સોમવારની સવાર દેશભરના લાખો બેંક ગ્રાહકો માટે રાહતના મોટા સમાચાર લઈને આવી છે. 28-30 સપ્ટેમ્બર દરમિયાન યોજાનારી ત્રણ દિવસીય રાષ્ટ્રવ્યાપી બેંક હડતાળ છેલ્લી ઘડીએ ટાળી દેવામાં આવી. 'યુનાઇટેડ ફોરમ ઓફ બેંક યુનિયન્સ' (UFBU)એ રવિવાર, 27 સપ્ટેમ્બરના રોજ એક સત્તાવાર નિવેદનમાં આ જાહેરાત કરી હતી. એવી આશંકાઓ હતી કે, હાફ-ઈયરલી ક્લોઝિંગના બરાબર પહેલા આ હડતાળને કારણે બેંકિંગ કામગીરી સંપૂર્ણપણે ઠપ્પ થઈ જશે. આ દરમિયાન સામાન્ય લોકો સાથે-સાથે વ્યાપારી વ્યવહારો પણ ગંભીર રીતે અટકી શકતા હતા. જોકે, રવિવારે મોડી રાત્રે બનેલી એક મહત્ત્વપૂર્ણ ઘટનાએ સમગ્ર પરિસ્થિતિ બદલી નાખી.
રવિવારે રાત્રે 9:30 વાગ્યે, 'ઇન્ડિયન બેંક્સ એસોસિએશન' (IBA)ની ટીમે UFBUના પ્રતિનિધિઓ સાથે મહત્ત્વપૂર્ણ બેઠક યોજી હતી. આ તણાવપૂર્ણ બેઠકમાં બેંક યુનિયનોની લાંબા સમયથી પડતર માંગણીઓ પર વિગતવાર વાતચીત કરવામાં આવી હતી. મુખ્ય માંગણી 'પાંચ દિવસીય બેંકિંગ સપ્તાહ' (ફાઈવ-ડે વર્કિંગ વીક) લાગૂ કરવાની હતી. બેઠક દરમિયાન IBAએ યુનિયનોને સ્પષ્ટ ખાતરી આપી હતી કે તેમની તમામ વ્યાજબી માંગણીઓ અંગે સકારાત્મક પગલાં લેવામાં આવશે. આ ખાતરીના આધારે, યુનિયનોએ પ્રસ્તાવિત ત્રણ દિવસીય હડતાળ પાછી ખેંચવાનો અંતિમ નિર્ણય લીધો.
બેંક કર્મચારીઓ લાંબા સમયથી ફાઈવ-ડે વર્કિંગ વીકની માંગણી કરી રહ્યા છે. વર્તમાન વ્યવસ્થા હેઠળ જોવા જઇએ તો, બેંકો મહિનાના માત્ર બીજા અને ચોથા શનિવારે બંધ રહે છે; યુનિયનોની માંગ છે કે તમામ શનિવારને સાર્વજનિક રજા જાહેર કરવામાં આવે. રવિવારની રાત્રે થયેલી વાતચીત બાદ હવે એવો નિર્ણય લેવામાં આવ્યો છે કે આ મહત્ત્વપૂર્ણ મુદ્દાના ઉકેલ માટે એક ઉચ્ચ-સ્તરીય સમિતિની રચના કરવામાં આવશે.
આ સમિતિમાં IBAના પ્રતિનિધિઓ સાથે-સાથે UFBUના સભ્યોનો સમાવેશ થશે. આ વિશેષ સમિતિ બાકીના શનિવારોએ રજા આપવા માટેના તમામ સંભવિત વિકલ્પોની ઝીણવટભરી તપાસ કરશે. આ ઉપરાંત, તમામ હિતધારકો સાથે પરામર્શ કરીને એવો ઉકેલ લાવવામાં આવશે, જેનાથી બેંક કર્મચારીઓના રાહત મળે અને ગ્રાહકોને પણ પરેશાની ન થાય. આ માંગણી માર્ચ 2024ના વેતન સમાધાનનો એક મુખ્ય ભાગ હતી, અને આખરે તેના ઉકેલ માટે નક્કર પગલાં લેવામાં આવી રહ્યા છે.
હડતાળ ટળી જવા પાછળનું કારણ માત્ર શનિવારની રજાનો મુદ્દો જ નહોતો; સ્કેલ IV અને તેથી ઉપરના સ્તરના બેંક અધિકારીઓ માટેની 'પર્ફોર્મન્સ-લિંક્ડ ઇન્સેન્ટિવ' (PLI) યોજના અંગે પણ યુનિયનની ગંભીર ચિંતાઓ હતી. UFBUના નિવેદન અનુસાર, હવે આ બાબતે IBA સાથે ચર્ચા કરવાનો માર્ગ મોકળો થઇ ગયો છે. યુનિયનનો આગ્રહ છે કે કેન્દ્ર સરકારને કોઈ પણ નવો પ્રસ્તાવ રજૂ કરવામાં આવે તે પહેલાં PLI યોજના અંગેની તેમની તમામ ચિંતાઓનું નિરાકરણ લાવવામાં આવે. આ ઉપરાંત, એવી આશા છે કે 8 માર્ચ, 2024ના રોજ ચર્ચાયેલા અન્ય પડતર મુદ્દાઓનો પણ જલ્દી ઉકેલ આવશે. બંને પક્ષો બાકી મુદ્દાઓને શક્ય તેટલી વહેલી તકે ઉકેલવા માટે કામ કરશે.
હડતાળ સંપૂર્ણપણે ટળી ગઈ હોવાથી સોમવાર, 28 સપ્ટેમ્બરના રોજ તમામ બેંકો સામાન્ય રીતે કાર્યરત રહેશે. હડતાળને કારણે બેંકિંગ સેવાઓમાં મોટા પાયે વિક્ષેપ પડવાની આશંકા હતી. સમાચાર એજન્સી ANIના અહેવાલ મુજબ, દેશભરમાં ઘણી બેંક શાખાઓ રવિવારે પણ ખુલ્લી રાખવામાં આવી હતી. તેનો મુખ્ય ઉદ્દેશ્ય એ સુનિશ્ચિત કરવાનો હતો કે ગ્રાહકો હડતાળ શરૂ થાય તે પહેલાં તેમના આવશ્યક કામો પૂર્ણ કરી શકે. જોકે, હવે ત્રણ દિવસની દેશવ્યાપી હડતાળનું જોખમ દૂર થઈ ગયું છે. હવે યુનિયનનું ધ્યાન ઉચ્ચ-સ્તરીય સમિતિની આગામી બેઠકો પર રહેશે.
5.jpg)
