(Utkarsh Patel) આજે માનવજગતની કુટુંબ વ્યવસ્થાનું કડવું સત્ય સમજવાનો પ્રયત્ન કરીએ. ભાઈ ભાઈ અને ભાઈ બહેન વચ્ચે પિતાની મિલકતમાં ભાગ પડાવવાનું અને હિસ્સો મેળવી લેવાનું અને એમાય કંઈક વધારે મળે એવી ભાવના સાથે ઝઘડી લેવાનું આજે મોટાભાગના પરિવારોમાં સામાન્ય બની ગયું છે.
જેઓ યુવાનીમાં સમય વેડફે તેઓ જીવનમાં કંઈ વધુ ઉકાળી શકતા નથી. અને આવા લોકો કંઇક વ્યવસાય કરે તો ધબડકો વાળે. અને પછી પિતાની મિલકતમાં ભાગ માંગે!
જેઓ નોકરી કરે છે અને ચોક્કસ પગારમાં જીવન જીવે છે એવા લોકોની પણ પિતાની મિલકતમાંથી ભાગ મેળવી લેવાની દાનત વધુ રહે છે!
જેમણે જેમણે પિતાની મિલકતમાં ભાગ માંગ્યા છે અને ભાગ માટે ભાઈ ભાઈ ઝઘડ્યા છે એમને થોડું માઠું લાગવાનું આ વિષય વાંચીને. માઠું ના લાગતા બસ સમજવાનો પ્રયત્ન કરજો અને તમારા સંતાનો તમારી સાથે આવું ન કરે એ માટે ચેતી જજો. આજે સમગ્ર સંસારમાં મારી જાણ મુજબ કુટુંબિક ભાઈઓ અને બહેનો વચ્ચેના મહત્તમ ઝઘડા માટે પિતાની મિલકતનો ભાગ જ જવાબદાર હોય છે.
પિતાએ જીવનભર મહેનત કરી ધન સંપદા ભેગી કરી હોય અને અંતે એના જ માટે લડાઈ ઝઘડા! પિતાની હયાતીમાં ઝઘડા ચાલુ થાય અને પિતા જ્યારે ના રહે ત્યારે સંતાનો મારામારી પર પણ ઉતરે એ હદ સુધીનાં કિસ્સા તમે સાંભળ્યા જોયા જ હશે.
યુવાનીના સમયમાં જે લોકો જીવનમાં મહેનત કરી સફળ થાય તેઓ ક્યારેય પિતાની મિલકતો પર ભાગની દાનત રાખતા નથી અને પોતાનાથી ઓછું હોય તેવા ભાઈ કે બહેનને પોતાનો હક હિસ્સો સામેથી ભેટમાં આપી દેતા હોય છે. આવા લોકો ભાઈ બહેન સાથે બાધતા નથી અને સુખેથી માતાપિતાના આશીર્વાદ સાથે જીવન જીવી જાણે છે.
જો આપ યુવાન છો તો ખંતથી મહેનત કરો ભગવાન સાથ આપશે સફળ થશો, સંપન્ન થશો!
જો આપ વાલી છો તો આપના સંતાનોને યુવાનીમાં મહેનત કરવા પ્રેરણા અને સાથ આપો જેથી તેઓ આપની મિલકતના ભરોસે ના રહે અને ભવિષ્યમાં ભાઈ બહેન મિલકત માટે ઝઘડે નહીં!
ભાઈઓ બહેનો નો પ્રેમનો સબંધ આ મિલકતોના ભાગમાં અભડાય જાય એ દુઃખની વાત છે. આપણે સમજુ માનવ બનીએ. કંઇક જતું કરીને સબંધો જાળવી લેતા થઈએ તો સમાજમક કુટુંબભાવના જળવાઈ રેહશે નહીતર સબંધોનો દાયરો ઘટતો જશે આપણા સંતાનો એકલા પડશે. આપણે સાચવી લઈશું તો ભવિષ્યની પેધીઓક માટે સબંધો સચવાઈ રેહશે!
આપના હાથમાં છે... ભાગ વ્હાલો કે ભાઈ બહેન.
જો ભાઈ બહેન વ્હાલા હોય તો મહેનત કરો અને પિતાથી આગળ વધી આપના ભાઈ બહેનને સુખ વહેચો.
મારી નમ્ર વિનંતી છે કે ભાઈ બહેનના સબંધને માન આપજો અને પિતાની મિલકતના ભાગને મહત્ત્વના આપતા.
મારી વાતુ પર એક વાર વિચાર જરૂર કરજો,
પછી નિર્ણય આપનો.
(સુદામા)
