રાજસ્થાનના ભીલવાડાના એક પાર્કમાં અનેક વૃક્ષો કાપી નાખવામાં આવ્યા. કારણ સામે આવ્યું તો લોકો વચ્ચે તે ચર્ચાનો વિષય બની ગયું. છોકરાઓ-છોકરીઓ ઝાડની આડમાં બેસતા હતા, એટલે પાર્કના વૃક્ષો કાપી નાખવામાં આવ્યા હતા. જ્યારે વિસ્તારની મહિલાઓએ વિરોધ કર્યો, ત્યારે કાપવાનું કામ રોકવામાં આવ્યું.
દૈનિક ભાસ્કરના અહેવાલ મુજબ, આ ઘટના ભીલવાડાના આર.કે. કોલોનીની, જ્યાં પાર્કની હરિયાળીને લઈને મોટો વિવાદ થયો હતો. અહી શનિવાર 7 ફેબ્રુઆરીના રોજ અચાનક 7-8 (કેટલાક અહેવાલોમાં 20થી વધુ) મોટા-મોટા વૃક્ષો અચાનક કાપી નાખવામાં આવ્યા હતા. આ વૃક્ષો વર્ષો જૂના હતા, ગાઢ છાંયો આપતા હતા અને પક્ષીઓનું ઘર હતા.
કોલોનીની મહિલાઓ આ ઘટનાથી એટલી દુઃખી થઈ ગઈ હતી કે તેઓ આખો દિવસ રડતી હતી. એક મહિલાએ ભાવુક થઈને કહ્યું કે, 'મેં હાથ જોડીને વિનંતી કરી કે તેમને ન કાપો, પરંતુ માત્ર ઉપરની ડાળીઓ કાપો. પરંતુ તેમણે આખા વૃક્ષને થડમાંથી કાપી નાખ્યું. મારી એક ન સાંભળી.'
https://twitter.com/arvindchotia/status/2020415216610361569?s=20
આખરે, મહિલાઓનો વિરોધ એટલો તેજ થયો કે વૃક્ષ કાપવાનું કામ બંધ કરવું પડ્યું. કોલોનીના રહેવાસીઓ પાર્કમાં ભેગા થયા અને પૂર્વ કાઉન્સિલર ઓમ પરાશર વિરુદ્ધ નારેબાજી કરવા લાગ્યા. પૂર્વ કાઉન્સિલરનો દાવો છે કે વૃક્ષો ખૂબ મોટા અને ઊંચા થઈ ગયા હતા, જેના કારણે તેમના ઘરો પર પડવાનું જોખમ હતું. સાથે જ, અસામાજિક તત્વો અને છોકરા-છોકરીઓ ઝાડ બેસતા હતા, જેના કારણે પડોશીઓને પરેશાની થતી હતી. તેમણે એમ પણ કહ્યું કે, કોલોનીના કેટલાક લોકોએ જ તેમને ઝાડ કપાવવાનું કહ્યું હતું. જોકે, કાપણીના નામે આખા વૃક્ષો કાપી નાખવામાં આવ્યા, જે મહિલાઓ અને પર્યાવરણ પ્રેમીઓને સહન ન થયું.
કેટલાક લોકોનો દાવો છે કે આ કાપણી માત્ર એટલે કરવામાં આવી, જેથી યુગલો પાર્કમાં ન બેસી શકે. મહિલાઓના આંસુ અને વિરોધ બાદ કાપણી બંધ થઈ ગઈ, પરંતુ પાર્ક હવે પહેલા જેવો હરિયાળો રહ્યો નથી. ભીલવાડામાં ઝાડની આડમાં બેસનારાઓથી પરેશાન થઈને આખી હરિયાળી જ ખતમ કરી દેવામાં આવી. પરિણામ? સ્ત્રીઓ રડી રહી છે, પક્ષીઓ બેઘર થઈ ગયા છે, અને પર્યાવરણને નુકસાન થયું છે. હવે જોવાનું એ રહ્યું કે વહીવટીતંત્ર આ બાબતે શું પગલાં લે છે.
