મદરેસા ચાલુ રહેશે, સુપ્રીમે હાઇકોર્ટના ફેસલા પર રોક લગાવી, આપ્યું આ કારણ

સુપ્રીમ કોર્ટે ઉત્તર પ્રદેશની 25 હજાર મદરેસાના 17 લાખ વિદ્યાર્થીઓને મોટી રાહત આપી છે. કોર્ટે UP મદરેસા એક્ટ 2004ના કેસમાં અલ્હાબાદ હાઈકોર્ટના નિર્ણય પર રોક લગાવી દીધી છે. સુપ્રીમ કોર્ટે અલ્હાબાદ હાઈકોર્ટના એ નિર્ણય પર વચગાળાનો સ્ટે લગાવી દીધો છે, જેમાં આ એક્ટને ગેરબંધારણીય જાહેર કરવામાં આવ્યો હતો. ઉપરાંત, કોર્ટે પક્ષકારો એટલે કે મદરેસા બોર્ડ, UP સરકાર અને કેન્દ્ર સરકારને નોટિસ આપી છે અને 30 જૂન, 2024 સુધીમાં તેમનો જવાબ માંગ્યો છે.

હાલમાં, મદરેસામાં શિક્ષણ મદરેસા બોર્ડ એક્ટ 2004 હેઠળ ચાલુ રહેશે. SCએ પોતાના આદેશમાં કહ્યું છે કે, અલ્હાબાદ હાઈકોર્ટનો નિર્ણય પ્રથમ દૃષ્ટિએ સાચો નથી. કારણ કે હાઈકોર્ટનું કહેવું યોગ્ય નથી કે, આ ધર્મનિરપેક્ષતાનું ઉલ્લંઘન છે. ખુદ UP સરકારે હાઈકોર્ટમાં આ એક્ટનો બચાવ કર્યો હતો. હાઈકોર્ટે 2004ના કાયદાને ગેરબંધારણીય જાહેર કર્યો હતો. સુપ્રીમ કોર્ટે આ મામલે સરકાર અને અન્યને નોટિસ ફટકારી છે.

અલ્હાબાદ હાઈકોર્ટની લખનઉ બેન્ચે UP બોર્ડ ઓફ મદરેસા એજ્યુકેશન એક્ટ 2004ને ગેરબંધારણીય જાહેર કર્યો હતો. આ આદેશને સુપ્રીમ કોર્ટમાં પડકારવામાં આવ્યો હતો. ચીફ જસ્ટિસ DY ચંદ્રચુડ, જસ્ટિસ JB પારડીવાલા અને જસ્ટિસ મનોજ મિશ્રાની બેંચ યુપી મદરેસા એક્ટને રદ્દ કરવાના અલ્હાબાદ હાઈકોર્ટના નિર્ણયને પડકારતી અરજી પર સુનાવણી કરી રહી છે. શુક્રવારે સુપ્રીમ કોર્ટમાં સુનાવણી દરમિયાન કોર્ટે UP સરકારને પૂછ્યું કે, શું આપણે એ સ્વીકારવું જોઈએ કે, રાજ્યએ હાઈકોર્ટમાં કાયદાનો બચાવ કર્યો છે?

ઉત્તર પ્રદેશ સરકાર વતી ASG KM નટરાજે કહ્યું કે અમે હાઈકોર્ટમાં તેનો બચાવ કર્યો હતો. પરંતુ હાઈકોર્ટના કાયદાને રદ કર્યા પછી અમે નિર્ણય સ્વીકાર્યો છે. જ્યારે રાજ્યએ નિર્ણયનો સ્વીકાર કર્યો છે, ત્યારે રાજ્ય પર કાયદાના ખર્ચનો ભાર નાખી શકાય નહીં.

