ઉત્તર પ્રદેશના બાંદામાં એક લગ્ન થવાના હતા, પરંતુ છેલ્લી ઘડીએ કંઇક એવું થયું કે લગ્નની જાન જ ન આવી. હકીકતમાં લગ્ન પહેલા જ વરરાજા અને તેના પરિવારની માંગણીઓએ બધાને ચોંકાવી દીધા હતા. વરરાજાના પરિવારે કહ્યું કે, તેઓને દહેજમાં TV, કુલર, રેફ્રિજરેટર અથવા વોશિંગ મશીન નથી જોઈતું, અમને તેના બદલે રોકડા રૂપિયા જોઈએ છે. જ્યારે કન્યાના પરિવારે રોકડ રકમ આપવાનો ઇનકાર કર્યો, ત્યારે હંગામો થઇ ગયો, અને પરિણામ એ આવ્યું કે, લગ્નની જાન જ ન આવી અને તેના કારણે લગ્ન રદ કરવા પડ્યા હતા.
આ મામલો હવે પોલીસ સુધી પહોંચ્યો છે. કન્યાના પરિવારે પોલીસ અધિક્ષક (SP)ને ફરિયાદ કરી છે અને વરરાજાના પરિવાર સામે કાર્યવાહીની માંગ કરી છે. તેમનો દાવો છે કે, કન્યા મહેંદી લગાવીને રાહ જોઈ રહી હતી, પરંતુ લગ્નની જાન ન આવી, જેના કારણે સમાજમાં તેમની પ્રતિષ્ઠા ખરાબ થઇ ગઈ. SP પલાશ બંસલે પીડિતની સામે જ સ્ટેશન ઇન્ચાર્જને ફોન કર્યો અને તાત્કાલિક કાર્યવાહી કરવા સૂચના આપી.
આ ઘટના અટારા પોલીસ સ્ટેશન વિસ્તારમાં બની. પીડિત જે તે જ શહેરના રહેવાસી છે, તેમણે બતાવ્યું હતું કે, તેણે તેની પુત્રીના લગ્ન શહેરમાં જ ગોઠવ્યા હતા. લગ્નની જાન 11 માર્ચ, 2026ના રોજ આવવાની હતી. તે પહેલાં, તેણે તિલક સમારંભ, બારીક્ષા સમારંભમાં લાખો રૂપિયા ખર્ચો કર્યો હતો અને બાઇક અને સોનાના દાગીના આપ્યા હતા. તેણે વધુમાં જણાવ્યું કે, લગ્નની જાન આવવાના દિવસે, તેમણે બધી તૈયારીઓ કરી રાખી હતી ત્યારે અચાનક, વરરાજા પક્ષના કેટલાક સભ્યો આવ્યા અને કુલર, રેફ્રિજરેટર, TV, વોશિંગ મશીન વગેરે જેવી દહેજની વસ્તુઓ આપવાની ના પાડી અને તેના બદલે રોકડ રકમની માંગણી કરી. જો તેઓ આનું પાલન નહીં કરે તો તેઓએ લગ્નની જાન લઈને નહીં આવવાની ધમકી આપવા લાગ્યા.
પીડિતે તેમને સમજાવવાનો ઘણો પ્રયાસ કર્યો, પરંતુ તેઓ માન્યા ન હતા. કન્યાના પિતાએ જણાવ્યું કે, તેમણે પહેલેથી જ બધી વસ્તુઓ ખરીદી લીધી છે અને તેમની પાસે 3 લાખ રૂપિયા રોકડા છે જ નહીં, પરિણામ એ આવ્યું કે, કન્યાનો પરિવાર જાન આવવાની આતુરતાથી રાહ જોઈ રહ્યો, કન્યા હાથ પર મહેંદી લગાવીને વરરાજાની રાહ જોઈ રહી હતી, પરંતુ લગ્નની જાન ત્યાં પહોંચી જ નહીં. ત્યાર પછી, ઘણા લોકો આવ્યા, તેમની સાથે અપશબ્દોનો દુર્વ્યવહાર કર્યો અને તેમને મારી નાખવાની ધમકી આપી. પીડિત પિતાએ જણાવ્યું કે, તેમણે સાડા દસ લાખ રૂપિયા ખર્ચ કર્યા છે. તેમણે SPને કહ્યું કે સમાજમાં તેમની પ્રતિષ્ઠા ખરાબ થઇ ગઈ છે, અને હવે આગળ તેમની પુત્રીના લગ્ન કેવી રીતે થશે? આ ઘટનાથી તેમની પુત્રી અને તેના પરિવારને માનસિક આઘાત લાગ્યો હતો. તેમણે કાર્યવાહીની માંગ કરી હતી.
SP પલાશ બંસલે પીડિત પિતાની દુર્દશાને ગંભીરતાથી સાંભળીને તાત્કાલિક સ્ટેશન ઇન્ચાર્જને તપાસ કરવા અને કાર્યવાહી કરવાનો આદેશ આપ્યો. સ્ટેશન ઇન્ચાર્જે જણાવ્યું કે, બંને પક્ષોને બોલાવવામાં આવ્યા છે અને તપાસ ચાલી રહી છે. તપાસ કર્યા પછી આગળની કાયદેસરની કાર્યવાહી કરવામાં આવશે.
