદર્શન રહ્યું નહોતું. મોહસીન ખાને તેની સામે મેડન ઓવર ફેંકતા તેની વિકેટ લીડહી હતી. તે મેડન ઓવર સાથે વિકેટ લેનારો IPLનો પ્રથમ બોલર બન્યો. મેચમાં, વૈભવ સૂર્યવંશીએ 11 બોલનો સામનો કર્યો પરંતુ તે ફક્ત 8 રન બનાવી શક્યો હતો.

વૈભવ સૂર્યવંશી હાલમાં IPL 2026 માં રાજસ્થાનનો સૌથી સફળ બેટ્સમેન છે. 7 મેચમાં 7 ઇનિંગ્સમાં તેણે કુલ 254 રન બનાવ્યા છે, જેમાં બે અડધી સદીનો સમાવેશ થાય છે. આ આંકડાઓ સાથે તે IPL 2026 માટે ઓરેન્જ કેપ જીતવાની રેસમાં છે.

વૈભવ સૂર્યવંશી ભારતીય ક્રિકેટનો નવો સ્ટાર છે. તેની વિસ્ફોટક ઇનિંગ્સથી, વૈભવે ક્રિકેટ પ્રેમીઓને દીવાના બનાવી દીધા છે તો સચિન તેંદુલકરે તેમના સમયમાં જે કારનામા ક્રિકેટના મેદાન પર બતાવ્યા હતા, તેને જોતા લોકોએ સચિનને ‘ક્રિકેટના ભગવાન’ ઉપનામ આપ્યું છે. આ બંનેમાં જ્યોતિષીય સમાનતાઓ સાથે જ, એક સમાનતા એ પણ છે કે બંનેએ નાની ઉંમરે જ આંતરરાષ્ટ્રીય ક્રિકેટ રમવાનું શરૂ કર્યું હતું અને ચર્ચામાં આવી ગયા. જો કે, આજે અમે તમને આ લેખમાં, એ સમાનતાઓ બાબતે વૈભવ સૂર્યવંશી અને સચિન તેંદુલકરની કુંડળીમાં જોવા મળે છે. ચાલો જોઈએ આ સમાનતાઓ.

સચિન અને વૈભવ બંનેની ધનુ રાશિ છે

સચિન અને વૈભવ બંનેની જ ધનુ રાશિ છે. ધનુ રાશિના લોકોને ઉત્સાહી અને મહેનતુ માનવામાં આવે છે. આ અગ્નિ તત્વની રાશિ છે, એટલે તેઓ મજબૂત ઉર્જા અને રમત ભાવનાની તેમાં કોઈ કમી હોતી નથી. આ સાથે જ ધનુ રાશિના લોકોને સારા ટીમ લીડર પણ માનવામાં આવે છે. તેમની પાસે અનુશાસનની કોઈ કમી જોવા મળતી નથી એટલે રમતના મેદાનમાં આ ઉપલબ્ધિઓ હાંસલ કરે છે. ધનુ રાશિના લોકોની બીજી એક ખાસ વાત એ પણ છે કે તેઓ શારીરિક રૂપે મજબૂત હોય છે. સચિન અને વૈભવ બંનેમાં આ ગુણો જોવા મળે છે.

સચિન તેંદુલકરનો જન્મ 24 એપ્રિલ, 1973ના રોજ થયો હતો અને વૈભવ સૂર્યવંશીની જન્મ તારીખ 27 માર્ચ, 2011 છે. આ બંને જ દિવસે ચંદ્રમાં ધનું રાશિમાં હતો, એટલે બંનેની ચંદ્ર રાશિ ધનુ છે. બંનેની રાશિ સમાન હોવા ઉપરાંત, તેમનો સ્વભાવ પણ સમાન લાગે છે. બંને ખેલાડીઓ મેદાન પર ખૂ આક્રમક લાગે છે, પરંતુ વાસ્તવિક જીવનમાં તેઓ જમીન સાથે જોડાયેલા હોય છે. ધનુ રાશિના પ્રભાવને કારણે, બંનેમાં અન્ય લોકો માટે સન્માન અને સમાજમાં સારું વર્તન બંનેના જ ચરિત્રમાં જોવા મળે છે.