UP મદરેસા બોર્ડ વતી વરિષ્ઠ વકીલ અભિષેક મનુ સિંઘવીએ કહ્યું કે, હાઈકોર્ટને આ એક્ટને રદ કરવાનો અધિકાર નથી. આ નિર્ણયથી રાજ્યમાં ચાલતા લગભગ 25,000 મદરેસામાં અભ્યાસ કરતા 17 લાખ વિદ્યાર્થીઓ પ્રભાવિત થયા છે. 2018માં UP સરકારના આદેશ અનુસાર, આ મદરેસાઓમાં વિજ્ઞાન, પર્યાવરણ, ગણિત જેવા વિષયો ભણાવવામાં આવે છે. મદરેસાઓ વતી એડવોકેટ મુકુલ રોહતગીએ કહ્યું કે, અહીં કુરાન એક વિષય તરીકે ભણાવવામાં આવે છે. વરિષ્ઠ વકીલ હુઝૈફા અહમદીએ કહ્યું કે, ધાર્મિક શિક્ષણ અને ધાર્મિક વિષયો બે અલગ અલગ મુદ્દા છે. તેથી હાઈકોર્ટના નિર્ણય પર સ્ટે મુકવો જોઈએ.

સિંઘવીએ કહ્યું કે, જો તમે એક્ટને રદ કરો છો, તો તમે મદરેસાઓને અનિયંત્રિત કરો છો. પરંતુ 1987ના નિયમોને સ્પર્શવામાં આવ્યો નથી. હાઈકોર્ટનું કહેવું છે કે, જો તમે ધાર્મિક વિષય ભણાવો છો તો તે ધર્મનિરપેક્ષતાના સિદ્ધાંતની વિરુદ્ધ છે. જ્યારે સુપ્રીમ કોર્ટે સ્વીકાર્યું છે કે, ધાર્મિક શિક્ષણનો અર્થ ધાર્મિક સૂચના નથી.

સિંઘવીએ કહ્યું કે, આજે ઘણા ગુરુકુળો પણ પ્રખ્યાત છે. તેઓ સારું કામ કરી રહ્યા છે, તો શું આપણે તેમને બંધ કરવાનું કહેવું જોઈએ કે, આ હિંદુ ધાર્મિક શિક્ષણ છે? શું આ 100 વર્ષ જૂની સિસ્ટમનો અંત લાવવાનો આધાર બની શકે? કર્ણાટકના શિમોગા જિલ્લામાં એક એવું ગામ છે, જ્યાં આખું ગામ સંસ્કૃતમાં જ બોલે છે. ત્યાં પણ આવી સંસ્થાઓ છે. મને આશા છે કે કોર્ટ આ વિશે જાણશે.

તેમણે આગળ કહ્યું, 'હું હિંદુ ધર્મ કે ઈસ્લામ ધર્મ વગેરે શીખવાડું છું, તેનો અર્થ એ નથી કે, હું ધાર્મિક શિક્ષણ આપું છું. આ કેસમાં કોર્ટે અરુણા રોયના નિર્ણય પર વિચાર કરવો જોઈએ. રાજ્યે ધર્મનિરપેક્ષ રહેવું પડશે. તેણે તમામ ધર્મોનું સન્માન કરવું જોઈએ અને તેમની સાથે સમાન વ્યવહાર કરવો જોઈએ. રાજ્ય તેની ફરજો નિભાવતી વખતે કોઈપણ રીતે ધર્મો વચ્ચે ભેદભાવ ન કરી શકે. શિક્ષણ પૂરું પાડવું એ રાજ્યની પ્રાથમિક ફરજોમાંની એક હોવાથી, તેણે આ ક્ષેત્રમાં તેની સત્તાનો ઉપયોગ કરતી વખતે બિનસાંપ્રદાયિક રહેવું જોઈએ. તે કોઈ ચોક્કસ ધર્મનું શિક્ષણ આપી શકતો નથી અથવા વિવિધ ધર્મો માટે વિવિધ શિક્ષણ પ્રણાલીઓ બનાવી શકતો નથી.'

મદરેસાઓ તરફથી હાજર રહેલા એડવોકેટ મુકુલ રોહતગીએ એમ પણ કહ્યું કે, આ સંસ્થાઓ વિવિધ વિષયો શીખવે છે. કેટલીક સરકારી શાળાઓ છે. કેટલીક ખાનગી છે. અહીં ઈરાદો એ છે, કે તે સંપૂર્ણપણે રાજ્ય સહાયિત શાળા છે. ધાર્મિક શિક્ષણ નથી. સુપ્રીમ કોર્ટમાં આગામી સુનાવણી જુલાઈના બીજા સપ્તાહમાં થશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.