હવે કોઈ ભારતને તોડી શકશે નહીંઃ મોહન ભાગવત

મુંબઈમાં આયોજિત 'મુંબઈ વ્યાખ્યાનમાળા'ના બીજા દિવસે રાષ્ટ્રીય સ્વયંસેવક સંઘ (RSS)ના સરસંઘચાલક મોહન ભાગવતે સામાજિક અને રાજકીય મુદ્દાઓ પર ખુલીને વાત કરી હતી. સંઘના 100 વર્ષ પૂર્ણ થવાના અવસરે '100 Years of Sangh Journey - New Horizons' વિષય પર આયોજિત આ કાર્યક્રમમાં તેમણે જાતિવાદ, ભાષા વિવાદ અને ધર્માંતરણ જેવા ગંભીર વિષયો પર સંગઠનનું વલણ સ્પષ્ટ કર્યું હતું.

રાષ્ટ્રીય સ્વયંસેવક સંઘ (RSS) ના વડા મોહન ભાગવતે ભારતની બદલાતી વસ્તી ગતિશીલતાને સંબોધવા માટે સરકારના પ્રયાસો વિશે વાત કરી. મોહન ભાગવતે જણાવ્યું હતું કે સરકારે અગાઉ દેશના વસ્તી માળખાને બદલવા માટે પૂરતું કામ કર્યું નથી. આ દિશામાં ગંભીર પ્રયાસો છેલ્લા ત્રણથી ચાર વર્ષમાં જ શરૂ થયા છે. ભારતમાં પોપ્યુલેશન ડાયનામિક્સ બદલવા પાછળનું કારણ જન્મ દરમાં અસંતુલન અને ગેરકાયદેસર ઘૂષણખોરી છે. જો કે, તેમણે એમ પણ કહ્યું કે હવે સરકારે આના પર કામ શરૂ કરી દીધું છે, તો તે ચોક્કસપણે સફળ થશે. તેમણે વધુમાં કહ્યું, "હવે કોઈ ભારતને તોડી શકશે નહીં. જે કોઈ ભારતને તોડવાનો પ્રયાસ કરશે તે પોતે જ તૂટી જશે."

જાતિવાદ અને સંગઠનનું માળખું

જાતિના પ્રશ્ન પર ભાગવતે સ્પષ્ટપણે જણાવ્યું હતું કે, "સંઘમાં કોઈપણ જાતિની વ્યક્તિ સર્વોચ્ચ પદ સુધી પહોંચી શકે છે. અનુસૂચિત જાતિ કે જનજાતિ હોવું એ કોઈ અવરોધ નથી અને બ્રાહ્મણ હોવું એ કોઈ વિશેષ લાયકાત નથી." તેમણે સ્વીકાર્યું હતું કે શરૂઆતના તબક્કે સંઘમાં બ્રાહ્મણોની સંખ્યા વધુ હતી, પરંતુ આજે સંગઠન તમામ જાતિઓ માટે સમાન રીતે કામ કરે છે.

RSSના ફંડિંગ અંગે ચાલી રહેલી જિજ્ઞાસા પર વિરામ મુકતા તેમણે કહ્યું કે, સંગઠન મુખ્યત્વે સ્વયંસેવકોના સહયોગથી ચાલે છે. પ્રવાસ દરમિયાન પણ કાર્યકરો હોટલમાં જમવાને બદલે સ્વયંસેવકોના ઘરે રોકાય છે અને તેમના દ્વારા આપવામાં આવેલ ભોજન જ લે છે.

ભાષા વિવાદ અને ધર્માંતરણ

• ભાષા: અંગ્રેજી ભાષા અંગે તેમણે કહ્યું કે, "અમારે અંગ્રેજી સાથે કોઈ વેર નથી. જ્યાં તેના વિના કામ ન ચાલે ત્યાં અમે તેનો ઉપયોગ કરીએ છીએ, પરંતુ અમારો આગ્રહ હંમેશા માતૃભાષા અથવા હિન્દીના પ્રયોગ પર જ હોય છે." તેમણે ભાષા વિવાદને 'સ્થાનિક બીમારી' ગણાવી હતી.
• ધર્માંતરણ (ઘર વાપસી): ધર્માંતરણ પર બોલતા તેમણે જણાવ્યું કે અલગ-અલગ ધાર્મિક વિચારોનું સન્માન થવું જોઈએ. જોકે, જેમનું બળજબરીથી ધર્મ પરિવર્તન કરાવવામાં આવ્યું છે, તેમને તેમની ઈચ્છાથી પરત લાવવા જોઈએ (ઘર વાપસી). તેમણે કવિ નારાયણ વામનરાવનું ઉદાહરણ આપીને કહ્યું કે તેમણે ખ્રિસ્તી ધર્મ અપનાવ્યો હોવા છતાં અમે તેમનું સન્માન કરીએ છીએ.

મુસ્લિમ વિસ્તારો અને ગેરકાયદેસર પ્રવાસીઓ

મુસ્લિમ વિસ્તારોમાં કામ કરતી વખતે આવતા પડકારો વિશે તેમણે સલાહ આપી કે જો કોઈ અપશબ્દો કહે તો તેની પ્રતિક્રિયા ન આપવી જોઈએ, કારણ કે તેનાથી ટકરાવ વધે છે. ગેરકાયદેસર પ્રવાસીઓ મુદ્દે તેમણે સરકારને અપીલ કરી કે તેમની ઓળખ કરી તેમને દેશનિકાલ કરવા જોઈએ. સાથે જ ભારપૂર્વક કહ્યું કે, ભારતમાં વેપારની તકો ભારતીયોને જ મળવી જોઈએ, પછી ભલે તેઓ ગમે તે ધર્મના હોય.