સચિન અને વૈભવ બંનેનો જન્મ પૂર્વાષાઢા નક્ષત્રમાં થયો હતો

સોમવારે રમાયેલી IPL (ઇન્ડિયન પ્રીમિયર લીગ) 2026ની મેચમાં, મુંબઈ ઇન્ડિયન્સે ગુજરાત ટાઇટન્સને 99 રનથી હરાવ્યું, સતત 4 મેચથી હારી રહેલી MIએ આનાથી હારની પરંપરાને તોડી હતી. તિલક વર્મા આ જીતના હીરો રહ્યો, તેણે શાનદાર અણનમ સદી સાથે મેચને પલટી નાખી. જ્યારે અશ્વિની કુમારે પણ બોલિંગ વિભાગમાં 4 વિકેટ ઝડપીને પોતાની છાપ છોડી હતી.

ટોસ જીતીને પ્રથમ બેટિંગ કરવાનો નિર્ણય લેતા, MIની શરૂઆત ખૂબ જ ખરાબ રહી. કગીસો રબાડાએ પાવરપ્લેમાં 3 વિકેટ લીધી, જેનાથી MIની ટીમ પાછળ પડી ગઈ. પરંતુ ત્યારપછી તિલક વર્માએ આક્રમક બેટિંગ કરતા માત્ર 45 બોલમાં અણનમ 101 રન બનાવ્યા. તેણે ઇનિંગના છેલ્લા બોલ પર ફોર (4) સાથે પોતાની પ્રથમ IPL સદી પૂર્ણ કરી.

તિલકે તેની ઇનિંગમાં 7 છગ્ગા અને 8 ચોગ્ગા ફટકાર્યા. આ ઉપરાંત નમન ધીરે 32 બોલમાં 45 રન બનાવીને મહત્વપૂર્ણ ભાગીદારી કરી હતી. આ ઇનિંગ્સના પરિણામે MIએ 20 ઓવરમાં 199/5નો મજબૂત સ્કોર બનાવ્યો હતો. ગુજરાત તરફથી, રબાડાએ 3/33 અને મોહમ્મદ સિરાજે 1/25 સારી બોલિંગ કરી હતી.

રનનો પીછો કરવા ઉતરેલી GTની ટીમ સંપૂર્ણપણે વિખેરાઈ ગઈ હતી. કોઈ પણ બેટ્સમેન ખાસ કહી શકાય એવી ઇનિંગ્સ રમી શક્યો નહીં. ફક્ત વોશિંગ્ટન સુંદરે 26 રન બનાવ્યા, પરંતુ ટીમને હારથી બચાવવામાં અસમર્થ રહ્યો હતો.

https://twitter.com/IPL/status/2046285119166828604

મુંબઈ માટે ઇમ્પેક્ટ પ્લેયર અશ્વિની કુમારે શાનદાર પ્રદર્શન કરીને 4 ઓવરમાં 24 રન આપીને 4 વિકેટ લીધી હતી. મિશેલ સેન્ટનરે પણ 2/16નું યોગદાન આપ્યું હતું. આખી GT ટીમ 15.5 ઓવરમાં 100 રનમાં ઓલઆઉટ થઈ ગઈ.

ગુજરાત ટાઇટન્સ સામેની મેચમાં 4 વિકેટ લઈને સનસનાટી મચાવનાર 24 વર્ષીય અશ્વિની કુમારે શુભમન ગિલ, રાહુલ તેવતિયા, શાહરૂખ ખાન અને રાશિદ ખાનને આઉટ કર્યા. તે ઘરઆંગણેની ક્રિકેટમાં પંજાબ માટે રમે છે. IPLમાં આ તેની બીજી સીઝન છે. તેણે 2025માં તેની ડેબ્યૂ IPL સીઝનમાં કોલકાતા નાઈટ રાઇડર્સ સામે પણ 4 વિકેટ લઈને હેડલાઇન્સ બનાવી હતી. મુંબઈના વાનખેડે સ્ટેડિયમ ખાતે રમાયેલી તે મેચમાં અશ્વિનીએ કોલકાતા નાઈટ રાઈડર્સના અજિંક્ય રહાણે, રિંકુ સિંહ, મનીષ પાંડે અને આન્દ્રે રસેલને આઉટ કર્યા હતા. આનાથી તે IPL ડેબ્યૂમાં 4 વિકેટ લેનાર પ્રથમ ભારતીય ખેલાડી બન્યો.

https://twitter.com/mipaltan/status/2046462692836454486

31 માર્ચ, 2025ના રોજ યોજાયેલી તે મેચમાં તેના પ્રદર્શન માટે તેને પ્લેયર ઓફ ધ મેચ જાહેર કરવામાં આવ્યો હતો. અશ્વિનીએ 2025 સીઝનની 7 મેચમાં 11 વિકેટ લીધી હતી.

