પ્લાસ્ટિક સર્જરીની ચર્ચા વચ્ચે રાજકુમાર રાવે કહ્યું, 'સારા દેખાવા માટે પણ દબાણ'

બોલિવૂડ એક્ટર રાજકુમાર રાવ હાલમાં જ ચર્ચામાં હતો. તેનો એક ફોટો સોશિયલ મીડિયા પર વાયરલ થવા લાગ્યો છે, જેને જોઈને લોકો અનુમાન લગાવવા લાગ્યા કે, તેણે પ્લાસ્ટિક સર્જરી કરાવી છે. વાયરલ થઈ રહેલા ફોટામાં રાજકુમારની ચિન પહેલા કરતા લાંબી દેખાઈ રહી છે અને તેના ચહેરાનો આકાર પણ બદલાઈ ગયો છે.

જોકે, રાજકુમાર રાવે પ્લાસ્ટિક સર્જરી જેવી કોઈ વાતનો ઈન્કાર કર્યો હતો. તેણે કહ્યું કે, તેણે પણ આ તસવીર જોઈ હતી, અને તેને લાગ્યું કે કોઈએ તેની 'પ્રેંક' કરી છે. રાજકુમારે એમ પણ કહ્યું કે, તેને આ ફોટો એડિટ કરવામાં આવ્યો હોય તેવું લાગે છે. પરંતુ આ બધાની વચ્ચે તેણે ઈન્ડસ્ટ્રીની ચોંકાવનારી વાસ્તવિકતા વિશે વાત કરી છે.

રાજકુમાર રાવે એક મીડિયા ચેનલને આપેલા ઈન્ટરવ્યુમાં કહ્યું હતું કે, હવે પાપારાઝી દરેક જગ્યાએ પહોંચી જાય છે અને આવી સ્થિતિમાં હંમેશા ધ્યાનમાં રાખવું જોઈએ કે, તેઓ જ્યારે પણ બહાર જાય,  ત્યારે તેઓ સારા દેખાઈ રહ્યા હોય.

જ્યારે રાજકુમારને પૂછવામાં આવ્યું કે, શું પુરૂષ કલાકારો પર મહિલા કલાકારો જેટલા સારા દેખાવાનું દબાણ હોય છે? તો તેણે કહ્યું, 'એ તો બરાબર જ છે. મને નથી લાગતું કે કંઈ અલગ છે. કદાચ એટલું ખરાબ નથી, કારણ કે તેઓ તમારા ચપ્પલ વિશે વાત કરતા નથી. પરંતુ તે મારી સાથે તાજેતરમાં થયું છે, તેથી હું જાણું છું. એક ખોટો એંગલ, ખોટું ચિત્ર, ખોટી ક્ષણ કેપ્ચર થઈ જાય છે અને લોકો કોઈ કારણ વગર તેના વિશે વાત કરતા રહે છે. મને ખબર નથી કે, આ કેવી રીતે થયું. આવું ક્યારેય નહોતું. હવે જ્યારે તમે એરપોર્ટ પર જાઓ છો, ત્યારે તમને થાય છે કે અરે યાર, ત્યાં પેપ્સ હશે તો, શું થાય! મેં કેપ નથી પહેરી, આજે મારા વાળ ખરાબ છે, તસવીરો આવશે અને પછી તેના પર ખરાબ કોમેન્ટ્સ આવશે. આવું દબાણ તો છે. આ ખૂબ જ વિચિત્ર છે.'

પ્લાસ્ટિક સર્જરીની વાતને નકારી કાઢતાં રાજકુમારે કહ્યું હતું કે, તેણે તેવું ક્યારેય કરાવ્યું નથી. જોકે તેણે કબૂલ્યું હતું કે, ઘણા વર્ષો પહેલા તે તેના લુકને લઈને સભાન હતો અને તેણે ફિલર્સ લીધા હતા. તેણે કહ્યું હતું કે, 'જ્યારે મેં શરૂઆત કરી ત્યારે લોકો મારા લુક પર કોમેન્ટ કરતા હતા. તો હા, ઘણા સમય પહેલા, લગભગ 8-9 વર્ષ પહેલા, મારી પાસે ચોક્કસપણે ફિલર્સ લીધા હતા. મેં આ સારું અનુભવવા અને સારું દેખાવા માટે કર્યું, જેથી કરીને મારો ચહેરો સંતુલિત દેખાય. આ મારી ચામડીના ડૉક્ટર દ્વારા સૂચવવામાં આવ્યું હતું.' રાજકુમાર હવે ફિલ્મ 'શ્રીકાંત'માં જોવા મળશે જે 10 મેના રોજ સિનેમાઘરોમાં રિલીઝ થશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.