મહારાષ્ટ્રમાં નકલ મુક્ત પરીક્ષાના તમામ દાવાઓનો બીડ જિલ્લામાં પર્દાફાશ થયો છે. જિલ્લાના ચૌસાલામાં એક જૂનિયર કોલેજમાં 12મા ધોરણની બોર્ડ પરીક્ષાના પહેલા જ દિવસે નકલનો એક ગંભીર મામલો સામે આવ્યો છે. અંગ્રેજી પરીક્ષા દરમિયાન, વાલીઓ બહારથી વિદ્યાર્થીઓને કાપલીઓ અને જવાબો પહોંચાડવા માટે પરીક્ષા કેન્દ્રની આસપાસ એકઠા થઇ ગયા. આ સમગ્ર ઘટના શિક્ષણ વિભાગ અને પોલીસ દ્વારા તૈનાત કરાયેલા ડ્રોન કેમેરામાં કેદ થઈ ગઈ હતી.
અહેવાલો અનુસાર, સોમવારે સવારે 12મા ધોરણની અંગ્રેજી પરીક્ષા શરૂ થતા જ, પરીક્ષા કેન્દ્રની બહાર અસામાન્ય ગતિવિધિઓ જોવા મળી હતી. ડ્રોન ફૂટેજમાં સ્પષ્ટપણે દેખાય છે કે કેટલાક વાલીઓ અને સંબંધીઓ કોલેજની દીવાલો અને બારીઓ પાસે ઉભા હતા, વિદ્યાર્થીઓને જવાબોવાળી કાપલીઓ પાસ કરવાનો પ્રયાસ કરી રહ્યા હતા. કેટલાક લોકો તો બારીઓ પર ચઢતા પણ જોવા મળ્યા હતા.
ડ્રોન કેમેરો આવતો જોઈને ઘણા લોકો ઘટનાસ્થળેથી ભાગી જતા જોવા મળ્યા હતા. એવું કહેવામાં આવી રહ્યું છે કે કોલેજ કેમ્પસ ખુલ્લુ હોવાને કારણે બહારથી વિદ્યાર્થીઓ સુધી પહોંચવું સરળ થઈ ગયું, અને તેનો ફાયદો ઉઠાવીને વાલીઓ નકલ કરાવવા ભેગા થઈ ગયા. વહીવટીતંત્ર અને શિક્ષણ વિભાગે આ બાબતને ગંભીરતાથી લીધી છે અને તપાસ શરૂ કરી છે.
અધિકારીઓનું કહેવું છે કે ડ્રોન સર્વેલન્સ દ્વારા આવી ગતિવિધિઓ પર નજર રાખવામાં આવી રહી છે અને દોષિતો સામે કડક કાર્યવાહી કરવામાં આવશે. આ ઘટનાએ ફરી એકવાર રાજ્યના નકલ મુક્ત પરીક્ષા માટેના અભિયાન પર પ્રશ્નો ઉભા કર્યા છે અને પરીક્ષા કેન્દ્રો પર સુરક્ષા અને દેખરેખને વધુ મજબૂત બનાવવાની જરૂરિયાત પર ભાર મૂક્યો છે.
5.jpg)