પંજાબના ડાબોડી ફાસ્ટ બોલર અશ્વિની કુમારે IPL 2025 માં મુંબઈ ઇન્ડિયન્સ માટે ડેબ્યૂ કર્યું હતું. અહીં ખાસ વાત એ છે કે, તેણે તેના ડેબ્યૂ પહેલા માત્ર 4 T20 મેચ રમી હતી. અશ્વિની લગભગ 135 Km/hની ઝડપે બોલિંગ કરે છે. તેની ખાસિયત શાર્પ યોર્કર અને બેક-ઓફ-ધ-હેન્ડ ધીમી બોલિંગ છે, જેનાથી તે બેટ્સમેનોનું ધ્યાનભંગ કરે છે. 2024 શેર-એ-પંજાબ T20 ટુર્નામેન્ટમાં તેની ડેથ બોલિંગે બધાનું ધ્યાન ખેંચ્યું હતું.

https://twitter.com/mipaltan/status/2046293152273957308

તેને IPL 2025માં રૂ. 30 લાખમાં ખરીદવામાં આવ્યો હતો. તેની શરૂઆત આશાસ્પદ રહી હતી, પરંતુ તે પછીની મેચોમાં તે થોડો મોંઘો સાબિત થયો, બાકીની 6 મેચોમાં તેણે ફક્ત 7 વિકેટ લીધી. આમ છતાં, તેની ક્ષમતાને ધ્યાનમાં રાખીને, ટીમે તેને 2026 સીઝન પહેલા જાળવી રાખ્યો હતો. હવે, 2026માં તેના પ્રભાવશાળી પ્રદર્શન સાથે, અશ્વિની મુંબઈના IPL અભિયાનમાં મહત્વનો ખેલાડી બને તેવી અપેક્ષા રાખવામાં આવી રહી છે.

IPL 2026ની 24મી મેચમાં 5 વખતની ચેમ્પિયન મુંબઈ ઈન્ડિયન્સ (MI)ને પંજાબ કિંગ્સ (PBKS) સામે 7 વિકેટથી કારમી હારનો સામનો કરવો પડ્યો. પંજાબ સામેની આ મેચમાં મુંબઈનું બોલિંગ પ્રદર્શન ખૂબ જ નિરાશાજનક લાગ્યું. પ્રથમ બેટિંગ કરતા ટીમે ક્વિન્ટન ડી કોકની સદીની મદદથી 20 ઓવરમાં 5 વિકેટ ગુમાવીને કુલ 195 રન બનાવ્યા હતા, પરંતુ મુંબઈની ટીમ આ સ્કોરનો બચાવ કરવામાં નિષ્ફળ રહી.

આ જ કારણ છે કે મુંબઈ ઈન્ડિયન્સનો કેપ્ટન હાર્દિક પંડ્યા બોલિંગ દરમિયાન ગુસ્સામાં જોવા મળ્યો હતો. ગુસ્સે ભરાયેલા હાર્દિક પંડ્યાનો એક વીડિયો હાલમાં સોશિયલ મીડિયા પર વાયરલ થઈ રહ્યો છે, જેમાં તે ફિલ્ડિંગ સેટ કરતી વખતે જસપ્રીત બૂમરાહથી નારાજ દેખાય છે. આ દરમિયાન, બૂમરાહની પ્રતિક્રિયા પણ કંઈક એવી હતી, જાણે કે તેને હાર્દિક પંડ્યાનું વલણ સારું ન લાગ્યું હોય.

2026ની IPL સીઝન સ્ટાર ફાસ્ટ બોલર જસપ્રીત બૂમરાહ માટે ખાસ રહી નથી. આ સીઝનમાં બેટ્સમેનો બૂમરાહ સામે સાવધાનીપૂર્વક રમી રહ્યા છે, અને પોતાની વિકેટ ગુમાવી રહ્યા નથી. આ જ કારણ છે કે IPL 2026માં બૂમરાહને સતત પાંચમી મેચમાં પણ કોઈ વિકેટ ન મળી. બૂમરાહની વિકેટ લેવામાં અસમર્થતા મુંબઈ ઈન્ડિયન્સની ખરાબ પરિસ્થિતિનું કારણ બની ગઈ છે કારણ કે તેનાથી અન્ય બોલરો પર દબાણ વધ્યું છે.

