ભારતીય ક્રિકેટ કંટ્રોલ બોર્ડ (BCCI) ખેલાડીઓને અપાતા વાર્ષિક સેન્ટ્રલ કોન્ટ્રાક્ટના નિયમોમાં મોટો ફેરફાર કરવાની તૈયારી કરી રહ્યું છે. જેની સીધી અસર ખેલાડીઓ પર પડશે. અત્યાર સુધી, ખેલાડીઓને તેમના શાનદાર પ્રદર્શન અને વરિષ્ઠતાના આધારે કરાર મળતા હતા. જોકે, હવે BCCI 'મેચ માટે ઉપલબ્ધતા'ને પણ એક મહત્ત્વપૂર્ણ માપદંડ બનાવવાનું વિચારી રહ્યું છે. સરળ શબ્દોમાં કહીએ તો, બોર્ડ એ જોશે કે કોઈ ખેલાડી કેટલી મેચો રમવા માટે ફિટ અને ઉપલબ્ધ હતો.

તાજેતરના મહિનાઓમાં, ટીમ ઈન્ડિયાના ઘણા મુખ્ય ખેલાડીઓ વારંવાર ઈજાઓનો શિકાર બન્યા છે, જેના કારણે તેઓ મહત્ત્વપૂર્ણ મેચો રમી શક્યા નથી. આ બાબતને ધ્યાનમાં રાખીને બોર્ડ ઈચ્છે છે કે ખેલાડીઓ શક્ય તેટલી વધુ મેચો માટે ફિટ રહે. BCCI હાલમાં આખી સીઝન દરમિયાન ખેલાડીની ફિટનેસ અને ઉપલબ્ધતા પર નજર રાખવા માટે એક ફોર્મ્યૂલા પર ચર્ચા કરી રહ્યું છે. બોર્ડ મર્યાદા નક્કી કર શકે છે કે, સેન્ટ્રલ કોન્ટ્રાક્ટ મેળવવા માટે ખેલાડીએ ઓછામાં ઓછી કેટલી મેચ રમવા માટે ઉપલબ્ધ રહેવું જોઇએ.

શું આ નિયમ અત્યારે લાગુ કરવામાં આવ્યો છે?

'સ્પોર્ટ્સ તક' સાથે વાત કરતા, BCCIના એક સૂત્રએ જણાવ્યું હતું કે આ વિચાર હજુ પ્રારંભિક તબક્કામાં છે. હાલમાં ચર્ચાઓ માત્ર બોર્ડની આંતરિક વાતચીત ચાલી રહી છે, એ ચેક કરવામાં આવી રહ્યું છે કે એવા નિયમને લાગૂ કરવા યોગ્ય અને શક્ય હશે કે નહીં. હજુ સુધી કોઈ અંતિમ નિર્ણય લેવામાં આવ્યો નથી. જોકે, જો આ નિયમને મંજૂરી આપવામાં આવે છે, તો ભવિષ્યમાં ટીમ ઈન્ડિયાના ખેલાડીઓ માટે માત્ર સારું પ્રદર્શન કરવું પૂરતું નહીં હોય; આકર્ષક અને કરોડો રૂપિયાના કરાર મેળવવા માટે ટીમ માટે ફિટ રહેવું એ પૂર્વશરત બની જશે.

ઈંગ્લેન્ડના પ્રવાસ દરમિયાન હર્ષિત રાણા ઈજાગ્રસ્ત થયો હતો; ત્યારબાદ તેણે ફિટનેસ મેળવી લીધી છે અને તે અફઘાનિસ્તાન સામેની T20 સીરિઝમાં રમવા માટે તૈયાર છે. જોકે, આ સીરિઝ પહેલાં તેની પસંદગીને લઈને સવાલો ઉઠ્યા છે. ભારતના ભૂતપૂર્વ ક્રિકેટર સદાગોપન રમેશે સવાલ ઉઠાવ્યો છે. તેમણે પોતાની યુટ્યૂબ ચેનલ પર સવાલ ઉઠાવતા કહ્યું કે, આખરે હર્ષિત રાણા માટે અલગ નિયમો કેમ બન્યા છે? શું બુમરાહે ટેસ્ટ ટીમમાં પસંદગી પામતા પહેલા 'રેડ-બોલ' મેચો રમવી પડશે, જ્યારે હર્ષિત રાણા ઈજામાંથી પરત ફરી રહ્યો છે અને તેને ટેસ્ટ મેચ રમ્યા વિના જ સીધો ટીમમાં પસંદ કરી લેવામાં આવ્યો. ચાલો જાણીએ હર્ષિત રાણા વિશે રમેશે શું-શું કહ્યું.

પોતાની યુટ્યુબ ચેનલ પર વાત કરતા સદગોપન રમેશે કહ્યું કે, એવા સમાચાર મળી રહ્યા છે કે બુમરાહ ગયા નવેમ્બરથી કોઈ રેડ-બોલ મેચ રમ્યો નથી, તેથી પસંદગી માટે વિચારણા કરવા માટે તેણે ન્યૂઝીલેન્ડ સામે 'ઈન્ડિયા A' માટે રમવું પડશે. તે એક યોગ્ય નિર્ણય છે. હર્ષિત રાણાને ઘૂંટણની ઈજા થઈ છે, તે ઘૂંટણની સર્જરી બાદ તરત જ તેની ટીમમાં પસંદગી કરવામાં આવી. તે એકદમ સ્પષ્ટ છે કે કેટલાક સમયે કેટલાક વ્યક્તિઓ માટે નિયમોમાં છૂટછાટ આપવામાં આવે છે.

રમેશે કહ્યું કે, મારું કહેવું એ છે કે તમામ ખેલાડીઓ માટે નિયમો સમાન હોવા જોઈએ. જે ખેલાડી પહેલા પોતાને સાબિત કરી ચૂક્યા છે, તેમના પર સૌથી વધુ દબાણ છે. બૂમરાહ અને શમીને તેમની ફિટનેસ સાબિત કરવાનું કહેવામાં આવ્યું છે, પરંતુ હર્ષિત રાણાને ઈજામાંથી સાજા થયા બાદ સીધો જ ટીમમાં સામેલ કરવામાં આવ્યો. આ અંગે કોઈ સ્પષ્ટતા આપવામાં આવી નથી અને BCCIએ આ બાબતે કંઇ કહ્યું નથી.

ઉલ્લેખનીય છે કે હર્ષિત રાણાએ આયર્લેન્ડ અને ઈંગ્લેન્ડના પ્રવાસ દરમિયાન પહેલા પાંચ T20 મેચો રમ હતી, ત્યારબાદ ફરી એક વાર હેમસ્ટ્રિંગની ઈજા થઇ. ફિટનેસ ક્લિયરન્સ મળ્યા બાદ તેને અફઘાનિસ્તાન સામેની T20 સીરિઝ માટે ભારતીય ટીમમાં સામેલ કરવામાં આવ્યો છે. રમેશે સવાલ કર્યો કે જો હર્ષિતની સીધી પસંદગી થઈ શકે છે તો  પછી બૂમરાહને ટેસ્ટ મેચોમાં સીધી તક કેમ આપવામાં આવતી નથી. કેમ બૂમરાહને 'ઈન્ડિયા A' માટે રમવું પડશે તેવી વાત કેમ કરવામાં આવે છે.

દુલીપ ટ્રોફી (2026-27) ફાઇનલમાં, પૂર્વ ઝોનના યુવા બેટ્સમેન વૈભવ સૂર્યવંશી અને વિરોધી ટીમના કેપ્ટન તિલક વર્મા વચ્ચે મેદાન પર ઉગ્ર બોલાચાલી થઈ ગઈ. શરૂઆતમાં બંને વચ્ચે મજાકમાં ચાલુ થયેલી વાતચીત પરથી સ્લેજિંગ શરૂ થયું હતું જે અચાનક ઉગ્ર બોલાચાલીમાં બદલાઈ ગયું. પરિસ્થિતિ એટલી વણસી ગઈ કે અમ્પાયરોએ પરિસ્થિતિને કાબૂમાં લેવા માટે દરમિયાનગીરી કરવી પડી.

