મહારાષ્ટ્રની નાગપુર વિધાનસભામાં CM શિંદે- DyCM ફડણવીસ સરકારનું ચાલુ શિયાળુ સત્ર શુક્રવારે સમાપ્ત થયું. આખું સત્ર હોબાળાથી ભરેલું હતું. સત્રના છેલ્લા દિવસે પણ વિધાનસભામાં વિપક્ષના નેતા અજિત પવારે CM એકનાથ શિંદે જૂથ પર આકરા પ્રહારો કર્યા હતા. તેમણે કહ્યું કે શિવસેના સામે બળવો કરીને CM શિંદે જૂથમાં સામેલ થયેલા 30 થી 35 ધારાસભ્યોને સરકાર દ્વારા Y+ સુરક્ષા પૂરી પાડવામાં આવી છે. Y પ્લસ સિક્યોરિટી (Y+)ની કિંમત 20 લાખ રૂપિયા પ્રતિ મહિને આવે છે. આખરે આ ધારાસભ્યોને Y પ્લસ સુરક્ષા આપવાની શું જરૂર છે? જે પણ ધારાસભ્યને ખરેખર તેની જરૂર છે તેને આ રક્ષણ મળવું જોઈએ. પછી તે શાસક પક્ષના હોય કે વિપક્ષના ધારાસભ્ય. અજિત પવારે કહ્યું કે, જે રીતે ધારાસભ્ય ભાસ્કર જાધવના ઘરની બહાર બોમ્બ મળ્યો હતો.
આ દર્શાવે છે કે તેનો જીવ જોખમમાં છે. પવારે કહ્યું કે, રાજન સાલ્વીને લઈને તેમણે ગઈકાલે CMને એક પત્ર આપ્યો છે. તે જે વિસ્તારમાં કામ કરે છે ત્યાં તેનો જીવ પણ જોખમમાં છે. આ ઉપરાંત ધર્મરાવબાબા આત્રામ એક જનપ્રતિનિધિ હોવા છતાં તેમનું અપહરણ કરવામાં આવ્યું હતું. પોલીસ વિભાગ દ્વારા સમયસર તેને નક્સલવાદીઓની ચુંગાલમાંથી સુરક્ષિત રીતે બહાર લાવવામાં આવ્યો હતો. એટલા માટે Y+ સિક્યોરિટી આપતી વખતે એ ન જોવું જોઈએ કે તે વ્યક્તિ કયા પક્ષ અને જૂથનો છે. જો મહારાષ્ટ્રના કોઈપણ નાગરિકને તેના જીવનું જોખમ હોય અને તેને સુરક્ષાની જરૂર હોય તો તેને પણ સુરક્ષા આપવી જોઈએ.
અજિત પવારે કટાક્ષ કરતા કહ્યું કે, જે રીતે વિરોધ પક્ષોના નેતાઓની સુરક્ષા દૂર કરવામાં આવી છે. તે બિલકુલ ખોટું છે. જો ખરેખર સુરક્ષાની જરૂર હોય તો તેની સાથે બદલાની રાજનીતિ ન કરવી જોઈએ. અજિત પવાર અહીં જ ન અટક્યા, તેમણે કહ્યું કે, અમે ગૃહમાં CM શિંદે સરકારના ચાર પ્રધાનો સામે ભ્રષ્ટાચારના પુરાવા આપ્યા, પરંતુ એવું લાગે છે કે સરકારે તે તમામને ક્લીનચીટ આપવાનો નિર્ણય કરી લીધો છે.
થોડા મહિના પહેલા મહારાષ્ટ્રની CM એકનાથ શિંદે સરકારે અચાનક 15 વિપક્ષી નેતાઓની સુરક્ષા હટાવી દીધી હતી. જેમાં મોટાભાગના કોંગ્રેસ, NCP અને શિવસેનાના નેતાઓ હતા. ખાસ વાત એ છે કે આ યાદીમાં ઉદ્ધવ ઠાકરેનું નામ પણ હતું, જેમની સુરક્ષામાં ઘટાડો કરવામાં આવ્યો છે. જ્યારે, ઉદ્ધવ ઠાકરેના ખાનગી સચિવ મિલિંદ નાર્વેકરની સુરક્ષા વધારીને Y શ્રેણીની કરવામાં આવી છે. આ યાદીમાં ઉદ્ધવ જૂથના ઘણા નેતાઓ અને પૂર્વ મંત્રીઓ સામેલ છે. જેમની સુરક્ષા હટાવી દેવામાં આવી છે તેમાં NCPના પૂર્વ મંત્રી છગન ભુજબલ, NCPના પ્રદેશ અધ્યક્ષ જયંત પાટીલ, NCPના નેતા અને પૂર્વ વિધાનસભાના ડેપ્યુટી સ્પીકર નરહરિ ઝિરવલ, NCP નેતા અને પૂર્વ મંત્રી ધનંજય મુંડેનો સમાવેશ થાય છે.
ઉદ્ધવ ઠાકરે અને તેમના પુત્ર આદિત્ય ઠાકરેની સુરક્ષામાં પણ ઘટાડો કરવામાં આવ્યો છે. આ સિવાય કોંગ્રેસ વિધાયક દળના નેતા અને પૂર્વ મંત્રી બાલાસાહેબ થોરાત, કોંગ્રેસ પ્રદેશ અધ્યક્ષ નાના પટોલે, કોંગ્રેસ નેતા અને પૂર્વ મંત્રી નીતિન રાઉત, સતેજ પાટીલ, વિજય વડેટ્ટીવાર, સુનીલ કેદારની સુરક્ષા પણ હટાવી દેવામાં આવી છે.
15.jpg)
