ભારત-પાકિસ્તાન સીઝફાયર: ભારતની સેના અને મોદી સરકારની નીતિની જીત છે

(ઉત્કર્ષ પટેલ)

ભારત અને પાકિસ્તાન વચ્ચે તાજેતરમાં થયેલા સીઝફાયરની ઘોષણા બાદ રાજકીય અને લશ્કરી ગલિયારાઓમાં ચર્ચાઓ ગરમ છે. કોંગ્રેસના વરિષ્ઠ નેતા શશિ થરૂરે આ અંગે મહત્ત્વનું નિવેદન આપ્યું છે જેમાં તેમણે સ્પષ્ટ કહ્યું કે આ સીઝફાયરમાં અમેરિકાના રાષ્ટ્રપતિ ડોનાલ્ડ ટ્રમ્પનો કોઈ ફાળો નથી પરંતુ તે ભારતની લશ્કરી તાકાત અને મોદી સરકારની કઠોર નીતિઓનું પરિણામ છે. થરૂરે ઉમેર્યું કે પાકિસ્તાનના DGMOએ ભારત સમક્ષ શાંતિની વિનંતી કરી જેના પછી જ આ સમજૂતી શક્ય બની.

ભારતની સેનાએ ‘ઓપરેશન સિંદૂર’ હેઠળ પાકિસ્તાનના આતંકી અડ્ડાઓ પર ચોક્કસ અને શક્તિશાળી હુમલાઓ કરીને દુશ્મનને ઘૂંટણે લાવી દીધું. 22 એપ્રિલે જમ્મુ-કાશ્મીરના પહેલગામમાં થયેલા આતંકી હુમલાના જવાબમાં ભારતે 7 મેના રોજ આ કાર્યવાહી શરૂ કરી જેમાં પાકિસ્તાનના મુખ્ય શહેરો અને પીઓકેમાં આતંકી ઠેકાણાઓ નષ્ટ કરવામાં આવ્યા. ભારતના સ્વદેશી ડ્રોન અને અદ્યતન એર ડિફેન્સ સિસ્ટમનો ઉપયોગ આ ઓપરેશનમાં થયો જેણે વૈશ્વિક સ્તરે ભારતની સૈન્ય ક્ષમતાને સાબિત કરી.

મોદી સરકારની નીતિઓએ આ સફળતામાં મહત્ત્વની ભૂમિકા ભજવી છે. સરકારે સ્પષ્ટ કર્યું હતું કે આતંકવાદની કોઈપણ ઘટનાને યુદ્ધની કાર્યવાહી ગણીને તેનો કડક જવાબ આપવામાં આવશે. વડાપ્રધાન નરેન્દ્ર મોદી, રાષ્ટ્રીય સુરક્ષા સલાહકાર અજીત ડોભાલ અને વિદેશ મંત્રી એસ. જયશંકરની નેતૃત્વમાં ભારતે ન માત્ર લશ્કરી જવાબ આપ્યો પરંતુ રાજનૈતિક સ્તરે પણ પાકિસ્તાન પર દબાણ બનાવ્યું. વિદેશ સચિવ વિક્રમ મિસ્રીએ જણાવ્યું કે પાકિસ્તાનના DGMOએ 10 મેના રોજ ભારતના DGMO સાથે સંપર્ક કરીને શાંતિની વાતચીતની શરૂઆત કરી જે ભારતની શરતો પર સ્વીકારવામાં આવી.

આ ઘટનાએ ભારતની ‘ઝીરો ટોલરન્સ’ નીતિને વિશ્વ સમક્ષ રજૂ કરી છે. ભારતની સેનાએ પોતાના શૌર્ય અને ટેકનોલોજીકલ શ્રેષ્ઠતા દ્વારા દુશ્મનને સ્પષ્ટ સંદેશ આપ્યો કે ભારત હવે આતંકવાદ સામે ચૂપ નહીં રહે. મોદી સરકારની આ નીતિઓ અને ભારતીય સેનાની કાર્યક્ષમતાએ દેશના ગૌરવમાં વધારો કર્યો છે જેની સરાહના વૈશ્વિક સ્તરે પણ થઈ રહી છે.

(લેખક એક પ્રતિષ્ઠિત ઉદ્યોગપતિ અને સમાજસેવક છે. લેખમાં વ્યક્ત કરેલા વિચારો તેમના અંગત વિચારો છે.)