ફોક્સવેગને રજુ કરી સૌથી સસ્તી ઇલેક્ટ્રિક કાર, ID Every1, સુંદર ડિઝાઇન... સ્માર્ટ કેબિન!

જર્મન કાર ઉત્પાદક ફોક્સવેગન તેના ઇલેક્ટ્રિક વાહન પોર્ટફોલિયોને વિસ્તૃત કરવાની તૈયારી કરી રહી છે. કંપનીએ હવે તેની સૌથી સસ્તી હેચબેક ઇલેક્ટ્રિક કાર કોન્સેપ્ટ ફોક્સવેગન ID Every1 રજૂ કરી છે. અત્યાર સુધી કંપનીએ આ નાની કારના ઘણા ટીઝર રિલીઝ કર્યા છે, પરંતુ આ વખતે જે તસવીરો સામે આવી છે તે જોઈને લાગે છે કે તે પ્રોડક્શન રેડી વર્ઝનની ખૂબ નજીક છે.

ફોક્સવેગન કહે છે કે, ID Every1નું પ્રોડક્શન વર્ઝન આ કોન્સેપ્ટ મોડેલથી બહુ દૂર નહીં હોય. આ હેચબેકના આગળના ભાગમાં બ્લેક-આઉટ ફોક્સ ગ્રિલ અને મોટા LED હેડલેમ્પ્સ છે. જે તેને સ્માઈલી ફેસ આપે છે. બમ્પરની બાજુઓ પર વર્ટિકલ LED ડેટાઇમ રનિંગ લાઇટ્સ આપવામાં આવી છે, જે તેના ગોળાકાર ફેસને ટેકો આપે છે. આ ઉપરાંત, બ્લેક-આઉટ એ-પિલર વિન્ડસ્ક્રીન તેના દેખાવને વધુ નિખારે છે.

બાજુઓ પર, વ્હીલ કમાનોને થોડી સરસ રીતે કોતરવામાં આવી છે. પરંતુ તેમાં આક્રમક પાત્ર રેખાઓ નથી. કંપની કહે છે કે, તેમાં સરળ બોડીવર્ક કરવામાં આવ્યું છે, જે આ કારને 'ટાઈમલેસ' અને 'ક્લાસલેસ' ડિઝાઇન આપે છે. આ કોન્સેપ્ટમાં ફ્લશ ડોર હેન્ડલ્સ અને 19-ઇંચ વ્હીલ્સ જોઈ શકાય છે. C-પિલર ડિઝાઇન કંપનીની પ્રખ્યાત પ્રીમિયમ હેચબેક કાર ગોલ્ફની યાદ અપાવે છે.

ફોક્સવેગન કહે છે કે, 3,880 mmની લંબાઈ સાથે, આ કાર ID. 2all (4,050 mm) અને વર્તમાન પોલો (4,074 mm)ની વચ્ચે પોઝિશન કરે છે. તેના કેબિનમાં ચાર લોકો માટે જગ્યા છે અને 305 લિટરની સારી બૂટ સ્પેસ છે. આજે મોટાભાગની કંપનીઓ તેમની કારના કેબિનને સમૃદ્ધ બનાવી રહી છે, ત્યારે ફોક્સવેગને તેની કેબિન સરળ રાખવાનો શ્રેષ્ઠ પ્રયાસ કર્યો છે.

તેમાં એક મોટી ફ્લોટિંગ ઇન્ફોટેનમેન્ટ સ્ક્રીન આપવામાં આવી છે. આ ઉપરાંત, તાપમાન, ગરમી અને વોલ્યુમ નિયંત્રણ જેવી સુવિધાઓ માટે તળિયે ભૌતિક બટનોનો બેન્ડ દેખાય છે. અન્ય હાઇલાઇટ્સમાં નવું ટુ-સ્પોક સ્ક્વેર્ડ-આઉટ સ્ટીયરિંગ વ્હીલ, હેડલેમ્પ ડિઝાઇનની નકલ કરતા AC વેન્ટ્સ અને સેન્ટર કન્સોલનો સમાવેશ થાય છે, જે રેલ પર માઉન્ટ થયેલ છે જેથી તેને આગળથી પાછળના ડબ્બામાં સરકી શકાય. તેમાં ડ્રાઇવર અને પેસેન્જર વચ્ચે જરૂર પડ્યે હટાવી શકાય તેવું બ્લૂટૂથ સ્પીકર પણ છે.

આ નાની ઇલેક્ટ્રિક કારની મોટર 95 HP પાવર જનરેટ કરે છે. કંપનીનું કહેવું છે કે, આ કારની ટોપ સ્પીડ 130 Km પ્રતિ કલાક છે અને એક જ ચાર્જમાં આ કાર 250 Km સુધીની ડ્રાઇવિંગ રેન્જ આપશે. જે શહેરી વિસ્તારોમાં દૈનિક ડ્રાઇવિંગ માટે વધુ સારું સાબિત થશે. જોકે, ફોક્સવેગને તેના બેટરી પેક વગેરે વિશે કોઈ માહિતી શેર કરી નથી.

ફોક્સવેગન આ કારને સૌપ્રથમ વર્ષ 2027માં યુરોપિયન બજારમાં રજૂ કરશે. આ પછી, આ કારને અન્ય બજારોમાં લોન્ચ કરવાની યોજના છે. કંપનીનું કહેવું છે કે, આ કારની કિંમત લગભગ 20,000 યુરો (18.95 લાખ રૂપિયા) હશે. આ એક એન્ટ્રી લેવલ ઇલેક્ટ્રિક હેચબેક કાર છે જે ID પરિવારમાં સૌથી સસ્તી કાર હશે. કંપની બીજી એક કાર ID. 2all જે 2026માં 25,000 યુરો (રૂ. 23.69 લાખ)થી ઓછી કિંમતે લોન્ચ કરવાની યોજના છે.