ભારતીય ટીમના પૂર્વ બેટર અને જાણીતા કોમેન્ટેટર સંજય માંજરેકરે મુંબઈ ઈન્ડિયન્સને એક મોટો નિર્ણય લેવા વિનંતી કરી છે. તેમણે કહ્યું છે કે ટીમે હવે હાર્દિક પંડ્યાને કેપ્ટન પદેથી બરતરફ કરી દેવો જોઈએ અને તેના સ્થાને સ્ટાર ફાસ્ટ બોલર જસપ્રીત બુમરાહની નિમણૂક કરવી જોઈએ.
આ સીઝનમાં મુંબઈ ઈન્ડિયન્સનું પ્રદર્શન અત્યંત ખરાબ રહ્યું છે. ટીમે અત્યાર સુધી રમાયેલી મેચોમાંથી માત્ર ત્રણમાં જ જીત મેળવી છે. હાર્દિક પંડ્યાની કેપ્ટનશીપ પર માત્ર ચાહકો જ નહીં, પરંતુ ક્રિકેટ નિષ્ણાતો પણ સવાલો ઉઠાવી રહ્યા છે. 'સ્પોર્ટસ્ટાર' સાથેની વાતચીતમાં માંજરેકરે જણાવ્યું હતું કે, ફ્રેન્ચાઈઝીએ હવે નેતૃત્વ વિશે ગંભીરતાથી વિચારવાની જરૂર છે અને બુમરાહ જેવા અનુભવી ખેલાડીને ટીમની કમાન સોંપવી જોઈએ.
માંજરેકરે એક રસપ્રદ મુદ્દો ઉઠાવતા સૂચન કર્યું હતું કે જ્યારે મુંબઈ ઈન્ડિયન્સે હાર્દિક પંડ્યાને ગુજરાત ટાઇટન્સ (GT) પાસેથી ટ્રેડ કર્યો, ત્યારે તેમણે આશિષ નેહરાને પણ પોતાની સાથે લેવા જોઈતા હતા. ઉલ્લેખનીય છે કે, ગુજરાત ટાઇટન્સને આઈપીએલ ચેમ્પિયન બનાવવામાં હાર્દિક અને કોચ નેહરાની જોડીનો મોટો ફાળો રહ્યો હતો. માંજરેકરના મતે, હાર્દિક માટે નેહરાનું માર્ગદર્શન હોવું જરૂરી હતું.
હવે જોવાનું એ રહેશે કે આગામી સીઝન માટે મુંબઈ ઈન્ડિયન્સ મેનેજમેન્ટ માંજરેકરની આ સલાહ પર વિચાર કરે છે કે કેમ.