IPL 2026માં અત્યાર સુધી મુંબઈ ઈન્ડિયન્સે કુલ પાંચ મેચ રમી છે. આ 5 મેચમાંથી મુંબઈ ફક્ત એકમાં જીત મેળવવામાં સફળ રહી છે. સીઝનની પ્રથમ મેચમાં જીત મળ્યા બાદ મુંબઈને હવે સતત 4 હારનો સામનો કરવો પડ્યો છે. આ જ કારણ છે કે, તે હાલમાં પોઈન્ટ ટેબલ પર 9મા સ્થાને છે. એવામાં, જો મુંબઈ પ્લેઓફ સ્થાન માટે પોતાની દાવ મજબૂત કરવા માંગતી હોય, તો ટીમે સીઝનની બાકીની મેચોમાં સારું પ્રદર્શન કરવું પડશે.

ગયા વર્ષે 16 ડિસેમ્બરે અબુ ધાબીમાં ઈન્ડિયન પ્રીમિયર લીગ (2026) માટે મીની ઓક્શન યોજાયું હતું. ઓસ્ટ્રેલિયન ઓલરાઉન્ડર કેમેરોન ગ્રીન પર પૈસાનો વરસાદ થયો હતો.

ગ્રીનને ત્યારે કોલકાતા નાઈટ રાઈડર્સે રૂ. 25.20 કરોડમાં ખરીદ્યો હતો. આનાથી તે સમયે કેમેરોન ગ્રીન IPL ઇતિહાસનો સૌથી મોંઘો વિદેશી ખેલાડી બન્યો. ગ્રીને તેના જ દેશના મિશેલ સ્ટાર્કનો રેકોર્ડ પણ તોડી નાખ્યો હતો.

ડાબા હાથના ફાસ્ટ બોલર સ્ટાર્કને IPL 2024ની હરાજીમાં KKRએ રૂ. 24.75 કરોડમાં ખરીદ્યો હતો. રિષભ પંત (રૂ. 27 કરોડ રૂપિયા) IPLનો સૌથી મોંઘો ખેલાડી છે.

પરંતુ આ અપડેટ પછી, હવે વાત કરીએ કેમેરોન ગ્રીનના હાલના IPL ફોર્મ વિશે, એટલે કે IPL 2026 વિશે વાત કરીએ, જ્યાં ગ્રીન બેટ સાથે સંઘર્ષ કરતો જોવા મળે છે. એવું લાગે છે કે, તેની બેટિંગમાં હવે પહેલા જેવી ધાર નથી રહી, ન તો તે ઝડપથી રન બનાવી શકે છે અને ન તો તે મેદાનમાં રમતમાં ટકી શકે છે.

એકંદરે, શાહરૂખ ખાનની માલિકીની આ ટીમ હવે એ વિચારવા પર મજબુર થશે કે તેમણે આ ખેલાડીને કેમ ખરીદ્યો. જ્યારે તે બોલિંગ કરી રહ્યો ન હતો, અને ઘણા ક્રિકેટ જગતના દિગ્ગજો આશ્ચર્ય પામી રહ્યા હતા કે આવા ખેલાડીમાં આટલું મોટું રોકાણ કરવાનું કારણ શું છે.

14 એપ્રિલના રોજની મેચમાં, નૂર અહેમદના પહેલા જ બોલ પર તે ગોલ્ડન ડક માટે આઉટ થયો હતો; એવું લાગતું હતું કે, તે આ બોલ માટે સંપૂર્ણપણે તૈયાર જ નહોતો.

ક્રિકેટ ઓસ્ટ્રેલિયાએ 30 માર્ચે બોલિંગમાં તેની ગેરહાજરી અંગે સ્પષ્ટતા બહાર પાડી હતી. નિવેદનમાં એમ કહેવામાં આવી રહ્યું હતું કે, 'કેમેરોનને કમરના નીચેના ભાગમાં ઈજા છે, જેના માટે તેનો ઈલાજ ચાલુ છે, પરંતુ તેના કારણે, તેને થોડા સમય માટે બોલિંગથી દૂર રહેવું પડશે. તે ધીમે ધીમે ભારતમાં તેના બોલિંગ વર્કલોડમાં વધારો કરી રહ્યો છે અને 10-12 દિવસમાં પાછો ફરવાની અપેક્ષા છે.'

