622 કરોડ...જાણો બીજા તબક્કાના સૌથી ધનિક ઉમેદવાર 'સ્ટાર ચંદ્રુ' પાસે શું-શું છે

દેશમાં લોકસભાની ચૂંટણી ચાલી રહી છે અને પ્રથમ તબક્કાનું મતદાન થઈ ગયું છે. હવે બીજા તબક્કાના મતદાનનો દિવસ નજીક આવી રહ્યો છે. આ દરમિયાન લોકસભાના બીજા તબક્કાની ચૂંટણીના સૌથી અમીર ઉમેદવારોની યાદી પણ બહાર પાડવામાં આવી છે. એસોસિએશન ફોર ડેમોક્રેટિક રિફોર્મ્સ (ADR)ના અહેવાલ મુજબ, બીજા તબક્કાના સૌથી ધનિક ઉમેદવાર 'સ્ટાર ચંદ્રુ' છે, જેની કુલ સંપત્તિ 600 કરોડ રૂપિયાથી વધુ છે.

સ્ટાર ચંદ્રુ કોંગ્રેસ પાર્ટીની ટિકિટ પર લોકસભાની ચૂંટણી લડી રહ્યા છે અને તેમનું પૂરું નામ વેંકટરમણ ગૌડા છે, પરંતુ તેઓ સ્ટાર ચંદ્રુ તરીકે ઓળખાય છે. ADRના અહેવાલ મુજબ, બીજા તબક્કામાં સૌથી ધનાઢ્ય લોકસભા ઉમેદવારોમાં પ્રથમ સ્થાન મેળવનાર આ કોંગ્રેસી નેતાની કુલ નેટવર્થ ચૂંટણી પંચમાં સબમિટ કરવામાં આવેલી એફિડેવિટ મુજબ રૂ. 622.97 કરોડથી વધુ છે.

લોકસભા ચૂંટણીમાં ઓલ્ડ મૈસુર મંડ્યા સીટ પરથી કોંગ્રેસના ઉમેદવાર વેંકટરમણ ગૌડાએ પોતાના ચૂંટણી એફિડેવિટમાં જણાવ્યું છે કે, તેમની વાર્ષિક આવક 16.28 કરોડ રૂપિયા છે. પુષ્કળ સંપત્તિના માલિક સ્ટાર ચંદ્રુએ કર્ણાટકમાં 2019ની લોકસભા ચૂંટણીમાં સૌથી ધનિક ઉમેદવાર DK સુરેશને પણ પાછળ છોડી દીધો છે. ADR મુજબ, વેંકટરમણ ગૌડાએ 2,12,78,08,148 રૂપિયાની જંગમ સંપત્તિ અને 4,10,19,20,693 રૂપિયાની સ્થાવર સંપત્તિ જાહેર કરી છે, આમ તેમની કુલ સંપત્તિ 6,22,97,28,841 રૂપિયા છે. ખાસ વાત એ છે કે, સ્ટાર ચંદ્રુના નામે કોઈ ખેતીની જમીન નથી.

ચૂંટણી પંચમાં આપવામાં આવેલી એફિડેવિટ મુજબ, જાહેર કરાયેલી સંપત્તિઓમાં તેમની પત્ની કુસુમા ગૌડા પાસે 329.32 કરોડ રૂપિયાની જંગમ અને અચલ સંપત્તિ છે. તેની જંગમ સંપત્તિ કુલ રૂ. 182.33 કરોડ છે, જેમાં ગૌડા દ્વારા સંચાલિત કંપની સ્ટાર ઇન્ફ્રાટેકમાં રોકાણ કરાયેલ રૂ. 176.44 કરોડનો સમાવેશ થાય છે. આ સિવાય તેની પાસે 4.2 કિલો સોનું છે, જેની કિંમત 2.29 કરોડ રૂપિયા છે.

વેંકટરમણ ગૌડા ઉર્ફે સ્ટાર ચંદ્રુ વ્યવસાયે કોન્ટ્રાક્ટર છે અને ગૌરીબિદાનુરના સ્વતંત્ર ધારાસભ્ય KH પુટ્ટસ્વામી ગૌડાના ભાઈ છે, જેઓ હાલમાં કોંગ્રેસ પક્ષ સાથે સંકળાયેલા છે. તેણે બેંગ્લોર યુનિવર્સિટીમાંથી BScની ડિગ્રી મેળવી છે. 26 એપ્રિલે યોજાનારી લોકસભા ચૂંટણીના બીજા તબક્કામાં, તેઓ મંડ્યા બેઠક પરથી NDA ઉમેદવાર અને JDSના પ્રદેશ અધ્યક્ષ HD કુમારસ્વામી સાથે સ્પર્ધાનો સામનો કરી રહ્યા છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.