મંગળવારે ગણેશ ચતુર્થીની રજા બાદ આજે શેરબજાર ભારે ઘટાડા સાથે ખુલ્યું હતું. આ ઘટાડો ખુલતાની સાથે આગળ વધ્યો હતો. હેવીવેઇટ શેર્સમાં ઓલરાઉન્ડ વેચવાલીને કારણે BSE સેન્સેક્સ 796.00 પોઈન્ટના તોતિંગ કડાકા સાથે 66,800.84 પોઈન્ટ પર બંધ રહ્યો હતો. સેન્સેક્સના 30 શેરોમાંથી માત્ર 6 ગ્રોનમાં હતા અને 24 મોટા ઘટાડાની સાથે લાલ નિશાનમાં બંધ થયા હતા. રિલાયન્સ ઈન્ડસ્ટ્રીઝ અને HDFC બેંકના શેરમા ભારે ગાબડાં પડ્યા હતા. શેરબજારમાં એક જ દિવસમાં રોકાણાકારોના 3 લાખ કરોડ રૂપિયા ધોવાઇ ગયા હતા.
બુધવારે શેરબજારમાં HDFC બેન્કનો શેર 3.84 ટકા ઘટીને રૂ. 1565.50 પર બંધ થયો. રિલાયન્સના શેરમાં પણ 2 ટકાથી વધુનો ઘટાડો થયો છે. નિફ્ટી 50 પણ ઉંધા માથે પટકાયો હતો.
બજાર બંધ સમયે નિફ્ટી 50 222.85 પોઈન્ટ ઘટીને 19,910.45 પર બંધ રહ્યો હતો. બજારમાં જોરદાર વેચવાલીથી આજે રોકાણકારોને ભારે નુકસાન થયું હતું. રોકાણકારોએ એક જ દિવસમાં લાખો કરોડ રૂપિયા ગુમાવ્યા. હકીકતમાં, જ્યારે 18 સપ્ટેમ્બરે બજાર બંધ થયું ત્યારે BSE પર લિસ્ટેડ કંપનીઓનું માર્કેટ કેપિટલાઇઝેશન રૂ. 3.23 લાખ કરોડ હતું. તે જ સમયે, બજારમાં આજે મોટા ઘટાડાને કારણે, લિસ્ટેડ કંપનીઓનું માર્કેટ કેપ ઘટીને રૂ. 3.20 લાખ કરોડ થઈ ગયું છે. આ રીતે એક જ દિવસમાં રોકાણકારોના 3 લાખ કરોડ રૂપિયાનું નુકસાન થયું છે.
બુધવારે બજારમાં અચાનક કડાકો કેમ બોલી ગયો? બજારના જાણકારોનું કહેવું છે કે US બોન્ડ યીલ્ડ 16 વર્ષની ટોચે પહોંચી ગયું છે. આ સિવાય ક્રૂડ ઓઈલના ઊંચા ભાવને કારણે કોમોડિટી ફુગાવો વધવાની ભીતિથી પણ રોકાણકારોના સેન્ટિમેન્ટને અસર થઈ હતી. પોલિસી રેટ અંગેના નિર્ણય પહેલા વિદેશી સંસ્થાકીય રોકાણકારોની વેચવાલી અને વિશ્વના વિવિધ દેશોની મધ્યસ્થ બેન્કોના સાવચેતીભર્યા વલણને કારણે બજાર નરમ પડ્યું હતું.
બજારના જાણકારોનું કહેવું છે કે આ સપ્તાહમાં અમેરિકી ફેડરલ રિઝર્વ, બેંક ઓફ ઇંગ્લેંડ અને બેંક ઓફ જાપાનની બેઠક થવાની છે. એ પહેલાં સાવચેતીના પગલાં રૂપે બજારમાં ભારે વેચવાલી નિકળી હતી.
BSE સેન્સેક્સમાં સમાવિષ્ટ શેરોમાં સૌથી વધારે ઘટાડો HDFC બેંકમાં જોવા મળ્યો હતો. ઉપરાંત JSW સ્ટીલ, રિલાયન્સ, અલ્ટ્રાટેક સીમેન્ટ, મારુતિ, ટાટા સ્ટીલ, વિપ્રો, ટેક મહિન્દ્રા, ભારતી એરટેલ, લાર્સન એન્ડ ટોબ્રોમાં ગાબડાં પડ્યા હતા.બીજી તરફ પાવર ગ્રિડ, એશિયન પેઇન્ટસ, સન ફાર્મા NTPC, ITC અને ઇન્ફોસિસ સામેલ છે.
એશિયાના અન્ય સ્ટોક માર્કેટની વાત કરીએ જાપાનનો નિક્કી, ચીનનો શાંઘાઇ કમ્પોઝીટ ઇન્ડેક્સ અને હોંગકોંગના હેંગસેંગમાં પણ ઘટાડો જોવા મળ્યો હતો. બીજી તરફ સાઉથ કોરિયોનો કોસ્પી વધવા તરફી રહ્યો હતો.
ભારતીય શેરબજારોમાં વિદેશી સંસ્થાકીય રોકાણકારોએ સોમવારે 1236.51 કરોડ રૂપિયાનો માલ વેચ્યો હતો.
15.jpg)
