બીજી તરફ ગુજરાતમાં ફરજ બજાવતા 160 જેટલા આઇપીએસ ઓફિસરોએ તેમના એસોસિયેશન માટે ડીજીપી એચ.પી.સિંઘને નિયુક્ત કરી દીધા છે. સિંઘ એ 1980 બેચના આઇપીએસ અધિકારી છે અને હોમગાર્ડ્ઝ એન્ડ સિવિલ ડિફેન્સના તેઓ ડીજીપી છે. તેઓ હવે આઇપીએસ એસોસિયેશનના નવા પ્રેસિડેન્ટ બન્યા છે.
એડીશનલ ડીજીપી અને સુરતના પોલીસ કમિશનર પદેથી નવી દિલ્હીમાં પ્રતિનિયુક્ત થયેલા રાકેશ અસ્થાનાએ રાજીનામું આપતાં તેમની જગ્યાએ સિંઘની નિયુક્તિ કરી દેવામાં આવી છે. અસ્થાના હાલ નવી દિલ્હીમાં સીબીઆઇના એડિશનલ ડાયરેક્ટર છે. પોલીસ વિભાગના સૂત્રોના જણાવ્યા પ્રમાણે 1985 બેચના એ.કે.સિંઘ આઇપીએસ એસોસિયેશનમાં વાઇસ પ્રેસિડેન્ટ તરીકે નિમાયા છે.
ગુજરાતના ગૃહ વિભાગની બલિહારી જોઇએ તો ઇન્ટેલિજન્સ બ્યુરો ઉપરાંત એટીએસ અને મરીન ટાસ્કફોર્સ જેવી મહત્વની જગ્યાઓ ચાર્જમાં ચાલી રહી છે. રાજ્યના ગૃહ મંત્રી રજની પટેલ અને હોમ વિભાગના વડા પી.કે.તનેજાને તેમના જ ડિપાર્ટમેન્ટને ઠીક કરવામાં રસ નથી.
ગુજરાતના તત્કાલિન રાજ્ય પોલીસ વડા પી.સી.ઠાકુરની નવી દિલ્હીમાં બદલી કર્યા પછી આ જગ્યાનો વધારાનો હવાલો એસીબીના ડાયરેક્ટર પી.પી.પાંડેને સોંપવામાં આવ્યો છે. તેમની આ નિયુક્તિને અદાલતમાં પડકારવામાં આવી છે. આશ્ચર્યની બાબત એવી છે કે છેલ્લા સાત વર્ષથી ગુજરાતના ઇન્ટેલિજન્સ બ્યુરોની જગ્યા ચાર્જથી ચલાવવામાં આવે છે. સીઆઇડી ક્રાઇમના વડા પ્રમોદકુમારને આ વિભાગનો વધારાનો હવાલો આપવામાં આવ્યો છે.
રાજ્યના ગૃહ વિભાગે ડીજીપી મોનિટરીંગ સેલનો વધારાનો હવાલો આઇજી હસમુખ પટેલને આપ્યો હતો પરંતુ તેમણે આ ચાર્જ લેવાનો ઇન્કાર કરી દીધો હતો. બીજી તરફ કાયદો અને વ્યવસ્થાના એડીજી તીર્થરાજ લાંબી રજા પર હોવાથી તેમની જગ્યાનો વધારાનો ચાર્જ એડીજી વી.એમ.પારગીને આપવામાં આવ્યો છે.
આ જ પ્રમાણે વિકાસ સહાય પાસે પણ બે ચાર્જ છે. કોસ્ટલ સિક્યોરિટીના આઇજી નિરજા ગોત્રુ રાવને મરીન ટાસ્કફોર્સના આઇજીનો હવાલો સોંપવામાં આવ્યો છે. અમદાવાદ સ્પેશ્યલ બ્રાન્ચના જેસીપી આર.વી.જોટગીયાને હેડક્વાર્ટરના જેસીપીનો, અમદાવાદ ક્રાઇમ બ્રાન્ચના જેસીપી જે.કે.ભટ્ટને એટીએસના આઇજીનો તેમજ એટીએસના એસપી હિમાંશુ શુક્લાને કરાઇના ડેપ્યુટી ડાયરેક્ટરનો વધારાનો હવાલો આપવામાં આવ્યો છે. રાજ્ય પોલીસ દળની મહત્વની 14 જગ્યાઓ કે જ્યાં ફુલટાઇમ ઓફિસરની આવશ્યકતા છે ત્યાં સરકાર વધારાના ચાર્જથી આઇપીએસ ઓફિસરો ઉપર વધારાનું બર્ડન નાંખી રહી છે પરિણામે ગૃહ વિભાગની કામગીરીમાં વિક્ષેપ ઉભા થાય છે.
27.jpg)
