અમદાવાદના સરદાર વલ્લભભાઈ પટેલ ઇન્ટરનેશનલ (SVPI) એરપોર્ટ પર કસ્ટમ્સ વિભાગે દાણચોરીના એક અનોખા કેસનો પર્દાફાસ કર્યો છે. જાપાનથી વિયેતનામ થઈને અમદાવાદ પહોંચેલા એક મુસાફર પાસેથી 61 કિંમતી ડિઝાઇનર પેન જપ્ત કરવામાં આવી છે. આ પેનની કુલ અંદાજિત કિંમત આશરે 25 થી 30 લાખ રૂપિયા આંકવામાં આવી છે.
રવિવારે સવારે, વિયેતજેટ ફ્લાઇટ નંબર VJ 1805માં હો ચી મિન્હ સિટી થઈને જાપાન થી અમદાવાદ આવી રહેલા એક પુરુષ મુસાફરને શંકાસ્પદ વર્તન કરતા જોવા મળ્યો હતો. બેગેજ સ્કેનિંગ પ્રક્રિયા દરમિયાન કસ્ટમ્સ અધિકારીઓને મુસાફરના સામાનમાં કેટલીક શંકાસ્પદ છબીઓ મળી આવી; જેના આધારે મુસાફરને અટકાવવામાં આવ્યો હતો, અને તેના સામાનની સંપૂર્ણ તપાસ કરવામાં આવી હતી.
તપાસ દરમિયાન, મુસાફરના સામાનમાંથી 61 પ્રીમિયમ ડિઝાઇનર અને ઉચ્ચ-મૂલ્યવાળી શાહી પેન મળી આવી હતી. તપાસમાં જાણવા મળ્યું કે મુસાફરે કસ્ટમ ડ્યૂટીથી બચવા માટે જાણી જોઈને આ પેન છુપાવી હતી. એક પેનની અંદાજિત કિંમત 40,000 થી 50,000 રૂપિયા સુધીની છે.
જપ્ત કરાયેલી વસ્તુઓની કુલ અંદાજિત બજાર કિંમત 25 લાખ અને 30 લાખ રૂપિયા છે. કસ્ટમ્સ એક્ટ, 1962ની જોગવાઈઓ હેઠળ તમામ મુદ્દામાલ જપ્ત કરી લેવામાં આવ્યો છે. જોકે, આ પેનની ચોક્કસ કિંમત હજુ સુધી સત્તાવાર રીતે નક્કી કરવામાં આવી નથી, કારણ કે ચાર્ટર્ડ એકાઉન્ટન્ટ (CA) તેમનું મૂલ્યાંકન કરશે. આ કેસના સંદર્ભમાં મુસાફરની હાલમાં પૂછપરછ કરવામાં આવી રહી છે, અને વધુ તપાસ ચાલી રહી છે.