આ ઘટના પૂર્વ ઝોનના પ્રથમ દાવની 11મી ઓવરમાં બની હતી. દક્ષિણ ઝોનના કેપ્ટન તિલક વર્મા વૈભવ સૂર્યવંશી સાથે સતત વાત કરી રહ્યા હતા અને તેમને ઉપ-કેપ્ટનપદ વિશે સ્લેજિંગ કરી રહ્યા હતા. તિલક વૈભવને કહે છે, 'શું યાર, આ ઉપ-કેપ્ટન!'

થોડીવાર પછી, સ્લેજિંગ ઉગ્ર બોલાચાલીમાં બદલાઈ ગઈ. તિલક વર્મા 15 વર્ષના વૈભવ સૂર્યવંશી તરફ આગળ વધ્યા અને એક હળવો શારીરિક હાવભાવ કર્યો, જાણે કે તે તેને મુક્કો મારવા જતો હોય. પાછળ હટવાને બદલે, વૈભવે તરત જ તેનો સામનો કર્યો. બંને વચ્ચે વધતા તણાવને જોઈને, અમ્પાયરે દરમિયાનગીરી કરી અને ખેલાડીઓને અલગ કર્યા.

તિલક વર્મા સાથે મેદાન પર ઝઘડો થાય તે પહેલાં, વૈભવ સૂર્યવંશીનું બેટ ખુબ જોરદાર બોલ્યું હતું. તેણે અભિમન્યુ ઈશ્વરન સાથે મળીને પૂર્વ ઝોનને મજબૂત શરૂઆત અપાવી. તેઓએ પ્રથમ વિકેટ માટે 100 રનની ભાગીદારી કરી. વૈભવે માત્ર 37 બોલમાં 5 ચોગ્ગા અને 1 છગ્ગા સાથે 44 રનની ઝડપી રમત રમી.

https://twitter.com/asvanth1808/status/2096465843060347142

જોકે, ઝડપી બોલર ચામા મિલિંદે તેની અડધી સદી પુરી કરે તે પહેલાં જ તેની ઇનિંગને ખતમ કરી હતી. વૈભવ સૂર્યવંશીએ શોર્ટ-પિચ બોલ પર મોટો શોટ રમવાનો પ્રયાસ કર્યો, પરંતુ વધારાના ઉછાળાથી બોલ તેના બેટની ઉપરના ભાગે લાગીને મિડ-વિકેટ તરફ ગયો. ડીપ સ્ક્વેર લેગથી દોડતા તનય ત્યાગરાજને શાનદાર કેચ પકડ્યો.

વૈભવ સૂર્યવંશીની ઇનિંગ્સ 44 રન પર સમાપ્ત થઈ હોવા છતાં, તેણે રેડ-બોલ ક્રિકેટમાં તેની બેટિંગ પર એક અલગ દ્રષ્ટિકોણ રજૂ કર્યો છે. સેમિફાઇનલમાં 92 અને 40 રન બનાવ્યા પછી, તેણે ફાઇનલમાં પણ આક્રમક બેટિંગ કરી. હવે, દુલીપ ટ્રોફી પછી, વૈભવ ભારતીય ટીમ સાથે તેના આગામી કાર્યકાળ માટે આતુર રહેશે. તે અફઘાનિસ્તાન સામે 3 મેચની T20 શ્રેણીમાં રમશે. શ્રેણીની પહેલી મેચ 13 સપ્ટેમ્બરે દિલ્હીના અરુણ જેટલી સ્ટેડિયમ ખાતે રમાનારી છે.

મહેન્દ્ર સિંહ ધોનીના IPL ભવિષ્ય અંગે ચાલી રહેલી અટકળો વચ્ચે, એક મોટો અપડેટ સામે આવ્યો છે. ચેન્નાઈ સુપર કિંગ્સના ભૂતપૂર્વ બેટ્સમેન સુબ્રમણ્યમ બદ્રીનાથના જણાવ્યા મુજબ, ધોનીએ સ્પષ્ટ કરી દીધું છે કે જો તે IPLમાં રમવાનું ચાલુ રાખશે, તો તે ઈમ્પેક્ટ પ્લેયરની ભૂમિકા સ્વીકારશે નહીં. આનો અર્થ એ થયો કે ફક્ત બેટિંગ કરવાને બદલે, ધોની આખી મેચ વિકેટકીપર તરીકે રમવા માંગે છે.

ખરેખર, 45 વર્ષીય ધોની માટે ઈમ્પેક્ટ પ્લેયરનો વિકલ્પ મહત્વપૂર્ણ માનવામાં આવતો હતો. તેની વધતી ઉંમર અને ફિટનેસ પડકારોને ધ્યાનમાં રાખીને, આ નિયમ તેને 20 ઓવર માટે વિકેટકીપિંગના બોજથી બચવા અને જરૂર પડ્યે બેટિંગ કરવાની મંજૂરી આપતો હતો. જોકે, ધોનીનો દ્રષ્ટિકોણ અલગ છે.

બદ્રીનાથે તેની યુટ્યુબ ચેનલ પર ખુલાસો કર્યો કે, ધોનીએ તેને વ્યક્તિગત રીતે કહ્યું હતું કે, તે ઈમ્પેક્ટ પ્લેયર તરીકે નહીં રમે. તેનું માનવું છે કે જો તે રમશે, તો તે પૂર્ણ-સમયનો વિકેટકીપર રહેશે અને સમગ્ર 20 ઓવર માટે મેદાન પર રહેશે.

બદ્રીનાથ માને છે કે, હાલની પરિસ્થિતિમાં ધોની માટે ઇમ્પેક્ટ પ્લેયરની ભૂમિકા આદર્શ હોઈ શકે છે. તેમણે કહ્યું કે મેદાન પર લાંબા સમય સુધી રહેવાથી ધોનીના શરીર પર અસર પડે છે, અને કોચ સ્ટીફન ફ્લેમિંગે પણ આ વાતનો ઉલ્લેખ કર્યો છે.

બદ્રીનાથના મતે, ધોની હવે સામાન્ય રીતે ઇનિંગ્સના અંતમાં બેટિંગ કરવા માટે આવે છે, અને તેનો ઇમ્પેક્ટ પ્લેયર તરીકે ઉપયોગ કરવો CSK માટે વ્યૂહાત્મક રીતે ફાયદાકારક હોઈ શકે છે. આનાથી ટીમ ધોનીના અનુભવ અને ફિનિશિંગ ક્ષમતાનો લાભ મેળવી શકશે અને સાથે સાથે તેના શરીર પર પડતો દબાવ પણ ઓછો થશે.

આનાથી 2027ની IPLમાં ધોનીની રમવાની ક્ષમતા પર સૌથી મોટો પ્રશ્ન ઊભો થાય છે. જો માહી ઇમ્પેક્ટ પ્લેયર ન બનવાનું પસંદ કરે છે અને વિકેટકીપર તરીકે સમગ્ર 20 ઓવર માટે મેદાન પર રહેવા માંગે છે, તો તેની ફિટનેસ સૌથી મહત્વપૂર્ણ પરિબળ રહેશે.

ધોનીએ 2024ની સીઝન પહેલા CSKની કેપ્ટનશીપ છોડી દીધી હતી, અને ત્યારથી, તેની બેટિંગ ભૂમિકા પહેલાની તુલનામાં ઘણી રીતે મર્યાદિત રહી છે. જો કે, દબાણ હેઠળ મેચ પૂરી કરવાની તેનો અનુભવ અને ક્ષમતા ટીમ માટે મહત્વપૂર્ણ રહે છે.

ધોનીએ CSKને 5 IPL ટાઇટલ અપાવ્યા છે. હવે, પ્રશ્ન એ નથી કે તે ઇમ્પેક્ટ પ્લેયર તરીકે રમશે કે નહીં... તેણે પોતાનું સ્થાન સ્પષ્ટ કરી દીધું છે. હવે અસલી સવાલ એ છે કે, શું માહીનું શરીર તેને બીજી સંપૂર્ણ IPL સીઝન માટે વિકેટકીપર તરીકે મેદાન પર રહેવા દેશે?

આ નિર્ણય નક્કી કરશે કે ધોની 2027માં ફરી એકવાર પીળી જર્સી પહેરશે કે નહીં.

