દર વર્ષે રક્ષાબંધન પર બહેન પોતાના ભાઈને રાખડી બાંધે છે. એવી મનોકામના સાથે કે, ભાઈ હંમેશા બહેનની રક્ષા કરે. સદીઓથી ચાલી આવતી આ પ્રથા હવે આ નવા જમાના પ્રમાણે બદલાઈ રહી છે. જ્યારથી બહેનો ઘરની બહાર નીકળીને દુનિયાની સામે આવવા લાગી છે, ત્યારથી બહેનો પણ જાણી ગઈ છે કે, કેવી રીતે પોતાનું તેમજ પોતાના પરિવારનું રક્ષણ કરવું. ખાસ કરીને, જો ભાઈ નાનો હોય તો આ જ બહેનો પોતાનો જીવ જોખમમાં મૂકતાં જરાય અટકતી નથી. જો તમને વિશ્વાસ ન હોય તો જુઓ આ વીડિયો તમને તમારી વિચારસરણી બદલવા મજબૂર કરી દેશે, જેમાં એક બહેનની હિંમત સામે પાણીનું એક ભારે વહેણ પણ તેની ધાર ધીમી કરવા મજબુર થઇ ગયું હતું.
આવા ઘણા વીડિયો ચોમાસા દરમિયાન જોવામાં આવતા હોય છે, જ્યારે પાણીના જોરદાર પ્રવાહો જિંદગીને પોતાના ભારે વહેણ સાથે ખેંચીને લઇ જતા હોય છે, તેમાં જે ખરેખર નસીબદાર હોય છે તે બચી જાય છે. જ્યારે કેટલાક બદનસીબ સાબિત થતા હોય છે, પરંતુ જેને આવી હિંમતવાન બહેનનો સાથ મળતો હોય છે, ત્યાં તેમને નસીબ પણ સાથ આપવા મજબૂર બની જતું હોય છે. ઈન્સ્ટાગ્રામ પર વાઈરલ થઈ રહેલો આ વીડિયો એવી જ એક બહેનની મજબૂત હિંમતની કામયાબીનો નમૂનો છે. આ વીડિયો 'ઝિંદગી ગુલઝાર હૈ' નામના ઈન્સ્ટાગ્રામ હેન્ડલ દ્વારા શેર કરવામાં આવ્યો છે, જેમાં એક બાળક પાણીના જોરદાર પ્રવાહમાં ફસાયેલો જોવા મળે છે. તે ભારે પ્રવાહની ઉપલી ધાર પર જ ફસાઈ ગયો હતો. જો થોડી પણ ભૂલ થાય તો બાળક ધોધની સાથે નીચે પથ્થરો પર પડી જાય તેમ હતું, તેને બચાવવા માટે એક બહેન પાણીના ભારે પ્રવાહથી ડર્યા વિના તેને મજબૂત રીતે પકડી રાખે છે. જ્યાં સુધી અન્ય લોકો તેને પકડીને બહાર કાઢવા ન આવે ત્યાં સુધી આ બહેન હિંમત હારતી નથી. આખરે તે બહેન પોતાના ભાઈને અને પોતાને બચાવવામાં સફળ થાય છે.
બહેનની આ હિંમતને લોકો દિલથી સલામ કરી રહ્યા છે. કેટલાક યુઝર્સે લખ્યું કે, બહેન માતાનું બીજું સ્વરૂપ છે. એક યુઝરે લખ્યું કે, આવી બહેનને સલામ. એક યુઝરે લખ્યું કે, દરેકને આવી બહેન મળવી જોઈએ. અહીં તમને જણાવી દઈએ કે, આ વાયરલ વીડિયોને અત્યાર સુધીમાં 11 લાખથી વધુ લોકો જોઈ ચૂક્યા છે. સમાચાર લખાય છે ત્યાં સુધી આ વીડિયોને 75 હજારથી વધુ લોકોના લાઈક પણ મળી ચુક્યા છે.
15.jpg)
