E20 પેટ્રોલ. તમે કદાચ નામ સાંભળ્યું હશે. તાજેતરમાં, જંતર-મંતર પર ભૂખ હડતાળ, ઉપવાસ અને Gen-Zના પ્રદર્શન વચ્ચે, આ નામ ધ્યાન બહાર રહી ગયું હતું. પરંતુ ફરી એકવાર, ઇથેનોલ-મિશ્રિત બળતણ હેડલાઇન્સમાં છે. પ્રથમ, કોકરોચ જનતા પાર્ટીએ NEET પેપર લીક મુદ્દે સરકારને ઘેરી લીધી, જેના પરિણામે કેન્દ્રીય શિક્ષણ પ્રધાન ધર્મેન્દ્ર પ્રધાને રાજીનામું આપવું પડ્યું. હવે, સોશિયલ મીડિયા પર એક નવો 'પક્ષ' ઉભો થયો છે. તેનું નામ 'E20 જનતા પાર્ટી' છે. માંગ ફક્ત એક જ છે, દેશના લોકોને E20 સાથે 100 ટકા શુદ્ધ પેટ્રોલ ખરીદવાનો વિકલ્પ મળવો જોઈએ. મીમ્સ, કટાક્ષ અને પ્રશ્નોથી શરૂ થયેલી આ ઝુંબેશ હવે પેટ્રોલ પંપથી લઈને સરકારની બળતણ નીતિ સુધી ચર્ચાને વેગ આપી રહી છે.
સોશિયલ મીડિયા પર શેર કરાયેલી એક લાંબી પોસ્ટ અનુસાર, E20 જનતા પાર્ટી પોતાને નાગરિકો દ્વારા ચલાવવામાં આવતી ગ્રાહક અધિકાર ઝુંબેશ તરીકે વર્ણવે છે. આ હેતુ માટે સોશિયલ મીડિયા પ્લેટફોર્મ 'X' પર એક હેન્ડલ બનાવવામાં આવ્યું છે. આ જૂથ દલીલ કરે છે કે, ઇંધણ નીતિઓ પારદર્શક, સચોટ અને ગ્રાહક પસંદગીનો આદર કરતી હોવી જોઈએ. તેઓ દલીલ કરે છે કે, જેમ લોકો પાસે અન્ય ઉત્પાદનો માટે વિકલ્પો હોય છે, તેમ ગ્રાહકોને પેટ્રોલ ખરીદતી વખતે પણ પસંદગી કરવાની સ્વતંત્રતા મળવી જોઈએ.
E20 જનતા પાર્ટીની પ્રાથમિક માંગ એ છે કે, દેશના દરેક પેટ્રોલ પંપ પર E20ની સાથે 100 ટકા શુદ્ધ પેટ્રોલ ઉપલબ્ધ કરાવવું જોઈએ. આ સોશિયલ મીડિયા હેન્ડલની એક પોસ્ટ મુજબ, તેઓ કોઈપણ સબસિડીવાળા ઇંધણ, મફત ઇંધણ અથવા ઇથેનોલ-મિશ્રિત પેટ્રોલને નાબૂદ કરવાની માંગ કરી રહ્યા નથી. તેઓ ફક્ત ઇચ્છે છે કે ગ્રાહકોને તેમની જરૂરિયાત મુજબનું પેટ્રોલ પસંદ કરવાનો અધિકાર મળે.
જૂથ જણાવે છે કે, ઘણા વાહન માલિકોએ ઘટેલા માઇલેજ, એન્જિન નિષ્ફળતા, જાળવણી ખર્ચ અને એન્જિન પર લાંબા ગાળાની અસર અંગે ચિંતા વ્યક્ત કરી છે. તેઓએ બધા ઇંધણનું સ્પષ્ટ લેબલિંગ, વિવિધ ઇંધણ મિશ્રણોના ફાયદા અને ગેરફાયદા પર ડેટા જાહેર કરવા અને માઇલેજ, એન્જિન અસર, પ્રદૂષણ અને જાળવણી ખર્ચ પર સ્વતંત્ર સંશોધનની જોગવાઈ કરવાની પણ માંગ કરી હતી. પક્ષ દલીલ કરે છે કે, નાગરિકોને ફક્ત એક જ વિકલ્પ ન આપવો જોઈએ, તમામ જાણકારી આપીને નિર્ણયો લેવા માટેનો અધિકાર મળવો જોઈએ.
E20 જનતા પાર્ટીનો અભિગમ કોકરોચ જનતા પાર્ટી જેવો જ છે. તે સોશિયલ મીડિયા, મીમ્સ અને વ્યંગ દ્વારા પણ સમર્થન મેળવવાનો પ્રયાસ કરી રહી છે. મે 2026માં સ્થપાયેલ કોકરોચ જનતા પાર્ટી એક વ્યંગાત્મક ઝુંબેશ તરીકે શરૂ થઈ હતી પરંતુ ત્યાર પછી NEET પેપર લીક પર રાષ્ટ્રીય રાજધાનીમાં એક મોટા આંદોલનમાં પરિવર્તિત થઈ, જેમાં દેશભરના વિદ્યાર્થીઓ અને વિદ્યાર્થી સંગઠનોએ ભાગ લીધો.
https://twitter.com/E20Party/status/2081279004536144115
E20 જનતા પાર્ટી પણ આ જ પ્રકારનો અભિગમ અપનાવી રહી હોય તેવું લાગે છે. 16 મેના રોજ અભિજીત દિપકે દ્વારા લખેલી એક પોસ્ટ શેર કરતા, જૂથે લખ્યું, 'જો બધા બાઇક અને કાર માલિકો એક સાથે આવે તો શું થશે.' આ અગાઉ, અભિજીત દિપકે લખ્યું હતું, 'જો બધા કોકરોચ એકસાથે આવે તો શું થશે.' આ જ થીમને અનુસરીને, E20 જનતા પાર્ટી લોકોને જોડવાનો પ્રયાસ કરી રહી છે.
જોકે, E20 જનતા પાર્ટી હાલમાં કોઈ ઔપચારિક સંગઠન નથી. તેની પાસે કોઈ ઘોષિત સ્થાપક, સંગઠન અથવા મોટા પાયે શેરી ચળવળ નથી. તે હાલમાં સોશિયલ મીડિયા પર ડિજિટલ ઝુંબેશ તરીકે સક્રિય છે. જો કે, લોકો 'X' અને Instagram પર ઝડપથી આ ઝુંબેશમાં જોડાઈ રહ્યા છે. આ લખાય રહ્યું છે ત્યાં સુધી, 'X' હેન્ડલ પર 13,000થી વધુ ફોલોઅર્સ છે અને ઇન્સ્ટાગ્રામ હેન્ડલ પર 8,800થી વધુ ફોલોઅર્સ જોડાઈ ચુક્યા છે.
