એન્ફોર્સમેન્ટ ડિરેક્ટોરેટ (ED) અમદાવાદ ઝોનલ ઓફિસે ઓમ ફેબના રણજીત લુનિયા વિરુદ્ધ મોટી કાર્યવાહી કરી છે. બેંકમાંથી લીધેલી કરોડોની લોન પરત કરવાને બદલે તેનો અંગત મોજશોખ અને સંપત્તિ ખરીદવા માટે કરવામાં આવી હતી. બેંકની લોનની રકમ પરત ન ચૂકવતા CBI દ્વારા આ બાબતે ફરિયાદ નોંધવામાં આવી હતી. જેના આધારે EDએ તપાસ શરૂ કરી મિલકતો ટાંચમાં લીધી છે. હજુ તપાસમાં ઘણી વિગતો સામે આવે એવી સંભાવના છે.
શું છે આખો મામલો?
દિવ્યભાસ્કરના અહેવાલ મુજબ, ઓરિએન્ટલ બેંક ઓફ કોમર્સ પાસેથી ઓમ ફેબના નામે 9.95 કરોડની ક્રેડિટ લાઇન (લોન) મંજૂર કરાવી હતી. આ રકમ વ્યાજ સાથે વધીને તાજેતરમાં 10.9 કરોડ સુધી પહોંચી ગઈ છે. લોન લેવામાં આવી ત્યારે તેના માટે જે હેતુ દર્શાવવામાં આવ્યો હતો, તેના બદલે લુનિયાએ લોનનો ઉપયોગ હોમ લોન ચૂકવવા, સોનાં-ચાંદી ખરીદવા અને અન્ય કામોમાં કરવામાં આવ્યો હતો.
લુનિયાની ઓમ ફેબ ઉપરાંત બાબા ટેક્સટાઇલ અને લક્ષ્મી ફેબ નામની કંપનીઓ પણ હતી. બેંકમાંથી લોન લઈને લુનિયાએ લોન પરત ચૂકવવાને બદલે આ રૂપિયા અન્ય ખાતાઓમાં ટ્રાન્સફર કર્યા હતા તેમજ સોનાં-ચાંદીની ખરીદી અને હોમ લોનની ભરપાઈ કરવા ઉપયોગ કર્યો હતો.
ફક્ત એટલું જ નહીં લુનિયાએ લોન મેળવવા માટે વેલ્યુઅર મયુર શાહ સહિત અન્ય મળતિયાઓ સાથે મળીને મિલકતોનું વધુ મૂલ્યાંકન દર્શાવી બેંક સાથે છેતરપિંડી કરવાનો પ્રયાસ કર્યો હતો. આ બાબત બેંકના ધ્યાનમાં આવતા મની લોન્ડરિંગ એક્ટ હેઠળ કાર્યવાહી માટે રજૂઆત કરવામાં આવી હતી. ત્યારબાદ CBIએ ફરિયાદ નોંધી અને EDએ તપાસ શરૂ કરી મિલકતો જપ્ત કરી છે.
અગાઉ EDએ આરોપીઓને ત્યાં દરોડા પાડ્યા હતા. ત્યારે આશરે 3.67 કરોડની ચીજવસ્તુ રીકવર કરવામાં આવીહતી. બે મિલકત કામચલાઉ રીતે જપ્ત કરી હતી. જોકે, તેની કિંમત 53.50 લાખ રૂપિયા છે પરંતુ, તેની હાલ બજાર કિંમત 4.65 કરોડ છે. આ કેસમાં હજી વધુ તપાસ ચાલી રહી છે અને આગામી દિવસોમાં બેન્કના કેટલાક અધિકારીઓએ અને અન્ય લોકોની સંડોવણી સામે આવે તેવી શક્યતા વ્યક્ત કરવામાં આવી રહી છે.
27.jpg)
