100 કરોડની સંપત્તિ ધરાવતા DSPના પુત્રના 250 કરોડના રિસોર્ટમાં ભવ્ય લગ્ન, IPS અધિકારીઓ, રાજકારણીઓ આવ્યા

કાનપુરના એક સમયે પ્રખ્યાત પોલીસ અધિકારી, સસ્પેન્ડેડ DSP ઋષિકાંત શુક્લાની આસપાસના કૌભાંડની હવે તપાસ ચાલી રહી છે. તેનું કારણ તેમની આવક કરતાં ઘણી વધારે સંપત્તિ અને એક લગ્ન છે જેણે સમગ્ર પોલીસ વિભાગ અને રાજકીય વર્તુળોમાં ખળભળાટ મચાવી દીધો છે.

આ કેસ માર્ચમાં કાનપુરના પ્રખ્યાત ઈટરનિટી રિસોર્ટમાં યોજાયેલા એક ભવ્ય લગ્નનો છે, જે રિસોર્ટની કિંમત 200થી 250 કરોડ રૂપિયા હોવાનું કહેવાય છે. DSP ઋષિકાંત શુક્લાના પુત્રના લગ્ન સમારોહ આ ભવ્ય સ્થળે યોજાયો હતો. જિલ્લા અને આસપાસના વિસ્તારોના ઘણા અગ્રણી રાજકારણીઓ, જેમાં ધારાસભ્યો, સાંસદો અને લગભગ 18 જિલ્લાના BJP પ્રમુખો હાજર હતા. અધિકારીઓમાં બાજુના જિલ્લાના તત્કાલીન SP, DIG સ્તરના અધિકારી અને ADG પણ સામેલ હતા. એથી વધુ કહીએ તો, એક વીડિયો વાયરલ થયો હતો, જેમાં ઘણા IPS અધિકારીઓ ડાન્સ ફ્લોર પર જોરદાર રીતે નાચતા જોવા મળ્યા હતા.

ઋષિકાંત શુક્લાએ તેમના 28 વર્ષના કાર્યકાળ દરમિયાન અનેક મહત્વપૂર્ણ હોદ્દાઓ સંભાળ્યા. તેમણે 8 વર્ષ સબ-ઇન્સ્પેક્ટર, ત્રણ વર્ષ ઇન્સ્પેક્ટર અને 17 વર્ષ DSP તરીકે કામ કર્યું. આ સમય દરમિયાન, તેમને એવા જિલ્લાઓમાં પોસ્ટ કરવામાં આવ્યા જ્યાં જમીન અને મકાનનો વ્યવસાય તેજીમાં ચાલતો હતો. આ સમય દરમિયાન, તેમણે સંપત્તિનું એક એવું સામ્રાજ્ય ઉભું કર્યું, જેણે તપાસ એજન્સીઓને પણ આશ્ચર્યચકિત કરી દીધી. વિજિલન્સ અને SIT રિપોર્ટ્સ અનુસાર, શુક્લા અને તેમના પરિવાર પાસે આશરે રૂ. 100 કરોડની સંપત્તિ છે. આર્ય નગર જેવા પોશ વિસ્તારમાં 11 દુકાનોની માલિકી, R નગરમાં ચાર માળની ઇમારત, એક ગેસ્ટ હાઉસ, રિયલ એસ્ટેટ રોકાણ અને ઘણી કંપનીઓમાં હિસ્સો જેવી વિગતો બહાર આવી છે.

મીડિયા સૂત્રો સાથેની વાતચીતમાં, ઋષિકાંત શુક્લાએ સમજાવ્યું, 'તે મારા દીકરાના લગ્ન હતા, મારી પુત્રીના નહીં. હું જાન લઈને ગયો હતો, છોકરીના પરિવારે આ કાર્યક્રમનું આયોજન કર્યું હતું. જો તેમણે જાતે પોતાની ઇચ્છાથી રૂ. 200 કરોડનો રિસોર્ટ પસંદ કરે, તો હું કેવી રીતે ના પાડી શકું?' મેં તેના પર એક પણ પૈસો ખર્ચ્યો નહીં. તેમના નિવેદનથી સોશિયલ મીડિયા પર વ્યાપક ચર્ચા થઈ. ઘણા લોકોએ પ્રશ્ન કર્યો કે જો લગ્ન સંપૂર્ણપણે કન્યાના ખર્ચે થયા હતા, તો અધિકારીઓ અને રાજકારણીઓની આટલી મોટી હાજરી કેમ હતી?

લગ્નમાં સાંસદ, ધારાસભ્ય, જિલ્લા પ્રમુખ અને BJPના વરિષ્ઠ નેતાઓની હાજરીએ પણ પ્રશ્નો ઉભા કર્યા. આના પર DSP શુક્લાનો જવાબ હતો કે, 'જો ગુનેગારો મારાથી ડરતા હોય અને જનપ્રતિનિધિઓ મારુ સન્માન કરે છે, તો તેમાં ખોટું શું છે? મેં હંમેશા જનતા અને કાયદા વચ્ચે સેતુ તરીકે કામ કર્યું છે. રાજકારણીઓ સાથે સારા સંબંધો રાખવા એ ગુનો નથી.' તેમણે વધુમાં જણાવ્યું હતું કે, તેમની સામે ચાલી રહેલી તપાસ કેટલાક અસંતુષ્ટ વ્યક્તિઓનું કાવતરું છે જેઓ મારી સફળતા અને લોકપ્રિયતાથી ખુશ નથી.

