દિલ્હીના ધારાસભ્યોને હવે મળશે મહિને 90 હજાર પગાર, જાણો ગુજરાતના MLAનો પગાર

સોમવારથી દિલ્હીમાં વિધાનસભાનું ચોમાસુ સત્ર શરૂ થઈ ગયું છે. મંત્રી કૈલાશ ગેહલોતે ધારાસભ્યો, મંત્રીઓ, ચીફ વ્હીપ, સ્પીકર, ડેપ્યુટી સ્પીકર અને ગૃહમાં વિપક્ષના નેતાના પગાર-ભથ્થાં વધારવા માટે એક બિલ રજૂ કર્યું. આ નવા પ્રસ્તાવ મુજબ હવે દિલ્હીના ધારાસભ્યોને દર મહિને 12 હજારને બદલે 30 હજાર રૂપિયા મળશે. પગાર ઉપરાંત અન્ય ભથ્થાં પણ વધી રહ્યા છે. પગાર અને તમામ ભથ્થાં સહિત હવે દિલ્હીના ધારાસભ્યોને દર મહિને 90 હજાર રૂપિયા મળશે, જે અત્યાર સુધી 54 હજાર રૂપિયા મળતા હતા. અહીં તમને જણાવી દઈએ કે, દિલ્હીના ધારાસભ્યો અને મંત્રીઓના પગારમાં છેલ્લો વધારો 2011માં કરવામાં આવ્યો હતો.

પગાર વધારાને લગતા કુલ 5 બિલ આજે ગૃહમાં રજૂ કરવામાં આવ્યા હતા. તેમાં મંત્રીઓના પગાર અને ભથ્થાંમાં સુધારો કરવા માટેનું બિલ, ગૃહના સભ્યો એટલે કે ધારાસભ્યોના પગાર અને ભથ્થાંમાં સુધારો કરવા માટેનું બિલ, મુખ્ય દંડકના પગાર અને ભથ્થાંમાં સુધારો કરવા માટેનું બિલ, વિધાનસભાના સ્પીકર અને ડેપ્યુટી સ્પીકરના પગાર અને ભથ્થાંમાં સુધારો કરવા માટેનું બિલ, અને વિપક્ષના નેતાના પગાર અને ભથ્થામાં સુધારા કરવાના બિલનો સમાવેશ થાય છે.

લગભગ 11 વર્ષ બાદ દિલ્હી વિધાનસભાના સભ્યો અને મંત્રીઓના પગારમાં વધારો થયો છે. મે મહિનામાં કેન્દ્ર સરકારે દિલ્હીના ધારાસભ્યો-મંત્રીઓના પગારમાં વધારો કરવાના પ્રસ્તાવને મંજૂરી આપી હતી. 2015માં જ દિલ્હી સરકારે કેન્દ્રને પગાર વધારવાનો પ્રસ્તાવ મોકલ્યો હતો, પરંતુ તે સમયે તેને મંજૂરી આપવામાં આવી ન હતી.

આ પછી, કેન્દ્ર સરકાર દ્વારા મળેલી સૂચના પર, દિલ્હી વિધાનસભાએ ફરીથી કેન્દ્ર સરકારને પગાર વધારવાનો પ્રસ્તાવ મોકલ્યો, જેને કેન્દ્રએ મંજૂરી આપી અને દિલ્હી કેબિનેટે પણ આ પ્રસ્તાવને મંજૂરી આપી હતી.

દેશના તમામ રાજ્યોમાં ધારાસભ્યોને અલગ-અલગ પગાર મળે છે. એટલું જ નહીં દરેક રાજ્યમાં અલગ-અલગ ભથ્થા પણ આપવામાં આવે છે. હાલમાં ભારતમાં સૌથી વધુ પગાર તેલંગાણામાં મળે છે. અહીં ધારાસભ્યોને ભથ્થા સહિત દર મહિને 2.50 લાખ રૂપિયાનો પગાર મળે છે. જો કે તેલંગાણામાં ધારાસભ્યોનો પગાર માત્ર 20 હજાર છે, પરંતુ દર મહિને 2,30,000 રૂપિયા ભથ્થા તરીકે મળે છે. જ્યારે, ત્રિપુરામાં ધારાસભ્યોને સૌથી ઓછો પગાર મળે છે. અહીં દર મહિને 48 હજાર રૂપિયાનો પગાર મળે છે.

દિલ્હી સરકાર દ્વારા જાહેર કરવામાં આવેલા આંકડા મુજબ સૌથી વધુ પગાર તેલંગાણામાં મળે છે. આ સિવાય ઉત્તરાખંડમાં ધારાસભ્યોને દર મહિને 1.98 લાખ રૂપિયા મળે છે. આ સિવાય હિમાચલમાં રૂ. 1.90 લાખ, હરિયાણામાં 1.55 લાખ, બિહારમાં 1.30 લાખ, રાજસ્થાનમાં રૂ. 1.42 લાખ, આંધ્રમાં રૂ. 1,25,000, ગુજરાતમાં રૂ. 1,05,000 અને ઉત્તર પ્રદેશમાં રૂ. 95,000 પ્રતિમાસ પગાર મળે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.