ઇન્ડિયન પ્રીમિયર લીગ (IPL) 2026માં શાનદાર શરૂઆત કરનાર 15 વર્ષીય વૈભવ સૂર્યવંશી હવે રાજસ્થાન રોયલ્સની (RR)ની રણનીતિથી સંપૂર્ણપણે નાખુશ છે. ટીમ માટે 200 રન બનાવનાર આ ખેલાડીએ તાજેતરમાં 'ઇમ્પેક્ટ પ્લેયર' તરીકે ઉપયોગ કરવા અંગે નારાજગી વ્યક્ત કરી છે.
સનરાઇઝર્સ હૈદરાબાદ (SRH) સામેની મેચમાં સૂર્યવંશી 'ગોલ્ડન ડક'નો શિકાર થયો હતો. તેને ડેબ્યૂ કરનાર ફાસ્ટ બોલર પ્રફુલ હિંગેએ શોર્ટ બોલ પર ચોંકાવતા આઉટ કરી દીધો હતો. બોલ તેના બેટની ઉપરની ધાર સાથે લાગીને ઉપર જતો રહ્યો હતો, જેને વિકેટકીપર સલિલ અરોડાએ પકડી લીધો હતો.
https://twitter.com/StarSportsIndia/status/2043729192429510987?s=20
મેચ દરમિયાન રાજસ્થાન રોયલ્સના ફિલ્ડિંગ કોચ ટ્રેવર પેનીએ એક મોટો ખુલાસો કર્યો. તેમણે કહ્યું કે વૈભવ એ વાતથી નિરાશ છે કે, તેને સતત ઇમ્પેક્ટ પ્લેયર તરીકે ઉપયોગ કરવામાં આવી રહ્યો છે, જેથી તેને ફિલ્ડિંગ કરવાની તકો મળી રહી નથી. પેનીએ કહ્યું કે, ‘જ્યારે તે છેલ્લી મેચમાં ન રમ્યો, ત્યારે તે ખુશ નહોતો. તેને ફિલ્ડિંગ કરવાનું પસંદ છે. એવું નથી કે તે ખરાબ ફિલ્ડર છે.’
હકીકતમાં, ડોનોવન ફેરેરા સ્વસ્થ થયા બાદ તે ટીમમાં પાછો ફરતા સૂર્યવંશીને પ્લેઇંગ ઇલેવનમાંથી બહાર બેસવું પડ્યું હતું. ફેરેરા SA20 દરમિયાન કોલરબોન ઇજાથી પીડાઇ રહ્યો હતો, પરંતુ હવે તે ફિટ થઈ ગયો છે અને તેની શાનદાર ફિલ્ડિંગને કારણે ટીમમાં સ્થાન મેળવ્યું છે. ફેરેરાએ SRH સામે આ વિશ્વાસને સાચો સાબિત કર્યો. જ્યારે ટીમે 9 રનમાં 5 વિકેટ ગુમાવી દીધી હતી, ત્યારે તેણે ઇનિંગ્સને સ્થિર કરી. ફેરેરાએ 44 બોલમાં 69 રનની શાનદાર ઇનિંગ રમી, જેમાં 7 ચોગ્ગા અને 3 છગ્ગાનો સમાવેશ થાય છે.
તેણે રવિન્દ્ર જાડેજા સાથે છઠ્ઠી વિકેટ માટે 118 રનની ભાગીદારી કરી, જે IPL ઇતિહાસમાં બીજી સૌથી મોટી ભાગીદારી હતી. નોંધનીય છે કે, ફેરેરાની IPLમાં આ પહેલી અડધી સદી હતી. ફેરેરાને IPLમાં અગાઉ વધારે તકો મળી નહોતી. તેણે 2024માં RR માટે 2 મેચ રમી હતી, પરંતુ તેને બેટિંગ કરવાની તક મળી નહોતી. તેણે દિલ્હી કેપિટલ્સ માટે પણ માત્ર એક જ મેચ રમી હતી.
શું સૂર્યવંશી ફરીથી ઇમ્પેક્ટ પ્લેયર બનશે?
RRને આ મેચમાં સીઝનની પહેલી હારનો મળી છે, હવે ટીમની આગામી મેચ 19 એપ્રિલે ઇડન ગાર્ડન્સ ખાતે કોલકાતા નાઈટ રાઇડર્સ (KKR) સામે રમાવાની છે. હવે એ જોવું રસપ્રદ રહેશે કે વૈભવ સૂર્યવંશીનો ફરીથી ઇમ્પેક્ટ પ્લેયર તરીકે ઉપયોગ થશે કે પછી તેને પ્લેઇંગ ઇલેવનમાં તક મળશે.