ભારતના પૂર્વ વિસ્ફોટક બેટ્સમેન વીવીએસ લક્ષ્મણ જાપાનના આઇચી-નાગોયા ખાતે યોજાનારી એશિયન ગેમ્સ 2026માં ભારતીય પુરુષ ક્રિકેટ ટીમના હેડ કોચ તરીકે જવાબદારી સંભાળવા માટે તૈયાર છે. ખેલ મંત્રાલય દ્વારા ગુરુવાર, 3 સપ્ટેમ્બરે મંજૂર કરવામાં આવેલી કોચ અને સપોર્ટ સ્ટાફની યાદીમાં આ નિર્ણયની સત્તાવાર પુષ્ટિ કરવામાં આવી છે.

એશિયા ખંડના આ બહુવિધ રમત ઉત્સવનું આયોજન 19 સપ્ટેમ્બરથી 4 ઓક્ટોબર દરમિયાન થવાનું છે, જેમાં પુરુષ ક્રિકેટ સ્પર્ધા 24 સપ્ટેમ્બરથી 3 ઓક્ટોબર વચ્ચે રમાશે. આ ટૂર્નામેન્ટમાં કુલ 10 ટીમો ભાગ લેશે. ભારતીય ટીમના રેગ્યુલર હેડ કોચ ગૌતમ ગંભીરની ગેરહાજરીમાં લક્ષ્મણ આ ભૂમિકા નિભાવશે. ગંભીર 27 સપ્ટેમ્બરથી શરૂ થઈ રહેલી વેસ્ટ ઈન્ડિઝ સામેની ત્રણ મેચોની હોમ વનડે શ્રેણી માટે વનડે ટીમની દેખરેખ રાખવા માટે ભારતમાં જ રોકાશે.

એશિયન ગેમ્સ માટે ભારત જૂથના કોચિંગ સ્ટાફમાં પૂર્વ ક્રિકેટરો સુનીલ જોશી, ઋષિકેશ કાનિટકર અને શુભદીપ ઘોષનો પણ સમાવેશ થાય છે. આ અભિયાન માટે મરૂફ ફજાનદારને ટીમ લીડર તરીકે નિયુક્ત કરવામાં આવ્યા છે. બીજી તરફ, ભારતીય મહિલા ક્રિકેટ ટીમ અમૂલ મજુમદાર અને આવિષ્કાર સાળવી જેવા અનુભવી સપોર્ટ સ્ટાફ સાથે એશિયન ગેમ્સમાં ઉતરશે.

પુરુષ T20 સ્પર્ધામાં શ્રેયસ અય્યર ભારતીય ટીમનું નેતૃત્વ કરશે, જ્યારે તિલક વર્માને વાઇસ કેપ્ટન બનાવવામાં આવ્યા છે. ટીમમાં વરિષ્ઠ સ્તરે ભારતનું પ્રતિનિધિત્વ કરનાર સૌથી નાની ઉંમરના ખેલાડી બનેલા યુવા બેટ્સિંગ સનસનાટી વૈભવ સૂર્યવંશી ઉપરાંત અનુભવી ફાસ્ટ બોલર જસપ્રીત બુમરાહનો પણ સમાવેશ કરાયો છે.

વીવીએસ લક્ષ્મણ એશિયન ગેમ્સના અનુભવથી સારી રીતે વાકેફ છે. આ પહેલાં તેમણે ચીનના હાંગઝોઉ ખાતે રમાયેલી 2023ની આવૃત્તિમાં ભારતને ગોલ્ડ મેડલ અપાવ્યો હતો. આ સિવાય ઓસ્ટ્રેલિયા, સાઉથ આફ્રિકા, આયર્લેન્ડ અને ઝિમ્બાબ્વે સામેની બહુવિધ દ્વિપક્ષીય T20I શ્રેણીઓમાં પણ તેઓ ભારતના કાર્યકારી હેડ કોચ તરીકેની જવાબદારી સંભાળી ચૂક્યા છે.

ભારત 2026ની ટૂર્નામેન્ટમાં ડિફેન્ડિંગ ચેમ્પિયન તરીકે મેદાનમાં ઉતરશે. એશિયન ગેમ્સમાં ક્રિકેટ ચોથી વખત રમાઈ રહ્યું છે, જોકે શરુઆતની બે આવૃત્તિઓમાં ભારતે ભાગ લીધો નહોતો. ટૂર્નામેન્ટના ફોર્મેટ અનુસાર, ચાર સીડેડ ટીમો - ભારત, પાકિસ્તાન, બાંગ્લાદેશ અને શ્રીલંકા સીધી ક્વાર્ટર ફાઈનલથી પોતાના અભિયાનની શરૂઆત કરશે.

બાકીની ટીમોને બે ગ્રુપમાં વહેંચવામાં આવી છે. ગ્રુપ-Aમાં અફઘાનિસ્તાન, જાપાન અને નેપાળ છે, જ્યારે ગ્રુપ-Bમાં હોંગકોંગ, ચીન, મલેશિયા અને ઓમાનનો સમાવેશ થાય છે. બંને ગ્રુપમાંથી ટોચની બે-બે ટીમો ક્વાર્ટર ફાઈનલ માટે ક્વોલિફાય થશે.

અફઘાનિસ્તાન સામે નવી દિલ્હીમાં રમાનારી ઐતિહાસિક T20I સીરિઝ માટે ભારતીય પસંદગી સમિતિએ 15 સભ્યોની ટીમની જાહેરાત કરી દીધી છે. ટીમમાં મોટા સ્ટાર્સ પાછા ફર્યા છે, પરંતુ ફિટનેસના અભાવે હાર્દિક પંડ્યા ટીમમાંથી બહાર રહ્યો છે.  આ ટીમ પસંદગીમાં સૌથી વધુ ધ્યાન ખેંચનારી બાબત એ છે કે ચાર ખેલાડીઓના નામના આગળ ‘ફિટનેસ ક્લિયરન્સને આધીન’  દર્શાવતી ફુદડી  મૂકવામાં આવી છે. આ યાદીમાં ઝડપી બોલિંગ જોડી જસપ્રીત બુમરાહ અને હર્ષિત રાણા તેમજ ઓલરાઉન્ડર નિતિશ રેડ્ડી અને વોશિંગ્ટન સુંદરનો સમાવેશ થાય છે. દ્વિપક્ષીય સીરિઝ માટે પસંદગીકારોએ એવા ખેલાડીઓની પસંદગી કરી હોય કે જેઓ હજુ પૂર્ણપણે ફિટ નથી, તે બાબતે અનેક સવાલો ઊભા થયા છે.

તાજેતરમાં ખેલાડીઓને ઉતાવળમાં ટીમમાં પરત લાવવાને કારણે તેઓ ફરી ઈજાગ્રસ્ત થયા હોવાના ઘણા કિસ્સાઓ બન્યા છે. આ અનુભવમાંથી પાઠ લઈને BCCIએ કોઈ પણ ખેલાડીને ટીમમાં રમવાની મંજૂરી આપતા પહેલાં અત્યંત સાવચેતીભર્યું વલણ અપનાવ્યું છે.  હર્ષિત રાણા ઘૂંટણની ઈજાના કારણે પાંચ મહિના સુધી બહાર રહ્યા બાદ આ વર્ષની શરૂઆતમાં આયર્લેન્ડ અને ઈંગ્લેન્ડના પ્રવાસ દરમિયાન આંતરરાષ્ટ્રીય ક્રિકેટમાં વાપસી કરી ચૂક્યો છે. તેણે ઈંગ્લેન્ડ પ્રવાસની પાંચેય T20I મેચો રમી હતી, પરંતુ ફિટનેસની સમસ્યાને કારણે તે ત્રણ મેચની વન-ડે સીરિઝમાંથી બહાર થઈ ગયો હતો અને તેના સ્થાને પ્રિન્સ યાદવનો સમાવેશ કરવામાં આવ્યો હતો.

એ જ રીતે, બુમરાહ ઈંગ્લેન્ડ સામેની ત્રણમાંથી બે વન-ડે મેચ રમ્યો હતો અને શ્રીલંકામાં તાજેતરમાં રમાયેલી ટેસ્ટ સીરિઝમાં ભારતીય ફાસ્ટ બોલિંગનું નેતૃત્વ કરવાનો હતો. જોકે, પ્રવાસ શરૂ થાય તે પહેલાં જ તેને પાછા ખેંચી લેવાયો હતો અને તેના સ્થાને આકિબ નબીને તક અપાઈ હતી.

