વિશ્વની અગ્રણી ટેક કંપનીઓમાંથી એક, મેટાને તાજેતરમાં મોટો ઝટકો લાગ્યો છે. માત્ર બે દિવસના સમયગાળામાં કંપનીના CEO, માર્ક ઝુકરબર્ગની નેટવર્થમાં આશરે 20 અબજ ડોલર (આશરે ₹1.6 લાખ કરોડ)નો મોટો ઘટાડો જોવા મળ્યો. આ ઘટાડા પાછળ ‘Big Tobacco’ જેવી આશંકાઓને મોટા કારણ માનવમાં આવે છે. જેમાં તમાકુ કંપનીઓએ ગંભીર કાનૂની અને નાણાકીય નુકસાનનો સામનો કરવો પડ્યો હતો. અહેવાલો અનુસાર, 27 માર્ચ 2026 સુધીમાં ઝુકરબર્ગની નેટવર્થ ઘટીને આશરે 182.5 અબજ ડોલર થઈ ગઈ હતી. આ અચાનક ઘટાડાએ રોકાણકારોમાં ચિંતાનું વાતાવરણ ફેલાવ્યું. હકીકતમાં આ સમગ્ર મામલાની શરૂઆત અમેરિકાના ન્યૂ મેક્સિકોમાં આવેલા એક મહત્ત્વપૂર્ણ કોર્ટના ચૂકાદાથી થઈ હતી.
કોર્ટે શોધી કાઢ્યું કે મેટા તેના પ્લેટફોર્મ ફેસબુક અને ઇન્સ્ટાગ્રામ પર સગીરોને પૂરતા પ્રમાણમાં સુરક્ષિત રાખવામાં નિષ્ફળ ગઈ છે; ખાસ કરીને એવો આરોપ લગાવવામાં આવ્યો હતો કે કંપનીના અલ્ગોરિધમ્સ સગીર વપરાશકર્તાઓને હાનિકારક સામગ્રી બતાવે છે. આ ટ્રાયલમાં લગભગ 40 સાક્ષીઓની જુબાની સામેલ હતી અને જેમાં વ્હિસલબ્લોઅર્સનો પણ સમાવેશ થતો હતો અને તેમાં સેંકડો આંતરિક દસ્તાવેજો અને અહેવાલોની સમીક્ષા કરવામાં આવી હતી.
છેલ્લા કેટલાક અઠવાડિયામાં સાન્તા ફેની એક કોર્ટમાં આ કેસની સુનાવણી થઈ હતી. ન્યૂ મેક્સિકોની એક જ્યૂરીએ સોશિયલ મીડિયા જાયન્ટને તેના પ્લેટફોર્મ પર શિકારીઓ અને હાનિકારક સામગ્રીના સંપર્કમાં લાવીને બાળકોને જોખમમાં મૂકવા માટે જવાબદાર ગણાવી હતી. કોર્ટે કંપની પર 375 મિલિયન ડોલરનો દંડ પણ ફટકાર્યો હતો. આ ચૂકાદો રોકાણકારો માટે મોટો સંકેત બની ગયો. તેમને હવે ડર છે કે આગામી સમયમાં મેટાને અસંખ્ય વધારાના કેસોનો સામનો કરવો પડી શકે છે. આ જ કારણ છે કે વર્તમાન પરિસ્થિતિની તુલના ‘Big Tobacco’ ઉદ્યોગ સાથે કરવામાં આવી રહી છે.
નિષ્ણાતોનું માનવું છે કે જો આવી જ રીતે ચૂકાદાઓ આવતા રહ્યા, તો સોશિયલ મીડિયા કંપનીઓ પર કડક નિયમો લાગૂ થઈ શકે છે. આવા પગલાં મેટાના બિઝનેસ મોડેલ અને નફાકારકતા પર ગંભીર અસર કરી શકે છે. આટલું જ નહીં, માર્ચ 2026માં જ મેટાના કુલ માર્કેટ વેલ્યૂમાં $300 બિલિયનથી વધુનો ઘટાડો જોવા મળ્યો હતો. તેનું કારણ કાનૂની જોખમો સાથે-સાથે આર્ટિફિશિયલ ઇન્ટેલિજન્સ (AI) પર વધતા ખર્ચને બતાવવામાં આવી રહ્યો છે.
જો કે, મેટાએ કોર્ટના ચૂકાદાને પડકારવાની વાત કહી છે અને અપીલ દાખલ કરવાની તૈયારી કરી રહી છે. કંપનીનું કહેવું છે કે તે તેના પ્લેટફોર્મને વધુ સુરક્ષિત બનાવવા માટે સતત કામ કરી રહી છે. AFPના અહેવાલ મુજબ, કેસનો બીજો તબક્કો 4 મેથી શરૂ થવાનો છે, જ્યાં કોર્ટ મેટાના પ્લેટફોર્મ અને ઓપરેશનમાં વધારાનો દંડ અને જરૂરી ફેરફારો પર વિચાર કરશે.
27.jpg)
