દેશના મુખ્ય ચૂંટણી કમિશનર (CEC) જ્ઞાનેશ કુમાર અને સ્પેશિયલ ઇન્ટેન્સિવ રિવિઝન (SIR)ને લગતા વિવાદ વચ્ચે, ઓડિશાના મુખ્ય ચૂંટણી અધિકારી (CEO) R. S. ગોપાલને સ્વૈચ્છિક નિવૃત્તિ (VRS) માટે અરજી કરી છે. જોકે, તેમણે વ્યક્તિગત અને સ્વાસ્થ્ય કારણોનો ઉલ્લેખ કર્યો કે તેમની સ્વૈચ્છિક નિવૃત્તિનો SIR પ્રક્રિયા સાથે કોઈ સંબંધ નથી. મોટી વાત એ છે કે, ઓડિશા કેડરના 2001 બેચના ભારતીય વહીવટી સેવા (IAS) અધિકારી ગોપાલને રાજ્યમાં SIR પૂર્ણ થયાના એક અઠવાડિયા પછી બુધવારે (30 સપ્ટેમ્બર) તેમની VRS અરજી સબમિટ કરી હતી.
તમિલનાડુના વતની ગોપાલન જુલાઈ 2024થી ઓડિશાના મુખ્ય ચૂંટણી અધિકારી તરીકે સેવા આપી રહ્યા છે. તેમની પાસે એક્સાઇઝ વિભાગના સચિવનો વધારાનો કાર્યભાર પણ છે. તેઓ જૂન 2028માં નિવૃત્ત થવાના હતા. તેમણે જણાવ્યું હતું કે VRS લેવાનો તેમનો નિર્ણય રાજ્યમાં મતદાર યાદીઓના સ્પેશિયલ ઇન્ટેન્સિવ રિવિઝન (SIR)ને લગતા ચાલી રહેલા વિવાદ સાથે સંબંધિત નથી. ગોપાલનને તેમની સેવામાં લગભગ 18 મહિના બાકી છે અને તેઓ ઘણા મહિનાઓથી નોકરી છોડવાનું વિચારી રહ્યા હતા.
તેમણે જણાવ્યું હતું કે તેમણે SIR પ્રક્રિયા પૂર્ણ થાય અને સુધારેલી મતદાર યાદી પ્રકાશિત થાય ત્યાં સુધી આ નિર્ણય મુલતવી રાખ્યો હતો. તેમણે કહ્યું, 'હું વ્યક્તિગત કારણોસર VRS લેવા માંગુ છું. હું વ્યક્તિગત બાબતો પર ધ્યાન કેન્દ્રિત કરવા માંગુ છું. હું મારા પરિવાર પર ધ્યાન કેન્દ્રિત કરીશ અને મારો પુત્ર તેનું શાળાકીય શિક્ષણ પૂર્ણ ન કરે ત્યાં સુધી ભુવનેશ્વરમાં જ રહીશ.' જ્યારે તેમને પૂછવામાં આવ્યું કે શું તેમનો નિર્ણય SIR પ્રક્રિયા પર વિપક્ષની રાજીનામાની માંગ સાથે સંબંધિત છે, ત્યારે ગોપાલને કહ્યું, 'જો તેઓ ખુશ રહેવા માંગતા હોય, તો તેમને રહેવા દો. મેં 2 સપ્ટેમ્બરના રોજ સરકારી સેવામાં 25 વર્ષ પૂર્ણ કર્યા અને તેથી VRS લેવાનું નક્કી કર્યું.'
