અમરેલી પોલીસે બાળકીની વિગતોના આધારે 12 વર્ષ જૂનો કેસ ઉકેલ્યો, મળી ત્યારે....

અમરેલી પોલીસે પ્રશંસનીય કામગીરી કરતાં 12 વર્ષ જૂનો અપહરણનો કેસ ઉકેલી કાઢ્યો છે. આ કામગીરી પોલીસ માટે સરળ નહોતી કારણ કે તેની પાસે છોકરીનો નાનપણનો એટલે કે 13 વર્ષની ઉંમરનો ફોટો, જન્મ તારીખ અને પરિવારની વિગત હતી. 13 વર્ષે એક છોકરી ગુમ થઈ ગઈ હતી, જેના 12 વર્ષ વીતી ચૂક્યા બાદ તે કેવી દેખાય છે તે પણ ખબર નહોતી.

દિવ્યભાસ્કર અહેવાલ મુજબ, વર્ષ 2014માં અમરેલી તાલુકા પોલીસ સ્ટેશનમાં 13 વર્ષની સગીરા ગુમ, અપહરણ અને POCSO એક્ટ હેઠળ ગંભીર ગુનો નોંધાયો હતો. વિતેલા વર્ષો દરમિયાન આશરે 16 પોલીસ ઈન્સ્પેક્ટર બદલાયા, પરંતુ કેસનો ઉકેલાયો નહીં. તાજેતરમાં એન્ટી હ્યુમન ટ્રાફિકિંગ યુનિટે જૂના કેસના દસ્તાવેજો અને ટેક્નિકલ સોર્સના આધારે ફરીથી ઝીણવટભરી તપાસ શરૂ કરી હતી. જેમાં 12 વર્ષ પહેલાં એક 13 વર્ષની સગીરા ગુમ થયાનો કેસ ઉકેલાઈ ગયો હતો.

પોલીસ પાસે માત્ર ગુમ થનાર બાળકીનો જૂનો ફોટો, જન્મ તારીખ અને પરિવારની વિગતો હતી. મહિલા કર્મચારીઓની ટીમ બનાવીને સોશિયલ મીડિયા પર તપાસ કેન્દ્રીત કરવામાં આવી.  પોલીસ ટીમ સોશિયલ મીડિયા એકાઉન્ટો ફંફોળતી હતી ત્યારે એક હેપ્પી બર્થ ડેની પોસ્ટ મળી. બાદમાં એકાઉન્ટને વધુ તપાસતા તેમાંથી એક રિક્ષાનો ફોટો મળ્યો. જેમાં આગળ તપાસ કરતા પોલીસને ઘરનું એડ્રેસ મળ્યું. બાદમાં પોલીસ વસ્તી ગણતરીના બહાને ઘર સુધી પહોંચી અને સગીરાની ઓળખ કરતા 13 વર્ષની સગીરા 25 વર્ષની યુવતી અને 4 બાળકની માતા બની ગઈ હતી. સગીરાની જન્મ તારીખના આધારે મહિલા કર્મચારીઓએ 1800 ઇન્સ્ટાગ્રામ અને ફેસબુક ID તપાસ્યા. તપાસ દરમિયાન એક શંકાસ્પદ ID પર ભોગ બનનારની જન્મ તારીખના દિવસે જ 'હેપી બર્થડે' વિશ કરતી એક પોસ્ટ મળી આવી. આ શંકાસ્પદ પ્રોફાઈલના એક ફોટામાં પાછળ એક રિક્ષા દેખાતી હતી. જે બાદ RTOમાંથી ગાડીના નંબરના આધારે તેના માલિકનો મોબાઈલ નંબર મેળવ્યો હતો.

મોબાઇલ નંબરની તપાસ કરતા જાણવા મળ્યું કે, આ નંબર પરથી 'ગુજરાત ગ્રામીણ બેંક'માં એક ખાતું ખોલાવવામાં આવ્યું હતું. બેંક એકાઉન્ટ ખોલાવતી વખતે ભોગ બનનાર યુવતીનો ગુમ થયા સમયનો જ જૂનો ફોટો આપવામાં આવ્યો હતો. ફોટો મેચ થતા પોલીસની શંકા મજબૂત બની, પરંતુ યુવતી અને આરોપીનું ચોક્કસ સરનામું મળવાનું બાકી હતું.

બેંકમાંથી મળેલી વિગતોને આધારે પોલીસ ટીમ મોરબી જિલ્લાના હળવદ તાલુકાના ભલગામડા ગામ સુધી પહોંચી. સ્થાનિક સ્તરે ઓળખ છતી ન થાય તે માટે પોલીસ કર્મચારીઓએ વસ્તી ગણતરીના શિક્ષક સ્ટાફ તરીકે શેરીઓમાં જઈ પૂછપરછ શરૂ કરી.

5-7 ઘરની તપાસ બાદ શંકાસ્પદ ઘર આવ્યું. જ્યાં યુવતી હાજર હતી, પરંતુ તેણે પોતાનું નામ અલગ બતાવ્યું. પોલીસે ચતુરાઈ વાપરીને પૂછ્યું, તમારા પિયરમાં નોંધણી થઈ ગઈ હશે તો અહીં સરકારી લાભો નહીં મળે, માટે પિયરના પિતાનું નામ આપો. યુવતીએ તેના પિતાનું સાચું નામ આપતા જ ફરિયાદી સાથે નામ મેચ થઈ ગયું અને ગુમ થયેલી બાળકીની ઓળખ પાકી થઈ ગઈ. આ દરમિયાન રિક્ષા ચલાવવા ગયેલા આરોપીને પણ વસ્તી ગણતરીના બહાને ઘરે બોલાવીને પોલીસે તેની અટકાયત કરી હતી.

પોલીસ તપાસમાં સામે આવ્યું કે, વર્ષ 2014માં માતા સાથે મનદુઃખ થતા સગીરા ગુસ્સામાં ઘરેથી નીકળી ગઈ હતી. તે રાજકોટ બસ સ્ટેન્ડ પર 2-3 દિવસ રહી હતી, જ્યાં એક સજ્જન વ્યક્તિએ તેનો ઉછેર કર્યો હતો. ત્યાર બાદ તે આરોપીના સંપર્કમાં આવી અને પેલા સજ્જન વ્યક્તિએ બંનેના સામાજિક રીતે રાજીખુશીથી લગ્ન કરાવ્યા હતા. હાલ આ યુવતી પોતાના પરિવાર સાથે જીવન જીવી રહી છે અને તેને 4 બાળક પણ છે. સગીરાના હાલના પતિને સામે કાયદેસરની કાર્યવાહી હાથ ધરી જેલહવાલે કરવામાં આવ્યો છે.

SP સંજય ખરાતે જણાવ્યું હતું કે, ગુજરાત સરકાર અને પોલીસનો અભિગમ ગુમ થયેલા બાળકો કે વ્યક્તિઓને પરિવાર સાથે પુનઃ મિલાવવાનો છે. અમરેલી પોલીસે 2025 અને 2026ના વર્ષ દરમિયાન કુલ 111 ગુમ/અપહરણ થયેલા બાળકો અને 342થી વધુ પ્રૌઢ વ્યક્તિઓને શોધીને પરિવાર સાથે પુનઃ મિલન કરાવ્યું છે.