જ્યારે સેલિબ્રિટીઓ કોઈ બ્રાન્ડનો પ્રચાર કરે છે, ત્યારે લોકો તે ઉત્પાદનો પર વિશ્વાસ કરવાનું શરૂ કરે છે. તેઓ વિચારે છે કે તે સેલિબ્રિટીઓ પોતે પણ તે ઉત્પાદનોનો ઉપયોગ કરે છે. જ્યારે હકીકતમાં એવું નથી હોતું. તેથી, જ્યારે તે ઉત્પાદનોમાં ખામી નીકળે છે, ત્યારે લોકો ઉત્પાદનની સાથે તેને વેચનાર વ્યક્તિને પણ સંભળાવવાનું શરૂ કરે છે. શાહરૂખ ખાન અને દીપિકા પાદુકોણ સાથે પણ કંઈક આવું જ બન્યું છે. તે બંને હ્યુન્ડાઇ કાર કંપનીના બ્રાન્ડ એમ્બેસેડર છે અને તેના કારણે, એક વ્યક્તિએ તેમની સામે FIR નોંધાવી છે.
મીડિયા સૂત્રોના અહેવાલ મુજબ, આ FIR રાજસ્થાનના ભરતપુરમાં રહેતા કીર્તિ સિંહ દ્વારા દાખલ કરવામાં આવી છે. તેણે બંને કલાકારો અને હ્યુન્ડાઇ કંપનીના અન્ય 6 લોકો સામે છેતરપિંડીનો કેસ દાખલ કર્યો છે. તેનો આરોપ છે કે, કંપનીના લોકોએ તેને છેતરપિંડીથી ઉત્પાદન ખામીવાળી કાર વેચી હતી. જેના કારણે તેને ઘણી સમસ્યાઓનો સામનો કરવો પડ્યો છે.
કીર્તિએ વર્ષ 2022માં હ્યુન્ડાઇ અલ્કઝાર કાર ખરીદી હતી. પરંતુ તેમાં પહેલા દિવસથી જ સમસ્યાઓ આવવા લાગી. ફરિયાદીએ દાવો કર્યો હતો કે, આ ખામીઓ કારમાં પહેલાથી જ હતી. તેમણે આ અંગે ઘણી ફરિયાદો પણ કરી હતી. પરંતુ વારંવાર વિનંતી કરવા છતાં, હ્યુન્ડાઇએ તેમની વાત સાંભળી નહીં. ઊલટું, તેઓ તેને ટાળતા રહ્યા હતા, જેના કારણે કારની મુશ્કેલીઓ વધી ગઈ. કીર્તિના મતે, જ્યારે આનાથી તેમના અને તેમના પરિવારના જીવ પર ખતરો વધ્યો, ત્યારે તેમણે કાનૂની માર્ગ અપનાવવાનું નક્કી કર્યું.
જોકે, કીર્તિએ શાહરુખ-દીપિકા અને અન્ય લોકો સામે સીધો પોલીસ કેસ દાખલ કર્યો ન હતો. તેમણે પહેલા ભરતપુરની CJM કોર્ટ નંબર 2માં એક ફરિયાદ દાખલ કરી. કોર્ટે તેમની સમસ્યા સમજી અને મથુરા ગેટ પોલીસને આ મામલે FIR દાખલ કરવાનો આદેશ આપ્યો. તરત જ, પોલીસે તમામ આરોપીઓ સામે કલમ 420 (છેતરપિંડી) અને અન્ય કલમો હેઠળ કેસ નોંધ્યો છે.
આ કેસમાં શાહરુખ અને દીપિકાના નામ સામે આવ્યા, કારણ કે કીર્તિએ તેમના પર વિશ્વાસ કરીને કાર ખરીદી હતી. તેમના મતે, આ બંને કલાકારો આ કેસમાં બાકીના કંપની જેટલા જ દોષિત છે. તેઓએ જાણી જોઈને આ ખરાબ કારનો પ્રચાર કર્યો હતો, અને લોકો તેના પરિણામો ભોગવી રહ્યા છે.
5.jpg)