અહીં તમને જણાવી દઈએ કે, SIR પછી, 3.16 કરોડ મતદારો ધરાવતી ઓડિશાની મતદાર યાદી 21 સપ્ટેમ્બરના રોજ પ્રકાશિત કરવામાં આવી હતી. વિપક્ષી બીજુ જનતા દળ (BJD) અને કોંગ્રેસે યાદીમાંથી લગભગ 17 લાખ નામો કાઢી નાખવા અંગે પ્રશ્નો ઉઠાવ્યા હતા. BJDએ આરોપ લગાવ્યો હતો કે SIR પ્રક્રિયા દરમિયાન 27.50 લાખથી વધુ મતદારોને યાદીમાંથી બહાર કાઢી નાખવામાં આવ્યા હતા અને આ બાબતને છુપાવવાનો દાવો કર્યો હતો. પાર્ટીએ એવો પણ આરોપ લગાવ્યો હતો કે CEO એ મતદાર ડેટા સાથે 'છેડછાડ' કરી હતી. ગોપાલન તેમના કારકિર્દી દરમિયાન અનેક મહત્વપૂર્ણ હોદ્દાઓ સંભાળી ચૂક્યા છે, જેમાં યુનિક આઇડેન્ટિફિકેશન ઓથોરિટી ઓફ ઇન્ડિયા (UIDAI)ના ડેપ્યુટી ડાયરેક્ટર જનરલ, શ્રમ વિભાગના સચિવ અને કૃષિ નિયામકનો સમાવેશ થાય છે.
ગોપાલનનો આ નિર્ણય એવા સમયે આવ્યો છે જ્યારે ભારતીય ચૂંટણી પંચ (ECI) ઘણા રાજ્યોમાં SIR પર ટીકાનો સામનો કરી રહ્યું છે. એક અંગ્રેજી અખબારમાં ગયા અઠવાડિયે અહેવાલ આવ્યો હતો કે ચૂંટણી કમિશનર સુખબીર સિંહ સંધુ અને વિવેક જોશીએ 10 મહિનામાં ઓછામાં ઓછા 14 વખત કમિશનના નિર્ણયો સામે વાંધો ઉઠાવ્યો હતો. આ મતભેદોમાં મતદાર યાદીમાં નામો સામેલ કરવા માટે ફોર્મ 6માં ફેરફાર, કાર્યનું કેન્દ્રીકરણ, પશ્ચિમ બંગાળમાં મતદાર નામો કાઢી નાખવાની અપીલ અને ગોવામાં લાયક મતદારોનો સમાવેશ કરવામાં નિષ્ફળતાનો સમાવેશ થાય છે.
રસપ્રદ વાત એ છે કે, સપ્ટેમ્બરની શરૂઆતમાં, ભુવનેશ્વરના ડેપ્યુટી કમિશનર ઓફ પોલીસ જગમોહન મીણા, એક IPS અધિકારી, એ પણ સરકારી સેવામાંથી રાજીનામું આપ્યું હતું. ઓડિશા સરકારે 27 ઓગસ્ટના રોજ તેમનું રાજીનામું સ્વીકાર્યું હતું અને ત્યારપછી તેને આગળની પ્રક્રિયા માટે કેન્દ્રીય ગૃહ મંત્રાલયને મોકલી આપ્યું હતું. છેલ્લા 3 વર્ષમાં, ઓડિશા કેડરના 4 IAS અને ભારતીય પોલીસ સેવા (IPS) અધિકારીઓએ રાજીનામું આપ્યું છે. ભૂતપૂર્વ CM નવીન પટનાયકના અનુગામી ગણાતા IAS અધિકારી V.K. પાંડિયન, ઓક્ટોબર 2023માં સ્વૈચ્છિક નિવૃત્તિ (VRS) લીધી હતી અને પછી રાજ્યમાં 2024ની વિધાનસભા અને લોકસભા ચૂંટણી પહેલા BJDમાં જોડાયા હતા.
તેમની પત્ની, ઓડિશા કેડરના IAS અધિકારી સુજાતા કાર્તિકેયન, માર્ચ 2025માં રાજીનામું આપ્યું હતું અને આ વર્ષે જૂનમાં BJDમાં જોડાયા હતા. 2013 બેચના IPS અધિકારી જગમોહન મીણા, કોર્પોરેટ કંપનીમાં જોડાવા માટે ગયા મહિને સ્વૈચ્છિક નિવૃત્તિ લીધી હતી. આ વર્ષની શરૂઆતમાં, IPS અધિકારી CA રામદાસ (2025 બેચના પ્રોબેશનર)એ હૈદરાબાદમાં સરદાર વલ્લભભાઈ પટેલ રાષ્ટ્રીય પોલીસ એકેડેમીમાં તાલીમ દરમિયાન જ રાજીનામું આપી દીધું હતું.
3.jpg)
5.jpg)