આમ જોઈએ તો તેની બોલિંગ તો છોડો, તે બેટ સાથે પણ સંઘર્ષ કરી રહ્યો છે. આંકડા આ વાત સાબિત કરે છે. અત્યાર સુધી, તેણે આ IPLમાં કોલકાતા નાઈટ રાઈડર્સ માટે 5 મેચોમાં 5 ઇનિંગ્સમાં 56 રન બનાવ્યા છે, જેમાં તેનો શ્રેષ્ઠ સ્કોર 32(નોટ આઉટ) છે. ગ્રીનની બેટિંગ એવરેજ 14 છે અને તેનો સ્ટ્રાઇક રેટ 143.58 છે. આ સમયગાળા દરમિયાન, તેણે 5 ચોગ્ગા અને 2 છગ્ગા ફટકાર્યા છે.

https://twitter.com/StarSportsIndia/status/2044103706023735581

જ્યારે તેના બોલિંગના આંકડા ખૂબ જ નિરાશાજનક નજરે આવે છે. પાંચ મેચોમાં બે ઇનિંગ્સમાં, તેણે 24 બોલમાં 58 રન આપ્યા છે. આ સમયગાળા દરમિયાન, તેને અત્યાર સુધી ફક્ત એક જ IPL સફળતા મળી છે. આ સ્પષ્ટપણે દર્શાવે છે કે, તે તેને મળેલી કિંમત પ્રમાણે રમી શક્યો નથી.

IPL ગવર્નિંગ કાઉન્સિલના નિયમો અનુસાર, કોઈપણ વિદેશી ખેલાડી મીની-હરાજીમાં મહત્તમ રૂ. 18 કરોડ કમાઈ શકે છે, પછી ભલે ફ્રેન્ચાઇઝ તે રકમથી વધુ રકમની તેની બોલી લગાવે.

આનો અર્થ એ છે કે, જો બોલી રૂ. 18 કરોડથી વધુ હોય, તો પણ વિદેશી ખેલાડીને એટલી જ રકમ મળશે. આ નિયમ સૌપ્રથમ IPL 2025 માટે મેગા ઓક્શનમાં લાગુ કરવામાં આવ્યો હતો અને પછીથી તેને મીની ઓક્શનમાં પણ લાગુ કરવામાં આવ્યો હતો.

આનો ઉદ્દેશ્ય નાણાકીય શિસ્ત જાળવવાનો અને મીની ઓક્શનમાં વધુ પડતી બોલીઓ પર રોક લગાવવાનો હતો. આ જ કારણ છે કે, ઓસ્ટ્રેલિયાના સ્ટાર ઓલરાઉન્ડર કેમેરોન ગ્રીનને રૂ. 25.20 કરોડમાં હરાજી કરવામાં આવ્યા હતા, પરંતુ તેમનો IPL પગાર ફક્ત રૂ. 18 કરોડ રહેશે. બાકીના રૂ. 12 કરોડ ભારતીય ક્રિકેટ કંટ્રોલ બોર્ડ (BCCI)ના ખેલાડીઓના કલ્યાણ ભંડોળમાં જશે. જોકે, ફ્રેન્ચાઇઝ ટીમે પોતાના ખિસ્સામાંથી રૂ. 25.20 કરોડ ચૂકવવા પડશે.

એકંદરે, આ નિયમ ફક્ત વિદેશી ખેલાડીઓને જ લાગુ પડે છે, જ્યારે ભારતીય ખેલાડીઓ સંપૂર્ણ બોલી રકમ માટે હકદાર રહેશે, ભલે તે રૂ. 18 કરોડથી વધુ હોય. IPL 2025 માટે મેગા ઓક્શનમાં રિષભ પંત સૌથી મોંઘો ખેલાડી હતો. પંતને લખનઉ સુપર જાયન્ટ્સ (LSG) દ્વારા રૂ. 27 કરોડમાં ખરીદવામાં આવ્યો હતો અને તેને તેનો સંપૂર્ણ પગાર મળ્યો હતો. પંત IPL ઇતિહાસનો સૌથી મોંઘો ખેલાડી છે.