ઓબેન ઇલેક્ટ્રિકે ભારતમાં તેની નવી ઇલેક્ટ્રિક બાઇક, ઓબેન રોર ઇવો લોન્ચ કરી છે. આ બાઇક રૂ. 1 લાખ (એક્સ-શોરૂમ)થી શરૂ થાય છે, પરંતુ આ કિંમત ફક્ત પહેલા 10,000 ગ્રાહકો માટે જ માન્ય રહેશે. તે પછી, કિંમત વધીને રૂ. 1.25 લાખ થશે. કંપનીએ બુકિંગ શરૂ કરી દીધું છે, અને ડિલિવરી આવતા મહિનાથી શરૂ પણ થઇ જશે. આ બાઇક તમારા બજેટમાં એક સારું ઇલેક્ટ્રિક વિકલ્પ છે, ખાસ કરીને સસ્તું અને સ્ટાઇલિશ EV શોધી રહેલા લોકો માટે.
નવી રોર ઇવો કંપનીના ARX પ્લેટફોર્મ પર બનાવવામાં આવી છે, પરંતુ તેમાં મોટર, બેટરી અને ડ્રાઇવટ્રેનમાં ઘણા મોટા ફેરફારો કરવામાં આવ્યા છે. તેમાં નવી 9 kWની મોટર આપવામાં આવી છે, જે કંપનીએ જાતે બનાવી છે, અને ખાસ વાત એ છે કે, તેમાં રેર-અર્થ મટિરિયલ્સનો ઉપયોગ નથી કરવામાં આવ્યો. આ મોટર IP68 રેટિંગ સાથે આવે છે, જે તેને પાણી અને ધૂળ પ્રતિરોધક બનાવે છે.
આ બાઇક 8 વર્ષની વોરંટી સાથે 3.4kWh LFP બેટરી દ્વારા સંચાલિત થાય છે. કંપનીનો દાવો છે કે, આ બેટરીનું પરીક્ષણ 280 ડિગ્રી સેલ્સિયસ સુધી કરવામાં આવ્યું છે, જે તેની મજબૂતાઈ બતાવે છે. રેન્જની વાત કરીએ તો, બાઇક 180 કિલોમીટર સુધી ચાલી શકે છે, જ્યારે વાસ્તવિક જીવનમાં લગભગ 150 કિલોમીટરની રેન્જ આપે છે, જે પહેલા કરતા લગભગ 25 ટકા વધુ છે.
રોર ઇવોની ટોપ સ્પીડ 110 Km/h હોવાનું જણાવાયું છે, અને તે માત્ર 5 સેકન્ડમાં 0થી 40 Km/hની ઝડપ પકડી લે છે. તેનો પીક ટોર્ક 250 Nm છે, જે તેને ઝડપી અને શક્તિશાળી બનાવે છે. તેમાં હવે ચેઇન-ડ્રાઇવ સિસ્ટમ આપવામાં આવી છે, જે બાઇકની કાર્યક્ષમતામાં લગભગ 10 ટકા વધારો કરે છે.
બાઇકનું વજન 140 કિલો રાખવામાં આવ્યું છે, જેના કારણે તેને નિયંત્રિત કરવાનું સરળ બની જાય છે. આ ઉપરાંત, તેમાં 200mm ગ્રાઉન્ડ ક્લિયરન્સ અને 780mm સીટની ઊંચાઈ છે, જે તેને રોજિંદા ઉપયોગ માટે આરામદાયક બનાવે છે.
બાઇકમાં ટ્રેલીસ ફ્રેમ અને આગળના ભાગમાં ટેલિસ્કોપિક ફોર્ક દ્વારા સસ્પેન્શન અને પાછળના ભાગમાં 7-સ્ટેપ એડજસ્ટેબલ મોનોશોક આપવામાં આવ્યું છે. બ્રેકિંગ માટે આગળ અને પાછળ બંને બાજુ 270mm ડિસ્ક બ્રેક્સ અને CBS સિસ્ટમ પણ આપવામાં આવી છે.
ડિઝાઇનની વાત કરીએ તો, તેમાં LED લાઇટ્સ, પ્રોજેક્ટર હેડલાઇટ અને DRLsનો નવો ફ્રન્ટ લુક છે. આ બાઇક ચાર રંગોમાં ઉપલબ્ધ છે, વાદળી, લાલ, સફેદ અને કાળો.
રોર ઇવોમાં બ્લૂટૂથ કનેક્ટિવિટી સાથે 5-ઇંચ TFT ડિસ્પ્લે આપવામાં આવી છે. તે 4 રાઇડિંગ મોડ્સ ઓફર કરે છે- ઇકો, રોડ, હેવોક અને સ્માર્ટ IQ. સ્માર્ટ IQ મોડ તમારી રાઇડિંગ સ્ટાઇલના આધારે રેન્જનો અંદાજ કાઢવા માટે AIનો ઉપયોગ કરે છે.
તેમાં ફોલ એલર્ટ ફીચર પણ છે, જે અકસ્માતના કિસ્સામાં તમારા ઇમરજન્સી કોન્ટેક્ટ્સને સૂચના મોકલીને એલર્ટ કરે છે. તેમાં 6 લિટર અંડર-સીટ સ્ટોરેજ અને USB પોર્ટ સાથે 4-લિટર ટાંકી સ્ટોરેજ પણ આપવામાં આવી છે.
ચાર્જિંગ માટે, તેમાં ઓબેન પ્લગ પણ આપવામાં આવ્યું છે, જે સ્ટાન્ડર્ડ 15A સોકેટથી કામ કરે છે. આ ઉપરાંત, ઓબેન પોર્ટ ચાર્જિંગના પ્રતિ મિનિટ આશરે 1 કિલોમીટરની રેન્જમાં વધારો કરી શકાય છે. આ ફીચર તેને રોજિંદા ઉપયોગ માટે વધુ અનુકૂળ બનાવે છે.