બુમરાહની જેમ જ મોખરાના બેટ્સમેન સાઈ સુદર્શન પણ શ્રીલંકા પ્રવાસમાં રમવાનો હતો, પરંતુ તે સમયસર સાજો ન થઈ શકતા તેની જગ્યાએ સરફરાઝ ખાનનો સમાવેશ કરાયો હતો. આ ઉપરાંત, ઝિમ્બાબ્વે T20I સીરિઝ દરમિયાન નિતિશ રેડ્ડીના સ્થાને સૂર્યાંશ શેડગે અને વરુણ ચક્રવર્તીના સ્થાને રવિ બિશ્નોઈએ ટીમમાં સ્થાન મેળવ્યું હતું.

ખેલાડીઓની સતત ઈજાઓ અને છેલ્લી ઘડીએ નામ પાછા ખેંચવાના કારણે BCCIના 'સેન્ટર ઓફ એક્સેલન્સ' (CoE) પર પણ સવાલો ઊભા થયા છે, જ્યાં ભારતીય ખેલાડીઓ ઈજામાંથી બહાર આવવા રિહેબિલિટેશનમાંથી પસાર થાય છે.

આ જ કારણસર હવે ટીમ મેનેજમેન્ટ ખેલાડીને મેદાનમાં ઉતારવા માટે ફિટનેસ ક્લિયરન્સ આપવા અંગે અત્યંત કડક બન્યું છે. 'ક્રિકબઝ'ના અહેવાલ મુજબ એક સૂત્રએ જણાવ્યું હતું કે, મેનેજમેન્ટ ખેલાડીની મેદાન પરની ઉપલબ્ધતા વિશે 100 ટકા નહીં, પણ 200 ટકા ખાતરી કરવા માગે છે. CoE આ બાબતે કોઈ જોખમ લેવા તૈયાર નથી.

BCCIના સેક્રેટરી દેવજીત સાઈકિયાએ શરતી પસંદગી પાછળનું કારણ આપતા જણાવ્યું હતું કે, અમે સામાન્ય રીતે ટીમ રવાના થવાના ઓછામાં ઓછા ત્રણથી ચાર અઠવાડિયા પહેલા પસંદગી સમિતિની બેઠક યોજીએ છીએ. તેથી મેચના ત્રણ-ચાર સપ્તાહ પહેલાં ખેલાડીની ફિટનેસનું ચોક્કસ સ્ટેટસ આપણી પાસે હોતું નથી. તે સમયે ખેલાડી રિહેબિલિટેશન પ્રોગ્રામમાંથી પસાર થઈ રહ્યો હોવાથી તેના નામ આગળ 'ફિટનેસ ક્લિયરન્સને આધીન' લખવામાં આવે છે. જો તે ખેલાડી આગામી 21 કે 28 દિવસમાં ફિટ થઈ જાય, તો તેને ટીમમાં સામેલ કરી શકાય છે.

તેમણે વધુમાં ઉમેર્યું, અમે પસંદગીના દિવસે ખેલાડીને સીધો નકારી શકતા નથી, કારણ કે મેચ રમવાના દિવસે કે પ્રવાસ વખતે તે સંપૂર્ણપણે ફિટ થઈ શકે તેવી શક્યતા હોય છે. તેથી જ આ શરતી પસંદગીનો રસ્તો અપનાવવામાં આવે છે જેથી ખેલાડી તકથી વંચિત પણ ન રહે અને તેને ફિટ થવાનો પૂરતો સમય મળી રહે.

ટીમ ઈન્ડિયાના સ્ટાર ઓલરાઉન્ડર હાર્દિક પંડ્યાના પાછા ફરવાની રાહ જોઈ રહેલા ચાહકોને થોડી વધુ રાહ જોવી પડી શકે છે. હાર્દિક પોતાની પાછલી ઈજામાંથી સ્વસ્થ થવા માટે સંઘર્ષ કરી રહ્યો છે અને જ્યારે મેદાનમાં પાછો ફરવાનો હતો ત્યારે હવે નવી ઈજા થઈ છે. અહેવાલો અનુસાર, બેંગલુરુમાં BCCIના સેન્ટર ઓફ એક્સેલન્સ (CoE) ખાતે તાલીમ દરમિયાન હાર્દિકને પગમાં ઈજા થઈ હતી, જેના કારણે આંતરરાષ્ટ્રીય ક્રિકેટમાં તેના પાછા ફરવામાં વિલંબ થઈ શકે છે.

ટીમ ઈન્ડિયા 13 સપ્ટેમ્બરથી અફઘાનિસ્તાન સામે 3 મેચની T20I શ્રેણી રમવાનું છે. એવી અપેક્ષા છે કે, પસંદગીકારો આ અઠવાડિયે નવી દિલ્હીમાં T20I મેચો માટે ટીમ પસંદ કરવા માટે મળશે અને ટૂંક સમયમાં બેંગલુરુમાં સ્વસ્થ થઈ રહેલા ખેલાડીઓની ફિટનેસ સ્થિતિ અંગે અપડેટ કરવામાં આવશે.

એક અંગ્રેજી અખબારમાં છપાયેલા અહેવાલ મુજબ, હાર્દિક પંડ્યા કોઈ સમસ્યા વિના સંપૂર્ણ ગતિએ પ્રેક્ટિસ કરી રહ્યો હતો, પરંતુ પગની સમસ્યાને કારણે, તેને થોડા સમય માટે બોલિંગ ન કરવાની સલાહ આપવામાં આવી છે. તે ટૂંક સમયમાં બોલિંગ ફરી શરૂ કરશે, પરંતુ અફઘાનિસ્તાન શ્રેણી માટે જરૂરી ફિટનેસ સ્તર સુધી પહોંચવા માટે ખૂબ જ ઓછો સમય બાકી છે. આ બાબત પર નજીકથી નજર રાખતા એક સૂત્ર કહે છે કે, 'બેટિંગ અને મૂવમેન્ટમાં કોઈ મોટી સમસ્યા નહોતી, પરંતુ CoEને મંજૂરી આપતા પહેલા સંપૂર્ણપણે સંતુષ્ટ થવાની જરૂર પડશે.'

હાર્દિક પંડ્યાને ટીમ ઈન્ડિયા માટે ખુબ મહત્વનો ખેલાડી માનવામાં આવે છે. તે આગામી વર્ષના 50-ઓવરના વર્લ્ડ કપમાં પણ મહત્વનો ખેલાડી બની શકે છે. આ સંદર્ભમાં, તેની ફિટનેસ ખુબ જ મહત્વપૂર્ણ છે. જો કે, તે છેલ્લા બે થી ત્રણ વર્ષથી ઇજાઓથી પીડાય છે. 2018માં તેને પીઠની ઇજા થઈ હતી, જેના કારણે તેને ટેસ્ટ ક્રિકેટથી દૂર રહેવું પડ્યું હતું. તેનું ધ્યાન મર્યાદિત ઓવરના ફોર્મેટ પર છે, પરંતુ છેલ્લા બે થી ત્રણ વર્ષમાં ઈજાને કારણે તે ઘણી મેચો ચૂકી ગયો છે.

હાર્દિક પંડ્યા છેલ્લે 8 માર્ચ, 2026ના રોજ ભારત માટે T20 વર્લ્ડ કપ ફાઇનલમાં રમ્યો હતો. ત્યારથી તે ક્રિકેટથી દૂર છે. ODIમાં, હાર્દિકે આ ફોર્મેટમાં ભારત માટે છેલ્લી મેચ 9 માર્ચ, 2025ના રોજ રમી હતી. જ્યારે ટેસ્ટ ક્રિકેટમાં તે લાંબા સમયથી બહાર છે. હાર્દિકે છેલ્લી ટેસ્ટ 2018માં રમી હતી.

પાકિસ્તાન ક્રિકેટ ટીમનો ઇંગ્લેન્ડ પ્રવાસ અત્યાર સુધી ખૂબ જ નિરાશાજનક રહ્યો છે. ટીમને બંને શરૂઆતની મેચમાં કારમી હારનો સામનો કરવો પડ્યો છે. ખેલાડીઓના નિરાશાજનક પ્રદર્શન બાદ પાકિસ્તાન ક્રિકેટ બોર્ડ (PCB)એ એક મોટો નિર્ણય લીધો છે. PCBએ કંઈક એવું કર્યું છે જેનાથી બધા સ્તબ્ધ થઈ ગયા છે.

