આ કારની ભારે માગ, કંપનીએ બુકિંગ બંધ કરવું પડ્યું, ક્યારે શરૂ થશે?

ટોયોટા કિર્લોસ્કર મોટર (TKM)એ ડિસેમ્બર 2022માં ટોયોટા ઈનોવા હાઈક્રોસ લોન્ચ કર્યું હતું. ત્યારથી આ કાર સારી રીતે વેચાઈ રહી છે અને ભારતમાં તેની માંગ ઘણી વધારે છે. કંપનીએ એપ્રિલ 2023માં ટોપ મોડલ ZX અને ZX(O) હાઇબ્રિડ વેરિઅન્ટ્સ માટે બુકિંગ બંધ કરી દીધું હતું, જે એક વર્ષ પછી એપ્રિલ 2024માં ફરી શરૂ કરવામાં આવ્યું હતું. પરંતુ હવે માત્ર એક મહિના પછી ફરી ટોયોટાએ આ ટોપ મોડલ હાઇબ્રિડ વાહનોનું બુકિંગ બંધ કરી દીધું છે.

આ કારનું બુકિંગ બંધ કરવાનું સૌથી મોટું કારણ ખૂબ લાંબો વેઇટિંગ પિરિયડ છે. આ હાઇબ્રિડ વેરિઅન્ટ્સ માટે રાહ જોવાનો સમયગાળો લગભગ 15 મહિનાનો છે અને એવી અપેક્ષા રાખવામાં આવે છે કે, જ્યારે આ રાહ જોવાનો સમયગાળો ઘટશે ત્યારે જ બુકિંગ ફરીથી શરૂ થશે. પરંતુ તમે હજુ પણ મિડ-લેવલ VX અને VX (O) હાઇબ્રિડ વાહનો બુક કરી શકો છો. આ કાર બુક કરવા માટે તમારે 50,000 રૂપિયા ચૂકવવા પડશે. આ વાહનો માટે રાહ જોવાનો સમયગાળો લગભગ 3 મહિનાનો છે.

કેટલાક અન્ય સમાચારોમાં, કંપનીએ તાજેતરમાં Toyota Innova Hycross GX(O) વેરિઅન્ટ લોન્ચ કર્યું છે જેની પ્રારંભિક કિંમત રૂ. 20.99 લાખ (એક્સ-શોરૂમ) છે. આ નવું વેરિઅન્ટ જૂના GX વેરિઅન્ટ કરતાં રૂ. 1 લાખ વધુ મોંઘું છે અને તે 7 અને 8 સીટર બંને વિકલ્પોમાં હોઈ શકે છે. આમાં, તમને Apple CarPlay અને Android Auto સાથે 10.1-ઇંચની ટચસ્ક્રીન ઇન્ફોટેનમેન્ટ સિસ્ટમ, ડ્યુઅલ-ટોન ઇન્ટિરિયર, ઓટોમેટિક ક્લાઇમેટ કંટ્રોલ, ડ્યુઅલ-ટોન સીટ્સ, સોફ્ટ-ટચ ડેશબોર્ડ, LED ફ્રોગ લેમ્પ્સ, પાછળની સીટો માટે સનશેડ્સ (માત્ર 7 સીટરમાં) મળે છે, 360 ડિગ્રી કેમેરા અને ફ્રન્ટ પાર્કિંગ સેન્સર ઉપલબ્ધ છે.

Toyota Innova Hycross GX (O) પેટ્રોલમાં 2.0-લિટર, ચાર-સિલિન્ડર પેટ્રોલ એન્જિન છે, જે 173 હોર્સપાવર અને 209Nm ટોર્ક ઉત્પન્ન કરે છે. આ વાહનમાં માત્ર CVT ઓટોમેટિક ગિયરબોક્સનો વિકલ્પ છે, જે વાહનની શક્તિને આગળના પૈડામાં ટ્રાન્સમિટ કરે છે. હાઇક્રોસમાં 2.0-લિટર મજબૂત હાઇબ્રિડ પેટ્રોલ એન્જિનનો વિકલ્પ પણ છે, જે કુલ 184 હોર્સપાવરની શક્તિ ઉત્પન્ન કરે છે અને E-ડ્રાઇવ ટ્રાન્સમિશન સાથે આવે છે.

ઇનોવા હાઇક્રોસના બંને એન્જિન માત્ર આગળના વ્હીલ્સને જ પાવર આપે છે અને મેન્યુઅલ ટ્રાન્સમિશન વિકલ્પ નથી. કંપનીનો દાવો છે કે, હાઈબ્રિડ વાહન 23.24 કિલોમીટર પ્રતિ લીટરની માઈલેજ આપે છે અને રેગ્યુલર પેટ્રોલ વાહન 16.13 કિલોમીટર પ્રતિ લીટરની માઈલેજ આપે છે.