ભારતીય ક્રિકેટ ટીમના અનુભવી ખેલાડી અને સનરાઇઝર્સ હૈદરાબાદ (SRH)ના ફાસ્ટ બોલર મોહમ્મદ શમીને મોટો ઝટકો લાગ્યો છે. કોલકાતા હાઇકોર્ટે શમીને પત્ની હસીન જહાં અને પુત્રીને દર મહિને 4 લાખ રૂપિયાનું ભરણપોષણ ભથ્થું ચૂકવવાનો આદેશ આપ્યો છે. હાઇકોર્ટે ક્રિકેટર શમીને આદેશ આપ્યો કે,હસીન જહાંને દર મહિને 1.5 લાખ રૂપિયા અને સગીર પુત્રીના ખર્ચ માટે દર મહિને 2.5 લાખ રૂપિયા આપશે. એટલે કે શમી દર મહિને કુલ 4 લાખ રૂપિયા પત્ની અને પુત્રીને ચૂકવશે.
શું હતો મામલો?
વર્ષ 2018માં હસીન જહાંએ માસિક ભથ્થા માટે કોર્ટનો દરવાજો ખખડાવ્યો હતો. તેણે શમી પાસેથી 10 લાખ રૂપિયા માસિક ભથ્થાની માગણી કરી હતી, જેમાંથી 7 લાખ રૂપિયા પોતાના માટે અને 3 લાખ રૂપિયા તેની પુત્રીના શિક્ષણ અને ઉછેર માટે. જોકે, અલીપુર કોર્ટે ઓગસ્ટ 2018માં શમીને તેની પત્ની માટે દર મહિને 50 હજાર રૂપિયા અને પુત્રી માટે 80 હજાર રૂપિયા ચૂકવવાનો આદેશ આપ્યો હતો.
હસીન જહાંએ અલીપુર કોર્ટના નિર્ણયને કોલકાતા હાઈકોર્ટમાં પડકાર્યો હતો. હસીનનું કહેવું હતું કે વર્ષ 2021ના ઈનકમટેક્સ રિટર્ન (ITR) મુજબ, શમીની વાર્ષિક આવક 7.19 કરોડ રૂપિયા છે એટલે કે દર મહિને 60 લાખ રૂપિયાની આવક. જ્યારે મારો માસિક ખર્ચ 6 લાખ રૂપિયાથી વધુ છે.
આ આધારે પર હસીન જહાંએ કોલકાતા હાઈકોર્ટમાં અલીપુર કોર્ટના નિર્ણયને પડકાર્યો હતો. કોલકાતા હાઈકોર્ટમાં, જસ્ટિસ અજય મુખર્જીએ જોયું કે અલીપુર કોર્ટનો આદેશ સ્પષ્ટ નહોતો. શમીની આર્થિક સ્થિતિ સારી છે અને તે વધુ માસિક ભથ્થું આપવામાં સક્ષમ છે. હસીને ફરી લગ્ન કર્યા નથી અને પુત્રી સાથે એકલી રહે છે. મીડિયા રિપોર્ટ્સ અનુસાર, શમી અને હસીન જહાં વચ્ચે કોઈ છૂટાછેડા થયા નથી. તેની પ્રક્રિયા ચાલી રહી છે. 23 જુલાઈ, 2022ના રોજ શમીએ 'તલાક-ઉલ-હસન' હેઠળ હસીનને છૂટાછેડાની નોટિસ મોકલી હતી. છૂટાછેડાનો કેસ કોર્ટમાં પેન્ડિંગ છે.
-copy17.jpg)