SIT રિપોર્ટમાં જે મિલકતોનો ઉલ્લેખ કરેલો છે તેમાં ગેસ્ટ હાઉસ, દુકાનો અને R નગરમાં ચાર માળની ઇમારતનો સમાવેશ થાય છે. આના પર શુક્લાએ જણાવ્યું હતું કે, આમાંની મોટાભાગની તેમની પૂર્વજોની મિલકતો છે. 'મારા દાદા પોલીસ ઇન્સ્પેક્ટર હતા, અને મારા પિતા મેનેજર હતા. તેમણે સખત મહેનત દ્વારા જે કંઈ કમાયું હતું તે આગળ જઈને મને સોંપવામાં આવ્યું છે. જે ઘરને મારી ગેરકાયદેસર મિલકત તરીકે વર્ણવવામાં આવી રહ્યું છે તે મારા દાદાએ ખરીદ્યું હતું. જો સરકારને કોઈ શંકા હોય, તો હું બધા દસ્તાવેજો રજૂ કરીશ. પરંતુ કોઈના મહેનતથી કમાયેલા પૈસાને ભ્રષ્ટાચાર તરીકે કહેવું અન્યાયી છે.

કાનપુરના સૌથી પોશ વિસ્તાર, આર્યનગરમાં તેમની 11 દુકાનોની કિંમત રૂ. 92 કરોડ હોવાનો અંદાજ છે. આ ઉપરાંત, શહેરના અન્ય વિસ્તારોમાં ગેસ્ટ હાઉસ અને પ્લોટ માટેના દસ્તાવેજો પણ બહાર આવ્યા છે. તેમની પત્ની અને સંબંધીઓના નામે કેટલીક કંપનીઓમાં રોકાણ મળી આવ્યું છે. વિજિલન્સ સૂત્રો કહે છે કે, તેમની આવકના સ્ત્રોતો અને તેમની સંપત્તિ વચ્ચેનો તફાવત એટલો મોટો છે કે તેમણે સાબિત કરવું મુશ્કેલ બનશે.

કાનપુરના ભૂતપૂર્વ પોલીસ અધિકારીઓ કહે છે કે, ઋષિકાંત શુક્લાની છબી હંમેશા વિવાદાસ્પદ રહી છે. તેઓ ઘણીવાર એન્કાઉન્ટર સ્પેશિયાલિસ્ટ તરીકે હેડલાઇન્સમાં રહ્યા છે. એવું કહેવાય છે કે તેઓ ગુનેગારો સાથે વ્યવહાર કરવામાં કડક હતા, પરંતુ આ કડકતા ઘણીવાર વિવાદોનું કારણ બને છે. તેમના ઊંડા રાજકીય સંબંધો હોવાનું પણ કહેવાય છે, તેમના અનેક ધારાસભ્યો અને સાંસદો સાથે અંગત સંબંધો છે.

હવે, આ સમગ્ર લગ્ન તપાસનો વિષય બની ગયા છે. વિજિલન્સ તપાસ કરી રહ્યું છે કે, લગ્નનો ખર્ચ કોણે ઉઠાવ્યો હતો અને શું કોઈ અનામી વ્યવહારો કરવામાં આવ્યા હતા. રિસોર્ટ બુકિંગ, સજાવટ, મહેમાનોની રહેવાની વ્યવસ્થા અને કેટરિંગ પર કરોડો રૂપિયા ખર્ચવામાં આવ્યા હોવાના અહેવાલ છે. તપાસ એજન્સીઓ આ ઘટના સંબંધિત તમામ બિલ અને ચૂકવણીની તપાસ કરી રહી છે.

એક સમયે ગણવેશમાં પ્રામાણિકતા અને કડકાઈનું પ્રતીક ગણાતા ઋષિકાંત શુક્લા હવે લોકોની નજર હેઠળ છે. લોકો સોશિયલ મીડિયા પર પૂછી રહ્યા છે કે, 'જો તમે લગ્નમાં એક પણ પૈસો ખર્ચ્યો ન હતો, તો આટલો ભવ્ય ખર્ચ કેમ?' અને જો તમે કર્યો હોય, તો પ્રામાણિકપણે કમાયેલા પગાર સાથે આટલો વૈભવ કેવી રીતે શક્ય છે? DSP ઋષિકાંત શુક્લા સતત દાવો કરી રહ્યા છે કે, તેઓ નિર્દોષ છે. તેમની સામે ચાલી રહેલી કાર્યવાહી દ્વેષથી પ્રેરિત છે. જ્યારે સત્ય બહાર આવશે, ત્યારે બધું સ્પષ્ટ થઈ જશે.