સીરિઝની મધ્યમાં જ બોર્ડે મુખ્ય કોચ સરફરાઝ અહમદ, બોલિંગ કોચ ઉમર ગુલ અને મોહમ્મદ રિઝવાન સહિત સાત ખેલાડીઓને બહારનો રસ્તો બતાવી દીધો છે. આ અજીબગરીબ નિર્ણય પર પાકિસ્તાનના ભૂતપૂર્વ કેપ્ટન અને ભૂતપૂર્વ PCB ચેરમેન રમીઝ રાજાએ પોતાનો રોષ વ્યક્ત કર્યો છે. BBC પોડકાસ્ટમાં વાત કરતા રમીઝ રાજાએ ટિપ્પણી કરી હતી કે ક્રિકેટના ઇતિહાસમાં આવી ઘટના ક્યારેય બની નથી. તેમણે PCBના આ પગલાને પેનિક બટન દબાવવાનું ગણાવ્યું.

રમીઝે કટાક્ષ કર્યો કે પાકિસ્તાને તો ખરેખર એક વિશ્વ રેકોર્ડ બનાવી દીધો છે. ક્રિકેટમાં આવું થતું નથી. આ તો ફૂટબોલ જેવું થઇ ગયું, જ્યાં સીઝનની મધ્યમાં જ મેનેજરને કાઢી મૂકવામાં આવે છે. આ સીરિઝ હજુ પણ ચાલી રહી છે; બોર્ડ સરળતાથી બીજા 10 દિવસ રાહ જોઈ શક્યું હોત.

રમીઝ રાજા એ વાતથી ખૂબ જ નારાજ છે કે ત્રીજી ટેસ્ટ મેચ પહેલા ટીમમાં આટલી મોટી ઉથલપાથલ મચાવી દીધી. સાત નવા ખેલાડીઓને બોલાવવામાં આવ્યા છે, જેમાંથી પાંચ ખેલાડીઓએ ક્યારેય ટેસ્ટ ક્રિકેટ રમી નથી. રમીઝે ચેતવણી આપી હતી કે આવા વર્તનથી ટીમમાંથી બહાર કરાયેલા ખેલાડીઓનું મનોબળ તૂટી જશે અમે જે નવા ખેલાડીઓ આવ્યા છે, તેઓ પણ ભયભીત રહેશે. આનાથી ટીમમાં સ્વાર્થ વધશે અને દરેક વ્યક્તિ ફક્ત પોતાનું સ્થાન બચાવવા માટે રમશે.

રમીઝે સરફરાઝ અહેમદ અને ઉમર ગુલ જેવા દિગ્ગજોને જે રીતે બહાર કરવામાં આવ્યા તેના પર ઊંડી ચિંતા વ્યક્ત કરી. તેમણે કહ્યું કે આ એવા ખેલાડીઓ છે જેમણે વર્ષોથી પાકિસ્તાનને ગૌરવ અપાવ્યું છે, છતા તેમને અચાનક આ રીતે બહાર કરી દેવામાં આવ્યા છે. જો તમે તમારા દિગ્ગજોનો આદર નથી કરતા, તો ભવિષ્યમાં કોઈ પાકિસ્તાન ક્રિકેટ સાથે નોકરી કેમ કરવા માંગશે?

જ્યારે રમીઝને પૂછવામાં આવ્યું કે સમગ્ર પાકિસ્તાન ક્રિકેટ સિસ્ટમ કેવી રીતે સુધારશે? ત્યારે રમીઝ રાજાએ લાચારીની વ્યક્ત કરતા કહ્યું કે મને વાસ્તવમાં કોઇ આઇડિયા નથી. બધું જ પાટા પરથી ઉતરી ગયું છે. તેમનું માનવું છે કે આગામી એક કે બે વર્ષ આવી જ ઉથલપાથલથી ભરપૂર રહેશે.

ઇંગ્લેન્ડમાં પાકિસ્તાને પહેલી ટેસ્ટ મેચ એક ઇનિંગ અને 103 રનથી હારી હતી, જ્યારે લોર્ડ્સમાં રમાયેલી બીજી ટેસ્ટમાં 194 રનથી હારનો સામનો કરવો પડ્યો હતો. ત્રીજી અને અંતિમ ટેસ્ટ મેચ હવે 9 સપ્ટેમ્બરથી બર્મિંઘમના એજબેસ્ટન ખાતે રમાશે.

ઇન્ડિયન પ્રીમિયર લીગ (IPL)માં ઇમ્પેક્ટ પ્લેયર નિયમ હંમેશા ચર્ચાનો વિષય રહ્યો છે. હવે, આ નિયમ અંગે મહત્વપૂર્ણ સમાચાર આવી રહ્યા છે. ભારતીય ક્રિકેટ કંટ્રોલ બોર્ડ (BCCI) ઇમ્પેક્ટ પ્લેયર નિયમ પર ફરી વખત વિચાર કરી શકે છે. આ વર્ષના મે મહિનામાં, BCCI સેક્રેટરી દેવજીત સૈકિયાએ જણાવ્યું હતું કે, બોર્ડ IPL 2026 સીઝન પછી ઇમ્પેક્ટ પ્લેયર નિયમની સમીક્ષા કરશે. હવે, બોર્ડે તે વચનનું પાલન કર્યું છે.

એક અહેવાલ મુજબ, BCCIએ તમામ 10 IPL ફ્રેન્ચાઇઝીઓ પાસેથી ઇમ્પેક્ટ પ્લેયર નિયમ પર ફીડબેક માંગ્યો છે અને ટીમોને સોમવાર (31 ઓગસ્ટ) સુધીનો સમય આપ્યો છે કે તેઓ તેમના મંતવ્યો રજૂ કરે. મીડિયા સૂત્રોના અહેવાલ મુજબ, BCCIએ PMOA, અમ્પાયરિંગ, પ્રેક્ટિસ સેશન અને રમવાની સ્થિતિ સહિતના અનેક મુદ્દાઓ પર ફ્રેન્ચાઇઝીઓ પાસેથી પ્રતિસાદ માંગ્યો છે. જો કે, 'ઇમ્પેક્ટ પ્લેયર' નિયમ સૌથી મહત્વપૂર્ણ છે, કારણ કે તે તાજેતરના સીઝનમાં, ખાસ કરીને ગયા સીઝનમાં ચર્ચાનો મુખ્ય વિષય રહ્યો છે. ગયા સિઝનમાં, 200થી વધુ રન બનાવનારાઓની સંખ્યામાં ખુબ મોટો વધારો થયો હતો, અને બોલરો પર તેની અસર અંગે ચિંતા વ્યક્ત કરવામાં આવી હતી.

BCCI દરેક IPL સિઝનના અંતે ફ્રેન્ચાઇઝીઓ પાસેથી પ્રતિસાદ એકત્રિત કરે છે, પરંતુ 'ઇમ્પેક્ટ પ્લેયર' નિયમ ખાસ કરીને મહત્વપૂર્ણ છે, કારણ કે તે બીજી સિઝન માટે યથાવત રહેવાની અપેક્ષા છે. આ મુદ્દો ગયા સિઝનમાં યોજાયેલી કેપ્ટનોની બેઠકમાંથી ઉભરી આવ્યો હતો, જ્યાં કેપ્ટનોએ આ નિયમનો વિરોધ કર્યો હતો. BCCIએ એક નિવેદનમાં જણાવ્યું હતું કે, 'IPL 2026 કેપ્ટનોની બેઠકમાં થયેલી ચર્ચા મુજબ, એવું નક્કી કરવામાં આવ્યું હતું કે, ટુર્નામેન્ટ સમાપ્ત થયા પછી મુખ્ય ક્રિકેટ કામગીરીના મુદ્દાઓ પર તમામ ફ્રેન્ચાઇઝીઓ પાસેથી ફીડબેક માંગવામાં આવશે.'

BCCIએ અગાઉ સૂચવ્યું હતું કે 'ઇમ્પેક્ટ પ્લેયર' નિયમ બીજી સિઝન માટે ચાલુ રહેવાની અપેક્ષા છે, જોકે અગાઉની બેઠકમાં ઘણા કેપ્ટનોનો વિરોધ હતો. BCCIની આ નવી વિનંતી આ વર્ષની શરૂઆતમાં સૈકિયાની ટિપ્પણીઓને અનુસરે છે, જેમાં તેમણે જણાવ્યું હતું કે, જો ફ્રેન્ચાઇઝીઓ ચિંતાઓ ઉઠાવે તો બોર્ડ નિયમ પર પુનર્વિચાર કરવા તૈયાર રહેશે. 'ઈમ્પેક્ટ પ્લેયર' નિયમની રોહિત શર્મા અને વિરાટ કોહલી જેવા અગ્રણી ભારતીય ક્રિકેટરો દ્વારા પણ ટીકા કરવામાં આવી છે, જેમણે બોલરોની ભૂમિકા અને T20 ક્રિકેટના સંતુલન પર તેની અસર પર પ્રશ્ન ઉઠાવ્યો છે.

