ગુજરાતમાં ફરી ઊડ્યાં દારૂબંધીના ધજાગરા! 2 એક્ટિવામાંથી 455 બોટલો નીકળી, 2ની ધરપકડ

ગુજરાતમાં દારુબંધીના અવારનવાર ધજાગરા ઉડી રહ્યા છે. દારુબંધીના ધજાગરા ઉડાવતી વધુ એક ઘટના સામે આવી છે. વડોદરાના બાપોદમાં પોલીસે દારુ ભરેલી એક્ટિવા ઝડપી પાડી હતી. એક્ટિવાની તપાસ કરતા તેમાંથી 455 બોટલો નીકળી હતી જેને જોઈને પોલીસ પણ આશ્ચર્યચકિત થઈ ગઈ હતી. પોલીસે ઘટનાસ્થળ પરથી દારૂની હેરાફેરી કરતા અલ્કેશ અરવિંદભાઈ રાઠવા અને સુનિલ પ્રતાપભાઈ રાઠવાની ધરપકડ કરી છે અને પોલીસે દારૂ, વાહનો અને મોબાઈલ સહિત 1,41,000નો મુદ્દામાલ કબજે કર્યો છે.

દિવ્યભાસ્કરના અહેવાલ મુજબ, બાપોદ પોલીસની ટીમને પેટ્રોલિંગમાં બાતમી મળી કે બે એક્ટિવા મોપેડ (GJ-06-PM-5003 અને GJ-23-DB-7712) પર વિદેશી દારૂનો જથ્થો લઈ બે શખ્સો પસાર થવાના છે. પોલીસે તુરંત વોચ ગોઠવી બંને એક્ટિવાને અટકાવી હતી. તપાસમાં એક્ટિવામાંથી એટલી દારૂની બોટલો નીકળી કે પોલીસની પણ આંખો પહોળી થઇ ગઈ હતી. ચોરખાનાઓમાં છુપાવેલા દારૂને શોધતા પોલીસને પણ પરસેવો છૂટી ગયો હતો. તપાસ દરમિયાન બંને એક્ટિવામાંથી 91 હજાર રૂપિયાની કિંમતની 455 દારૂની બોટલ મળી આવી હતી.

આ મામલે બાપોદ પોલીસ સ્ટેશનના PI ડી. ડી. લાડુમોરે જણાવ્યું હતું કે, આ કેસમાં દારૂનો જથ્થો આપનાર છોટાઉદેપુરના લગામી ગામના રિતેશ રાઠવાનું નામ સામે આવ્યું છે. વડોદરાના ડોડકા ગામના લક્ષ્મીબેન અર્જૂનભાઈ માળીએ દારૂ મંગાવ્યો હતો. આ બંને આરોપીને વોન્ટેડ જાહેર કરી તેમની શોધખોળ ચાલી રહી છે. પકડેલા બંને આરોપી સામે પ્રોહિબિશન એક્ટ હેઠળ ગુનો નોંધી આગળની તપાસ શરૂ કરી છે.

ETV ભારતના અહેવાલ મુજબ, પોલીસ તપાસ દરમિયાન દારૂના જથ્થા અંગે વધુ મહત્ત્વની વિગતો પણ સામે આવી છે. પ્રાથમિક પૂછપરછમાં આરોપીઓએ જણાવ્યું હતું કે, આ જથ્થો વડોદરાના કોડકા ગામની લક્ષ્મીબેન અર્જૂનભાઈ માળીએ મંગાવ્યો હતો. આ માહિતીના આધારે પોલીસ હવે દારૂનો જથ્થો સપ્લાય કરનાર વ્યક્તિ સુધી પહોંચવાના પ્રયાસમાં છે. આ ઉપરાંત માલ મંગાવનાર લક્ષ્મીબેન માળીની ભૂમિકા અંગે પણ પોલીસ દ્વારા તપાસ કરવામાં આવી રહી છે. દારૂ ક્યાંથી લાવવામાં આવ્યો હતો, કોની પાસેથી મેળવવામાં આવ્યો હતો અને આ હેરાફેરી પાછળ વધુ કોઈ વ્યક્તિ સંકળાયેલી છે કે નહીં તે સહિતના મુદ્દાઓ પર તપાસ આગળ ધપાવવામાં આવી રહી છે.

બાપોદ પોલીસે પકડાયેલા બંને આરોપીઓ સામે કાયદેસરની કાર્યવાહી શરૂ કરી છે. સાથે જ ફરાર વ્યક્તિઓને ઝડપી પાડવા માટે શોધખોળ હાથ ધરવામાં આવી છે. બે સામાન્ય દેખાતા મોપેડમાં મોટી સંખ્યામાં દારૂની બોટલો છુપાવીને લઈ જવામાં આવી રહી હોવાની ઘટના સામે આવતા પોલીસ પણ હવે સમગ્ર સપ્લાય ચેઇન સુધી પહોંચવા તપાસ કરી રહી છે.