ભારતથી પાકિસ્તાન મોકલ્યો ઘરનો દરવાજો, જોતા જ પ્રોફેસર રડી પડ્યા, જુઓ વીડિયો
1947માં ભારતનું વિભાજન થયું ત્યારે ઘણા લોકોનું ઘણું બધું લૂંટાઈ ગયું. તેમણે પોતાનું ઘર પણ છોડીને જવું પડ્યું. ભારતમાં રહેતા ઘણા લોકોએ પાકિસ્તાનમાં પોતાનું ઘર છોડી દીધું અને જે લોકો પાકિસ્તાન ગયા તેઓ ભારતમાં પોતાનું ઘર છોડી ગયા. આવું જ કંઈક લાહોરના રહેવાસી પ્રોફેસર અમીન ચૌહાણ સાથે થયું. તેમનું જૂનું ઘર ભારતમાં છે. જ્યારે ભૂતકાળનો એક અંશ તેમની પાસે પહોંચ્યો ત્યારે તે તેની આંખોમાંથી આંસુ રોકી શક્યા નહીં. તેમના ઘરનો દરવાજો મુંબઈથી લાહોર મોકલવામાં આવ્યો છે.
મીડિયા સૂત્રોના સમાચાર અનુસાર, દરવાજાને સૌથી પહેલા પંજાબના બટાલાથી મુંબઈ લાવવામાં આવ્યો હતો. અહીંથી તેની યાત્રા શરૂ કરી અને દુબઈ, કરાચી થઈને લાહોર પહોંચ્યો. અમીન ચૌહાણને અહીંથી મળ્યો હતો. તેને ભારતમાં રહેતા તેના મિત્ર પલવિંદર સિંહે ભેટ તરીકે મોકલ્યો હતો. તેમના માટે તે માત્ર એક દરવાજો નથી પણ યાદો અને ઈતિહાસ છે. અમીન ચૌહાણના પિતાનું ઘર બટાલાના ઘોમાન પિંડમાં હતું. જ્યારે તેમની પાસે દરવાજા પહોંચ્યા તો કોઈએ તેનો વીડિયો બનાવી લીધો. જે પાછળથી સોશિયલ મીડિયા પર વાયરલ થયો હતો.
જ્યારે તેમણે પેકિંગ કાઢીને દરવાજો જોયો તો તેમની આંખોમાંથી ખુશીના આંસુ વહેવા લાગ્યા. તેમનો આ વિડિયો ભાગલાને કારણે થયેલા ઘાવની યાદ અપાવે છે. આ વીડિયો સોશિયલ મીડિયા પ્લેટફોર્મ ઈન્સ્ટાગ્રામ પર સાદ જાહિદ નામના યુઝરે શેર કર્યો છે.
વીડિયોના કેપ્શનમાં લખવામાં આવ્યું છે કે, 'આ હૃદયસ્પર્શી વીડિયોમાં જોવા મળે છે, એચિસન કોલેજ જુનિયર સ્કૂલના પૂર્વ પ્રિન્સિપાલ પ્રોફેસર અમીન ચૌહાણ જ્યારે ભારત તરફથી તેમના મિત્ર પલવિંદર સિંઘે મોકલાવેલી ખાસ ભેટ મેળવે છે ત્યારે તેઓ ભાવુક થઈ જાય છે. ભેટ શું છે? આ છે બટાલાના ઘોમાન પિંડમાં પ્રોફેસરના પિતાના ઘરનો આ જૂનો દરવાજો. યાદો અને ઈતિહાસથી ભરેલો આ દરવાજો બટાલાથી મુંબઈ, પછી દુબઈ, કરાચી અને છેલ્લે લાહોર સુધીનું લાબું અંતર કાપીને આવ્યો છે. જ્યાં પહેલા પ્રોફેસર અમીન રહેતા હતા.'
કેપ્શનમાં આગળ લખ્યું છે કે, 'પ્રોફેસર આ જૂના દરવાજાને જોતાની સાથે જ પોતાના આંસુ રોકી શક્યા નથી. આ દરવાજાનો મતલબ અને તેની સાથે જોડાયેલી યાદોથી તેઓ ખૂબ જ પ્રભાવિત થયા હતા. 'ભલે 1947ના ભાગલાએ જમીનનું વિભાજન કર્યું હોય, તે પંજાબીઓના હૃદયને અલગ કરી શક્યું નથી, જેઓ સહિયારા વારસા અને મિત્રતા દ્વારા જોડાયેલા રહે છે.'
લોકો વીડિયોને ખૂબ પસંદ કરી રહ્યા છે. તેઓ તેને લાઈક અને શેર કરી રહ્યા છે. પોસ્ટ પર કોમેન્ટ કરીને પ્રતિભાવ પણ આપી રહ્યા છે. પોસ્ટ પર કોમેન્ટ કરતાં એક યુઝરે કહ્યું, 'તેમના માટે કેટલી ભાવનાત્મક ક્ષણ છે. માનવીય લાગણી દરેક વસ્તુ પર વિજય મેળવે છે.' અન્ય એક યુઝરે લખ્યું, 'માનવતા, મિત્રતા અને પ્રેમ શ્રેષ્ઠ છે. અદ્ભુત લાગણી.'
નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.
તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.
ગુજરાતનું અગ્રેસર ન્યૂઝ પોર્ટલ, અહીં વાત થાય છે માત્ર ગુજરાત અને ગુજરાતનાં હિતની... Download Khabarchhe APP www.khabarchhe.com/downloadApp