જોકે, દેવજીત સૈકિયાએ મે મહિનામાં ટુર્નામેન્ટમાં આવેલા અલગ અલગ પરિણામોનો ઉલ્લેખ કરીને આ નિયમનો બચાવ કર્યો હતો. તેમણે કહ્યું હતું કે, 'કેટલીક ઓછી સ્કોરિંગ મેચો પણ થઈ છે. બધા ચાહકો મેચોનો આનંદ માણી રહ્યા છે. બોલરોને પણ સારી વિકેટ મળી રહી છે. બધું થઈ રહ્યું છે. આ તમામ એક પેકેજમાં બધું મેળવવા જેવું છે.' આ નવી ફીડબેક પ્રક્રિયા હવે BCCIને વધુ સારી રીતે સમજવાની મંજૂરી આપશે કે ફ્રેન્ચાઇઝી નિયમને બીજી સંપૂર્ણ સીઝન માટે ઉપયોગમાં લીધા પછી કેવી રીતે જુએ છે.

BCCIએ ટીમોને તેમના ક્રિકેટ ઓપરેશન વિભાગો સાથે સૂચિબદ્ધ મુદ્દાઓ પર ચર્ચા કરવા અને 31 ઓગસ્ટ સુધીમાં સામૂહિક રીતે તેમનો ફીડબેક સબમિટ કરવા કહ્યું છે. આનાથી BCCI બધા પ્રતિભાવો એકત્રિત કરી શકશે અને IPL 2027 પહેલા કોઈ ફેરફારોની જરૂર છે કે નહીં તે નક્કી કરી શકશે. હાલ માટે, 'ઈમ્પેક્ટ પ્લેયર' નિયમ અમલમાં રહેશે, પરંતુ ફ્રેન્ચાઇઝના ફીડબેક નક્કી કરી શકે છે કે શું આ નિયમ આગામી IPL સીઝનમાં યથાવત રહેશે કે નહીં.

BCCIએ 2023માં IPL મેચો માટે 'ઇમ્પેક્ટ પ્લેયર' નિયમ રજૂ કર્યો હતો, જેનાથી ટીમોને દરેક મેચમાં એક અવેજી ખેલાડી બદલવાની મંજૂરી મળી હતી. આંતરરાષ્ટ્રીય ક્રિકેટમાં, અવેજીનો ઉપયોગ સામાન્ય રીતે ફક્ત ખાસ પરિસ્થિતિઓમાં જ થાય છે, જેમ કે માથામાં ઇજાના કિસ્સામાં, જોકે, IPLમાં આવી કોઈ જરૂરિયાત નથી, અને ટીમો મેચ દરમિયાન ગમે ત્યારે તેમની પ્લેઇંગ ઇલેવનમાં એક ફેરફાર કરી શકે છે.

ભૂતપૂર્વ ભારતીય ક્રિકેટર સંજય બાંગરની પુત્રી અનાયા બાંગરે દક્ષિણ આફ્રિકાની સ્ટાર મહિલા ઓલરાઉન્ડર મેરિઝેન કૈપની આકરી ટીકા કરી છે. અનાયાએ કૈપની ટીકાનો આકરો જવાબ આપ્યો છે, જેમાં તેણે મહિલા બિગ બેશ લીગમાં રમવાની તેની તકો પર સવાલ ઉઠાવ્યા હતા. ક્રિકેટ ઓસ્ટ્રેલિયા દ્વારા અનાયા બાંગરને ઓસ્ટ્રેલિયામાં મહિલા સમુદાય અને પ્રીમિયર ક્રિકેટમાં રમવાની મંજૂરી આપવાથી એક નવી ચર્ચા શરૂ થઈ છે.

આ સમાચાર અનાયા બાંગરે ક્રિકેટ ઓસ્ટ્રેલિયા પાસેથી મંજૂરી મેળવવા અને તેની સ્પર્ધાત્મક કારકિર્દી ફરી શરૂ કરવાની ઇચ્છા વ્યક્ત કર્યાના થોડા સમય પછી આવ્યા છે. આ ઉપરાંત, તે માર્ચ 2027થી શરૂ થતા એલિટ-લેવલ ક્રિકેટ માટે લાયક બની શકે છે.

દક્ષિણ આફ્રિકાની સ્ટાર કૈપે આ નિર્ણયની ટીકા કરતા કહ્યું કે, ટ્રાન્સજેન્ડર ખેલાડીઓને મહિલા ક્રિકેટમાં રમવાની મંજૂરી ન આપવી જોઈએ. કૈપે તેના ઇન્સ્ટાગ્રામ પર લખ્યું, 'આ એકદમ વાહિયાત છે અને તેને મંજૂરી ન આપવી જોઈએ.'

https://www.instagram.com/reel/DclUSLTC7ID/

ભૂતપૂર્વ ભારતીય બેટિંગ કોચ સંજય બાંગરની પુત્રી અનાયાએ હવે પ્રતિક્રિયા આપતા કહ્યું છે કે, જેઓ તેના રમતમાં ભાગ લેવાનો વિરોધ કરી રહ્યા છે તેઓએ આ બાબતની માહિતી લેવી જોઈએ. તેણે એમ પણ કહ્યું કે, તેણે માહિતી આપી છે કે તેને કોઈ ખાસ લાભ મળી રહ્યો નથી અને તે ક્રિકેટ ઓસ્ટ્રેલિયા દ્વારા નિર્ધારિત નિયમોનું પાલન કરી રહી છે.

અનાયાએ ગુસ્સામાં કહ્યું, 'મને લાગે છે કે જેઓ આની વિરુદ્ધ અવાજ ઉઠાવવા માંગે છે તેઓએ ખરેખર આ બાબતની માહિતી મેળવી લેવી જોઈએ. મેં પહેલાથી જ જરૂરી માહિતી આપી છે કે આ કોઈ ખાસ લાભ આપતું નથી અને ક્રિકેટ ઓસ્ટ્રેલિયાની માર્ગદર્શિકા અનુસાર છે. જો કોઈનો આવો વ્યક્તિગત અભિપ્રાય હોય, તો મને આશા છે કે તેઓ ત્યાં જશે અને તેના વિશે માહિતી મેળવશે.'

અનાયા બાંગરે કહ્યું કે તેમનું આગળનું પગલું ઓસ્ટ્રેલિયા જવું અને ક્લબ ક્રિકેટ રમવું અને પોતાના પ્રદર્શન દ્વારા પોતાને સાબિત કરવું છે, જેથી તેને મહિલા બિગ બેશ લીગ માટે પસંદ કરી શકાય. તેણે કહ્યું, 'હકીકતમાં, હવે આગળનું પગલું ત્યાં જઈને ક્લબમાં જોડાવાનું છે. મારે ક્રિકેટ રમવું છે અને મારા પ્રદર્શન દ્વારા પોતાને સાબિત કરવું છે. જો હું સારું રમીશ, તો આશા છે કે હું 'મહિલા બિગ બેશ લીગ' માટે પસંદ થઈ શકીશ. તો, અહીંથી થોડું થોડું ચાલીને આગળ વધવાનું છે, પરંતુ રમવાની જગ્યા મેળવવાનો મુખ્ય અવરોધ તો દૂર થઈ ગયો છે.

અહીં તમને બતાવી દઈએ કે, અનાયાનો WBBLમાં રમવાનો માર્ગ સરળ નથી. જો તે 2027થી શરૂ થતા WBBLમાં સ્થાન મેળવવા માંગતી હોય, તો ક્રિકેટ ઓસ્ટ્રેલિયાએ તેના માટે અમુક ખાસ આવશ્યકતાઓની શરતો નક્કી કરી છે. તેણે બ્લડ ટેસ્ટ રિપોર્ટ સબમિટ કરવો પડશે, જે સાબિત કરે છે કે તેનું સીરમ ટેસ્ટોસ્ટેરોન સ્તર 10 nmol/Lથી નીચે છે અને સાથે જ ગવર્નિંગ બોડીની નીતિમાં દર્શાવેલ અન્ય આવશ્યકતાઓને પણ પુરી કરવી પડશે.

