અબજપતિઓની લિસ્ટમાં 80 વર્ષીય બિઝનેસમેનનો જલવો, બન્યા બીજા સૌથી અમીર વ્યક્તિ

એક તરફ જ્યાં ઈરાન અને ઈઝરાયલ વચ્ચે ચાલી રહેલા યુદ્ધને કારણે દુનિયાભરના શેરબજારોમાં ઉથલ-પાથલ મચી છે, તો બીજી તરફ, દુનિયાના ટોપ અબજપતિઓની લિસ્ટમાં ઉલટફેર જોવા મળી રહ્યો છે. જી હા, ઓરેકલ (Oracle)ના ફાઉંન્ડર લેરી એલિસનની સંપત્તિમાં એવો ઉછાળો આવ્યો છે કે તેઓ બીજા સૌથી અમીર વ્યક્તિ બની ગયા છે. રોજ તેઓ કમાણીના રેકોર્ડ તોડી રહ્યા છે અને ફોર્બ્સ રિયલ ટાઈમ બિલિયોનેર્સ ઇન્ડેક્સ અનુસાર, તેમણે એમેઝોનના જેફ બેજોસ અને ફેસબુકના માર્ક ઝુકરબર્ગને સંપત્તિની રેસમાં પાછળ છોડી દીધા છે.

ઓરેકલના ફાઉન્ડર 80 વર્ષીય લેરી એલિસન ગત ગુરુવારથી જબરદસ્ત કમાણી કરતા જોવા મળી રહ્યા છે અને આ સિલસિલો યથાત છે. માત્ર ગુરુવારે જ, એલિસનની સંપત્તિમાં 26 અબજ ડોલરનો મોટો ઉછાળો આવ્યો, જે અમીરોની સંપત્તિમાં એક દિવસમાં સૌથી વધુ કમાણી કરનારા આંકડાઓમાં સામેલ છે. આ વધારાને કારણે તેમણે એમેઝોનના જેફ બેજોસને પાછળ છોડી દીધા અને છેલ્લા 24 કલાકમાં તેમની સંપત્તિમાં 13 અબજ ડોલરથી વધુનો વધારો થયો છે, જેના કારણે માર્ક ઝુકરબર્ગ પણ તેમનાથી પાછળ રહી ગયા છે.

ફોર્બ્સના બિલિયોનેર ઇન્ડેક્સ પર નજર કરીએ તો, દુનિયાના ટોપ-10 અમીરોની લિસ્ટમાં લાંબા સમયથી સામેલ લેરી એલિસનના નેટવર્થમાં તાજેતરના દિવસોમાં થયેલાના વધારાને કારણે તે વધીને 258.8 અબજ ડોલર થઈ ગઈ છે. જ્યારે આ અગાઉ, દુનિયાના બીજા અને ત્રીજા સૌથી અમીર વ્યક્તિ ક્રમશઃ માર્ક ઝુકરબર્ગ અને જેફ બેજોસ હતા. આંકડાઓને જોઇએ તો, માર્ક ઝુકરબર્ગની નેટવર્થ 235.7 અબજ ડોલર છે અને તેઓ ત્રીજા નંબર પર આવી ગયા છે, જ્યારે જેફ બેજોસનું નેટવર્થ 226.8 અબજ ડોલર છે અને તેઓ ચોથા નંબર પર સરકી ગયા છે.

અમીરોની લિસ્ટમાં બીજા અને ત્રીજા નંબર પર અચાનક મોટો ઊલટફર થયો જોવા મળ્યો છે, પરંતુ દુનિયાના સૌથી અમીર વ્યક્તિની ખુરશી પર એલન મસ્કનો દબદબો હજી કાયમ છે. ફોર્બ્સના રિપોર્ટ અનુસાર, એલન મસ્ક 410.8 અબજ ડોલરના નેટવર્થ સાથે પહેલા નંબરે છે. અન્ય અમીરોની વાત કરીએ તો બેજોસ બાદ, પાંચમા નંબર પર દિગ્ગજ રોકાણકાર વોરેન બફેટનું નામ આવે છે અને તેમનું નેટવર્થ 152.1 અબજ ડોલર છે, જ્યારે લેરી પેજ 144.7 અબજ ડોલરના નેટવર્થ સાથે છઠ્ઠા નંબર પર છે.

ટોપ-10 અબજપતિઓની લિસ્ટમાં એક સમયે દુનિયાના સૌથી અમીર વ્યક્તિ રહેલા બર્નાર્ડ અર્નોલ્ટ 141 અબજ ડોલરની સંપત્તિ સાથે સાતમા નંબર પર સરકી ગયા છે. તો આઠમા નંબરે સેર્ગેઈ બ્રિન 138.4 અબજ ડોલર સાથે આવેલા છે. દુનિયાના નવમા સૌથી અમીર વ્યક્તિ 136.2 અબજ ડોલર સાથે સ્ટીવ બાલ્મર છે, જ્યારે 10મા નંબરે NVIDIAના ફાઉન્ડર જેન્સન હુઆંગની એન્ટ્રી થઈ છે છે અને તેમની કુલ સંપત્તિ 123.9 અબજ ડોલર છે. ખાસ વાત એ છે કે માઇક્રોસોફ્ટના કો-ફાઉન્ડર બિલ ગેટ્સ આ લિસ્ટમાંથી બહાર થઈ ગયા છે અને 116.5 અબજ ડોલર સાથે અમીરો લિસ્ટમાં 12મા નંબરે પહોંચી ગયા છે.