સ્ટ્રોંગ રૂમમાંથી 24 EVM ગાયબ થવા પાછળનું સત્ય શું છે? સરકારી કર્મચારી સસ્પેન્ડ

મધ્ય પ્રદેશમાં 24 EVMની કથિત ચોરીની ઘટના ચોરીનો મામલો નહોતો. તે માત્ર રેકોર્ડમાં બેદરકારી હતી, જેના માટે એક સરકારી કર્મચારીને સસ્પેન્ડ કરી દેવામાં આવ્યો છે. તેનું કારણ જણાવવામાં આવ્યું હતું કે કર્મચારીએ મશીનોનો રેકોર્ડ યોગ્ય રીતે રાખ્યો નહોતો, ફરજમાં બેદરકારી અને મશીનોનું સ્ટેટસ અપડેટ કરી ન કર્યું. આનાથી 'EVM ચોરી'ની વાત ફેલાઈ અને સરકારની છબીને નુકસાન થયું. સસ્પેન્ડ કરાયેલા કર્મચારીનું નામ ફૂલ સિંહ શ્યામ છે, જેઓ એક સહાયક શિક્ષક છે. તેમને EVM સ્ટ્રોંગ રૂમનો રેકોર્ડ રાખવાની જવાબદારી સોંપવામાં આવી હતી.

આ ઘટના મધ્ય પ્રદેશના અનુપપુર જિલ્લાની છે. અહીં તાલુકાની જૂની બિલ્ડિંગમાંથી 24 EVM મશીનો ગાયબ થવા અંગે ફરિયાદ નોંધાવવામાં આવી હતી. ફરિયાદમાં જણાવાયું હતું કે તાલૂકાની તહસીલ બિલ્ડિંગ તોડી પાડવામાં આવી રહી હતી અને ત્યાંથી સામાન શિફ્ટ કરવામાં આવી રહ્યો હતો. જ્યારે આ બધુ કરવામાં આવી રહ્યું હતું, ત્યારે અધિકારીઓને બિલ્ડિંગમાં રાખવામાં આવેલા 24 EVM મશીનો મળ્યા નહોતા. એવી આશંકા હતી કે મશીનો ચોરાઈ ગઇ છે. જે મશીનો 'ગાયબ' બતાવવામાં આવ્યા હતા, તેમાં 8 બેલેટ યુનિટ અને 16 કંટ્રોલ યુનિટનો સમાવેશ થાય છે અને આ બધા રાજ્ય ચૂંટણી પંચના હતા.

મશીનો ન મળ્યા બાદ, અધિકારીઓ પોલીસ સ્ટેશન પહોંચ્યા હતા અને ચોરીની ફરિયાદ નોંધાવી હતી. પોલીસે FIR નોંધીને તપાસ શરૂ કરી હતી. બાદમાં જાણવા મળ્યું કે મશીનો ચોરાયા નહોતા, પરંતુ ખરાબ થઈ ગયા હતા. ત્યારબાદ, 2021માં તમામ 24 મશીનોને ભોપાલમાં રાજ્ય ચૂંટણી પંચને મોકલી આપવામાં આવ્યા હતા. ત્યારબાદ, હૈદરાબાદની કંપની, ઈલેક્ટ્રોનિક્સ કોર્પોરેશન ઓફ INDIA લિમિટેડ (ECIL)એ ખરાબ મશીનો નાશ કર્યો હતો.

જ્યારે ખરાબ મશીનો ચૂંટણી પંચને મોકલી દેવામાં આવ્યા અને ત્યારબાદ તેનો નાશ કરવામાં આવ્યો, તો પછી ચોરીની ફરિયાદ કેમ નોંધાવવામાં આવી? અહીંથી આરોપી ફૂલ સિંહ શ્યામની ભૂમિકા પર સવાલ ઊભા થાય છે. તેમનું કામ સ્ટ્રોંગનો રેકોર્ડ રાખવાનું હતું. કેટલા મશીનો છે કેટલા નહીં, કેટલા ખરાબ છે. કયા મશીનો ક્યાં છે? રેકોર્ડમાં આ જ બધું નોંધવાનું હોય છે. પરંતુ, ફૂલ સિંહ શ્યામ આ કામ સારી રીતે ન કરી શક્યો; તેમણે 24 મશીનો ખરાબ હોવા અ તેમને ભોપાલ મોકલવા અને ત્યારબાદ તેનો નાશ કરવાની માહિતી જિલ્લા રેકોર્ડમાં સારી રીતે નોંધી નહોતી.