કેટલાક ખેલાડીઓ રન બનાવે છે, કેટલાક રેકોર્ડ બનાવે છે, અને કેટલાક અપેક્ષાનું કારણ બની જાય છે. આ દિવસોમાં વૈભવ સૂર્યવંશી અપેક્ષા અને આશા બંનેનો હિસ્સો છે; પરંતુ, ભારતીય રમતોનો ઇતિહાસ સૂચવે છે કે પ્રતિભાની સાચી કસોટી ફક્ત મેદાન પર જ નહીં, પણ મેદાનની બહાર પણ થાય છે. ક્યારેક ક્યારેક, ભારતીય ક્રિકેટમાં એવા ખેલાડીઓ આવે છે જે ફક્ત રન બનાવતા નથી, પરંતુ આખી પેઢીની કલ્પના પર કબજો કરી લે છે. IPL 2026માં, વૈભવે કંઇક આવી છાપ છોડી છે. તેની બેટિંગમાં ફક્ત ટેકનિકલ કુશળતા જ નહીં, પણ એક બેચેની, એક આકર્ષણ અને કંઈક અલગ કરી જવાની ભૂખ પણ દેખાઈ.

આ સીઝનમાં સ્કોર્સ અથવા મેચના પરિણામોથી વધારે રસ એ વાત પર રહેતો હતો કે વૈભવ ક્યારે બેટિંગ કરવા આવશે? ક્રીઝ પર પગ મૂકતા જ ટીવી સ્ક્રીન અને મોબાઇલ ફોન પર નજર રોકાઇ જતી હતી. દરેક બોલ સાથે આશા વધતી જતી હતી, અને દરેક શોટ સાથે રોમાન્ચ. તેની નીડર બેટિંગ, મોટા શોટ્સ અને તેના આત્મવિશ્વાસ દ્વારા વૈભવે એવો જાદુ કર્યો કે જે ક્ષણે તે આઉટ થઇ જતો મેચનું આકર્ષણ ફિક્કુ પડી જતું હતું. કેટલાક લોકો તેના બેટની તુલના તલવાર સાથે કરી; કોઇ તેને ગોડ ગિફ્ટેડ પ્રતિભા ગણાવતું; તો કેટલાક લોકોએ એવું લાગતું હતું કે માનો તેના બેટમાં ચુંબક લાગ્યું હોય અને બોલ ઓટોમેટિક બાઉન્ડ્રી તરફ જતો રહેતો હતો. ભલે બીજા ગમે તે કહેતા હોય, વૈભવની બેટિંગે ચોક્કસપણે ક્રિકેટ જોવાનું એક નવું કારણ પેદા કરી દીધું છે.

જોકે, ભારતીય ક્રિકેટે પહેલા પણ આ પ્રકારની દીવાનગી જોઇ છે. એક યુગ હતો જ્યારે સચિન તેંડુલકર ક્રીઝ પર હોય ત્યારે આખો દેશ થંભી જતો. મહોલ્લામાં ટીવીના અવાજો એક સાથે ગુંજી ઉઠતા. સચિન આઉટ થતા જ લોકો ટીવી બંધ કરી દેતા. રસ્તાઓ પર નીરવ શાંતિ છવાઈ જતી. સચિન ફક્ત એક ખેલાડી નહોતા; તે આશાનું પ્રતિક હતા. હવે, વર્ષો પછી, એવી જ દીવાનગીની ઝાંખી ઝલક વૈભવની આસપાસ જોવા મળી રહી છે. એમ કહેવું વહેલું ગણાશે કે વૈભવ સચિન બની જશે; પરંતુ, એક વાત જરૂર છે કે, તેણે ફરી કોઇ બેટ્સમાનની રાહ જોવાનું શીખવ્યું છે.

જોકે, ભારતીય રમતોનો ઇતિહાસ ફક્ત પ્રતિભાનો ઇતિહાસ નથી. તે સત્તા, ક્ષેત્રવાદ ત લોબી અને પ્રભાવનો પણ ઇતિહાસ રહ્યો છે. તેથી, જ્યારે કોઈ નવો ખેલાડી અસાધારણ લોકપ્રિયતા પ્રાપ્ત કરે છે, ત્યારે તેની વાસ્તવિક રમત કરતા તેના  ભવિષ્યની ચિંતા થવા લાગે છે. ડર રહે છે કે ક્યાંક તે પણ એ જ રાજકારણનો ભોગ ન બની જાય, જેણે ભૂતકાળમાં ઘણી પ્રતિભાઓને સમય પહેલા ગળી લીધી છે.

ભારતીય ક્રિકેટ લાંબા સમય સુધી કેટલાક વિશેષ કેન્દ્રોના પ્રભાવ હેઠળ રહ્યું. ખાસ કરીને, પશ્ચિમ અને દક્ષિણને હંમેશાં ભારતીય ક્રિકેટમાં સત્તાનું કેન્દ્ર ગણવામાં આવતા હતા. બેંગલુરુ અને મુંબઈમાં ક્રિકેટનું માળખું મજબૂત હતું; તેમની પાસે સમૃદ્ધ ક્લબ સંસ્કૃતિ હતી, સંસાધન હતા, પસંદગીકારોની નિકટતા હતી અને  સૌથી મોટી વાત ત્યાંથી આવતા ખેલાડીની ક્રિકેટિંગ કુશળતા ધરાવતા હોવાનું માનવામાં આવતું હતું. ધીમે-ધીમે, આ સિસ્ટમ એટલી મજબૂત બની ગઈ કે દેશના અન્ય ભાગોમાંથી આવતા ખેલાડીઓ ફક્ત રન બનાવીને નહીં, પરંતુ તેમની યાત્રાના દરેક પગલે પોતાને સાબિત કરીને આગળ વધવું પડતું હતું. ઘણીવાર પ્રતિભાથી વધારે ઓળખ, નેટવર્ક અને પ્રભાવનું ઘણું મહત્ત્વ રહેતું હતું. ભારતીય ક્રિકેટની આ વાસ્તવિકતા, લાંબા સમય સુધી અસ્પષ્ટ જરૂર રહી પરંતુ, અદૃશ્ય પણ નહોતી.

ઉત્તર ભારત, બિહાર, પૂર્વાંચલ અને નાના શહેરોના ખેલાડીઓ માટે, ક્રિકેટ - લાંબા સમય સુધી માત્ર એક રમત જ નહીં, પરંતુ સિસ્ટમ સામેની લડાઈ પણ હતી. તેમની પાસે ન તો મોંઘી એકેડેમી હતી, ન પ્રભાવશાળી નેટવર્ક, ન પસંદગીકારો સુધી પહોંચ, ન તો  મહાનગરીય ચમક હતી, જેને ભારતીય ક્રિકેટ ઘણીવાર પ્રતિભા સમજતી લેતી હતી. આવા ખેલાડીઓને ફક્ત રન બનાવવા પડતા નહોતા; તેમને રમતના દરેક સ્તરે તેમની હાજરી સાબિત કરવી પડતી હતી. આ જ કારણ છે કે વૈભવની કહાની ફક્ત એક બેટ્સમેનની કહાની નથી લાગતી. તે એક એવા ભૌગોલિક પરિદૃશ્યમાંથી ઉભરી આવ્યો છે જ્યાં ભારતીય ક્રિકેટનું પરંપરાગત શક્તિ માળખું લાંબા સમયથી હાંસિયામાં ધકેલાઈ ગયું હતું. તેની લોકપ્રિયતાનું કારણ તેના શોટ્સ નહીં, પરંતુ તે પ્રતીકાત્મક સ્થાન છે, જ્યાં તે ઉભો જોવા મળે છે.

વૈભવના ઉદયે ભારતીય ક્રિકેટમાં જૂની સત્તા-સંતુલ પર પણ સવાલ ઉભા કર્યા છે, જ્યાં પ્રતિભાથી વધારે મોટાભાગે ભૂગોળ અને પહોંચને વધુ મહત્ત્વ આપવામાં આવતું હતું. એટલે, તેની બેટિંગ ફક્ત મનોરંજન પૂરું પાડતી નથી; તે એક માનસિક પરિવર્તનને પણ પેદા કરી રહી છે. એવું લાગે છે કે નાના શહેરો, પહેલી વાર અનુભવી રહ્યા છે કે ક્રિકેટ હવે મહાનગરોની ખાનગી સંપત્તિ નથી.

