એર ઇન્ડિયાએ તેના માલિકો, ટાટા સન્સ અને સિંગાપોર એરલાઇન્સ પાસેથી આશરે 1.5 અરબ ડૉલર (રૂ. 14355 કરોડ)ના નવા ઇક્વિટી ભંડોળની માંગ કરી છે. એક સમાચાર એજન્સીના જણાવ્યા અનુસાર, એરલાઇનને તાત્કાલિક આ મૂડીની જરૂર છે. જો કે, પ્રસ્તાવિત ભંડોળની પુરેપુરી રકમને બદલે હપ્તામાં પણ આપી શકાય છે. આ દરખાસ્ત પર વાટાઘાટો હાલમાં ચાલી રહી છે, અને ટાટા સન્સ કે સિંગાપોર એરલાઇન્સ દ્વારા કોઈ અંતિમ નિર્ણય લેવામાં આવ્યો નથી.
એર ઇન્ડિયા અને એર ઇન્ડિયા એક્સપ્રેસે માર્ચમાં પૂરા થયેલા નાણાકીય વર્ષમાં 2.33 બિલિયન ડૉલર (₹22,180 કરોડ)નું સંયુક્ત નુકસાન નોંધાવ્યું છે. આ બંને એરલાઇન્સ માટે રેકોર્ડ વાર્ષિક નુકસાન હોવાનું જાણવા મળે છે, જે પાછલા નાણાકીય વર્ષના નુકસાન કરતાં બમણાથી વધુ છે. એર ઇન્ડિયાના મોટા નુકસાનથી તેના શેરધારક, સિંગાપોર એરલાઇન્સના નફા પર પણ અસર પડી છે. નવી ઇક્વિટીની માંગ એરલાઇનના મુખ્ય પરિવર્તન અને ટર્નઅરાઉન્ડ યોજનાનો સામનો કરી રહેલા નાણાકીય દબાણને પ્રતિબિંબિત કરે છે.
2022માં ટાટા ગ્રુપ દ્વારા એર ઇન્ડિયાને હસ્તગત કરવામાં આવ્યા પછી આ સૌથી મોટી જાહેર ભંડોળ વિનંતી છે. એરલાઇન અગાઉ સરકારની માલિકીની હતી. ટાટા ગ્રુપે તેને મજબૂત બનાવવા માટે મોટા પરિવર્તનની યોજના બનાવી હતી, જેમાં જૂના વિમાનોનું નવીનીકરણ, નવા વિમાન ઉમેરવા, નેટવર્કનું વિસ્તરણ અને કામગીરીમાં સુધારો કરવાનો સમાવેશ થાય છે. જો કે, ભારે નુકસાન અને વધતી જતી મૂડીની જરૂરિયાતો વચ્ચે, આ ટર્નઅરાઉન્ડ યોજના હવે વધતા નાણાકીય દબાણનો સામનો કરી રહી છે.
એક સમાચાર એજન્સીના જણાવ્યા અનુસાર, બે વિશ્વસનીય સૂત્રોએ જણાવ્યું હતું કે, એર ઇન્ડિયા આ રકમ નવી ઇક્વિટી તરીકે માંગી રહી છે. એક સ્ત્રોત અનુસાર, એરલાઇનને તાત્કાલિક મૂડીની જરૂર છે, જોકે રોકાણ તબક્કાવાર કરી શકાય છે. સિંગાપોર એરલાઇન્સે પણ તેના હિસ્સાના પ્રમાણમાં આ રોકાણમાં ફાળો આપવો પડશે. સિંગાપોર એરલાઇન્સ એર ઇન્ડિયામાં આશરે 25 ટકા હિસ્સો ધરાવે છે.
સૂત્રો અનુસાર, ભંડોળ અંગે ચર્ચાઓ પ્રારંભિક તબક્કામાં છે અને દરખાસ્તને અંતિમ સ્વરૂપ આપવામાં આવ્યું નથી. બંને સૂત્રોએ નામ ન આપવાની શરતે વાત કરી કારણ કે તેઓ આ બાબતે જાહેરમાં બોલવા માટે અધિકૃત ન હતા.
સમાચાર એજન્સીના સવાલ પર એર ઇન્ડિયા અને ટાટા સન્સે કોઈ ટિપ્પણી કરી ન હતી. સિંગાપોર એરલાઇન્સે કહ્યું કે તે ટાટા સન્સ સાથે એર ઇન્ડિયાના પરિવર્તન કાર્યક્રમને સમર્થન આપી રહી છે. જોકે, કંપનીએ એર ઇન્ડિયાની નાણાકીય સ્થિતિ અંગે ટિપ્પણી કરવાનો ઇનકાર કર્યો હતો.
એર ઇન્ડિયાના ટર્નઅરાઉન્ડ વચ્ચે, એરલાઇનને અનેક પડકારોનો સામનો કરવો પડ્યો છે. ભારતીય એરલાઇન્સ માટે પાકિસ્તાન દ્વારા એરસ્પેસ પ્રતિબંધોએ તેના સંચાલનને અસર કરી છે. આ ઉપરાંત, પશ્ચિમ એશિયામાં ચાલી રહેલા તણાવ અને ઇરાન સંબંધિત વિકાસથી એરલાઇનના આંતરરાષ્ટ્રીય નેટવર્ક પર અસર પડી છે. ગયા વર્ષે થયેલા જીવલેણ વિમાન દુર્ઘટનાનો પણ એર ઇન્ડિયા પર પ્રભાવ પડ્યો હતો, જેમાં 260 લોકોના મોત થયા હતા. આ ઘટનાઓએ એરલાઇનના સંચાલન અને નાણાકીય પરિસ્થિતિ પર વધારાનું દબાણ બનાવ્યું છે.
ટાટા સન્સના ચેરમેન N. ચંદ્રશેખરને અગાઉ જણાવ્યું હતું કે, એર ઇન્ડિયાના ટર્નઅરાઉન્ડમાં 10 વર્ષ સુધીનો સમય લાગી શકે છે. તેમના મતે, એરલાઇનને સપ્લાય ચેઇન વિક્ષેપોને દૂર કરવાની જરૂર છે, તેમજ તેની જૂની સિસ્ટમ્સ, કાર્ય સંસ્કૃતિ અને કાફલાને ફરીથી ગોઠવવાની જરૂર છે. આ દરમિયાન, ખર્ચ ઘટાડવાના પ્રયાસો ચાલી રહ્યા છે. સમાચાર એજન્સીના જણાવ્યા અનુસાર, ટાટા ગ્રુપ ખર્ચને નિયંત્રિત કરવા માટે એરબસ અને બોઇંગથી ઓર્ડર કરાયેલા સેંકડો વિમાનોની ડિલિવરી મુલતવી રાખવાનું વિચારી રહ્યું છે.
3.jpg)
