71 હોસ્પિટલ, 5000 ફાર્મસીના 92 વર્ષના માલિક રોજ ઓફિસ જાય છે; 26,560 કરોડની છે સંપત્તિ

92 વર્ષની ઉંમર અને દરરોજ કામ કરવું, આ સાંભળીને તમને કદાચ વિશ્વાસ નહીં આવે. પણ આ વાસ્તવિકતા છે. તે ઉંમર જેમાં મોટાભાગના લોકો નિવૃત્ત થઈ જાય છે. પરંતુ એપોલો હોસ્પિટલના સ્થાપક ડૉ. પ્રતાપ C રેડ્ડી હજુ પણ દરરોજ ઓફિસ જાય છે.

દેશના સૌથી મોટા હોસ્પિટલ નેટવર્કના સ્થાપકની મહેનત અને વિઝનથી ભારતમાં આરોગ્ય સંભાળમાં પરિવર્તન આવ્યું છે. 92 વર્ષની ઉંમરે પણ, ડૉ. રેડ્ડી દરરોજ સવારે 10 થી સાંજે 5 વાગ્યા સુધી ઓફિસમાં કામ કરે છે. અઠવાડિયામાં છ દિવસ કામ કરતા ડૉ. રેડ્ડીની ઉંમર જાણીને બધાને નવાઈ લાગી.

આજે પણ, ડૉ. રેડ્ડીનો જુસ્સો અને કામ પ્રત્યે તેમનું સમર્પણ કોઈ યુવાનો કરતા ઓછો નથી. તેઓ કહે છે કે આરોગ્ય સેવા તેમનો જુસ્સો છે અને તેઓ તેમાં સતત સુધારો કરવા માંગે છે. ડૉ. રેડ્ડીએ 1983માં દેશની પહેલી કોર્પોરેટ હોસ્પિટલ, એપોલો હોસ્પિટલ શરૂ કરી હતી. તે સમયે દેશમાં સારી આરોગ્ય સુવિધાઓનો અભાવ હતો અને લોકો સારવાર માટે વિદેશ જતા હતા.

ડૉ. રેડ્ડી દેશમાં જ વૈશ્વિક સ્તરની સારવાર સુવિધાઓ પૂરી પાડવા માટે કટિબદ્ધ હતા. તેમના આ વિચારથી દેશની આરોગ્ય સેવા હંમેશા માટે બદલાઈ ગઈ. ચેન્નાઈમાં જન્મેલા ડૉ. રેડ્ડીએ સ્ટેનલી મેડિકલ કોલેજમાંથી MBBS પૂર્ણ કર્યું. અમેરિકામાં કાર્ડિયોલોજિસ્ટ તરીકે તાલીમ લીધી. 1970ના દાયકામાં તેમના પિતાના એક પત્રે તેમને ભારત પાછા ફરવા માટે પ્રેરણા આપી.

1979માં, એક દર્દીનું સારી સુવિધાઓના અભાવે મૃત્યુ થયું; આ ઘટનાથી તે એટલા દુઃખી થયા કે તેમણે એપોલો હોસ્પિટલ શરૂ કરવાનું નક્કી કર્યું. આ સાથે તેમણે નક્કી કર્યું કે સારવારના અભાવે કોઈનું મૃત્યુ ન થવું જોઈએ.

આજે એપોલો હોસ્પિટલ્સ માત્ર એક હોસ્પિટલ જ નથી પરંતુ એક મોટું આરોગ્યસંભાળ સામ્રાજ્ય છે. એપોલો દેશભરમાં 71 હોસ્પિટલો, 5,000થી વધુ ફાર્મસી આઉટલેટ્સ, 291 પ્રાથમિક સંભાળ ક્લિનિક્સ, ડાયગ્નોસ્ટિક નેટવર્ક અને ડિજિટલ હેલ્થ પ્લેટફોર્મ ધરાવે છે. આ જૂથ દેશના દરેક ખૂણામાં સારી ગુણવત્તાવાળી આરોગ્ય સેવાઓ પૂરી પાડી રહ્યું છે. જૂથ દ્વારા આ સુવિધાઓનો સતત વિસ્તાર કરવામાં આવી રહ્યો છે.

એપોલો હોસ્પિટલ્સનું માર્કેટ કેપ હાલમાં રૂ. 70,000 કરોડથી વધુ છે. રેડ્ડી પરિવારનો તેમાં 29.3 ટકા હિસ્સો છે. ફોર્બ્સ અનુસાર, ડૉ. રેડ્ડીની કુલ સંપત્તિ 26,560 કરોડ રૂપિયા છે. આટલી બધી સંપત્તિ હોવા છતાં, તેઓ ખૂબ જ સાદું જીવન જીવે છે.

ડૉ. રેડ્ડી માને છે કે, સફળતા આપણને વીનમ્ર બનાવે છે અને દેશ માટે વધુ કામ કરવા પ્રેરણા આપે છે. મીડિયા સૂત્રને આપેલા ઇન્ટરવ્યુમાં તેમણે કહ્યું, 'આપણે આપણી સફળતાનો ઉપયોગ દેશને સુધારવા માટે કરવો જોઈએ.' 92 વર્ષની ઉંમરે પણ, ડૉ. રેડ્ડીનો ઉત્સાહ અને નેતૃત્વ પ્રશંસનીય છે. તેમની વાર્તામાંથી આપણને જે પાઠ શીખવા મળે છે તે એ છે કે, જો તમારામાં કંઈક કરવાનો જુસ્સો હોય, તો ઉંમર ક્યારેય તમારા સપના અને લક્ષ્યોના માર્ગમાં આવતી નથી.