પંજાબમાં તાજેતરમાં પૂર્ણ થયેલી મ્યુનિસિપલ ચૂંટણીના પરિણામોમાં શાસક પક્ષ આમ આદમી પાર્ટી (AAP)નો દબદબો રહ્યો છે. 1977માંથી 1909 વોર્ડનું પરિણામ આવી ગયું છે, જેમાં 925 વોર્ડમાંં આમ આદમી પાર્ટીએ જીત મેળવી છે, જ્યારે કોંગ્રેસે 373 સીટ પર અને અકાલી દળે 178 વોર્ડમાં જીત મેળવી છે, જ્યારે ભાજપનું પ્રદર્શન ખરાબ રહ્યું હતું, ભાજપને 1900માંથી 167 વોર્ડમાં જ જીત મળી છે. જ્યારે બહુજન સમાજ પાર્ટીએ 6 વોર્ડ જીત્યા છે. આ પરિણામો સ્પષ્ટપણે શહેરી વિસ્તારોમાં આમ આદમી પાર્ટીનો પ્રભાવ દર્શાવે છે, અને વિરોધ પક્ષોને મુશ્કેલ પડકારનો સામનો કરવો પડ્યો છે.
શુક્રવારે સવારે 8 વાગ્યે મતગણતરી શરૂ થતાં, રાજ્યભરના રાજકીય પક્ષો પરિણામો પર ભારે ઉત્સુકતાથી નજર રાખી રહ્યા હતા. રાજ્ય ચૂંટણી પંચે સંપૂર્ણપણે ન્યાયી, પારદર્શક અને સુરક્ષિત મતગણતરી પ્રક્રિયા સુનિશ્ચિત કરવા માટે ખાસ વ્યવસ્થા કરી હતી. કમિશનના સમયપત્રક મુજબ, દરેક જિલ્લામાં ચૂંટણી નિરીક્ષકોની દેખરેખ હેઠળ મતગણતરી હાથ ધરવામાં આવી હતી. રેન્ડમાઇઝેશન પ્રક્રિયા પછી, કોઈપણ અનિયમિતતા દૂર કરવા માટે ગણતરી નિરીક્ષકો અને સહાયકોની નિમણૂક કરવામાં આવી હતી.
દરેક ગણતરી કેન્દ્ર પર બે માઇક્રો-નિરીક્ષકો પણ ગોઠવવામાં આવ્યા હતા. આ અધિકારીઓ સંબંધિત જિલ્લાના જનરલ ઓબ્ઝર્વરની સીધી દેખરેખ હેઠળ કામ કરતા હતા અને તેમને નિયમિત રિપોર્ટ આપતા હતા. કમિશને સ્પષ્ટ કર્યું હતું કે, ફક્ત અધિકૃત વ્યક્તિઓને જ ગણતરી કેન્દ્રોમાં પ્રવેશ આપવામાં આવશે. દરેક ઉમેદવારને દરેક ગણતરી ટેબલ પર ગણતરી એજન્ટ નિયુક્ત કરવાની મંજૂરી આપવામાં આવી હતી. ઉમેદવાર અથવા તેનો ચૂંટણી એજન્ટ ગણતરી હોલમાં રહીને સમગ્ર પ્રક્રિયાનું નિરીક્ષણ કરી શકે છે.
રાજ્ય ચૂંટણી પંચે વોર્ડવાર પરિણામો ઓનલાઈન ઉપલબ્ધ કરાવવાની પણ વ્યવસ્થા કરી હતી. 'મ્યુનિસિપલ ચૂંટણીઓ 2026ના પરિણામો' ટેબ હેઠળ કમિશનની વેબસાઇટ પર પરિણામો અપલોડ કરવામાં આવી રહ્યા છે. ચૂંટણી પરિણામો વિશે માહિતીની ઝડપી પહોંચ સુનિશ્ચિત કરવા માટે ગણતરી કેન્દ્રો પર મીડિયા પ્રતિનિધિઓ માટે પણ જરૂરી સુવિધાઓ પૂરી પાડવામાં આવી હતી.
અત્રે ઉલ્લેખનીય છે કે, પંજાબમાં 26 મેના રોજ મતદાન યોજાયું હતું. આ ચૂંટણીમાં, 8 મ્યુનિસિપલ કોર્પોરેશનો, 75 મ્યુનિસિપલ કાઉન્સિલો અને 20 નગર પંચાયતો સહિત કુલ 103 શહેરી સંસ્થાઓ માટે મતદાન થયું હતું. મતદાન દરમિયાન મતદારોએ ઉત્સાહપૂર્વક ભાગ લીધો હતો. પોલીસ દળો, વહીવટી અધિકારીઓ અને CCTV સર્વેલન્સની તૈનાતી દ્વારા સુરક્ષા મજબૂત બનાવવામાં આવી હતી.
