તમિલનાડુ સરકાર તરફથી સતત મફત લાભો આપતી કલ્યાણકારી યોજનાઓની જાહેરાત કરવામાં આવી રહી છે. મફત યોજનાઓની આ યાદીમાં ઘણી નવી યોજનાઓ ઉમેરવામાં આવી છે. રાજ્યમાં આર્થિક રીતે નબળા પરિવારોને હવે વર્ષે ત્રણ મફત LPG સિલિન્ડર મળશે. ટ્રાન્સજેન્ડર વ્યક્તિઓ માટે મફત બસ મુસાફરી યોજનાની જાહેરાત કરવામાં આવી છે, અને મહિલાઓ માટે મફત બસ મુસાફરીનો વ્યાપ વધારીને એક્સપ્રેસ અને ડિલક્સ સેવાઓનો સમાવેશ કરવામાં આવ્યો છે.
મુખ્યમંત્રી જોસેફ વિજયે આજે સોમવારે વિધાનસભામાં અનેક નવી મફત યોજનાઓની જાહેરાત કરતી વખતા વાર્ષિક ₹2.5 લાખથી ઓછી વાર્ષિક આવક ધરાવતા દરેક પરિવારને દર વર્ષે ત્રણ મફત LPG સિલિન્ડર આપવાની જાહેરાત કરી. સાથે જ આગામી વર્ષે પોંગલથી 'અન્નપૂર્ણી સુપર સિક્સ' યોજના શરૂ કરવામાં આવશે, અને તેનાથી આશરે 1.30 કરોડ પરિવારોને લાભ થવાની અપેક્ષા છે.
આ યોજના હેઠળ, પાત્ર લાભાર્થીઓ દ્વારા ખરીદવામાં આવેલા ત્રણ LPG સિલિન્ડરનો ખર્ચ સીધો તેમના બેંક ખાતામાં જમા કરવામાં આવશે. આ યોજનાથી રાજ્યના ખજાના પર વાર્ષિક આશરે ₹4,000 કરોડનો બોજ પડવાનો અંદાજ છે. આ યોજનાની જાહેરાત કરતા, મુખ્યમંત્રી વિજયે જણાવ્યું હતું કે ગલ્ફ ક્ષેત્રમાં ચાલી રહેલા સંઘર્ષને કારણે રસોઈ ગેસ સિલિન્ડરની અછત અને વધતી કિંમતોએ પરિવારો પર વધારાનો નાણાકીય બોજ નાખ્યો છે.
તેમણે વિધાનસભામાં જણાવ્યું હતું કે, સંકટપૂર્ણપરિસ્થિતિને ધ્યાનમાં રાખીને, અને આર્થિક તંગી છતા, રાજ્ય સરકારે જનતા પરના નાણાકીય બોજને ઓછો કરવા, તેમના કલ્યાણની સુરક્ષા કરવા અને લોકોને આપેલા વચનો પૂરા કરવા માટે રસોઈ ગેસ સિલિન્ડરની કિંમત ભરપાઈ કરવાનો નિર્ણય લીધો છે. ચૂંટણી પહેલા, વિજયની પાર્ટી 'તમિલાગા વેત્રી કઝગમ'એ વર્ષે 6 મફત LPG સિલિન્ડર આપવાનું વચન આપ્યું હતું.
મુખ્યમંત્રી વિજયે ટ્રાન્સજેન્ડર વ્યક્તિઓ માટે મફત બસ મુસાફરી સુવિધાઓની પણ જાહેરાત કરી હતી અને મહિલાઓ માટે 'વેટ્રી પાયના થિટ્ટમ' યોજનાનો વ્યાપ વધાર્યો હતો. આ વિસ્તૃત યોજના હેઠળ, મહિલાઓને ફક્ત સામાન્ય બસોમાં જ નહીં પરંતુ એક્સપ્રેસ, LSS અને ડીલક્સ સેવાઓમાં પણ મફત મુસાફરી કરવાની મંજૂરી હશે. આ સુવિધા આંતર-જિલ્લા બસ સેવાઓ સુધી પણ વધારવામાં આવશે.
વિજયે કહ્યું કે, મહિલાઓની મુસાફરીની સ્વતંત્રતા તેમની આર્થિક સ્વતંત્રતા અને તેમના પરિવારોની પ્રગતિનો પાયો છે. હાલની મફત મુસાફરી યોજના હેઠળ, મહિલાઓને મહાનગર અને શહેરી વિસ્તારોમાં સામાન્ય અને પહાડી રૂટની બસોમાં ફક્ત 40 કિમી સુધી મફત મુસાફરી કરવાની મંજૂરી હતી, જ્યારે એક્સપ્રેસ, LSS, ડિલક્સ અથવા ઉપનગરીય સેવાઓ માટે આવી કોઈ સુવિધા નહોતી. જોકે, નવી યોજના હેઠળ મહિલાઓ મહાનગર અને શહેરી વિસ્તારોમાં ચાલતી એક્સપ્રેસ, LSS અને ડિલક્સ સરકારી બસોમાં તેમજ ઉપનગરીય (મોફસિલ) અને પહાડી પ્રદેશોમાં સામાન્ય ભાડાની બસોમાં મફત મુસાફરી કરી શકે છે.
સામાજિક ન્યાયના સિદ્ધાંતની વાત કરતા મુખ્યમંત્રી વિજયે કહ્યું કે, આ સરકારનો મુખ્ય ઉદ્દેશ્ય સામાજિક ન્યાયનો સિદ્ધાંત છે, જે હેઠળ તમિલનાડુના કોઈપણ ભાગમાં રહેતી કોઈપણ મહિલા પરિવહન ખર્ચને કારણે તકોથી વંચિત ન રહેવી જોઇએ."
તેમણે વધુમાં કહ્યું કે, મહિલા કલ્યાણ પર ધ્યાન કેન્દ્રિત કરતા, સરકારે મહિલાઓ માટે મફત મુસાફરી યોજનાનો મોટાપાયે વિસ્તાર કરવાનો નિર્ણય લીધો છે. 'વેટ્રી પયનમ' (વિજયી યાત્રા) નામ આપવામાં આવ્યું છે, આ યોજના 2 ઓક્ટોબરથી મહાત્મા ગાંધીની જન્મજયંતિ સાથે અમલમાં આવશે. આ નિર્ણયથી રાજ્ય સરકારને વાર્ષિક ₹6,000 કરોડનો વધારાનો ખર્ચ આવશે.=
3.jpg)
