મુંબઈ ઈન્ડિયન્સની બીજી હાર માટે હાર્દિક પંડ્યાએ જણાવ્યું ક્યાં ભૂલ થઈ ગઈ

મુંબઈ ઈન્ડિયન્સને IPL 2024માં સતત બીજી હારનો સામનો કરવો પડ્યો છે. હૈદરાબાદમાં રમાયેલી મેચમાં હાર્દિક પંડ્યાની કેપ્ટન્સીમાં મુંબઈને સનરાઈઝર્સ હૈદરાબાદ સામે 31 રને પરાજય મળ્યો હતો. હાર પછી હાર્દિક પંડ્યાએ કહ્યું, ક્યાં ભૂલ થઈ. પંડ્યાએ કહ્યું કે, તેણે ક્યારેય વિચાર્યું ન હતું કે, હૈદરાબાદની ટીમ આટલો મોટો સ્કોર કરશે. મુંબઈના સુકાનીએ સ્વીકાર્યું કે, તે બોલિંગ કરતી વખતે કંઈક અલગ કરવાનો પ્રયાસ કરી શક્યો હોત, પરંતુ એવું થયું નહીં. આ મેચમાં બેટ્સમેનોએ ઘણા રન બનાવ્યા હતા. પ્રથમ બેટિંગ કરતા હૈદરાબાદે 277 રન બનાવ્યા, જે IPLના ઈતિહાસમાં સૌથી વધુ રન છે. પેટ કમિન્સની આગેવાની હેઠળની SRH ટીમે MIને હરાવીને વર્તમાન સિઝનમાં તેની પ્રથમ જીત નોંધાવી હતી.

સનરાઈઝર્સ હૈદરાબાદ સામેની હાર પછી મુંબઈ ઈન્ડિયન્સ (SRH vs MI)ના કેપ્ટન હાર્દિક પંડ્યાએ કહ્યું, 'વિકેટ સારી હતી પરંતુ અમે વિચાર્યું ન હતું કે આટલો મોટો સ્કોર બનશે. આનાથી સ્પષ્ટ દેખાય છે કે, હૈદરાબાદના બેટ્સમેનોએ સારી બેટિંગ કરી હતી. 500થી વધુ રન બન્યા હતા. મતલબ કે વિકેટ બેટ્સમેનોને મદદરૂપ હતી.'

પ્રથમ બેટિંગ માટે આમંત્રિત કર્યા પછી, સનરાઇઝર્સ હૈદરાબાદે રાજીવ ગાંધી ઇન્ટરનેશનલ સ્ટેડિયમમાં 3 વિકેટે 277 રન બનાવ્યા, જે IPLમાં એક નવો રેકોર્ડ છે. તેણે રોયલ ચેલેન્જર્સ બેંગ્લોર (RCB)ના 2013માં પુણે વોરિયર્સ સામે 5 વિકેટે 263 રનના રેકોર્ડને પાછળ છોડી દીધો હતો. મુંબઈની ટીમે પણ આકરો પડકાર રજૂ કર્યો હતો, પરંતુ સારી શરૂઆત છતાં તેની ટીમ 5 વિકેટે 246 રન જ બનાવી શકી હતી. આ રીતે મેચમાં કુલ 523 રન બનાવ્યા, જે IPL માટે એક રેકોર્ડ છે. આટલું જ નહીં આ મેચમાં 38 સિક્સર ફટકારવામાં આવી હતી, જે T20 ક્રિકેટમાં એક નવો રેકોર્ડ છે.

હાર્દિક પંડ્યાએ વધુમાં કહ્યું, 'અમારી પાસે યુવા બોલિંગ આક્રમણ છે. અમે આ હારમાંથી શીખીશું. આપણે કેટલીક બાબતોમાં સુધારો કરવાની જરૂર છે. જો અમે તેને ઠીક કરવામાં સફળ થઈશું તો બધું સારું થઈ જશે.' મુંબઈની સતત બીજી હાર પછી લોકોએ હાર્દિક પંડ્યાની કેપ્ટનશિપ પર સવાલ ઉઠાવવાનું શરૂ કર્યું છે. મુંબઈએ પણ ઝડપી શરૂઆત કરી હતી. તેની તરફથી તિલક વર્માએ 34 બોલમાં સૌથી વધુ 64 રન બનાવ્યા, જેમાં બે ચોગ્ગા અને છ છગ્ગાનો સમાવેશ થાય છે.

ટિમ ડેવિડે 22 બોલમાં અણનમ 42 રન ફટકારીને હારનું અંતર ઓછું કર્યું હતું. મુંબઈએ પાવર પ્લેમાં પણ બે વિકેટે 76 રન બનાવ્યા હતા, પરંતુ આ દરમિયાન તેણે બંને ઓપનર ઈશાન કિશન (13 બોલમાં 34 રન) અને રોહિત શર્મા (12 બોલમાં 26 રન)ની વિકેટ ગુમાવી દીધી હતી, જેમણે મજબૂત શરૂઆત કરી હતી. રોહિતે તેની ઇનિંગમાં ત્રણ સિક્સર ફટકારી હતી, જ્યારે કિશને ચાર સિક્સર ફટકારી હતી, જેમાં એક ઓવરમાં ભુવનેશ્વર કુમારની બોલિંગમાં ફટકારવામાં આવેલી ત્રણ સિક્સરનો પણ સમાવેશ થાય છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.