(ઉત્કર્ષ પટેલ)
રાજાભાઈ પટેલ જેમને લોકપ્રિય રીતે રાજાભાઈ કે રાજા પટેલ તરીકે ઓળખવામાં આવતા હતા. જેમનો જન્મ 1 જૂન 1955ના રોજ સુરત જિલ્લાના સુલતાનાબાદમાં થયો હતો. તેમનું વ્યક્તિત્વ અત્યંત સરળ, વિનમ્ર અને કાર્યપ્રધાન હતું. તેઓ ગ્રાસરૂટ લેવલથી રાજકારણમાં આવ્યા હતા અને ક્યારેય લોકોની સમસ્યાઓથી અજાણ નહોતા રહ્યા. તેમની વાતચીતમાં સૌની સાથે લાગણી અને વિશ્વાસ જણાતો જેના કારણે કાંઠા વિસ્તારના લોકો તેમને પોતાનો માણસ માનતા હતા. 5 ઓગસ્ટ 2015ના રોજ તેમનું અવસાન થયું ત્યારે આખા કાંઠા વિસ્તારમાં શોકની લહેર ફેલાઈ ગઈ હતી. તેમના અવસાને માત્ર એક પરિવારને જ નહીં પરંતુ કોળી સમાજ અને કાંઠાના મતદારોને ભારે ખોટની અનુભૂતિ કરાવી.
આજે દક્ષિણ ગુજરાતના કાંઠા વિસ્તારમાં રાજાભાઈ પટેલની ગેરહાજરી મતદારોને અનુભવાઈ રહી છે. ચોર્યાસી વિધાનસભા ક્ષેત્રના લોકો માટે તેઓ માત્ર એક નેતા નહોતા પરંતુ પરિવારના સભ્ય હતા. તેમનું સરળ વ્યક્તિત્વ અને અથાગ મહેનતે કાંઠા વિસ્તારને એક નવી ઓળખ આપી હતી. આજે પણ તેમના અવસાન પછી લગભગ એક દાયકો વીતી ગયો હોવા છતાં તેમના કાર્યોનો પ્રભાવ જીવંત છે.
1990થી 2000 સુધી તેઓ સુલતાનાબાદના સરપંચ તરીકે કાર્યરત રહ્યા અને ગામના વિકાસમાં અગ્રેસર ભૂમિકા ભજવી. 2000માં તેઓ ભારતીય જનતા પાર્ટીમાં જોડાયા અને ચોર્યાસી તાલુકા પંચાયતના સભ્ય તરીકે સેવા આપી. તાલુકા પંચાયતની કાર્યકારી સમિતિના પ્રમુખ તરીકે 8 વર્ષ અને બાંધકામ સમિતિના પ્રમુખ તરીકે પણ તેમણે અમૂલ્ય યોગદાન આપ્યું. 2012ની વિધાનસભા ચૂંટણીમાં તેઓ ચોર્યાસી વિધાનસભા બેઠક પરથી ભાજપના ઉમેદવાર તરીકે જીત્યા અને ધારાસભ્ય બન્યા. તેમની રાજકીય સફર ગ્રામ પંચાયતથી વિધાનસભા સુધીની હતી જે સેવા અને સમર્પણનું ઉદાહરણ છે.
ધારાસભ્ય તરીકે તેમની સક્રિય કામગીરી અદ્ભુત હતી. કાંઠા વિસ્તારના વિકાસ માટે તેઓ દિવસ રાત કામ કરતા. રસ્તા, પાણી, વીજળી, શિક્ષણ અને આરોગ્ય જેવા મુદ્દાઓ પર તેમણે અવિરત પ્રયાસો કર્યા. લોકોની સમસ્યાઓને તેઓ પોતાની સમસ્યા માનતા અને તેનું નિરાકરણ લાવવા માટે ક્યારેય પાછળ નહોતા હટતા. તેમની કામગીરીથી ચોર્યાસી અને આસપાસના વિસ્તારોમાં અનેક વિકાસ કાર્યો પૂર્ણ થયા જે આજે પણ લોકો યાદ કરે છે.
કોળી સમાજ માટે તેમનું સમર્પણ નોંધનીય હતું. કાંઠા વિસ્તારમાં કોળી સમાજના આગેવાન તરીકે તેઓ સમાજના ઉત્થાન માટે સતત કાર્યરત રહ્યા. સમાજના યુવાનોને શિક્ષણ, રોજગાર અને સામાજિક સુધારણા તરફ પ્રેરિત કરવામાં તેમણે મહત્વની ભૂમિકા ભજવી. તેમના કારણે કોળી સમાજને રાજકીય અને સામાજિક ક્ષેત્રે નવી સિદ્ધિઓ મળી. તેઓ સમાજના દરેક વ્યક્તિ સાથે વ્યક્તિગત સંપર્ક રાખતા અને તેમની મુશ્કેલીઓનું નિરાકરણ કરવા પ્રયત્નશીલ રહેતા.
આજે તેમના દીકરી ઝંખનાબેન પટેલ પિતાના સેવાના વારસાને આગળ વધારી રહ્યા છે. તેઓ પિતાના નેતૃત્વ અને સમર્પણની પરંપરા જાળવીને સમાજસેવામાં કાર્યરત છે. 2016ની પેટાચૂંટણીમાં તેઓ ચોર્યાસી બેઠક પરથી ધારાસભ્ય ચૂંટાયા હતા અને ત્યારથી સતત સેવાકાર્યમાં જોડાયેલા છે. ઝંખનાબેન તેમના પિતાની જેમ સમાજના કલ્યાણ માટે કામ કરી રહ્યા છે અને કાંઠા વિસ્તારના લોકો માટે પ્રેરણા સ્ત્રોત બની રહ્યા છે.
રાજાભાઈ પટેલનું જીવન સેવા, સમર્પણ અને નેતૃત્વનું પ્રતીક હતું. તેમના અવસાને કાંઠા વિસ્તારને એક પ્રજાની તકલીફ સમજનારા નેતાની ખોટ ઊભી કરી છે. રાજાભાઈ જેવા નેતાઓની કાર્યશૈલી આપણને યાદ અપાવે છે કે સાચી રાજકીય સેવા લોકોના હૃદયમાં વસે છે.
(લેખક એક પ્રતિષ્ઠિત ઉદ્યોગપતિ, સમાજસેવક અને khabarchhe.comના સંસ્થાપક છે.)