ભારતીય રમતોના ક્ષેત્રિય વર્ચસ્વની કોઇ નવી કહાની નથી. લગભગ દરેક મોટી રમતમાં સત્તા, પ્રભાવ અને ભૂગોળનું એક અનોખું જોડાણ રહ્યું છે. કુસ્તી આનું સૌથી ફ્રેશ અને સૌથી સ્પષ્ટ ઉદાહરણ છે. લાંબા સમય સુધી, હરિયાણા ભારતીય કુસ્તીની નિર્વિવાદ રાજધાની રહી. તેની અખાડા સંસ્કૃતિ, રાજકીય સંરક્ષણ, સરકારી માળખાગત સુવિધાઓ અને સામાજિક પ્રતિષ્ઠાએ મળીને એક એવી શક્તિ ઊભી થઈ જેણે રમત પર લગભગ સંપૂર્ણ પ્રભુત્વ સ્થાપિત કર્યું. જોકે, રમતગમતમાં સત્તા ક્યારેય કાયમી હોતી નથી.

ધીમે ધીમે, અન્ય રાજ્યોમાંથી પણ કુસ્તીબાજો ઉભરી આવવા લાગ્યા. નવી પ્રતિભાઓ સામે આવી, નવા દાવેદારો ઉભા થયા, અને અહીંથી સંઘર્ષ શરૂ થયો. જેમ-જેમ શક્તિનું સંતુલન બદલાવા લાગ્યું, તેમ-તેમ રમતમાં જૂથવાદ, પક્ષપાત અને રાજકીય દખલગીરીના આરોપો પણ તેજ થવા લાગ્યા. આ મુદ્દો ફક્ત કુસ્તીના દાવ-પેંચનો ન રહ્યો; તે રમતના સત્તા માળખા પર નિયંત્રણનો થઇ ગયો. પરિસ્થિતિ એટલી હદે વણસી ગઈ કે ભારતીય કુસ્તીને લગતો વિવાદ અખાડાઓથી નીકળીને રસ્તાઓ અને પછીસુપ્રીમ કોર્ટ સુધી પહોંચ્યો. આ ફક્ત ખેલાડીઓનો સંઘર્ષ નહોતો; તે એક એવી વ્યવસ્થાનો ખુલાસો પણ હતો જેમાં રમતો ઘણીવાર પ્રતિભા દ્વારા ઓછી અને પ્રભાવ દ્વારા વધુ ચલાવવામાં આવે છે.

વાસ્તવમાં, ભારતમાં રમત ફક્ત રમતો નથી હોતી; તે સામાજિક શક્તિના વિસ્તરણનું માધ્યમ પણ બની જાય છે. જે રાજ્યનો ખેલાડી પ્રસિદ્ધિ મેળવે છે, ત્યાંની રાજકારણ તેને પોતાનો ચહેરો બનાવવા લાગે છે. રમત સંગઠનો પર નિયંત્રણ મેળવવા માટે લડાઈઓ શરૂ થાય છે, અને પસંદગી પ્રક્રિયા અંગે પ્રશ્નો ઉભા થવા લાગે છે. મીડિયા કવરેજ પણ ઘણીવાર પ્રતિભા કરતા પ્રભાવ દ્વારા વધુ નક્કી થાય છે.

ક્રિકેટમાં આ રાજકારણ વધારે જોવા મળતું નથી કારણ કે કેમેરા આકર્ષક હોય છે, પ્રાયોજકો મોટા છે, અને ભાષા ખૂબ જ પોલિશ્ડ હોય છે. પરંતુ આંતરિક સત્તા ખેંચતાણ એટલી જ સખત હોય છે જેટલી કોઇ બીજી રમતમાં. કયા ખેલાડીને સતત તકો મળી શકશે છે, કોના ખરાબ ફોર્મને કામચલાઉ સંઘર્ષ કહેવામાં આવે છે, અને કોને માત્ર એક કે બે મેચ પછી બહાર કરી દેવામાં આવશે, આ બધા પાછળ ફક્ત પ્રદર્શન જ ચાલતું નથી.

એક એવી પણ ચર્ચા છે કે સૂર્યવંશીની સ્થિતિ પૃથ્વી શૉ જેવી ના થાય તો સારું, કારણ કે એ પણ જ્યારે ક્રિકેટમાં નવો નવો હતો ત્યારે તે જેવી રીતે બેટિંગ કરતો તેને બીજો સચિન તેંદુલકર કહેવાતો હતો, પણ ધીમે ધીમે ફેમ, પૈસા આવતા તેના જીવનમાં પરિવર્તન આવ્યું હતું અને તે વિવાદમાં પણ ફસાયો હતો અને આજે તેની હાલત એ છે કે  IPLની ટીમમાં હોવા છતા તેને એકપણ મેચ રમવા નહોતી મળી.

શ્રીલંકા પ્રવાસ દરમિયાન ટીમ ઈન્ડિયાને એક નવો સ્ટાર મળ્યો છે. વાત થઇ રહી છે દેવદત્ત પડિક્કલની, જેણે શ્રીલંકા સામે પોતાની શાનદાર બેટિંગથી બધાના દિલ જીતી લીધા છે. પડિક્કલે શ્રેણીમાં બે ટેસ્ટ મેચમાં બે સદી ફટકારી છે. ગાલેમાં સદી ફટકાર્યા પછી, તેણે કોલંબો ટેસ્ટમાં બીજી સદી ફટકારી, જેનાથી પ્રશ્ન ઊભો થયો કે, શું ટીમ ઈન્ડિયામાં તેનું સ્થાન હવે ફિક્સ થઈ ગયું છે? શું તે હવે નંબર 3 પર જ બેટિંગ કરશે? શું તેને વિદેશમાં થનારી ટેસ્ટ શ્રેણીમાં પણ નંબર 3નું સ્થાન જાળવી રાખવામાં આવશે? સાથે જ શું તેને ODI ટીમમાં પણ એન્ટ્રી મળશે?

પડિક્કલે શ્રીલંકાની પડકારજનક પીચો પર પોતાની પ્રતિભા સાબિત કરી છે. તેની પાસે મજબૂત ડિફેન્સ સાથે-સાથે ઝડપથી રન બનાવવાની ક્ષમતા પણ છે. તે ખૂબ જ સંતુલિત બેટ્સમેન લાગે છે; જે વિકેટની આસપાસ ઉત્તમ શોટ રમી શકે છે, સાથે જ તેની પાસે પીચની સ્થિતિ વાંચીને સંયમ કેવી રીતે રાખવો તે પણ જાણે છે. પડિક્કલ એક પરંપરાગત ટેસ્ટ બેટ્સમેન નજરે પડે છે, જે શરૂઆતમાં પોતાનો સમય લે છે અને એકવાર સ્થાયી થયા પછી ખુલીને રમે છે. ગજબની વાત એ છે કે, તેની અંદર રન બનાવવાની ગજબની ખૂબ છે. તે ફાસ્ટ બોલરો અને સ્પિનરો બંને સામે ખૂબ જ નિયંત્રણમાં દેખાય છે. એવામાં એવું કહી શકાય છે કે ટીમ ઈન્ડિયા મેનેજમેન્ટ તેને તકો આપતું રહેશે. સંયોગથી, પડિક્કલને સાઈ સુદર્શન ઇજાગ્રસ્ત થવાને કારણે તક મળી હતી; હવે, એવું લાગે છે કે સાઈ સુદર્શનને પડિક્કલને બહાર કરવા માટે ખૂબ જ મહેનત કરવી પડશે.

પડિક્કલની બેટિંગ ટેકનિક પણ તેને ઝડપી પીચો પર એક મજબૂત ખેલાડી બનાવે છે. એ ખેલાડી શોર્ટ-પીચ ડિલિવરીને અસરકારક રીતે કેવી રીતે હેન્ડલ કરવી તે જાણે છે. આક્રમક શોટ રમવા ઉપરાંત તે બોલ ક્યારે છોડવો તે પણ જાણે છે. પરિણામે, તેને આગામી ન્યૂઝીલેન્ડ પ્રવાસ દરમિયાન તક મળી શકે છે.