(ઉત્કર્ષ પટેલ)
જ્યારે મોટા ઉદ્યોગપતિઓ કે ધનિક વ્યક્તિઓ કોઈ મોટું દાન કરે છે ત્યારે આખી દુનિયામાં તેમની ચર્ચા થાય છે. ટીવીના સ્ક્રીન પર તેમના ફોટા આવે છે, અખબારોમાં હેડલાઇન્સ છપાય છે, સોશિયલ મીડિયા પર પ્રશંસાનો વરસાદ વરસે છે. લોકો કહે છે “વાહ! કેટલું મોટું હૃદય!” પણ શું ખરેખર આ પ્રશંસા તે કાર્યની કિંમત છે કે માત્ર એક આકર્ષક પ્રદર્શન?
આ જ દુનિયાના એક ખૂણે બીજી એક દુનિયા વસે છે શાંત, નમ્ર, પ્રચાર વિહીન. અહીં એવા લોકો છે જેઓ રોજ સવારે ઊઠીને ચૂપચાપ કોઈને કહ્યા વગર માનવતાને મદદનો હાથ લંબાવે છે. તેમના નામ કદાચ કોઈ એવોર્ડ લિસ્ટમાં નથી, તેમના ફોટા ક્યાંય વાયરલ નથી... પણ તેમના કાર્યની હૂફ હજારો હૃદયોમાં જીવંત છે.
એક ગામની શિક્ષિકા દરરોજ સવારે ધૂળભર્યા રસ્તા પર પગપાળા ચાલીને નાનકડી શાળાએ પહોંચે છે. તેમની પાસે મોટું ફંડ નથી, NGO નથી પણ છે તો માત્ર એક દીવો બાળકો પ્રત્યેનો અતૂટ સ્નેહ. પોતાના નાનકડા પગારમાંથી તેઓ બાળકો માટે પુસ્તકો લાવે છે, યુનિફોર્મની વ્યવસ્થા કરે છે, કેટલીક વખત તો ભૂખ્યા પેટને પોતાના ઘરનું ટિફિનનું ખાવાનું વહેંચી દે છે. તેમનું નામ કદાચ કોઈને ખબર નથી પણ જે બાળકો આજે ભણીને સુખી છે તેમની આંખોમાં તે શિક્ષિકાની મીઠી યાદ છે.
એક નિવૃત્ત ડોક્ટર છે જેઓ હવે કોઈ હોસ્પિટલમાં નથી પણ દર રવિવારે દૂરના ગામડાઓમાં દવા લઈને જાય છે. ગરીબ દર્દીઓને મફત તપાસ, મફત દવા અને સૌથી મોટું મફત હિંમત આપે છે. તેમને કોઈએ “પદ્મશ્રી” નથી આપ્યો પણ જેમના જીવનમાં તેઓ આવ્યા તે લોકો માટે તેઓ જીવંત દેવ છે.
આવા હજારો નામરહિત નાયકો છે. રક્તદાતા જે દર બે મહિને રક્ત આપે છે, અનાથાશ્રમમાં રસોઈ બનાવતી માતા જેવી બહેન, રસ્તા પર ભટકતા પ્રાણીઓને ખવડાવતો યુવાન, પોતાની બાજુમાં રહેતા વૃદ્ધને દવા પહોંચાડતી દીકરી...
આ બધાની એક વાત સામાન્ય છે તેઓ દાન કરે છે પણ અહંકાર નથી કરતા. તેઓ મદદ કરે છે પણ તેની કિંમત નથી માંગતા. તેઓ જાણે છે કે સાચી સેવા એ છે જે ચૂપ રહીને થાય અને જેની પાછળ કોઈ લાઇક કે શેરની ભૂખ ન હોય.
આજે જ્યારે મોટા દાનની વાતો સાંભળીએ તો એક ક્ષણ થોભીને વિચારીએ... સાચું મહાન કાર્ય તો એ છે જે આપણે કોઈને કહ્યા વગર કરીએ. જે લોકો ચુપચાપ સેવા કરે છે તેઓ જ આ સમાજના અસલી સ્તંભ છે. તેમની પાસે કરોડો નથી, પણ કરુણા છે, સમર્પણ છે, નિઃસ્વાર્થ પ્રેમ છે. અને આ ગુણ જ દુનિયા બદલી શકે છે.
આ અજાણ્યા સેવકોને લાખ લાખ પ્રણામ.
તમે દેખાતા નથી, પણ તમારી હાજરી અમને દર પળ અનુભવાય છે.
હૃદયથી ધન્યવાદ અને વંદન.
(લેખક એક પ્રતિષ્ઠિત ઉદ્યોગપતિ, સમાજસેવક અને khabarchhe.comના સંસ્થાપક છે.)
