અમે બાંગ્લાદેશી 'મિયાઓ' પાસેથી જમીન પાછી લઈશું, UCC લાગૂ કરીશું... ભાજપે આસામમાં 31-વચનોનો ઘોષણાપત્ર બહાર પાડ્યો

બાંગ્લાદેશી 'મિયાઓ' દ્વારા અતિક્રમણ કરાયેલી જમીન પાછી મેળવવા અને રાજ્યમાં સમાન નાગરિક સંહિતા (UCC) લાગૂ કરવા સહિત 31 વચનોના વચન સાથે ભાજપે આસામ ચૂંટણી માટે તેનો 'સંકલ્પ પત્ર' બહાર પાડ્યો છે. મુખ્યમંત્રીએ કહ્યું કે, ‘અમે છઠ્ઠા અનુસૂચિ વિસ્તારો અને અનુસૂચિત જનજાતિ (ST) પ્રદેશોને બાદ કરતા આસામમાં UCC લાગૂ કરીશું. અમે 'લવ જિહાદ' સામે કડક પગલાં લઈશું. અમે આસામને પૂરમુક્ત બનાવવાનો પ્રયાસ કરીશું, અને ફક્ત પહેલા 2 વર્ષમાં અમે આ પહેલ પર ₹18,000 કરોડ ખર્ચ કરીશું. અમે આગામી 5 વર્ષમાં 2 લાખ નોકરીઓ પૂરી પાડીશું. અમે 'એક જિલ્લો, એક મેડિકલ કોલેજ; એક યુનિવર્સિટી; એક એન્જિનિયરિંગ કોલેજ' બનાવવા માંગીએ છે.’

કેન્દ્રીય નાણાં મંત્રી નિર્મલા સીતારમણના નેતૃત્વમાં, ભાજપે આજે મંગળવારે પોતાનો ચૂંટણી ઢંઢેરો બહાર પાડ્યો હતો, જેમાં મૂળ નિવાસીઓની જમીન, વારસો અને ગૌરવનું રક્ષણ અને  5 લાખ કરોડ રૂપિયાના માળખાગત રોકાણનું પણ વચન આપવામાં આવ્યું છે.

આસામમાં શાસક ભારતીય જનતા પાર્ટી (BJP)એ 2026ની વિધાનસભા ચૂંટણી માટે મંગળવારે પોતાનો 'સંકલ્પ પત્ર' બહાર પાડ્યો હતો. 'સંકલ્પ પત્ર' જાહેર કર્યા બાદ નાણા મંત્રી સીતારમણે જણાવ્યું હતું કે આસામમાં શાંતિ અને વિકાસની પુનઃસ્થાપના ફક્ત ત્યારે જ શક્ય છે જો આ પ્રદેશમાં સ્થિરતા હશે. આ ઢંઢેરો આસામમાં એક દાયકાના પરિવર્તન પર આધારિત છે. જે કોંગ્રેસ 60 વર્ષના સમયગાળામાં પણ કરી શકી નથી.  'સંકલ્પ પત્ર' ના વિમોચન દરમિયાન કેન્દ્રીય નાણાં મંત્રી સીતારમણની સાથે-સાથે સર્બાનંદ સોનોવાલ, મુખ્યમંત્રી હિમંત બિસ્વા સરમા, પાર્ટીના પ્રદેશ અધ્યક્ષ દિલીપ સૈકિયા અને અન્ય મહાનુભાવો હાજર રહ્યા હતા.

કેન્દ્રીય મંત્રી સીતારમણે જણાવ્યું હતું કે, ‘કોંગ્રેસ પાર્ટીએ પૂર્વોત્તર ક્ષેત્રના લાંબા ગાળાના વિકાસ પર કોઈ ધ્યાન આપ્યું નથી. આસામમાં શાંતિ અને વિકાસની પુનઃસ્થાપના ત્યારે જ વાસ્તવિકતા બનશે જ્યારે અહીં સ્થિરતા આવશે. રાજ્યમાં ભાજપના શાસન દરમિયાન તકોમાં ખૂબ વધારો જોવા મળ્યો છે; આ કારણે, આસામના યુવાનો હવે તેમના ગૃહ રાજ્યમાં પાછા ફરવા લાગ્યા છે.’

કોંગ્રેસ પર નિશાન સાધતા તેમણે ઉમેર્યું હતું કે, ‘કોંગ્રેસની નીતિઓને કારણે, આસામ 32 વર્ષથી AFSPAના પડછાયા હેઠળ રહેવા માટે મજબૂર હતું; જોકે, ભાજપ સરકારે સુનિશ્ચિત કર્યું કે, આ જતદાને મોટાભાગના રાજ્યોમાંથી હટાવી લેવામાં આવે.’

'સંકલ્પ પત્ર' પર ટિપ્પણી કરતા કેન્દ્રીય મંત્રી સોનોવાલે કહ્યું કે, ‘આ 'સંકલ્પ પત્ર' બનાવવા પાછળનો તર્ક એ છે કે અમે આસામના દરેક ખૂણાના લોકો સુધી પહોંચ્યા. અમે  ઘરે-ઘર ગયા અને આગામી કાર્યકાળમાં શું કરવાનું છે એ માટે સૂચનો માંગ્યા અને તેને એકત્રિત કર્યા. આ દસ્તાવેજના આધાર પર એટલે કે, આસામના લોકોના સૂચનોના આધારે અમે ત્રીજા કાર્યકાળમાં કાર્ય કરીશું. તેમણે જણાવ્યું કે 300,000 થી વધુ લોકોએ તેમના સૂચનો આપ્યા છે. આસામની 126 વિધાનસભા બેઠકો માટે મતદાન 9 એપ્રિલે એક જ તબક્કામાં થશે, જ્યારે મત ગણતરી 4 મેના રોજ થશે.