અમેરિકા અને ઈરાન વચ્ચે વધતા તણાવ અને વૈશ્વિક તેલ-ગેસ સંકટ વચ્ચે, વિશ્વવિખ્યાત પુસ્તક 'રિચ ડેડ પુઅર ડેડ'ના લેખક રોબર્ટ કિયોસાકીએ રોકાણકારો માટે એક ગંભીર ચેતવણી અને સલાહ આપી છે. સોશિયલ મીડિયા પ્લેટફોર્મ 'X' (ટ્વિટર) પર તેમની પોસ્ટ વાયરલ થઈ રહી છે, જેમાં તેમણે આર્થિક મહામંદી અને યુદ્ધ વચ્ચે અમીર બનવાના 'સીક્રેટ' શેર કર્યા છે.
હાલમાં હોર્મુઝ સ્ટ્રેટ (Strait of Hormuz) માં અવરોધને કારણે વૈશ્વિક સપ્લાય ચેઈન પર માઠી અસર પડી છે. જેના લીધે પેટ્રોલ-ડીઝલના ભાવ આસમાને પહોંચ્યા છે અને રોજિંદી ચીજવસ્તુઓ મોંઘી થઈ રહી છે. શેરબજારમાં પણ ભારે ઉતાર-ચઢાવ જોવા મળી રહ્યો છે. આ સ્થિતિમાં કિયોસાકીએ રોકાણકારોને ભવિષ્ય જોવાની સલાહ આપી છે.
કિયોસાકીની બે મહત્વની આગાહીઓ
તેમણે પોતાની પોસ્ટમાં લખ્યું છે કે અત્યારે ભવિષ્ય જોવું બે કારણોસર એકદમ સરળ બની ગયું છે. સરકારો સતત 'નકલી પૈસા' (ચલણી નોટો) છાપતી રહેશે, જેના કારણે દેવું વધતું જશે. પરિણામે મોંઘવારી વધશે અને જે લોકો અમેરિકી ડોલર બચાવીને રાખશે તેમને મોટું નુકસાન થશે. ઈરાનમાં ચાલી રહેલું યુદ્ધ જલ્દી ખતમ થવાનું નથી. આનાથી તેલના ભાવ સતત વધતા રહેશે, જે મોંઘવારીમાં વધુ ભડકો કરશે.
રોબર્ટ કિયોસાકીએ પરંપરાગત આર્થિક સલાહ પર આકરા પ્રહારો કરતા જણાવ્યું કે સૌથી મોટું જૂઠાણું એ છે કે US બોન્ડ્સ સુરક્ષિત છે. વર્ષોથી કહેવામાં આવે છે કે- શાળાએ જાઓ, સારા ગ્રેડ મેળવો, નોકરી કરો, ટેક્સ ભરો, પૈસા બચાવો અને સ્ટોક્સ, બોન્ડ્સ કે મ્યુચ્યુઅલ ફંડમાં લાંબા ગાળા માટે રોકાણ કરો. આ 'મીઠી ગોળી' પર વિશ્વાસ કરનારાઓને સૌથી વધુ નુકસાન થશે.
તેમણે ભારપૂર્વક કહ્યું કે આ તેલ, દેવું અને બેંકિંગ સંકટમાં માત્ર તમારી આર્થિક શિક્ષણ (Financial Education) જ તમને બચાવી શકે છે. જે વસ્તુ છાપી શકાય (જેમ કે કાગળની નોટો), તે 'નકલી' છે.
કિયોસાકીએ રોકાણકારોને આર્થિક ક્રેશમાં પણ અમીર બનવાનો મંત્ર આપતા નીચેની વસ્તુઓમાં રોકાણ કરવા સૂચવ્યું છે:
તેમણે ઉમેર્યું કે, મારા મતે 2026 માટે આ સૌથી સુરક્ષિત રોકાણ છે. જોકે, મારી વાત પર આંખ મીંચીને ભરોસો ન કરો, જાતે સંશોધન કરો અને નક્કી કરો કે તમારા માટે સાચું શું છે.
સોમવારે કરવામાં આવેલી આ પોસ્ટને અત્યાર સુધીમાં 8 લાખથી વધુ વ્યુઝ મળી ચૂક્યા છે. રોબર્ટ કિયોસાકી અવારનવાર આવી આગાહીઓ માટે જાણીતા છે અને તેમની આ નવી પોસ્ટ હાલમાં આર્થિક જગતમાં ચર્ચાનો વિષય બની છે.
